Benneꞌ dxelune̱ꞌ tu zren Dios lu zrin chee̱ꞌ
3
Naꞌa,
leꞌe,
bi bíchaꞌdauꞌ,
quebe guca guchálajle̱naꞌ leꞌe ca dxuchálajle̱naꞌ benneꞌ caꞌ zúale̱ Beꞌ Láꞌazxa chee̱ Dios le̱ꞌ,
san bchálajle̱naꞌ leꞌe ca dxuchálajle̱naꞌ benneꞌ caꞌ quebe zúale̱ Beꞌ Láꞌazxa le̱ꞌ,
laweꞌ da ne nácale ca bidu caꞌ lu da naca chee̱ Cristo.
2 Bsé̱dedaꞌ leꞌe da quebe zaj naca na ste̱be da naca na ca da dxugágudxu bidu dxeꞌene,
bidu ne dxázrebeꞌ,
ne quebe gaca gágubeꞌ xel-la wagu da naca na zibaj,
laweꞌ da quebe ne séquele chéajniꞌile da zaj naca na ste̱be.
Cáꞌanqueze naꞌa quebe ne séquele chéajniꞌile na
3 laweꞌ da ne nácale ca zaj naca benneꞌ cun ca nalaje̱ꞌ.
Dxácate̱ ne xuꞌule xel-la zre lazreꞌ,
ne dxutil-la ljwézrele dizraꞌ ne nácale chupa laꞌa,
ne nácale ca zaj naca benneꞌ cun ca nálaje̱ꞌ,
ne dxunle cáte̱ze dxelún xúgute̱ bénneache.
4 Dxácate̱ ne dxennale:
Netuꞌ daꞌntuꞌ Pablo,
naꞌ xezícale dxennale:
Netuꞌ daꞌntuꞌ Apolos,
ne dxunle ca dxelún benneꞌ cun ca nálajze̱ꞌ.
5 Naꞌa,
¿nuzra naꞌ Pablo?
¿Nuzra naꞌ Apolos?
Nácantuꞌ we̱n zrin chee̱ Dios,
naꞌ ne̱ chee̱ netuꞌ guxéajle̱le chee̱ Xránadxu.
Tu tuntuꞌ be̱ntuꞌ zrin chee̱ Xránadxu da bléꞌene̱ꞌ netuꞌ.
6 Nedaꞌ guzaꞌ bínnedu caꞌ lu xichaj lázrdaule,
bchálajle̱naꞌ leꞌe xrtizra Dios,
naꞌ Apolos gudile̱ꞌ na,
san Dios bsegule̱ꞌ na.
7 Caꞌ naca na,
ne benneꞌ dxaze̱ꞌ,
ne benneꞌ dxile̱ꞌ na,
quebe bi zaque̱ꞌ,
san Dios naꞌ dxune̱ꞌ xúgute̱,
laweꞌ da dxusegule̱ꞌ da du caꞌ.
8 Benneꞌ dxelaze̱ꞌ,
ne benneꞌ dxelile̱ꞌ zaj naque̱ꞌ lé̱bete̱,
san Dios quízruje̱ꞌ tu tu benneꞌ caní ca naca zrin da belune̱ꞌ.
9 Nácantuꞌ we̱n zrin tu zren nen Dios,
naꞌ leꞌe nácale ca tu xe̱zr la xu naga dxun Dios zrin.
Cáꞌanqueze nácale ca tu xuꞌu da dxun Dios.
10 Nedaꞌ nacaꞌ ca tu we̱n xuꞌu blau,
naꞌ Dios be̱nne̱ꞌ nedaꞌ lataj gulechaꞌ lane na,
naꞌ benneꞌ xula dxusegule̱ꞌ zeꞌe naꞌ.
Tu tu benneꞌ dxal-laꞌ guxúe xánnie̱ꞌ ca dxusegule̱ꞌ na.
11 Québedxa nu sequeꞌ cueche̱ꞌ xetú lane ca da ba dxeꞌ,
da naꞌ naca na Jesucrístoqueze,
12 san waca nu benneꞌ gusegule̱ꞌ laweꞌ na da zaca na ca oro,
ne plata,
ne xiaj da zaj zaca,
u waca gusegule̱ꞌ laweꞌ na da quebe zaca na ca blagaꞌ,
ne xizre,
ne luaj lagaꞌ.
13 Zrin da nun tu tu benneꞌ guléꞌequeze lawe na lu zra guchiꞌa Dios,
laweꞌ da lu zra naꞌ laꞌ tu xiꞌ,
naꞌ lu xiꞌ naꞌ guléꞌe lawe na ca naca zrin nun tu tudxu.
14 Che nu benneꞌ nune̱ꞌ tu zrin da quebe chezxe na lu xiꞌ,
naꞌ waziꞌe̱ lazruj chee̱ꞌ.
15 Che chezxe zrin naꞌ,
ca naca na nite na,
san lé̱queze̱ꞌ walé̱ꞌ,
ca tu benneꞌ dxexedxúaje̱ꞌ lu xiꞌ.
16 ¿Quebe nézele leꞌe nácale xudauꞌ chee̱ Dios,
naꞌ Beꞌ Láꞌazxa chee̱ Dios zue̱ꞌ lu xichaj lázrdaule?
17 Che nu benneꞌ gucáꞌana dítaje̱ꞌ xudauꞌ nigá chee̱ Dios,
Dios guzría xiꞌe̱ bénneaꞌ laweꞌ da naca láꞌazxa xudauꞌ chee̱ Dios,
naꞌ léꞌequezle nácale xudauꞌ naꞌ.
18 Quebe si xe̱ cuínale.
Che núlale dxéquele nácale benneꞌ sina lu da naca chee̱ xe̱zr la xu nigá,
dxal-laꞌ xun cuínale ca tu benneꞌ quebe bi dxaque̱ꞌ,
chee̱ gunna Dios leꞌe xel-la sina li.
19 Xel-la sina chee̱ xe̱zr la xu nigá naca na tu da xálaze lau Dios.
Naxúaj lu dizraꞌ láꞌazxa da dxenná na:
Dios dxun zréajane̱ꞌ benneꞌ sina caꞌ lu xel-la sina da zaj nápaqueze̱ꞌ.
20 Cáꞌanqueze dxenná na:
Xránadxu nézene̱ꞌ quebe bi zaca da dxululaba lazreꞌ benneꞌ sina caꞌ.
21 Chee̱ le̱ naꞌ quebe nu benneꞌ dxal-laꞌ gun szren cuine̱ꞌ laweꞌ da de̱ꞌe̱ tu benneꞌ,
laweꞌ da Dios dxunne̱ꞌ leꞌe xúgute̱ da caꞌ dxechínnele.
22 Pablo,
ne Apolos,
ne Pedro,
ne xe̱zr la xu nigá,
ne xel-la nabán,
ne xel-la gute,
ne naꞌa zra,
ne da za zaꞌ,
ne xúgute̱ da caꞌ zaj naca na chee̱ gaca da chaweꞌ chee̱le,
23 naꞌ léꞌequezle xuꞌule lu naꞌ Cristo,
naꞌ Cristo xuꞌe̱ lu naꞌ Xradxu Dios.