Ca naca chee̱ xel-la dxuchaga naꞌ
7
Naꞌa xeche̱baꞌ ca zaj naca da bché̱bele nedaꞌ.
Da li naca xrlátaje quebe guchaga naꞌ tu benneꞌ.
2 Laweꞌ da dxácale̱ꞌe̱ da sban naga zúale,
tu tu benneꞌ biu dxal-laꞌ súale̱ne̱ꞌ nuꞌula chee̱queze̱ꞌ,
naꞌ tu tu nuꞌula dxal-laꞌ súale̱ne̱ꞌ benneꞌ biu chee̱queze̱ꞌ.
3 Benneꞌ biu dxal-laꞌ gune̱ꞌ nen zruꞌule̱ꞌ da nabague̱ꞌ chee̱ zruꞌule̱ꞌ,
naꞌ cáꞌanqueze nuꞌula dxal-laꞌ gune̱ꞌ nen benneꞌ biu chee̱ꞌ da nabague̱ꞌ chee̱ benneꞌ chee̱ꞌ.
4 Nuꞌula naꞌ quebe naque̱ꞌ xrana be̱laꞌ dxen chee̱ꞌ,
san naca na chee̱ benneꞌ biu chee̱ꞌ.
Cáꞌanqueze benneꞌ biu quebe naque̱ꞌ xrana be̱laꞌ dxen chee̱ꞌ,
san naca na chee̱ zruꞌule̱ꞌ.
5 Quebe dxal-laꞌ xeledábaga ljwezre̱ꞌ,
san tuze gate xelezúe̱ꞌ xel-la wezría tu chíꞌidauze chee̱ xuluzúa cuine̱ꞌ lau Dios chee̱ xuluchálajle̱ne̱ꞌ Le̱ꞌ.
Te naꞌ dxal-laꞌ xuluchaga ljwezre̱ꞌ chee̱ quebe sequeꞌ Satanás nna beꞌe na le̱ꞌ che quebe xelezéquene̱ꞌ xelenná beꞌe cuine̱ꞌ.
6 Da nigá dxapaꞌ leꞌe naca na tu da dxue leꞌe lataj.
Quebe naca na tu da nadxixruj bea na.
7 Nedaꞌ dxezá lazraꞌ súale xúgute̱le ca zuaꞌ nedaꞌ,
san Dios ba nunne̱ꞌ tu tudxu da gaca gundxu.
Tu da nunne̱ꞌ tudxu,
naꞌ da xula xetudxu.
8 Dxapaꞌ benneꞌ weguꞌ,
ne nuꞌula we̱ze̱be,
naca xrlátaje xelexegáꞌane̱ꞌ cáꞌaze ca zuaꞌ nedaꞌ.
9 Che quebe xelezéquene̱ꞌ xelenná beꞌe cuine̱ꞌ,
waca xuluchaga ne̱ꞌe̱,
laweꞌ da nácadxa xrlátaje xuluchaga ne̱ꞌe̱ quézcala xeledée̱ꞌ ba xaꞌ lu be̱laꞌ dxen chee̱ꞌ.
10 Benneꞌ zaj nuchaga ne̱ꞌe̱ dxapaꞌ nuꞌula quebe gusane̱ꞌ benneꞌ biu chee̱ꞌ.
Quebe naca chee̱zaꞌ da nadxixruj bea nigá,
san naca na da dxun Xránadxu.
11 Che nu nuꞌula gusane̱ꞌ benneꞌ biu chee̱ꞌ,
dxal-laꞌ xegáꞌane̱ꞌ cáꞌaze,
u xexaque̱ꞌ tuze nen benneꞌ biu chee̱ꞌ naꞌ.
Cáꞌanqueze benneꞌ biu quebe dxal-laꞌ gusane̱ꞌ zruꞌule̱ꞌ.
