Da dxuzéajniꞌi na dxiꞌu ca naca chee̱ bedáuꞌ xiaj xaga caꞌ
10
Dxaca lazraꞌ nézele,
bi bíchaꞌdauꞌ,
ca guca chee̱ xra xrtáudxu caꞌ xjácale̱ne̱ꞌ Moisés.
Dios guché̱ꞌe̱ xúgute̱ benneꞌ caꞌ ne̱ chee̱ beuj bza naꞌ,
naꞌ xúgute̱ꞌ guledée̱ꞌ ládujla nísadauꞌ da nazí le na Xrna.
2 Caꞌ naca na,
waca nnadxu xúgute̱ꞌ beledxúe̱ꞌ nisa lu nísadauꞌ naꞌ,
ne gulaque̱ꞌ tuze nen Moisés gate guledále̱ne̱ꞌ beuj bza naꞌ.
3 Cáꞌanqueze xúgute̱ꞌ gulawe̱ꞌ tuze xel-la wagu da bnezruj Dios le̱ꞌ,
4 ne guleꞌaj xúgute̱ꞌ tuze nisa da bnezruj Dios le̱ꞌ,
laweꞌ da guléꞌaje̱ꞌ nisa naꞌ bedxúaj na xiaj xre naꞌ.
Xiaj xre nigá dxuléꞌe na ca naca Crístoqueze,
Bénneaꞌ guxéajle̱ne̱ꞌ benneꞌ caꞌ le̱ꞌe̱ xixreꞌ laweꞌ lataj naꞌ.
5 Benneꞌ zan benneꞌ caꞌ quebe belune̱ꞌ da bezaca ba lazreꞌ Dios,
naꞌ chee̱ le̱ naꞌ gulatie̱ꞌ le̱ꞌe̱ xixreꞌ laweꞌ lataj.
6 Xúgute̱ da caní guca na chee̱ guzéajniꞌi na dxiꞌu chee̱ quebe sa lázredxu da cale̱la caꞌ,
ca belún benneꞌ caꞌ.
7 Chee̱ le̱ naꞌ quebe gucáꞌana szrenle bedáuꞌ xiaj xaga caꞌ ca belún bal-la benneꞌ caꞌ,
ca naxúaj na lu dizraꞌ láꞌazxa,
dxenná na:
Bénneache gulebéꞌe̱,
ne guleꞌaj gulawe̱ꞌ lau bedáuꞌ xiaj xaga,
naꞌ belexase̱ꞌ chee̱ buluxé̱ꞌe̱.
8 Quebe dxal-laꞌ gundxu da sban ca belún bal-la benneꞌ caꞌ,
naꞌ tu zraze gulate chupa gaxúa chi dxua gaxue̱ꞌ.
9 Quebe dxal-laꞌ guchínedxu xel-la zren lazreꞌ chee̱ Xránadxu chee̱ gundxu da cale̱la ca belún bal-la benneꞌ caꞌ,
naꞌ gulatie̱ꞌ,
gate gulíꞌina be̱laꞌ le̱ꞌ.
10 Quebe nne̱le chee̱ Dios ca gulenné̱ bal-la benneꞌ caꞌ,
naꞌ gubáz chee̱ xabáa chee̱ xel-la gute be̱te̱ꞌ benneꞌ caꞌ.
11 Xúgute̱ da caní gulezaca xra xrtáudxu,
naꞌ zaj naxúaj na lu dizraꞌ láꞌazxa chee̱ guzéajniꞌi na dxiꞌu,
zúadxu lu zra bze̱be caní.
12 Caꞌ naca na,
nu benneꞌ dxéquene̱ꞌ ze̱ chache̱ꞌ lu da naca chee̱ Dios dxal-laꞌ guxúe xanneꞌ cuine̱ꞌ chee̱ quebe cheajcházie̱ꞌ.
13 Da dxelún zréaje leꞌe naca na tuze ca da dxelún zréaje xúgute̱ bénneache,
naꞌ waca guxrén lázrele Dios laweꞌ da quebe guꞌe̱ lataj bi gun zréaje leꞌe da quebe séquele guchaga laule,
naꞌ gate gaca tu da gun zréaje na leꞌe,
Dios gunne̱ꞌ leꞌe ájala gunle chee̱ lale lu da naꞌ,
chee̱ séquele guchaga laule na.
14 Chee̱ le̱ naꞌ,
bi bichaꞌ nazriꞌite̱ lazraꞌ,
québedxa gucáꞌana szrenle bedáuꞌ xiaj xaga caꞌ.
15 Dxuchálajle̱naꞌ leꞌe ca dxuchálajle̱naꞌ benneꞌ dxeléajniꞌine̱ꞌ,
naꞌ léꞌequeze waca guchíꞌale chee̱ da dxapaꞌ leꞌe.
16 Gate dxágadxu da dxucube na ca guca gate gute Xránadxu,
dxápadxu ba láꞌana Dios.
Gate dxíꞌajdxu xrisa uva láꞌazxa,
da nigá dxuléꞌe na dxezidxu ba neza dxen chee̱ Cristo da gulalaj na le̱ꞌe̱ xaga béguaj.
Xeta xtila naꞌ da dxuzúzrujdxu dxuléꞌe na xezidxu ba neza be̱laꞌ dxen chee̱ Cristo da bdee̱ꞌ waláz chee̱dxu le̱ꞌe̱ xaga béguaj.
