6
Caꞌ naca na,
ca we̱n zrin tu zren nen Dios dxataꞌ xuentuꞌ leꞌe chee̱ quebe guzúale chaláꞌala xel-la zriꞌi lazreꞌ chee̱ Dios,
2 laweꞌ da lu dizraꞌ láꞌazxa dxenné̱ꞌ:
Tu zra dxezaca ba lazraꞌ bendaꞌ chiuꞌ,
naꞌ lu zra chee̱ xel-la weselá gúcale̱naꞌ lueꞌ.
Naꞌa naca na zra dxezaca ba lazre̱ꞌ xenne̱ꞌ chee̱le,
ne guselé̱ꞌ leꞌe.
3 Quebe bi dxuntuꞌ da gun na quebe xeléajle̱ bénneache chee̱ Cristo,
chee̱ quebe nu nne̱ cale̱la chee̱ zrin dxuntuꞌ.
4 Ca naca xúgute̱ da dxuntuꞌ,
dxaca lázrentuꞌ guléꞌentuꞌ bénneache nácantuꞌ we̱n zrin chee̱ Dios,
ne̱ chee̱ xel-la dxebeza zren lazreꞌ chee̱ntuꞌ gate dxuchaga launtuꞌ da dxezácantuꞌ,
ne da dxexázrjentuꞌ,
ne da zaj naca ste̱be chee̱ntuꞌ,
5 ca buluzálaje̱ꞌ netuꞌ,
ne guleguꞌe̱ netuꞌ lizre xia.
Guledábague̱ꞌ netuꞌ san bé̱nle̱ꞌe̱ntuꞌ zrin.
Zaneꞌ lasa quebe gúsentuꞌ,
ne quebe bi gudáguntuꞌ.
6 Cáꞌanqueze bléꞌentuꞌ da nácantuꞌ
ne̱ chee̱ tu xel-la nabán li lazreꞌ chee̱ntuꞌ,
ne ne̱ chee̱ da li da núnbeantuꞌ,
ne ne̱ chee̱ xel-la zren lazreꞌ chee̱ntuꞌ,
ne xel-la zriꞌi lazreꞌ chee̱ntuꞌ,
ne ne̱ chee̱ Beꞌ Láꞌazxa,
Bénneaꞌ zúale̱ne̱ꞌ netuꞌ,
ne ne̱ chee̱ xel-la nazríꞌi chee̱ntuꞌ da naca na du lazreꞌ,
7 ne ne̱ chee̱ dizraꞌ li da dxuzénentuꞌ bénneache,
ne ne̱ chee̱ xel-la waca chee̱ Dios da zúale̱ na netuꞌ.
Bchínentuꞌ da zaj naca ca xia chee̱ wedil-la chee̱ da xrlátaje chee̱ gudíl-lantuꞌ,
ne chee̱ gudentuꞌ chaláꞌala da zaj naca ca xia chee̱ wedil-la chee̱ benneꞌ caꞌ dxeledábagueꞌ netuꞌ.
8 Zua gate dxelape̱ꞌ netuꞌ ba láꞌanaꞌ,
ne zua gate dxuluzúe̱ꞌ netuꞌ chaláꞌala.
Zua gate dxelenné̱ꞌ chee̱ntuꞌ da xrlátaje,
ne zua gate dxelenné̱ꞌ chee̱ntuꞌ da cale̱la.
Zua gate dxelenné̱ꞌ nácantuꞌ we̱n lazreꞌ,
ne zua gate dxelenné̱ꞌ dxenne̱ntuꞌ da li.
9 Zua gate quebe nu dxuzé̱ naga netuꞌ,
ne zua gate dxuluzé̱ naga xánnie̱ꞌ netuꞌ.
Zua gate zúantuꞌ lu da ste̱be chee̱ xel-la gute,
san ne naca bantuꞌ.
Zua gate dxuludée̱ꞌ netuꞌ xel-la ziꞌ,
san quebe ne xelutie̱ꞌ netuꞌ.
10 Láqueze zúantuꞌ lu da baxacheꞌ,
zúate̱quezentuꞌ lu xel-la dxebé.
Lácala nácantuꞌ benneꞌ xacheꞌ,
ba nuntuꞌ benneꞌ zan benneꞌ gunníꞌa.
Láqueze quebe bi núantuꞌ,
xúgute̱ nápantuꞌ.
11 Bi bíchentuꞌ,
benneꞌ Corinto,
ba bchálajntuꞌ du lázrentuꞌ.
Ba bléꞌentuꞌ leꞌe ca nazríꞌi lázrentuꞌ leꞌe.
12 Tu zúazqueze xel-la zriꞌi lazreꞌ chee̱ntuꞌ,
naꞌ leꞌe naꞌ quebe nazriꞌile netuꞌ du lázrele.
13 Dxataꞌ xuedaꞌ leꞌe ca dxun tu benneꞌ dxataꞌ xuene̱ꞌ bi cheé̱queze̱ꞌ chee̱ guléꞌele nedaꞌ du lázrele xel-la nazríꞌi da zua na lu xichaj lázrdaule cáte̱ze be̱naꞌ nedaꞌ.
Nácadxu xudauꞌ chee̱ Dios ban
14 Quebe gunle tuze nen benneꞌ quebe dxeléajle̱ꞌe̱ chee̱ Cristo,
da gaca na ca chacuéꞌ be̱zre guꞌuna,
be̱ quebe zaj nadíl-lebaꞌ.
¿Ájazra gun da xrlátaje gaca na tuze nen da cale̱la?
¿Ájazra gun xel-la naxaníꞌ gaca na tuze nen da chul-la?
15 ¿Ájazra gun Cristo gaque̱ꞌ tuze nen Satanás?
¿Ájazra gun benneꞌ dxéajle̱ꞌe̱ chee̱ Cristo gaque̱ꞌ tuze nen benneꞌ
quebe dxéajle̱ꞌe̱ chee̱ꞌ?
16 ¿Ájazra gun xudauꞌ chee̱ Dios gaca na tuze nen bedáuꞌ xiaj xaga?
Léꞌequeze nácale xudauꞌ chee̱ Dios ban cáte̱ze gunná Diósqueze:
Súale̱naꞌ le̱ꞌ,
ne tále̱naꞌ benneꞌ caꞌ.
Gacaꞌ Dios chee̱ benneꞌ caꞌ,
naꞌ le̱ꞌ xelaque̱ꞌ benneꞌ xe̱zre chiaꞌ.
17 Chee̱ le̱ naꞌ,
cáꞌanqueze gunné̱ꞌ:
Le xedxúaj ládujla benneꞌ caꞌ,
ne le cuasa naꞌ,
dxenná Xránadxu.
Quebe gutale da sban.
naꞌ leꞌe gácale zriꞌinaꞌ bi biu,
ne zriꞌinaꞌ bi nuꞌula.
Caní dxenná Xránadxu,
Bénneaꞌ nape̱ꞌ dute̱ xel-la waca.