12 Dxapaꞌ xezícadxa benneꞌ nédaꞌquezaꞌ,
quegá Xránadxu,
che zruꞌula tu bi bíchedxu quebe dxéajle̱ꞌe̱ chee̱ Xránadxu,
dxéquene̱ꞌ xrlátaje zúale̱ne̱ꞌ benneꞌ chee̱ꞌ,
bi bíchedxu naꞌ quebe dxal-laꞌ gusane̱ꞌ le̱ꞌ.
13 Che benneꞌ biu chee̱ tu nuꞌula zandxu quebe dxéajle̱ꞌe̱ chee̱ Xránadxu,
san dxéquene̱ꞌ xrlátaje zúale̱ne̱ꞌ zruꞌule̱ꞌ,
nuꞌula zandxu naꞌ quebe dxal-laꞌ gusane̱ꞌ benneꞌ biu chee̱ꞌ naꞌ.
14 Benneꞌ biu naꞌ quebe dxéajle̱ꞌe̱ chee̱ Xránadxu naque̱ꞌ ca tu bi chee̱ Dios laweꞌ da nuchague̱ꞌ zruꞌule̱ꞌ dxéajle̱ꞌe̱ chee̱ Xránadxu,
naꞌ nuꞌula naꞌ quebe dxéajle̱ꞌe̱ chee̱ Xránadxu naque̱ꞌ ca tu bi chee̱ Dios laweꞌ da nuchague̱ꞌ benneꞌ biu chee̱ꞌ dxéajle̱ꞌe̱ chee̱ Xránadxu.
La quebe naca na caní,
zríꞌinele leꞌe xelácabeꞌ ca zriꞌine benneꞌ quebe zaj naque̱ꞌ chee̱ Dios,
san da li zaj nácabeꞌ ca bi chee̱ Dios.
15 Che benneꞌ biu naꞌ u zruꞌule̱ꞌ,
benneꞌ quebe dxéajle̱ꞌe̱ chee̱ Xránadxu,
dxaca lázrtequeze̱ꞌ gusane̱ꞌ ljwezre̱ꞌ,
waca na.
Che caní dxaca chee̱ tu bi bíchedxu u chee̱ tu bi zandxu,
nape̱ꞌ lataj laweꞌ da gunné̱ Dios dxiꞌu chee̱ cueza zri lázredxu.
16 Che quebe gaca caní,
quebe nézenuꞌ lueꞌ,
nuꞌula,
che wazéquenuꞌ cuꞌu benneꞌ biu chiuꞌ lu naꞌ Cristo,
naꞌ lueꞌ,
benneꞌ biu,
quebe nézenuꞌ che wazéquenuꞌ cuꞌu zruꞌuluꞌ lu naꞌ Cristo.
17 Ájate̱ze naca,
tu tudxu dxal-laꞌ gundxu ca naca da nunna Xránadxu dxiꞌu,
ne xegáꞌanadxu cáte̱ze nácadxu gate gunné̱ Dios dxiꞌu.
Caní dxapaꞌ xúgute̱ cueꞌ bi chee̱ Cristo.
18 Che Dios dxenné̱ꞌ tu benneꞌ biu nadxugu lu be̱laꞌ chee̱ꞌ da dxuléꞌe na naque̱ꞌ bi chee̱ Dios,
benneꞌ nigá dxal-laꞌ xegáꞌane̱ꞌ caꞌ,
naꞌ che dxenné̱ Dios tu benneꞌ quebe nadxugu lu be̱laꞌ chee̱ꞌ da naꞌ,
quebe dxal-laꞌ chugu lu be̱laꞌ chee̱ꞌ da naꞌ.
19 Quebe bi naca che nadxugu da naꞌ lu be̱laꞌ chee̱dxu,
u quebe.
Da dxun na ba xen naca gundxu da dxaca lazreꞌ Dios.
