Dizraꞌ ca naca chee̱ Cristo, gudé̱ꞌe̱ xaga béguaj
2
Naꞌa,
bi bíchaꞌdauꞌ,
gate bedajchálajle̱naꞌ leꞌe da li chee̱ Dios,
quebe bchínedaꞌ dizraꞌ sina,
ne dizraꞌ zaca.
2 Gate ne zúale̱naꞌ leꞌe quebe guca lazraꞌ guchálajaꞌ chee̱ bila da xetú san tuze chee̱ Jesucristo,
Bénneaꞌ gudé̱ꞌe̱ xaga béguaj.
3 Gate guzúale̱naꞌ leꞌe ne nátete̱ niꞌa naꞌa,
ne guzrízeteaꞌ laweꞌ da bzrebaꞌ quebe guca gunaꞌ da nusebagaꞌ Cristo nedaꞌ.
4 Gate bchálajle̱naꞌ leꞌe,
ne bzendaꞌ leꞌe dizraꞌ chaweꞌ,
quebe guca lazraꞌ gunaꞌ chéajle̱le chee̱ꞌ nen dizraꞌ sina chee̱ bénneache da guchálajaꞌ,
san be̱naꞌ guxéajle̱le chee̱ꞌ ne̱ chee̱ Beꞌ Láꞌazxa,
ne ne̱ chee̱ xel-la waca chee̱ Dios
5 chee̱ gápale xel-la dxeajlí lazreꞌ da naca na ne̱ chee̱ xel-la waca chee̱ Dios,
ne quegá ne̱ chee̱ xel-la sina chee̱ bénneache.
Dios dxuléꞌe cuine̱ꞌ ne̱ chee̱ Beꞌ Láꞌazxa
6 Dxuchálajntuꞌ dizraꞌ sina lau benneꞌ caꞌ ba zaj ze̱ chache̱ꞌ lu xel-la dxeleajlí lazreꞌ chee̱ꞌ.
Xel-la sina nigá quebe naca na xel-la sina chee̱ xe̱zr la xu nigá,
ne chee̱ benneꞌ dxelenná beꞌe̱ lu xe̱zr la xu nigá,
benneꞌ caꞌ xeledé chie̱ꞌ.
7 Dxuchálajntuꞌ xel-la sina nagache chee̱ Dios,
da naꞌ bzua Dios nédxudaute̱ ca be̱ne̱ꞌ xe̱zr la xu nigá,
chee̱ ladxu chadía chacanna.
8 Netú benneꞌ caꞌ,
benneꞌ dxelenná beꞌe̱ lu xe̱zr la xu nigá,
quebe guléajniꞌine̱ꞌ da nigá,
laweꞌ da la guléajniꞌine̱ꞌ na quebe buludé̱ꞌe̱ Xránadxu,
Benneꞌ xabáa,
le̱ꞌe xaga béguaj.
9 Naca na ca da naxúaj na lu dizraꞌ láꞌazxa,
dxenná na:
Dios ba nucueze̱ꞌ chee̱ benneꞌ caꞌ zaj nazríꞌine̱ꞌ Le̱ꞌ
da caꞌ quebe nu ne leꞌe,
ne quebe nu ne xen,
ne da quebe nu ne cuꞌu lazreꞌ.
10 Da caní zaj naca na da bleꞌe Dios dxiꞌu ne̱ chee̱ Beꞌ Láꞌazxa nasel-la Le̱ꞌ,
laweꞌ da dxeléꞌe Beꞌ Láꞌazxa xúgute̱ da de̱,
ne dute̱ da xuꞌu na lu xichaj lázrdau Diósqueze.
11 Ládujla bénneache,
¿nu sequeꞌ neze da xuꞌu lu xichaj lázrdau xetú benneꞌ,
san tuze beꞌ da nacaque̱ze̱ꞌ?
Cáꞌanqueze,
tuze Beꞌ Láꞌazxa chee̱ Dios nézene̱ꞌ da xuꞌu lu xichaj lázrdau Dios.
12 Beꞌ Láꞌazxa da xúꞌudxu quebe naca na chee̱ xe̱zr la xu nigá.
Nazidxu Beꞌ Láꞌazxa da dxunna Dios dxiꞌu chee̱ chéajniꞌidxu da caꞌ ba nunna Dios dxiꞌu.
13 Dxuchálajntuꞌ ca naca da caní nen dizraꞌ da bse̱de Beꞌ Láꞌazxa chee̱ Dios netuꞌ,
ne quegá nen dizraꞌ da bsé̱dentuꞌ lu xel-la sina chee̱ntuꞌ.
Caꞌ naca na,
dxuzéajniꞌintuꞌ benneꞌ zaj naziꞌe̱ Beꞌ Láꞌazxa chee̱ Dios da nuse̱de Beꞌ Láꞌazxa nigá dxiꞌu.
14 Nu benneꞌ quebe naziꞌe̱ Beꞌ Láꞌazxa chee̱ Dios quebe dxezíꞌ lu ne̱ꞌe̱ da zaj naca na chee̱ Beꞌ Láꞌazxa chee̱ Dios,
laweꞌ da dxéquene̱ꞌ zaj naca na tu da xálaze.
Quebe dxezequeꞌ chéajniꞌine̱ꞌ na laweꞌ da zaj naca na da dxéajniꞌidxu tuze ne̱ chee̱ Beꞌ Láꞌazxa.
15 Bénneaꞌ naziꞌe̱ Beꞌ Láꞌazxa chee̱ Dios dxezéquene̱ꞌ chéajniꞌine̱ꞌ xúgute̱ da dxuléꞌe Beꞌ Láꞌazxa le̱ꞌ.
Benneꞌ quebe zúale̱ Beꞌ Láꞌazxa le̱ꞌ,
quebe séquene̱ꞌ chéajniꞌine̱ꞌ da dxusé̱de Beꞌ Láꞌazxa dxiꞌu.
16 Naxúaj lu dizraꞌ láꞌazxa da dxenná na:
¿Nuzra ba guxéajniꞌi da xuꞌu xichaj lázrdau Xránadxu?
¿Nuzra benneꞌ séquene̱ꞌ guzéajniꞌine̱ꞌ Dios?
Dxiꞌu nazidxu ca da xuꞌu xichaj lázrdau Cristo.