Zrin dxelún benneꞌ gubáz chee̱ Cristo
4
Caꞌ naca na,
dxal-laꞌ guéquele nácazentuꞌ we̱n zrin chee̱ Cristo,
ne nabágantuꞌ gusé̱dentuꞌ bénneache da zaj nagache chee̱ Dios.
2 Naꞌa,
benneꞌ nabague̱ꞌ tu zrin,
dxun na ba xen gaque̱ꞌ li lazreꞌ.
3 Nedaꞌ quebe dxeꞌa gunne xue bi dxéquele nacaꞌ nedaꞌ,
u bi dxeleque bénneache nacaꞌ.
Quebe gaca nniaꞌ xrlátaje u quegá chee̱ da nunaꞌ
4 laweꞌ da lácala quebe dxagu na zria nedaꞌ lázrdawaꞌ,
da nigá quebe dxuléꞌe na quebe nabagaꞌ zria.
Xránadxu naque̱ꞌ Benneꞌ dxuchiꞌe̱ ca da dxunaꞌ.
5 Caꞌ naca na,
quebe guchíꞌale chee̱ da caꞌ che quebe ne zrin zra.
Le cueza zra xeláꞌ Xránadxu,
naꞌ xebéaje̱ꞌ lu xel-la naxaníꞌ ca naca da nagache lu da chul-la.
Xránadxu guléꞌene̱ꞌ ca naca da dxulaba lázredxu,
naꞌ Dios guléꞌene̱ꞌ chaweꞌ tu tudxu ca da dxal-laꞌ sidxu.
6 Leꞌe,
bi bichaꞌ,
dxuchálajle̱naꞌ leꞌe da caní chee̱ gaca chaweꞌ chee̱le,
dxuzúaꞌ ca tu da guléꞌe na leꞌe Apolos,
ne nédaꞌquezaꞌ.
Dxenníaꞌ da nigá chee̱ gusé̱dele ne̱ chee̱ netuꞌ chee̱ quebe gundxale ca da dxue lataj dizraꞌ láꞌazxa leꞌe,
ne chee̱ quebe gucáꞌana szren cuínale,
ne chee̱ quebe guzúale chaláꞌala le saꞌ ljwézrele.
7 ¿Nuzra nun lueꞌ blaudxa ca xezícadxa benneꞌ?
¿Bizra napuꞌ da quebe nunna Dios lueꞌ?
Che Le̱ꞌ be̱nne̱ꞌ chiuꞌ da naꞌ,
¿bizr chee̱ naꞌ dxucáꞌana szren cuinuꞌ,
dxéquenuꞌ luéꞌqueze gudiljuꞌ da naꞌ?
8 ¿Nácale leꞌe benneꞌ gunníꞌa?
¿Nápale xúgute̱ da dxechínele?
¿Dxequele nácale wenná bea lácala quebe nácantuꞌ netuꞌ wenná bea?
Xrlátaje dxgua la nácaquezle wenná bea chee̱ guntuꞌ netuꞌ leꞌe tu zren lu xel-la dxenná bea chee̱le.
9 Dxéquedaꞌ Dios nuzúe̱ꞌ netuꞌ,
benneꞌ gubáz chee̱ꞌ,
lu lataj bze̱be.
Nácantuꞌ ca benneꞌ ba zaj nabía xiꞌ chee̱ gátentuꞌ.
Nácantuꞌ ca tu da dxuzé̱ na lau bénneache,
naꞌ dxelennáꞌ gubáz chee̱ xabáa caꞌ,
ne bénneache netuꞌ.
10 Dxeleque bénneache nácantuꞌ netuꞌ tu da xálaze laweꞌ da dxuntuꞌ zrin chee̱ Cristo,
san leꞌe dxéquele dxéajniꞌi xánnele da zaj naca chee̱ Cristo.