20 Tu tudxu dxal-laꞌ xegáꞌanadxu cáte̱ze nácadxu gate Dios dxenné̱ꞌ dxiꞌu chee̱ gácadxu bi chee̱ꞌ.
21 Che gucuꞌ benneꞌ nadaꞌu gate Dios gunné̱ꞌ lueꞌ,
quebe cueꞌu gunne xue,
san che gapuꞌ lataj gacuꞌ benneꞌ quebe nadaꞌu,
dxal-laꞌ guchínenuꞌ na.
22 Bénneaꞌ guque̱ꞌ benneꞌ nadaꞌu gate gunné̱ Xránadxu le̱ꞌ naque̱ꞌ ca benneꞌ quebe nadaꞌu chee̱ gune̱ꞌ zrin chee̱ Xránadxu,
naꞌ cáꞌanqueze bénneaꞌ quebe naque̱ꞌ benneꞌ nadaꞌu gate gunné̱ Xránadxu le̱ꞌ,
naque̱ꞌ ca benneꞌ nadaꞌu chee̱ Xránadxu.
23 Dios ba náꞌawe̱ꞌ leꞌe nen tu lazruj zrente̱.
Quebe güele lataj nu benneꞌ gune̱ꞌ leꞌe benneꞌ zaj nadaꞌu.
24 Caꞌ naca na,
bi bichaꞌ,
tu tudxu dxal-laꞌ xegáꞌanadxu lau Dios cáte̱ze nácadxu gate gunné̱ꞌ dxiꞌu.
25 Ca naca chee̱ benneꞌ caꞌ quebe zaj nuchaga ne̱ꞌe̱ quebe bi gunná beꞌe Xránadxu nedaꞌ,
san dxapaꞌ leꞌe ca da dxéquedaꞌ,
naꞌ waca guxrén lázrele nedaꞌ laweꞌ da bexache lazreꞌ Xránadxu nedaꞌ.
26 Dxéquedaꞌ nedaꞌ dxal-laꞌ xegáꞌana tu benneꞌ biu cáte̱ze naque̱ꞌ laweꞌ da zúadxu zra sté̱bele̱ꞌe̱.
27 Che nuchaguꞌ nuꞌula quebe cuasuꞌ le̱ꞌ,
naꞌ che quebe nuchaguꞌ nuꞌula,
quebe guchaga naꞌu.
28 Che guchaga naꞌu,
quebe gunuꞌ dul-la,
naꞌ che tu núꞌuladauꞌ guchaga naꞌabeꞌ,
quebe gunbeꞌ dul-la.
Benneꞌ caꞌ dxuluchaga ne̱ꞌe̱ welezúe̱ꞌ ste̱be lu zra caní,
naꞌ dxaca lazraꞌ quebe súale ste̱be caní.
29 Bi bíchaꞌdauꞌ,
da nigá dxaca lazraꞌ xapaꞌ leꞌe.
Xelátega ne de̱ súadxu lu xe̱zr la xu nigá.
Náꞌate̱la benneꞌ zaj nuchaga ne̱ꞌe̱ dxal-laꞌ gune̱ꞌ da naca chee̱ Cristo ca dxelún benneꞌ quebe zaj nuchaga ne̱ꞌe̱.
30 Benneꞌ dxelebezre xache̱ꞌ dxal-laꞌ xelune̱ꞌ da naca chee̱ Cristo ca dxelún benneꞌ quebe zaj naque̱ꞌ baxacheꞌ.
Benneꞌ zaj zraꞌ laní dxal-laꞌ xelune̱ꞌ da naca chee̱ Cristo ca dxelún benneꞌ quebe zaj zue̱ꞌ xel-la dxebé,
naꞌ benneꞌ dxeláꞌawe̱ꞌ dxal-laꞌ xelune̱ꞌ da naca chee̱ Cristo ca dxelún benneꞌ quebe zaj nape̱ꞌ da naꞌ dxeláꞌawe̱ꞌ.
