Da naca chee̱ tu benneꞌ gubáz chee̱ Cristo
9
Naca chiaꞌ nacaꞌ gubáz chee̱ Cristo,
ne napaꞌ lataj bi gunaꞌ laweꞌ da bleꞌedaꞌ Xránadxu Jesús,
naꞌ nácale leꞌe bi chee̱ Cristo ne̱ chee̱ zrin be̱naꞌ chee̱ꞌ.
2 Che dxeleque xezícadxa benneꞌ quebe nacaꞌ gubáz chee̱ Cristo,
san dxun na ba xen guéquele leꞌe nacaꞌ gubáz chee̱ꞌ laweꞌ da dxunna bea da nácale chee̱ Xránadxu da li nacaꞌ gubáz chee̱ꞌ.
3 Da nigá naca na da dxapaꞌ benneꞌ caꞌ dxelezí tizre̱ꞌ nedaꞌ:
4 Naca chiaꞌ siꞌ lu naꞌa da xiꞌaj gawaꞌ ne̱ chee̱ zrin da dxunaꞌ.
5 Cáꞌanqueze naca chiaꞌ guchaga naꞌa tu nuꞌula zandxu chee̱ chéajle̱ne̱ꞌ nedaꞌ ca dxelún xezícadxa benneꞌ gubáz chee̱ Cristo,
ne benneꞌ bíchequeze Xránadxu,
ne Pedro.
6 ¿Dxéquele tuze Bernabé,
ne nedaꞌ dxal-laꞌ guntuꞌ zrin chee̱ gataꞌ da xiꞌaj gáguntuꞌ gate dxuzénentuꞌ bénneache dizraꞌ chaweꞌ?
7 ¿Nuzra benneꞌ gaque̱ꞌ benneꞌ zeje̱ꞌ wedil-la che quebe nu quizruj le̱ꞌ?
¿Nuzra benneꞌ dxaze̱ꞌ lba uva che quebe gawe̱ꞌ na?
¿Nuzra benneꞌ gusegule̱ꞌ zrilaꞌ che quebe xequé̱ꞌe̱ xicha zrabaꞌ?
8 Quebe dxal-laꞌ guéquele dxapaꞌ leꞌe da nigá nédaꞌquezaꞌ,
laweꞌ da caníqueze dxenná na lu da bdxixruj beꞌe Moisés.
9 Naxúaj lu da nadxixruj bea na da dxenná Dios:
Quebe cuꞌule xixruj dxuꞌa be̱zre,
be̱ dxíchubaꞌ zruaꞌ xtila.
Quebe gunná Dios da nigá laweꞌ da dxue lazre̱ꞌ chee̱ be̱zre cáꞌaze.
10 Gunné̱ꞌ na ne̱ chee̱dxu dxiꞌu.
Naxúaj da nadxixruj bea nigá chee̱ gaca da ba neza chee̱dxu,
laweꞌ da benneꞌ dxugáꞌane̱ꞌ be̱zre,
ne benneꞌ dxine̱ꞌ dxal-laꞌ xelebeza lazre̱ꞌ xelexeziꞌe̱ ca naca da gunna lina da xelaze̱ꞌ.
11 Naꞌa,
che netuꞌ ba gúzantuꞌ lu xichaj lázrdaule da naca na chee̱ Beꞌ Láꞌazxa,
¿quebe dxal-laꞌ siꞌ lu naꞌntuꞌ látedauze da naca chee̱le lu xe̱zr la xu nigá?
12 Che xezícadxa benneꞌ naca chee̱ꞌ xelezíꞌ lu ne̱ꞌe̱ da naca chee̱le,
¿gázradxa netuꞌ?
Quebe ne guchínentuꞌ da nigá naca na chee̱ntuꞌ.
Bchaga launtuꞌ xúgute̱ chee̱ quebe guzágantuꞌ ca naca dizraꞌ chaweꞌ chee̱ Cristo.
13 Ba nézele benneꞌ dxelune̱ꞌ zrin chee̱ xudauꞌ dxelawe̱ꞌ chee̱ da xuꞌu lu xudauꞌ naꞌ,
naꞌ benneꞌ dxelune̱ꞌ zrin chee̱ lu cugu naga dxelutie̱ꞌ be̱ xíxreꞌdu caꞌ lau Dios dxelawe̱ꞌ be̱laꞌ chee̱ béadu caꞌ.
14 Cáꞌanqueze ba nun Xránadxu chee̱ benneꞌ dxuluchalaje̱ꞌ dizraꞌ chaweꞌ,
xelezíꞌe̱ ba neza zrin da dxelune̱ꞌ.
15 Cabataꞌ guchínedaꞌ netú da caní zaj naca na chiaꞌ,
ne quebe dxuzúajaꞌ da nigá chee̱ gúnnale nedaꞌ lateꞌ.
Gaca lázredxaꞌ gatiaꞌ quézcala nu gucuasa da ba neza da napaꞌ.
