―Quegá gundxu na lu laní,

chee̱ quebe dxeꞌena zraga bénneache.

3 Zua Jesús lu xe̱zre Betania,

lu lizre tu benneꞌ le̱ꞌ Simón,

benneꞌ guzríe̱ꞌ we̱ꞌ guzruꞌ.

Dxácate̱ zaj dxeꞌe̱ dxelawe̱ꞌ naꞌ,

naꞌ bzrin tu nuꞌula nuꞌe̱ tu da dauꞌ da naca na xiaj xrtan da nazí le na alabastro,

ne nazrate̱ na da za da dxelá zixre chee̱ xiaj nardo,

da zácale̱ꞌe̱ na.

Naꞌ gulé̱ꞌe̱ da dauꞌ naꞌ,

ne blálaje̱ꞌ da za naꞌ xichaj Jesús.

4 Bal-la benneꞌ caꞌ,

benneꞌ zaj zre̱ꞌe̱ naꞌ,

belezré̱ꞌe̱,

naꞌ gulenné̱ꞌ,

dxelé̱ ljwezre̱ꞌ:

―¿Bizr chee̱ naꞌ be̱n ditaj nuꞌula nigá da za naꞌ?

5 Waca taꞌu da naꞌ chee̱ sídxadxu ca lázrujdxu chee̱ tu iza,

chee̱ gácale̱dxu benneꞌ xacheꞌ caꞌ.

Naꞌ guledil-le̱ꞌ nuꞌulaꞌ.

6 Naꞌ Jesús guzre̱ꞌ le̱ꞌ:

―Quebe xe̱le nuꞌula nigá caꞌ.

¿Bizr chee̱ naꞌ dxunle le̱ꞌ ze̱de?

Ca naca da be̱n nuꞌula nigá chiaꞌ nedaꞌ naca na da cháwele̱ꞌe̱.

7 Benneꞌ xacheꞌ caꞌ tu zrázqueze̱ꞌ ládujla leꞌe.

Waca gunle benneꞌ caꞌ chaweꞌ gate dxaca lázrele,

san nedaꞌ quegá tu súale̱zaꞌ leꞌe.

8 Nuꞌula nigá be̱ne̱ꞌ ca da guzéquene̱ꞌ,

guluꞌe̱ da za be̱l-laꞌ dxen chiaꞌ nédxula chee̱ zra gate gachiaꞌ lu xe̱dxu ba.

9 Da li dxapaꞌ leꞌe,

gátete̱ze naꞌ gaca lban chee̱ dizraꞌ chaweꞌ chiaꞌ lu xúgute̱ xe̱zre zaj nnita xe̱zr la xu nigá,

cáꞌanqueze zrálajqueze ca naca da be̱n nuꞌula nigá,

chee̱ xulusá lazre̱ꞌ chee̱ꞌ.

10 Nadxa Judas Iscariote,

tu benneꞌ chazrinnu caꞌ dxuse̱de Jesús,

guxíaje̱ꞌ xeajchálajle̱ne̱ꞌ benneꞌ xíchaje̱ caꞌ chee̱ bxruze caꞌ chee̱ xelexegáꞌane̱ꞌ dizraꞌ ájala gune̱ꞌ gudée̱ꞌ Jesús lu naꞌ benneꞌ caꞌ.

11 Ca belén benneꞌ caꞌ ca gunná Judas,

gulebéle̱ꞌe̱ne̱ꞌ,

naꞌ guleche̱be lazre̱ꞌ xulunézruje̱ꞌ le̱ꞌ dumí.

Nadxa Judas guzú lawe̱ꞌ dxexílaje̱ꞌ ájala gudée̱ꞌ Jesús lu naꞌ benneꞌ caꞌ.

12 Zra nedxu chee̱ laní gate dxelawe̱ꞌ xeta xtila da quebe nachixre cua zichaj chee̱ na,

ne dxelutie̱ꞌ zrílaꞌdauꞌ chee̱ Laní Pascua,

gate naꞌ dxulusá lazre̱ꞌ ca guca gate bebéaj Dios benneꞌ Israel caꞌ lu xe̱zr la xu Egipto,

naꞌ benneꞌ caꞌ dxuse̱de Jesús buluche̱be̱ꞌ Le̱ꞌ:

―¿Gazra dxaca lazruꞌ chéajntuꞌ cheajcuézentuꞌ da gágudxu Laní Pascua?