31 Benneꞌ dxeleziꞌe̱ ba neza lu xe̱zr la xu nigá dxal-laꞌ xelune̱ꞌ da naca chee̱ Cristo ca dxelún benneꞌ quebe dxeleziꞌe̱ ba neza na,
laweꞌ da ba dxexuzre lazreꞌ xe̱zr la xu nigá.
32 Dxaca lazraꞌ quebe bi cueꞌle gunne xue.
Gate tu benneꞌ biu nácabeꞌ weguꞌ dxeꞌebeꞌ gunne xue da naca chee̱ Xránadxu chee̱ gunbeꞌ da dxezaca ba lazreꞌ Xránadxu.
33 Gate ba nuchaga ne̱ꞌe̱,
dxeꞌe̱ gunne xue da naca chee̱ xe̱zr la xu nigá chee̱ gune̱ꞌ da dxezaca ba lazreꞌ zruꞌule̱ꞌ.
34 Cáꞌanqueze dxaca chee̱ nuꞌula zua benneꞌ biu chee̱ꞌ,
ne nuꞌula weguꞌ.
Nuꞌula weguꞌ dxeꞌebeꞌ gunne xue da naca chee̱ Xránadxu chee̱ chuꞌubeꞌ lu naꞌ Dios dute̱ be̱laꞌ dxen chee̱beꞌ,
ne dute̱ beꞌ chee̱beꞌ,
san nuꞌula zua benneꞌ biu chee̱ꞌ dxeꞌe̱ gunne xue da naca chee̱ xe̱zr la xu nigá chee̱ gune̱ꞌ da xezaca ba lazreꞌ benneꞌ chee̱ꞌ.
35 Dxapaꞌ leꞌe da nigá chee̱ gaca chaweꞌ chee̱le,
ne quebe chee̱ nna beꞌedaꞌ leꞌe,
san chee̱ gunle da xrlátaje,
ne da li,
chee̱ chuꞌule du lázrele lu naꞌ Xránadxu.
36 Che nu benneꞌ dxéquene̱ꞌ nácadxa xrlátaje guchaga naꞌ zríꞌine̱ꞌ nuꞌula laweꞌ da ba dxedé xel-la cuideꞌ chee̱beꞌ,
ne naca da dxal-laꞌ gunbeꞌ,
dxal-laꞌ gune̱ꞌ da dxéquene̱ꞌ naca xrlátaje.
Waca guchaga naꞌabeꞌ.
Quebe naca na dul-la.
37 Che nu benneꞌ quebe dxéquene̱ꞌ dxun na ba xen,
ne che nape̱ꞌ lataj gune̱ꞌ da dxaca lazre̱ꞌ,
ne che ba nune̱ꞌ lu xichaj lázrdawe̱ꞌ xegáꞌana zríꞌine̱ꞌ nuꞌula weguꞌ,
dxune̱ꞌ da xrlátaje.
38 Caꞌ naca na,
benneꞌ dxuꞌe̱ lataj guchaga naꞌabeꞌ zríꞌine̱ꞌ nuꞌula,
dxune̱ꞌ da xrlátaje,
naꞌ bénneaꞌ quebe dxuꞌe̱ lataj dxune̱ꞌ da nácadxa xrlátaje.
39 Nuꞌula zua benneꞌ biu chee̱ꞌ nuchague̱ꞌ bénneaꞌ ne̱ chee̱ da nadxixruj bea na dxácate̱ ne zue̱ꞌ nabane̱ꞌ,
san che gate benneꞌ chee̱ꞌ,
de̱ lataj nuꞌula naꞌ guchaga ne̱ꞌe̱ nen nútete̱ze benneꞌ biu,
san dxun na ba xen dxéajle̱ꞌe̱ chee̱ Xránadxu.
40 Gácadxa chee̱ꞌ da ba neza che xegáꞌane̱ꞌ cáꞌaze.
Caní dxéquedaꞌ nedaꞌ,
ne dxéquedaꞌ dxun Beꞌ Láꞌazxa chee̱ Dios nedaꞌ tuze.