11
Le gun ca dxunaꞌ nedaꞌ,
ca nedaꞌ dxúnquezaꞌ ca be̱n Cristo.
Da dxelún nuꞌula naga zaj nazraga bi chee̱ Cristo
2 Bi bichaꞌ,
dxapaꞌ leꞌe ba láꞌana laweꞌ da dxeajsá lázrequezle nedaꞌ,
ne dxunle ca naca da bzéajniꞌidaꞌ leꞌe.
3 Naꞌa dxaca lazraꞌ chéajniꞌile naca Cristo xíchaje̱ chee̱ tu tu benneꞌ biu,
naꞌ benneꞌ biu naque̱ꞌ xíchaje̱ chee̱ zruꞌule̱ꞌ,
ca naca Dios,
naque̱ꞌ xíchaje̱ chee̱ Cristo.
4 Che tu benneꞌ biu gugácue̱ꞌ xíchaje̱ꞌ gate dxuchálajle̱ne̱ꞌ Dios naga zaj nadupa bi chee̱ Cristo,
u gate dxuchálaje̱ꞌ waláz chee̱ Dios,
naca na tu xel-la stuꞌ chee̱ Bénneaꞌ naque̱ꞌ xíchaje̱ꞌ.
5 Che tu nuꞌula quebe gugácue̱ꞌ xíchaje̱ꞌ gate dxuchálajle̱ne̱ꞌ Dios,
u gate dxuchálaje̱ꞌ waláz chee̱ Dios,
naca na tu xel-la stuꞌ chee̱ꞌ,
laweꞌ da dxun cuine̱ꞌ ca tu benneꞌ biu.
Lé̱bezqueze naca na chugue̱ꞌ xíchaje̱ꞌ.
6 Che tu nuꞌula quebe gugacu xíchaje̱ꞌ,
nácadxa xrlátaje chugue̱ꞌ tu chiꞌize ca naca xicha xíchaje̱ꞌ.
Naꞌ che naca na tu xel-la stuꞌ chee̱ nuꞌula che chugue̱ꞌ xíchaje̱ꞌ,
u che guzúe̱ꞌ zrígaze xíchaje̱ꞌ ca dxun tu benneꞌ biu,
dxal-laꞌ gugacu xíchaje̱ꞌ naga zaj nazraga bi chee̱ Cristo.
7 Benneꞌ biu quebe dxal-laꞌ gugacu xíchaje̱ꞌ laweꞌ da naque̱ꞌ luꞌa le saca Dios,
naꞌ da naque̱ꞌ dxuléꞌe na ca naca xel-la szren chee̱ Dios.
Da naca nuꞌula dxuléꞌe na ca naca xel-la szren chee̱ benneꞌ biu.
8 Gate be̱n Dios benneꞌ biu,
quebe bi guléaje̱ꞌ le̱ꞌ lu be̱laꞌ dxen chee̱ nuꞌula,
san guléaje̱ꞌ lu be̱laꞌ dxen chee̱ benneꞌ biu da naꞌ bexune̱ꞌ nuꞌula naꞌ.
9 Dios be̱ne̱ꞌ nuꞌula naꞌ chee̱ nna beꞌe benneꞌ biu le̱ꞌ,
ne quegá be̱ne̱ꞌ benneꞌ biu chee̱ nna beꞌe nuꞌula le̱ꞌ.
10 Chee̱ le̱ naꞌ nuꞌula dxal-laꞌ guzúe̱ꞌ xíchaje̱ꞌ tu da dxuléꞌe na zua nu dxenná beꞌe le̱ꞌ chee̱ quebe gun zréajene̱ꞌ gubáz chee̱ xabáa caꞌ chee̱ Dios.
11 Lu da nácadxu chee̱ Cristo,
benneꞌ biu dxechinne̱ꞌ nuꞌula,
ne cáꞌanqueze dxechín nuꞌula benneꞌ biu.
12 Da li Dios guléaje̱ꞌ nuꞌula naꞌ lu be̱laꞌ dxen chee̱ benneꞌ biu,
naꞌ cáꞌanqueze benneꞌ biu dxálaje̱ꞌ chee̱ nuꞌula,
naꞌ xúgute̱dxu zadxu lu naꞌ Dios.
13 Le nnaꞌxque leꞌe che naca xrlátaje che tu nuꞌula guchálajle̱ne̱ꞌ Dios,
ne quebe gugacu xíchaje̱ꞌ.
14 Da nácaquezdxu dxuléꞌe na dxiꞌu naca tu xel-la stuꞌ che benneꞌ biu se̱ tunna xicha xíchaje̱ꞌ,
15 naꞌ naca tu da ba láꞌana chee̱ nuꞌula se̱ na tunna,
laweꞌ da nunna Dios le̱ꞌ xicha xíchaje̱ꞌ tunna chee̱ gugacu na xíchaje̱ꞌ.
16 Naꞌa che nu benneꞌ dxaca lazre̱ꞌ gutil-le̱ꞌ dizraꞌ ca naca da nigá,
dxal-laꞌ nézene̱ꞌ quegá dxiꞌu ne quegá benneꞌ zaj nazraga chee̱ Cristo quebe núnbeadxu xetú da xula.
Da dxelún benneꞌ, gate dxelawe̱ꞌ da naca chee̱ Xránadxu
17 Ca naca chee̱ da nigá quebe dxapaꞌ leꞌe ba láꞌana laweꞌ da dxaca da cale̱la chee̱le gate nazrágale,
ne quegá da chaweꞌ.
