Xel-la wagu da zaj nuzúa bénneache lau bedáuꞌ xiaj xaga
8
Naꞌa guchálajaꞌ ca naca chee̱ xel-la wagu da zaj nuzúa bénneache lau bedáuꞌ xiaj xaga.
Da li xúgute̱dxu nápadxu xel-la dxéajniꞌi ca naca da nigá.
Xel-la dxéajniꞌi dxun na dxiꞌu benneꞌ dxulucáꞌana szren cuina,
san xel-la zriꞌi lazreꞌ dxusegula na dxiꞌu lu xel-la dxeajlí lazreꞌ chee̱dxu.
2 Che nu benneꞌ dxéquene̱ꞌ nape̱ꞌ dute̱ xel-la dxéajniꞌi,
quebe ne chéajniꞌine̱ꞌ ca dxal-laꞌ chéajniꞌine̱ꞌ.
3 Che nu benneꞌ nazríꞌine̱ꞌ Dios,
Dios ba nazíꞌ lu ne̱ꞌe̱ bénneaꞌ.
4 Naꞌa,
ca naca chee̱ xel-la wagu da zaj nuzúa bénneache lau bedáuꞌ xiaj xaga,
nezdxu quebe bi naca tu bedáuꞌ xiaj xaga lu xe̱zr la xu nigá,
ne tuze Bénneaꞌ naque̱ꞌ Dios.
5 Lácala zaj zraꞌ xabáa,
ne xe̱zr la xu nigá da zante̱ da dxeleque bénneache zaj naca na dios,
ne chee̱ benneꞌ caní zante̱ dios zaj zra na,
ne zante̱ xrane̱ꞌ zaj zra na,
6 chee̱dxu dxiꞌu che nácadxu chee̱ Cristo,
tuze Bénneaꞌ naque̱ꞌ Dios,
Bénneaꞌ naque̱ꞌ Xradxu.
Xradxu Dios be̱ne̱ꞌ xúgute̱ da de̱,
naꞌ dxiꞌu zúadxu chee̱ guchínene̱ꞌ dxiꞌu.
Cáꞌanqueze tuze Bénneaꞌ naque̱ꞌ Xránadxu,
Jesucristo.
Ne̱ chee̱ Le̱ꞌ guzráꞌ xúgute̱ da de̱,
naꞌ zúadxu dxiꞌu ne̱ chee̱ Le̱ꞌ.
7 Quegá xúgute̱ bi chee̱ Cristo zaj nézene̱ꞌ da nigá.
Bal-la benneꞌ caní gulúꞌu lawe̱ꞌ belúe láꞌane̱ꞌ bedáuꞌ xiaj xaga,
naꞌ gate dxelawe̱ꞌ xel-la wagu naꞌ,
dxeléquene̱ꞌ naca na tu da naca na chee̱ bedáuꞌ,
naꞌ laweꞌ da quebe zaj ze̱ chache̱ꞌ lu xichaj lázrdawe̱ꞌ,
dxeléquene̱ꞌ zaj nabague̱ꞌ zria ne̱ chee̱ da dxelawe̱ꞌ.
8 Da naꞌ dxágudxu quebe dxucáꞌanadxa na dxiꞌu xrlátaje lau Dios,
laweꞌ da quebe nácadxadxu xrlátaje che dxágudxu,
ne quebe nácadxadxu cale̱la che quebe dxágudxu.
9 Le guxúe xanneꞌ cuínale ca naca lataj da nápale bi gágule chee̱ quebe guzría xile tu benneꞌ quebe ze̱ chache̱ꞌ lu xel-la dxeajlí lazreꞌ chee̱ꞌ.
10 Caꞌ naca na,
che lueꞌ nézenuꞌ da nigá,
naꞌ che cueꞌu gaguꞌ tu naga zraꞌ bedáuꞌ xiaj xaga,
naꞌ che tu bi bíchedxu,
benneꞌ quebe ze̱ chache̱ꞌ lu xel-la dxeajlí lazreꞌ chee̱ꞌ,
léꞌene̱ꞌ lueꞌ dxeꞌu dxaguꞌ naꞌ,
naꞌ bi bíchedxu naꞌ wexázrquezne̱ꞌ cueꞌe̱ gawe̱ꞌ da naꞌ zaj nuzúa bénneache lau tu dios quebe bi naca.
11 Caꞌ naca na,
lueꞌ,
laweꞌ da napuꞌ xel-la dxéajniꞌi,
guzría xiꞌu tu bi bichuꞌ quebe ze̱ chache̱ꞌ lu xel-la dxeajlí lazreꞌ chee̱ꞌ,
naꞌ naque̱ꞌ benneꞌ gute Cristo waláz chee̱ꞌ.
12 Caꞌ naca na,
gate dxuzría xile bi bíchedxu quebe zaj ze̱ chache̱ꞌ lu xel-la dxeleajlí lazreꞌ chee̱ꞌ,
dxunle dul-la da dxuzúa Crístoqueze chaláꞌala.
13 Chee̱ le̱ naꞌ,
che guzría xiꞌa tu bi bichaꞌ ne̱ chee̱ da dxawaꞌ,
nácadxa chaweꞌ cabátadxa gawaꞌ be̱laꞌ chee̱ quebe guzría xiꞌa le̱ꞌ.