Dxeleque bénneache nate niꞌa naꞌntuꞌ netuꞌ san leꞌe dxéquele nácale leꞌe benneꞌ wal-la.
Dxuluzúa bénneache netuꞌ chaláꞌala,
san dxelape̱ꞌ leꞌe ba láꞌana.
11 Ga bzrinte̱ lu zra naꞌa zra dxeduntuꞌ,
ne dxebílentuꞌ,
ne nácantuꞌ gala xídeze,
naꞌ bénneache dxulucháchale̱ne̱ꞌ netuꞌ,
ne quebe zua lízrentuꞌ.
12 Dxexedú lázrentuꞌ dxuntuꞌ zrin.
Dxelenné̱ bénneache schanniꞌ chee̱ntuꞌ,
san netuꞌ dxexeché̱bentuꞌ dizraꞌ chaweꞌ.
Zaj nau ziꞌ xuzre̱ꞌ netuꞌ san dxuchaga launtuꞌ na.
13 Dxelenné̱ꞌ schanniꞌ chee̱ntuꞌ,
san netuꞌ dxuchálajle̱ntuꞌ le̱ꞌ da li dute̱ xel-la zren lazreꞌ chee̱ntuꞌ.
Dxelune̱ꞌ netuꞌ ca tu xizre be̱be,
ne ca tu da ba guca ditaj chee̱ bénneache ca lu zra naꞌa zra.
14 Quegá dxuzúajaꞌ chee̱le da nigá chee̱ xeduéꞌele,
san chee̱ guzéajniꞌidaꞌ leꞌe,
nácale ca bi chiaꞌ nazriꞌite̱ lazraꞌ.
15 Lácala zaj zúale̱ leꞌe gaxúa gaxúane benneꞌ dxulusé̱dene̱ꞌ leꞌe ca naca chee̱ Cristo,
quebe nu zua xetú xrale.
Nédaꞌquezaꞌ nacaꞌ xrale lu xel-la dxeajlí lazreꞌ chee̱le Cristo laweꞌ da bzendaꞌ leꞌe dizraꞌ chaweꞌ chee̱ Jesucristo.
16 Caꞌ naca na,
dxataꞌ xúedaꞌ leꞌe gunle ca dxunaꞌ nedaꞌ.
17 Chee̱ le̱ naꞌ dxusel-laꞌ Timoteo xedajnáꞌabeꞌ leꞌe,
nácabeꞌ ca bi li lazreꞌ chiaꞌ nazriꞌite̱ lazraꞌ,
lu da naca chee̱ Xránadxu.
Le̱beꞌ gusáꞌabeꞌ lázrele ca dxunaꞌ lu da naca chee̱ Cristo,
ne ca naca da dxusé̱dedaꞌ bénneache gátete̱ze naꞌ,
ne lau xúgute̱ cueꞌ bi chee̱ Cristo.
18 Bál-lale leꞌe ba nucáꞌana szren cuínale laweꞌ da dxéquele quebe xidaꞌ xedajnnabaꞌ leꞌe,
19 san dxebeza lazraꞌ xídazequezaꞌ xedajnnáꞌa leꞌe che gunna Xránadxu lataj.
Nadxa leꞌedaꞌ da dxelezequeꞌ xelún benneꞌ caꞌ dxulucáꞌana szren cuine̱ꞌ,
ne quegá tuze da dxelenné̱ꞌ.
20 Che dxenná beꞌe Dios dxiꞌu quebe naca na chee̱ tu da dxuchálajzedxu.
Lé̱caze̱ꞌ ba nunne̱ꞌ dxiꞌu xel-la waca chee̱ꞌ.
21 ¿Bizra dxaca lázrele leꞌe?
¿Dxaca lázrele gun na ba xen gudéaꞌ leꞌe xel-la ziꞌ,
u che xidaꞌ xedajnnáꞌa leꞌe lu xel-la zriꞌi lazreꞌ,
ne xel-la dxexruj lazreꞌ?