18 Da nédxuteca,
dxulé̱ꞌe̱ nedaꞌ gate dxezrágale chee̱ güe láꞌanale Dios nácale chupa laꞌa.
Dxéquedaꞌ naca da li da dxelenné̱ꞌ.
19 Dxál-laꞌqueze gácale chupa laꞌa chee̱ guléꞌe laweꞌ nu benneꞌ ládujla leꞌe da li naque̱ꞌ bi chee̱ Cristo.
20 Chee̱ le̱ naꞌ gate dxezrágale leꞌe chee̱ gágule da naca chee̱ Xránadxu,
da li québedxa naca na chee̱ Xránadxu.
21 Gate dxezrín zra dxágule,
tu tule leꞌe dxebía lau chee̱le dxecáꞌale xel-la wagu cha chee̱le,
naꞌ bál-lale leꞌe dxegáꞌanale dxedunle,
naꞌ xezícadxale dxezúzrele.
22 ¿Quebe bi de̱ chee̱le naga xiꞌaj gágule?
Caꞌan dxunle,
dxuzúale chaláꞌala bi caꞌ chee̱ Dios,
ne dxuguꞌule xel-la stuꞌ benneꞌ caꞌ quebe bi de̱ chee̱ꞌ.
¿Bízraqueze xapaꞌ leꞌe?
¿Dxal-laꞌ gapaꞌ leꞌe ba láꞌana?
¡Cabataꞌ!
Da dxágudxu da naca chee̱ Xránadxu
23 Xránaquezdxu bzéajniꞌine̱ꞌ nedaꞌ da nigá bsé̱dedaꞌ leꞌe:
Lu zreꞌ náꞌqueze gate Judas bdee̱ꞌ Xránadxu Jesús lu naꞌ benneꞌ guledábague̱ꞌ Le̱ꞌ,
naꞌ Jesús guqué̱ꞌe̱ xeta xtila,
24 naꞌ gudé guzre̱ꞌ Dios:
Xcalenuꞌ,
bzúzruje̱ꞌ na,
naꞌ gunné̱ꞌ:
“Le gagu.
Xeta xtila nigá dxuléꞌe na ca gaca chee̱ be̱l-laꞌ dxen chiaꞌ lu da naꞌ saca ziꞌa waláz chee̱le.
Le gun da nigá chee̱ cheajsá lázrele nedaꞌ.”
25 Cáꞌanqueze,
gudé gulawe̱ꞌ,
guqué̱ꞌe̱ xrisa uva,
naꞌ gunné̱ꞌ:
“Xrisa uva nigá dxuléꞌe na ca naca da dxuzé̱ chacha na xel-la wezría cube da naca na dxen chiaꞌ.
Tu tu lasa xíꞌajle na,
le gun na chee̱ cheajsá lázrele nedaꞌ.”
26 Caꞌ naca na,
ca zrin zra xeláꞌ Xránadxu,
guléꞌele ca guca gate gute Xránadxu tu tu lasa gate gágule xeta xtila nigá,
ne xíꞌajle xrisa uva nigá.
Ca dxal-laꞌ gágudxu da naca chee̱ Xránadxu
27 Caꞌ naca na,
nútete̱ze benneꞌ gawe̱ꞌ xeta xtila nigá,
u xíꞌaje̱ꞌ xrisa uva chee̱ Xránadxu,
ne quebe dxape̱ꞌ ba láꞌana na,
naꞌ dxune̱ꞌ dul-la da dxuzúa be̱laꞌ dxen chee̱ Xránadxu chaláꞌala.
28 Chee̱ le̱ naꞌ tu tudxu dxal-laꞌ guxúe xánnedxu xichaj lázrdaudxu gate za gágudxu xeta xtila nigá,
ne za xíꞌajdxu xrisa uva nigá,
29 laweꞌ da che xiꞌaj gágudxu,
ne quebe dxéquedxu dxuléꞌe na ca naca be̱laꞌ dxen chee̱ Xránadxu,
naꞌ da xiꞌaj gágudxu gun na bágadxu zria.
30 Chee̱ le̱ naꞌ benneꞌ zan ládujla leꞌe quebe chaweꞌ zaj zue̱ꞌ,
ne zaj nate niꞌa ne̱ꞌe̱,
naꞌ bal-la benneꞌ ládujla leꞌe ba gulatie̱ꞌ.
31 Che guxúe xanneꞌ cuínadxu,
quebe gun na ba xen guchiꞌa Xránadxu chee̱dxu caní.
32 Gate Xránadxu dxuchiꞌe̱ chee̱dxu,
dxudée̱ꞌ dxiꞌu xel-la ziꞌ chee̱ quebe cuía xidxu nen benneꞌ zaj zre̱ꞌe xe̱zr la xu nigá.
33 Caꞌ naca na,
bi bichaꞌ.
Gate dxezrágale chee̱ gágule da naca chee̱ Xránadxu,
le cueza ljwézrele tule xetule chee̱ bi gágule.
34 Che núlale dxedunle,
le gagu lu xuꞌu lízrquezle,
chee̱ quebe gun na ba xen guzría xiꞌ Dios leꞌe gate naꞌ nazrágale.
Xezícadxa da caꞌ dxelaca chee̱le gucáꞌanaꞌ chaweꞌ gate xidaꞌ xedajnnáꞌa leꞌe.