13 Nadxa Jesús gusel-le̱ꞌ chupa benneꞌ caꞌ dxusé̱dene̱ꞌ.

Dxe̱ꞌe̱ le̱ꞌ:

―Le chjaca lu xe̱zre Jerusalén,

naꞌ cheajxrácale tu benneꞌ biu ze nuꞌe̱ tu dxeꞌe nisa.

Le chjácale̱ne̱ꞌ,

14 naꞌ naga xexuꞌe̱,

xe̱le benneꞌ xrane xuꞌu naꞌ:

“Benneꞌ Wese̱de chee̱dxu dxenné̱ꞌ:

¿Gazra zua xuꞌu naga gunaꞌ Laní Pascua,

chee̱ gawaꞌ tu zren nen benneꞌ caꞌ dxusé̱dedaꞌ?”

15 Nadxa guléꞌene̱ꞌ leꞌe tu xuꞌu zren da naca na gudxupeꞌ cuía sibe da bache nabeza na.

Naꞌ gucuézale da gágudxu.

16 Nadxa benneꞌ caꞌ dxusé̱dene̱ꞌ belexedxúaje̱ꞌ gusáꞌaque̱ꞌ,

naꞌ belezrine̱ꞌ xe̱zre Jerusalén.

Naꞌ guca xúgute̱ ca da ba guzre Jesús le̱ꞌ,

naꞌ bulucueze̱ꞌ da xelawe̱ꞌ lu Laní Pascua.

17 Ca gula chizrela,

naꞌ bzrin Jesús nen benneꞌ chazrinnu caꞌ dxusé̱dene̱ꞌ.

18 Naꞌ ca zaj dxeꞌe̱ dxelawe̱ꞌ,

naꞌ gunná Jesús,

dxe̱ꞌe̱ le̱ꞌ:

―Da li dxapaꞌ leꞌe,

tu benneꞌ ládujla leꞌe,

benneꞌ dxawe̱ꞌ tu zren nen nedaꞌ,

gudée̱ꞌ nedaꞌ lu naꞌ benneꞌ caꞌ dxeledábague̱ꞌ nedaꞌ.

19 Nadxa benneꞌ caꞌ gulezúa xácheze̱ꞌ,

ne gulezú lawe̱ꞌ dxuluche̱be̱ꞌ Jesús tu tue̱ꞌ:

―¿Nedaꞌ xcaꞌ?

Naꞌ xetúe̱ꞌ cáꞌanqueze guzre̱ꞌ Le̱ꞌ:

―¿Nedaꞌ xcaꞌ?

20 Nadxa beche̱be Jesús,

dxe̱ꞌe̱ le̱ꞌ:

―Tu benneꞌ ládujla leꞌe chazrínnule,

benneꞌ dxawe̱ꞌ tu zren nen nedaꞌ lu xéꞌena nigá.

21 Da li gatiaꞌ nedaꞌ,

Benneꞌ Gulje̱ꞌ Bénneache,

ca da naxúaj na chiaꞌ lu xiche chee̱ Dios.

Baxacheꞌ naca chee̱ benneꞌ naꞌ gudée̱ꞌ nedaꞌ lu naꞌ benneꞌ caꞌ dxeledábague̱ꞌ nedaꞌ.

Cháwedxa gaca chee̱ bénneaꞌ la ca gúlaje̱ꞌ.

22 Dxácate̱ zaj zre̱ꞌe̱ dxelawe̱ꞌ,

naꞌ gucáꞌa Jesús xeta xtila,

ne guzre̱ꞌ Dios:

“Xcalenuꞌ.”

Ca gudé bzúzruje̱ꞌ na,

naꞌ bnézruje̱ꞌ na chee̱ benneꞌ caꞌ,

ne guzre̱ꞌ le̱ꞌ:

―Le gagu na.

Da nigá dxuléꞌe na ca gaca chee̱ be̱l-laꞌ dxen chiaꞌ.

23 Nadxa guqué̱ꞌe̱ tu da dxéꞌajdxu,

ne ca gudé guzre̱ꞌ Dios:

“Xcalenuꞌ”,

naꞌ bnézruje̱ꞌ na benneꞌ caꞌ,

naꞌ xúgute̱ꞌ guléꞌaje̱ꞌ lateꞌ weaj da naꞌ.