17 Lácala naxandxu,
xúgute̱dxu dxágudxu tu xeta xtílaqueze da naca na tuze,
da naꞌ dxuléꞌe na nácadxu ca tuze be̱laꞌ dxen chee̱ Cristo.
18 Le nnaꞌxque ca zaj naca benneꞌ Israel caꞌ.
Benneꞌ caní,
benneꞌ dxelawe̱ꞌ da dxuluzré̱ꞌe̱ lu cugu chee̱ Dios dxeleziꞌe̱ ba neza lu cugu naꞌ.
19 Quebe dxenníaꞌ naca tu bedáuꞌ xiaj xaga tu da zaca,
naꞌ be̱laꞌ da dxuluzría bénneache lau bedáuꞌ xiaj xaga quebe zácadxa ca bítete̱ze xetú be̱laꞌ.
20 Dxenníaꞌ da dxuluzría lau bedáuꞌ xiaj xaga benneꞌ caꞌ quebe zaj núnbeꞌe̱ Dios,
dxuluzríe̱ꞌ na lau beꞌ xriwe̱ꞌ caꞌ ne quegá lau Dios,
naꞌ quebe dxaca lazraꞌ gunle tuze beꞌ xriwe̱ꞌ caꞌ.
21 Quebe gaca xíꞌajle da naꞌ dxuléꞌe na nácale Xránadxu tuze,
ne xíꞌajte̱le da guléꞌe na nácale tuze beꞌ xriwe̱ꞌ caꞌ,
ne quebe gaca gágule da naca na chee̱ Xránadxu,
ne gágute̱le da naca na chee̱ beꞌ xriwe̱ꞌ caꞌ.
22 ¿Dxaca lázrele xewine lazreꞌ Xránadxu laweꞌ da dxusandxu Le̱ꞌ?
¿Dxéquele leꞌe nácadxu benneꞌ wáladxa ca Le̱ꞌ?
Da naca chee̱dxu gundxu, ne ca naca xel-la zriꞌi lazreꞌ
23 Da li naca da naꞌ dxelenná bénneache,
dxelenné̱ꞌ:
Naca chiaꞌ gunaꞌ da dxaca lazraꞌ.
Quegá xúgute̱ naca na da sidxu ba neza.
Naca chee̱ nu benneꞌ gune̱ꞌ ca dxaca lazre̱ꞌ san quegá xúgute̱ gusegula na le̱ꞌ lu xel-la dxeajlí lazreꞌ chee̱ꞌ.
24 Dxal-laꞌ gundxu da gaca chaweꞌ chee̱ benneꞌ xula,
ne quegá da gaca na chaweꞌ cheé̱zedxu.
25 Le gagu leꞌe ca naca da dxedaꞌu laweꞌ xiꞌa,
ne quebe naba xúzrele chee̱ na chee̱ quebe sua ste̱be xichaj lázrdaule,
26 laweꞌ da zaj naca chee̱ Xránadxu xe̱zr la xu nigá,
ne xúgute̱ da caꞌ zaj zraꞌ lu xe̱zr la xu.
27 Che nu benneꞌ,
benneꞌ quebe dxéajle̱ꞌe̱ chee̱ Xránadxu,
dxenné̱ꞌ leꞌe gágule xeta,
naꞌ che dxaca lázrele chéajle,
le gagu xúgute̱ da guzríe̱ꞌ laule,
ne quebe naba xúzrele chee̱ na chee̱ quebe sua ste̱be xichaj lázrdaule.
28 Che nna nu benneꞌ zúale̱ leꞌe,
naꞌ xe̱ꞌe̱ leꞌe:
“Be̱laꞌ nigá bache guzría na lau bedáuꞌ xiaj xaga”,
quebe gágule na,
chee̱ quebe guzúale ste̱be bénneaꞌ gunné̱ꞌ caꞌ,
ne chee̱ quebe sua ste̱be xichaj lázrdaule.
29 Dxenníaꞌ da nigá chee̱ xichaj lázrdau benneꞌ zúale̱ne̱ꞌ lueꞌ,
ne quegá chee̱ xichaj lázrdauꞌ luéꞌqueze.
Waca naba xuzre tu benneꞌ:
“¿Bizr chee̱ naꞌ dxuchiꞌu da naca chiaꞌ laweꞌ da sua ste̱be xichaj lázrdau benneꞌ xula?
30 Che dxapaꞌ Dios:
Xcalenuꞌ chee̱ da dxawaꞌ,
¿bizr chee̱ naꞌ xelezí tizre̱ꞌ nedaꞌ chee̱ da dxawaꞌ?”
31 Chee̱ le̱ naꞌ,
che dxágule u dxíꞌajle,
u bítete̱ze da dxunle,
le gun xúgute̱ chee̱ gaca ba Dios.
32 Quebe bi gunle da guzúa na ste̱be benneꞌ xula,
quegá benneꞌ judío caꞌ,
ne quegá benneꞌ quebe zaj naque̱ꞌ judío,
ne quegá nu benneꞌ naque̱ꞌ bi chee̱ Dios.
33 Nedaꞌ dxunaꞌ ba xuzre gunaꞌ da xelezaca ba lazreꞌ xúgute̱ bénneache ca naca xúgute̱ da dxunaꞌ.
Quebe dxunaꞌ da gaca chaweꞌ chee̱zaꞌ san da gaca chaweꞌ chee̱ xezícadxa bénneache chee̱ xelelé̱ꞌ.