Da dxunézrujdxu du lázredxu
8
Naꞌa,
bi bichaꞌ,
dxaca lazraꞌ guzendaꞌ leꞌe ca bleꞌe lau xel-la zriꞌi lazreꞌ chee̱ Dios ne̱ chee̱ xúgute̱ cueꞌ bi chee̱ Cristo zaj nnitaꞌ lu xe̱zr la xu Macedonia.
2 Láqueze guledée̱ꞌ tu xel-la ziꞌ zren gulebéle̱ꞌe̱quezne̱ꞌ,
naꞌ láqueze zaj nácale̱ꞌe̱ benneꞌ xacheꞌ,
du lazre̱ꞌ bulunézruje̱ꞌ da zaj de̱ chee̱ꞌ,
naꞌ belune̱ꞌ ca benneꞌ gunníꞌa caꞌ.
3 Dxexeche̱baꞌ du lazre̱ꞌ bulunézruje̱ꞌ xúgute̱ da gulezéquene̱ꞌ,
ne da zrendxa ca da gulezéquene̱ꞌ.
4 Gulataꞌ xuene̱ꞌ netuꞌ güentuꞌ le̱ꞌ lataj xelune̱ꞌ tu zren bénneache dxelácale̱ne̱ꞌ bi bíchedxu caꞌ dxelexázrjene̱ꞌ.
5 Belundxe̱ꞌ ca da guleza lázrentuꞌ,
laweꞌ da belunna cuínaqueze̱ꞌ,
nédxula chee̱ Xránadxu,
naꞌ gudé naꞌ chee̱ntuꞌ netuꞌ,
cáte̱ze dxaca lazreꞌ Dios.
6 Caꞌ naca na,
gutaꞌ xúentuꞌ Tito gusexuzre̱ꞌ gutupe̱ꞌ da gunézrujle leꞌe,
da naꞌ guzú lawe̱ꞌ dxutupe̱ꞌ gate nate.
7 Leꞌe dxúnle̱ꞌe̱le ca naca da dxunle,
ca dxeajlí lázrele Dios,
ne ca dxusé̱dele bi chee̱ Cristo,
ne ca naca da naxéajniꞌile,
ne ca du lázrele dxunle xúgute̱,
ne ca nazriꞌile netuꞌ.
Caꞌ naca na,
cáꞌanqueze dxal-laꞌ gúnle̱ꞌe̱le ca gunle zrin chaweꞌ nigá.
8 Quebe dxapaꞌ leꞌe da nigá ca tu da dxenná beꞌedaꞌ leꞌe.
Dxaca lazraꞌ nézele ca du lazreꞌ dxelún xezícadxa bénneache zrin nigá,
dxulunézruje̱ꞌ dumí,
chee̱ gueque beꞌele che naca li lazreꞌ xel-la zriꞌi lazreꞌ chee̱le.
9 Ba nézquezle ca naca xel-la zriꞌi lazreꞌ chee̱ Xránadxu Jesucristo.
Naque̱ꞌ benneꞌ gunníꞌa,
san be̱n cuine̱ꞌ benneꞌ xacheꞌ laweꞌ da bzriꞌine̱ꞌ leꞌe,
chee̱ gácale leꞌe benneꞌ gunníꞌa lu da naca chee̱ Cristo laweꞌ da gudé Le̱ꞌ lu xel-la xacheꞌ.
10 Chee̱ gaca da ba neza chee̱le dxapaꞌ leꞌe da dxéquedaꞌ ca naca da nigá.
Gudú iza guzú laule,
quegá dxúnzele,
san du lázrele dxunle da nigá,
dxunézrujle dumí.
11 Naꞌa,
le gúnte̱ze na chee̱ xexuzrte̱ gunle na,
gunle na du lázrele cáte̱ze guzú laule dxunle nédxute̱,
gunézrujle ca da du de̱ chee̱le.
12 Che da li dxaca lazreꞌ tu benneꞌ gunézruje̱ꞌ,
Dios xezaca ba lazre̱ꞌ na che gunézruje̱ꞌ ca da nape̱ꞌ,
ne quegá dxenabe̱ꞌ da quebe napa bénneaꞌ.
