Pablo dxuchiꞌe̱ chee̱ tu da sban
5
Ba bendaꞌ zua tu benneꞌ ládujla leꞌe nune̱ꞌ ca zruꞌule̱ꞌ xrna zie̱ꞌ.
Da nigá naca na tu da sbánle̱ꞌe̱ da quebe ne xelún benneꞌ quebe zaj núnbeꞌene̱ꞌ Dios.
2 Ca naca da naꞌ leꞌe ne dxucáꞌana szren cuínale.
Dxal-laꞌ cuezre xáchele.
Bénneaꞌ nune̱ꞌ da nigá dxal-laꞌ xebéajle le̱ꞌ ládujla leꞌe.
3 Quebe zuaꞌ nedaꞌ naga zúale lu be̱laꞌ dxen chiaꞌ,
san naca cáte̱ze zúale̱naꞌ leꞌe lu beꞌ nácaquezaꞌ,
naꞌ ba bchiꞌa chee̱ bénneaꞌ nune̱ꞌ dul-la nigá ca tu benneꞌ zúale̱tequeze leꞌe.
4 Le zraga leꞌe lu La Xránadxu Jesucristo,
naꞌ gaca na cáte̱ze nedaꞌ súale̱naꞌ leꞌe lu beꞌ nácaquezaꞌ,
naꞌ xel-la waca chee̱ Xránadxu Jesús suale̱ na leꞌe.
5 Nadxa dxal-laꞌ xudele bénneaꞌ lu naꞌ Satanás da xriwe̱ꞌ,
naꞌ lácala cuía xiꞌ be̱laꞌ dxen chee̱ꞌ naꞌ beꞌ nácaqueze̱ꞌ la na lu zra xeláꞌ Xránadxu Jesús.
6 Quebe dxal-laꞌ gucáꞌana szren cuínale ca naca da dxunle.
¿Quebe núnbeale dizraꞌ naꞌ dxenná na:
Láteze cua zichaj dxuchazra na ca naca cua naꞌ?
7 Le xebéaj chaláꞌala cua zichaj gula naꞌ da dxuxrinnaj na leꞌe,
chee̱ gácale ca tu xeta xtila da dxágudxu Laní Pascua,
da dxundxu nen cua cube da quebe nachixre na cua zichaj,
ca da li nácale leꞌe.
Crístoqueze gutie̱ꞌ waláz chee̱dxu.
Naque̱ꞌ chee̱dxu zrilaꞌ,
be̱ dxelutie̱ꞌ laní pascua.
8 Caꞌ naca na,
dxal-laꞌ gupáꞌadxu Laní Pascua chee̱dxu lu da naca du lazreꞌ,
ne lu da li,
da caꞌ zaj naca na ca xeta xtila da quebe nachixre na cua zichaj.
Quebe gupáꞌadxu na lu da cale̱la,
ne lu da zrinnaj,
da caꞌ zaj naca na ca cua zichaj gula naꞌ.
9 Lu da bzuajaꞌ chee̱le nédxudxa guchaꞌ leꞌe quebe guchixre chee̱le nen benneꞌ caꞌ dxelune̱ꞌ da sban.
10 Quebe guchaꞌ leꞌe xecuásatequezele chee̱ benneꞌ zaj zre̱ꞌe̱ xe̱zr la xu nigá,
benneꞌ dxelune̱ꞌ da sban,
ne benneꞌ wecudeꞌ caꞌ,
ne benneꞌ gubán caꞌ,
ne benneꞌ dxelúe láꞌane̱ꞌ bedáuꞌ xiaj xaga caꞌ,
laweꞌ da chee̱ quebe guchixre chee̱le nen benneꞌ caní,
dxun na ba xen xedxúajle xe̱zr la xu nigá.
11 Da guca lazraꞌ xapaꞌ leꞌe naca na chee̱ quebe guchixre chee̱le nen netú benneꞌ dxenné̱ꞌ naque̱ꞌ bíchedxu,
san dxune̱ꞌ da sban,
u naque̱ꞌ benneꞌ wecudeꞌ,
u dxue láꞌane̱ꞌ bedáuꞌ xiaj xaga,
u dxutupe̱ꞌ dizraꞌ bizruj,
u dxíꞌaje̱ꞌ,
u naque̱ꞌ gubán.
Quebe dxal-laꞌ gágule̱le benneꞌ caní.
12-13 Quegá naca chiaꞌ guchiꞌa chee̱ benneꞌ dxeledá cúzrela.
Dios guchiꞌe̱ chee̱ benneꞌ caꞌ.
Leꞌe dxal-laꞌ guchíꞌale chee̱ benneꞌ zaj naque̱ꞌ bi bíchedxu.
Chee̱ le̱ naꞌ le xebéaj benneꞌ dul-la naꞌ ládujla leꞌe.