24 Nadxa Jesús guzre̱ꞌ le̱ꞌ:

―Da nigá zéaje̱ na dxen chiaꞌ da dxucáꞌana chawe na xel-la wezría cube.

Dxen chiaꞌ nigá lalaj na ne̱ chee̱ benneꞌ zan.

25 Da li dxapaꞌ leꞌe,

québedxa xíꞌajaꞌ xrise uva caní ca zrindxa zra gate naꞌ xíꞌajaꞌ da cube naga dxenná bea Dios xabáa.

26 Ca gudé belul-le̱ꞌ da gaca ba Dios,

naꞌ belegüene̱ꞌ lu Xiꞌa Xaga Olivo Caꞌ.

27 Nadxa gunná Jesús,

dxe̱ꞌe̱ le̱ꞌ:

―Xúgute̱le leꞌe gusán lázrele nedaꞌ naꞌa xe̱la laweꞌ da naxúaj na lu xiche chee̱ Dios,

dxenné̱ꞌ:

“Gutiaꞌ benneꞌ dxuxúe̱ꞌ zrilaꞌ caꞌ,

naꞌ zrilaꞌ caꞌ welase dínnajbaꞌ.”

28 Gate te xebanaꞌ lu xe̱dxu ba,

wexáꞌa nedaꞌ nédxula ca leꞌe naga nababa Galilea.

29 Nadxa Pedro guzre̱ꞌ Jesús:

―Láqueze xúgute̱ benneꞌ caní xulusán lazre̱ꞌ Lueꞌ,

nedaꞌ québequeze gunaꞌ caꞌ.

30 Jesús guzre̱ꞌ le̱ꞌ:

―Da li dxapaꞌ lueꞌ,

lu xe̱la nigaze,

nédxula ca za cuezre xjeaj chupa lasa,

nnauꞌ chunna lasa quebe núnbeꞌu nedaꞌ.

31 Naꞌ dxennáqueze Pedro naꞌ,

gunné̱ꞌ:

―Láqueze gatiaꞌ tu zren nen Lueꞌ,

québequeze nniaꞌ quebe núnbeꞌa Lueꞌ.

Cáꞌanqueze gulenná xúgute̱ꞌ.

32 Nadxa belezrine̱ꞌ tu lataj naga nazí le na Getsemaní,

naꞌ gunná Jesús,

dxe̱ꞌe̱ benneꞌ caꞌ dxusé̱dene̱ꞌ:

―Le cueza nigá dxácate̱ chaꞌa cheajchálajle̱naꞌ Dios.

33 Nadxa Jesús guché̱ꞌe̱ Pedro,

ne Jacobo,

ne Juan,

naꞌ guzú lau dxezúa xácheꞌle̱ꞌe̱.

34 Naꞌ dxe̱ꞌe̱ benneꞌ caꞌ,

dxenné̱ꞌ:

―Ba dxunte̱ na watiaꞌ laweꞌ da zua xácheꞌle̱ꞌa.

Le xegáꞌana leꞌe nigá,

ne le sua ban lazreꞌ.

35 Nadxa Jesús guzé̱ꞌe̱ zéaje̱ꞌ xelateꞌ ca naꞌla,

naꞌ guzúe̱ꞌ sudxúꞌala,

gunabe̱ꞌ Dios che gaca,

quebe tée̱ꞌ xel-la ziꞌ ca da dxal-laꞌ saque̱ꞌ lu zra naꞌ.

36 Ca dxuchálajle̱ne̱ꞌ Dios naꞌ,

gunné̱ꞌ:

―Xrae,

xúgute̱ wazéquenuꞌ Lueꞌ.

Bselá nedaꞌ chee̱ quebe saca ziꞌa lu da caní.

Quebe gaca ca dxaca lázrezaꞌ nedaꞌ,

san ca dxaca lazruꞌ Lueꞌ gaca na.

37 Nadxa bezrine̱ꞌ naga zaj zraꞌ benneꞌ caꞌan dxusé̱dene̱ꞌ,

ne xeajxraque̱ꞌ le̱ꞌ dxelásie̱ꞌ.

Naꞌ Jesús guzreꞌ Pedro:

―Simón,

¿dxásequezuꞌ nigá?

¿Quebe guzéquenuꞌ gusebán lazruꞌ tu chíꞌidauꞌze?

38 Le sua ban lazreꞌ,

ne le guchálajle̱ Dios chee̱ quebe gun zréaje da xriwe̱ꞌ leꞌe.