13 Quebe dxenníaꞌ da nigá chee̱ xexácale leꞌe xacheꞌ chee̱ gácale̱le benneꞌ xula.
14 Naca na chee̱ gápale lé̱bete̱.
Naꞌa nápale chee̱ gunézrujle ca da dxelexazrje benneꞌ xula caꞌ,
naꞌ xetú lasa xelapa benneꞌ caꞌ da xelunne̱ꞌ chee̱le gate bi xázrjele leꞌe.
Caní gápale lé̱bete̱
15 cáte̱ze naxúaj na lu dizraꞌ láꞌazxa,
dxenná na:
Bénneaꞌ nápale̱ꞌe̱ quebe bi begáꞌana chee̱ꞌ,
naꞌ bénneaꞌ nape̱ꞌ láteze quebe bi bexázrjene̱ꞌ.
Tito ne bi ljwezre̱ꞌ caꞌ
16 Xcalén Dios,
Bénneaꞌ bzue̱ꞌ lu lázrdau Tito sue̱ꞌ gunne xue chee̱le leꞌe ca zuaꞌ nedaꞌ.
17 Guzíꞌ lu ne̱ꞌe̱ da bsebagaꞌ le̱ꞌ,
naꞌ laweꞌ da zúaqueze̱ꞌ gunne xue chee̱le leꞌe,
ba bezé̱ꞌe̱ chee̱ xide̱ꞌ xedajnné̱ꞌe̱ leꞌe laweꞌ da dxaca lázrequeze le̱ꞌ.
18 Tu zren nen Tito nasél-lantuꞌ tu bi bíchedxu,
tu benneꞌ dxelenné̱ chaweꞌ chee̱ꞌ xúgute̱ cueꞌ bi chee̱ Cristo,
ca naca zrin xrlátaje da nune̱ꞌ chee̱ dizraꞌ chaweꞌ chee̱ Cristo.
19 Quegá tuze da nigá,
san xúgute̱ cueꞌ bi chee̱ Cristo gulequé̱ꞌe̱ bi bíchedxu níqueze chee̱ sále̱ne̱ꞌ netuꞌ chee̱ gácale̱ne̱ꞌ netuꞌ lu zrin nigá da dxuntuꞌ dxutúbentuꞌ dumí da gácale̱ na benneꞌ xacheꞌ caꞌ chee̱ gaca ba Xránadxu,
ne chee̱ guléꞌe lau du lázrele dxunle zrin chaweꞌ nigá.
20 Caní dxuntuꞌ chee̱ quebe nu benneꞌ si tizre̱ꞌ netuꞌ ca dxuchínentuꞌ dumí zrente̱ nigá da dxulunezruj bi bíchedxu caꞌ.
21 Dxuntuꞌ ba xuzre guntuꞌ zrin nigá lu dute̱ xel-la li lazreꞌ chee̱ntuꞌ,
quegá tuze lau Xránadxu,
san cáꞌanqueze lau xúgute̱ bénneache.
22 Tu zren nen benneꞌ caní nasél-lantuꞌ xetú bi bíchedxu,
tu benneꞌ da zánete̱ lasa ba bléꞌene̱ꞌ netuꞌ du lazre̱ꞌ dxune̱ꞌ zrin chee̱ Cristo,
naꞌ naꞌa du lázredxe̱ꞌ dxune̱ꞌ zrin nigá laweꞌ da dxuxrén lazre̱ꞌ leꞌe.
23 Che nu benneꞌ guche̱be leꞌe ca naca chee̱ Tito,
le xe̱ꞌe̱ nácabeꞌ bi ljwezraꞌ,
ne dxunbeꞌ zrin tu zren nen nedaꞌ chee̱ gunbeꞌ zrin chee̱le.
Che nu guche̱be leꞌe ca naca chee̱ xezícadxa bi bíchedxu caꞌ zeajzrague̱ꞌ Tito,
le xe̱ꞌe̱ zaj naque̱ꞌ benneꞌ gulesel-la xúgute̱ cueꞌ bi chee̱ Cristo,
ne dxelape̱ꞌ ba láꞌana Cristo.
24 Chee̱ le̱ naꞌ,
chee̱ xeleneze xúgute̱ cueꞌ bi chee̱ Cristo,
le guléꞌe le̱ꞌ nazriꞌile le̱ꞌ,
naꞌ naca chee̱ntuꞌ xucáꞌana szrentuꞌ leꞌe.