Zria da dxelagu ljwezre bi caꞌ chee̱ Cristo
6
Gate tule leꞌe zua da dxaca chee̱le nen xetule leꞌe,
¿bizr chee̱ naꞌ dxeajle lau benneꞌ dxuchiꞌe̱ da dxaca,
naꞌ quebe dxéajle̱ꞌe̱ chee̱ Cristo,
ne quebe dxeajle lau bi bíchele?
2 ¿Quebe nézele leꞌe,
benneꞌ zaj naca bi chee̱ Dios xuluchíꞌe̱ ca da dxelún bénneache chee̱ xe̱zr la xu nigá?
Che leꞌe guchíꞌale chee̱ bénneache lu xe̱zr la xu nigá,
¿quebe naca chee̱le guchíꞌale chee̱ tu da dauze?
3 ¿Quebe nézele leꞌe guchíꞌadxu chee̱ gubáz chee̱ xabáa caꞌ?
Cáꞌanqueze dxal-laꞌ guchíꞌadxu da naca chee̱ xe̱zr la xu nigá.
4 Che leꞌe zua da dxaca chee̱le lu xe̱zr la xu nigá,
¿bizr chee̱ naꞌ dxeajle lau benneꞌ caꞌ quebe nu zaj naque̱ꞌ ládujla bi bíchedxu caꞌ chee̱ xuluchíꞌe̱ chee̱ da naꞌ?
5 Da nigá dxapaꞌ leꞌe chee̱ gapa stuꞌle.
¿Quebe nu chiláꞌ ládujla leꞌe nu bíchedxu,
benneꞌ naxéajniꞌine̱ꞌ chee̱ guchiꞌe̱ tu da dxaca chee̱ bi bíchedxu caꞌ?
6 ¿Dxun na ba xen tu bi bíchedxu cheajtágubeꞌ zria da dxaca chee̱beꞌ nen benneꞌ ljwézrebeꞌ lau tu benneꞌ dxuchiꞌe̱ da dxaca,
naꞌ quebe naque̱ꞌ bi chee̱ Dios?
7 Che zua da dxedíl-lale̱le biche ljwézrele,
naca na tu zria da ba nabágale.
¿Bizr chee̱ naꞌ quebe dxucáꞌanale na cáꞌaze?
¿Bizr chee̱ naꞌ quebe dxuele lataj nu benneꞌ cuane̱ꞌ chee̱le?
8 Leꞌe dxunle da quebe naca na xrlátaje,
ne dxebanle,
naꞌ dxunle caní chee̱ bi bíchele.
9-10 ¿Quebe nézele leꞌe,
quebe xelexúꞌu benneꞌ we̱n da cale̱la naga dxenná bea Dios?
Quebe güele lataj nu si xe̱ leꞌe.
Quebe xelexúꞌu naga dxenná bea Dios benneꞌ caꞌ dxelune̱ꞌ da sban,
ne benneꞌ caꞌ dxelúe láꞌane̱ꞌ bedáuꞌ xiaj xaga,
ne benneꞌ caꞌ dxelezúale̱ne̱ꞌ zruꞌula benneꞌ xula,
ne benneꞌ caꞌ dxeledále̱ne̱ꞌ ljwezre biue̱ꞌ,
ne benneꞌ gubán caꞌ,
ne benneꞌ wecudeꞌ caꞌ,
ne benneꞌ caꞌ dxeléꞌaje̱ꞌ,
ne benneꞌ caꞌ dxulutupe̱ꞌ dizraꞌ bizruj,
ne benneꞌ caꞌ dxulucache lane̱ꞌ.
11 Caní gúcale bál-lale leꞌe,
san naꞌa bache bexádxele lu xichaj lázrdaule,
ne nuzúa cuínale lu naꞌ Dios,
naꞌ nazíꞌ lu ne̱ꞌe̱ leꞌe lu La Xránadxu Jesús ne̱ chee̱ Beꞌ Láꞌazxa chee̱ Dios chee̱dxu.
Naca láꞌazxa be̱laꞌ dxen chee̱dxu
12 Da li naca da dxelenné̱ꞌ:
Nápadxu lataj gundxu da dxaca lazreꞌ tu tudxu.
Quegá xúgute̱ na naca na da ba neza.
Aweꞌ,
napa tu benneꞌ lataj gune̱ꞌ da dxaca lazre̱ꞌ,
san quebe dxal-laꞌ guꞌe̱ lataj bi da nna beꞌe na le̱ꞌ.
13 Naca da li da dxelenné̱ꞌ:
Xela wagu naca na chee̱ le̱ꞌe̱dxu,
naꞌ le̱ꞌe̱dxu naca na chee̱ xel-la wagu,
san Dios gusexuzre̱ꞌ dxúpate̱ na.
Quebe naca be̱laꞌ dxen chee̱dxu chee̱ gun na da sban.
Be̱laꞌ dxen chee̱dxu naca na da gunézrujdxu chee̱ Xránadxu,
naꞌ Xránadxu naque̱ꞌ Bénneaꞌ guchínene̱ꞌ be̱laꞌ dxen chee̱dxu lu da xrlátaje.
14 Ca be̱n Dios bsebane̱ꞌ Xránadxu ládujla benneꞌ gate caꞌ,
cáꞌanqueze gusebane̱ꞌ dxiꞌu nen xel-la waca chee̱ꞌ.
15 ¿Quebe nézele leꞌe be̱laꞌ dxen chee̱le naca na chee̱ Cristo?
¿Wacáꞌa tu da naca na be̱laꞌ dxen chee̱ Cristo,
ne guchagaꞌ na nen be̱laꞌ dxen chee̱ tu nuꞌula we̱n da sban?
¡Cabataꞌ!
16 ¿Quebe nézele leꞌe gate tu benneꞌ biu dxuchague̱ꞌ tu nuꞌula we̱n da sban dxúpate̱ꞌ zaj naque̱ꞌ ca tuze be̱laꞌ dxen?
Naxúaj lu dizraꞌ láꞌazxa da dxenná na:
Dxúpate̱ꞌ xelexaque̱ꞌ tuze be̱laꞌ dxen.
17 Gate tu benneꞌ dxuchague̱ꞌ Xránadxu,
dxelexaque̱ꞌ tuze beꞌ.
18 Le guzrunnaj chee̱ da sban.
Zaj nita dul-la xula da dxun benneꞌ da quebe dxulucáꞌana ditaj na be̱laꞌ dxen chee̱ꞌ,
san benneꞌ dxuchague̱ꞌ nuꞌula quebe naca zruꞌule̱ꞌ dxune̱ꞌ dul-la lu be̱laꞌ dxen chee̱queze̱ꞌ.
19 ¿Quebe nézele leꞌe naca be̱laꞌ dxen chee̱le xudauꞌ chee̱ Beꞌ Láꞌazxa,
Bénneaꞌ nunna Dios leꞌe,
naꞌ Beꞌ Láꞌazxa zue̱ꞌ xichaj lázrdaule?
Quebe nácale xrana be̱laꞌ dxen chee̱le,
20 laweꞌ da guzíꞌ Dios le̱ na nen tu lazruj zrente̱.
Chee̱ le̱ naꞌ,
dxal-laꞌ gápale ba láꞌana Dios nen be̱laꞌ dxen chee̱le,
ne nen beꞌ nácaquezle,
laweꞌ da dxúpate̱ naꞌ zaj naca na chee̱ Dios.