16 Quebe dxal-laꞌ gucáꞌana szren cuinaꞌ laweꞌ da dxuzendaꞌ bénneache dizraꞌ chaweꞌ chee̱ Cristo,
laweꞌ da dxun na ba xen gunaꞌ na.
Baxacheꞌ nacaꞌ che quebe guzendaꞌ bénneache dizraꞌ chaweꞌ nigá.
17 Chee̱ le̱ naꞌ,
che dxunaꞌ na laweꞌ da naca na da dxaca lazraꞌ gunaꞌ,
ba de̱ lazruj chiaꞌ.
Naꞌa,
che dxunaꞌ na xadíaze,
naca na tu da nusebaga Dios nedaꞌ.
18 Caꞌ naca na,
lazruj da dxeziꞌa naca na da ba neza napaꞌ gate dxuzendaꞌ bénneache dizraꞌ chaweꞌ chee̱ Cristo,
ne quebe bi dxuchízrujaꞌ benneꞌ caꞌ.
Caꞌ naca na,
quebe dxuchínedaꞌ da naca na chiaꞌ laweꞌ da dxunaꞌ zrin nigá.
19 Lácala quebe nacaꞌ benneꞌ nadaꞌu chee̱ nu benneꞌ,
ba nun cuinaꞌ ca tu benneꞌ nadaꞌu chee̱ xúgute̱ bénneache,
chee̱ séquedaꞌ cuꞌa benneꞌ zandxa lu naꞌ Cristo.
20 Gate zuaꞌ ládujla benneꞌ judío caꞌ,
dxun cuinaꞌ benneꞌ judío chee̱ cuꞌa le̱ꞌ lu naꞌ Cristo.
Caꞌ naca na,
ládujla benneꞌ zaj xuꞌe̱ lu naꞌ da nadxixruj bea na dxun cuinaꞌ ca tu benneꞌ xuꞌe̱ lu naꞌ da nadxixruj bea na,
chee̱ cuꞌa le̱ꞌ lu naꞌ Cristo lácala da li quebe xuꞌa lu naꞌ da nadxixruj bea na naꞌ.
21 Xetú naꞌa,
chee̱ séquedaꞌ cuꞌa lu naꞌ Cristo benneꞌ caꞌ quebe zaj xuꞌe̱ lu naꞌ da bdxixruj beꞌe Moisés,
dxun cuinaꞌ ca tu benneꞌ quebe xuꞌe̱ lu naꞌ da nadxixruj bea na naꞌ,
lácala da li xuꞌa lu naꞌ da nadxixruj bea na chee̱ Dios laweꞌ da xuꞌa lu naꞌ da nadxixruj bea na chee̱ Cristo.
22 Gate zuaꞌ ládujla benneꞌ caꞌ quebe zaj ze̱ chache̱ꞌ lu xel-la dxeajlí lazreꞌ chee̱ꞌ dxun cuinaꞌ ca zaj naca benneꞌ caꞌ chee̱ séquedaꞌ cuꞌa le̱ꞌ lu naꞌ Cristo.
Caꞌ naca na,
dxun cuinaꞌ ca naca tu tu benneꞌ caꞌ chee̱ ájate̱zla séquedaꞌ cuꞌa bal-la benneꞌ caꞌ lu naꞌ Cristo.
23 Dxunaꞌ xúgute̱ da nigá ne̱ chee̱ dizraꞌ chaweꞌ chee̱ Cristo chee̱ gapaꞌ tu da ba neza chee̱ na.
24 Ba nézquezle leꞌe tu lu da huitaj benneꞌ zan dxesíꞌaca chégüe̱ꞌ naꞌ tuze̱ꞌ dxezruéꞌene̱ꞌ lataj blau.
Le saꞌaca chegu leꞌe chee̱ zruéꞌele da dxunna Cristo.
25 Xúgute̱ benneꞌ caꞌ dxulupáꞌa cuine̱ꞌ chee̱ xeluꞌe̱ da huitaj,
dxuluzúe̱ꞌ chaláꞌala xúgute̱ da dxun na cale̱la chee̱ꞌ.
Benneꞌ caní dxelune̱ꞌ da caní chee̱ xelezíꞌ lu ne̱ꞌe̱ tu da guzúe̱ꞌ xíchaje̱ꞌ da naca na lagaꞌ da québequeze si bea,
san dxiꞌu dxundxu zrin chee̱ zruéꞌedxu da zeajlí canna.
26 Nedaꞌ quebe dxezá chéguaꞌ ájate̱zla,
ne quebe dxedil-laꞌ ca tu benneꞌ dxuꞌe̱ lu beꞌze gate dxedil-le̱ꞌ.
27 Nedaꞌ dxudéaꞌ xel-la ziꞌ be̱laꞌ dxen chiaꞌ,
ne dxenná beꞌedaꞌ na,
chee̱ quebe gunitiaꞌ nedaꞌ da naca chiaꞌ lu zrin nigá,
ca te naꞌ ba bsé̱dedaꞌ benneꞌ xula caꞌ.