7
Caꞌ naca na,
bi bíchaꞌdauꞌ nazriꞌite̱ lazraꞌ,
da caní zaj naca na da guche̱be lazreꞌ Dios chee̱dxu.
Chee̱ le̱ naꞌ dxal-laꞌ guxúe xanneꞌ cuínadxu chee̱ quebe güedxu lataj netú da sban gudxén na dxiꞌu lu be̱laꞌ dxen chee̱dxu,
ne lu beꞌ nácaquezdxu,
naꞌ laweꞌ da dxezrébedxu Dios dxal-laꞌ guzúa cuínadxu lu naꞌ Dios dute̱ ca nácadxu.
Ca belexebíꞌi lazreꞌ benneꞌ Corinto
2 Le siꞌ lu naꞌle netuꞌ.
Quebe bi da cale̱la ne guntuꞌ chee̱ nu benneꞌ ládujla leꞌe,
ne quebe nu ne guchántuꞌ,
ne quebe nu ne si xe̱ntuꞌ.
3 Quebe dxenníaꞌ da nigá chee̱ gusebagaꞌ leꞌe zria,
san naca na ca ba guchaꞌ leꞌe nédxula,
leꞌe zúale lu lázrdawaꞌ che gaca banaꞌ,
u che gatiaꞌ tu zrente̱ nen leꞌe.
4 Du lazraꞌ dxuchálajle̱naꞌ leꞌe,
ne zuaꞌ lu da ba neza ne̱ chee̱le leꞌe.
Lu xúgute̱ da dxezácantuꞌ zua da dxexúe zrénle̱ꞌe̱ nedaꞌ,
naꞌ dxebéle̱ꞌe̱daꞌ.
5 Da li,
gate bzrintuꞌ naga nababa Macedonia,
quebe bezíꞌ lázrentuꞌ.
Guzúantuꞌ lu da ste̱be gátete̱ze,
laweꞌ da gátete̱ze gudentuꞌ guledábaga bénneache netuꞌ,
naꞌ lu lázrdauntuꞌ bezrébentuꞌ.
6 Nadxa Dios,
Bénneaꞌ dxexúe zrene̱ꞌ benneꞌ zaj nate niꞌa ne̱ꞌe̱,
bexúe zrene̱ꞌ netuꞌ ne̱ chee̱ Tito laweꞌ da bezrinbeꞌ naga zúantuꞌ,
7 ne quegá tuze laweꞌ da blaꞌbeꞌ,
san cáꞌanqueze laweꞌ da bexúe zrenle le̱beꞌ.
Gúzrebeꞌ netuꞌ ca dxezá lázrele léꞌele netuꞌ,
ne bzenbeꞌ netuꞌ ca lu da baxacheꞌ zúale,
ne ca gunne xue dxeze̱le nedaꞌ,
naꞌ chee̱ le̱ naꞌ gubéle̱ꞌe̱dxedaꞌ.
8 Láqueze da bzuajaꞌ chee̱le bzua na leꞌe lu da baxacheꞌ,
quebe dxebezre lazraꞌ chee̱ da naꞌ.
Láqueze gudxezre lazraꞌ nédxula gate guque beꞌedaꞌ bzua na leꞌe lu da baxacheꞌ tu chíꞌidauꞌ,
9 naꞌa dxebedaꞌ,
quegá laweꞌ da guzúale lu da baxacheꞌ,
san laweꞌ da be̱n da baxacheꞌ naꞌ bexíaje lázrele.
Leꞌe bchaga laule da baxacheꞌ naꞌ ca da bezaca ba lazreꞌ Dios,
naꞌ da bzuajaꞌ chee̱le quebe bi da cale̱la be̱n na chee̱le.
10 Da baxacheꞌ da dxuchaga laudxu ca da dxezaca ba lazreꞌ Dios dxun na dxexebíꞌi lázredxu chee̱ ladxu,
naꞌ quebe dxal-laꞌ cuezre lázredxu chee̱ na.
Che xegáꞌanadxu lu da baxacheꞌ ca dxelún bénneache chee̱ xe̱zr la xu nigá,
naꞌ tu chiꞌize gátedxu.
11 Leꞌe bchaga laule da baxacheꞌ da guca na chee̱le ne̱ chee̱ da bzuajaꞌ,
ne be̱nle ca da dxezaca ba lazreꞌ Dios,
naꞌ le nnaꞌxque naꞌa:
Bzua na leꞌe gunne xue ca naca da guca,
ne be̱n na bleꞌele ca da be̱nle.
Bchaꞌa na leꞌe,
ne bchebe na leꞌe.
Nadxa guzé̱ lázrele léꞌele nedaꞌ,
ne guzúale gudele xel-la ziꞌ bénneaꞌ be̱n da cale̱la naꞌ.
Ca naca xúgute̱ da nigá bleꞌele quebe nabágale zria chee̱ dul-la nigá.
12 Caꞌ naca na,
gate bzuajaꞌ chee̱le da naꞌ,
quebe guca na laweꞌ da gudxeꞌa gunne xue chee̱ bénneaꞌ be̱ne̱ꞌ da cale̱la naꞌ,
ne quegá laweꞌ da gudxeꞌa gunne xue chee̱ bénneaꞌ guca na chee̱ꞌ,
san be̱naꞌ na chee̱ gueque beꞌele lau Dios ca dxele gunne xue chee̱ntuꞌ.
13 Chee̱ le̱ naꞌ guca da bexúe zren na netuꞌ.
Da naca tu da zrendxa,
gubéle̱ꞌe̱ntuꞌ gate bléꞌentuꞌ zúale̱ Tito xel-la dxebé,
laweꞌ da xúgute̱le leꞌe bexúe zrenle-beꞌ.
14 Láqueze bcaꞌana szrenaꞌ leꞌe lau Tito,
quebe dxeduéꞌedaꞌ,
laweꞌ da cáte̱ze naca da li ca naca xúgute̱ da bchálajle̱naꞌ leꞌe,
cáꞌanqueze guca da li da be̱naꞌ gate bcaꞌana szrenaꞌ leꞌe lau Tito.
15 Nazríꞌidxabeꞌ leꞌe gate dxajsá lázrebeꞌ ca be̱nle xúgute̱le leꞌe,
be̱nle cáte̱ze gunábabeꞌ leꞌe,
ne ca guzíꞌ lu naꞌle le̱beꞌ lu dute̱ xel-la dxexruj lazreꞌ,
ne lu xel-la dxezrebe.
16 Dxebedaꞌ laweꞌ da dxuxrén lazreꞌ xánniaꞌ leꞌe.