Da li,

lu xichaj lázrdaule dxaca lázrele gunle da xrlátaje,

san lu be̱laꞌ dxen chee̱le dxate niꞌa naꞌle.

39 Nadxa Jesús guxíaje̱ꞌ da xula zeajchálajle̱ne̱ꞌ Dios,

naꞌ tuze ca dxenné̱ꞌ.

40 Nadxa ca bezrine̱ꞌ,

xecha lasa xeajxraque̱ꞌ benneꞌ caꞌan dxusé̱dene̱ꞌ,

dxelásie̱ꞌ laweꞌ da xuꞌu bchigala xiaj lawe̱ꞌ.

Benneꞌ caní quebe belexezrela lazre̱ꞌ bi xelé̱ꞌe̱ Le̱ꞌ.

41 Naꞌ ca bezrín Jesús da guxunneꞌ lasa,

naꞌ guzre̱ꞌ benneꞌ caꞌ:

―¡Le gase naꞌa,

ne le xezíꞌ lázreꞌ!

¡Bache na!

¡Ba bzrin zra teaꞌ nedaꞌ,

Benneꞌ Gulje̱ꞌ Bénneache,

lu naꞌ benneꞌ dul-la caꞌ!

42 ¡Le chasa!

¡Le chuꞌu naꞌa!

¡Ba za benneꞌ gudée̱ꞌ nedaꞌ lu naꞌ benneꞌ caꞌ dxeledábague̱ꞌ nedaꞌ!

43 Dxácate̱ dxuchalaj Jesús caní,

naꞌ bzrin Judas,

tu benneꞌ nabábale̱ne̱ꞌ benneꞌ chazrinnu caꞌ dxuse̱de Jesús,

naꞌ zjácale̱ benneꞌ zan le̱ꞌ,

zaj nuꞌe̱ xia nalá,

ne xaga caꞌ.

Zaj naque̱ꞌ benneꞌ gulesel-la benneꞌ xíchaje̱ caꞌ chee̱ bxruze caꞌ,

ne benneꞌ caꞌ dxuluxuzájle̱ꞌe̱ da nadxixruj bea Dios,

ne benneꞌ gula sina caꞌ.

44 Judas,

benneꞌ dxudée̱ꞌ Jesús lu naꞌ benneꞌ caꞌ dxeledábague̱ꞌ Le̱ꞌ,

ba bléꞌene̱ꞌ benneꞌ caꞌ tu da gune̱ꞌ da gaca bea na nule̱ꞌ naca Jesús,

gunné̱ꞌ:

―Bénneaꞌ gunupaꞌ,

benneꞌ naꞌ qué̱l-lale.

Le xeché̱ꞌe̱,

ne le guxúe xanneꞌ chee̱ quebe xelé̱ꞌ.

45 Naꞌ ca bzrine̱ꞌ naꞌ,

gubigue̱ꞌ lau Jesús,

ne dxe̱ꞌe̱ Le̱ꞌ:

―Benneꞌ Wese̱de.

Naꞌ bnupe̱ꞌ Le̱ꞌ.

46 Nadxa benneꞌ caꞌ gule̱l-le̱ꞌ Jesús,

ne belexeché̱ꞌe̱ Le̱ꞌ ba nadxéaje̱ꞌ.

47 Tu benneꞌ dxune̱ꞌ Jesús tu zren guléaje̱ꞌ xia nalá chee̱ꞌ,

naꞌ guchugue̱ꞌ naga tu bi we̱n zrin chee̱ bxruze blau.

48 Nadxa Jesús guzre̱ꞌ benneꞌ caꞌ:

―¿Bdxuajle leꞌe zale nen xia nalá,

ne xaga caꞌ chee̱ qué̱l-lale nedaꞌ,

dxugúnele nedaꞌ ca tu benneꞌ gubán?

49 Xúgute̱ zra guzúaꞌ nedaꞌ ládujla leꞌe dxusé̱dedaꞌ leꞌe lu xudauꞌ,

naꞌ cabataꞌ gudé̱l-lale nedaꞌ.

Da nigá dxaca na chee̱ gaca li ca da naxúaj na lu xiche chee̱ Dios.

50 Nadxa xúgute̱ benneꞌ caꞌ dxuse̱de Jesús bulusán lazre̱ꞌ Le̱ꞌ.

Buluzrúnnuje̱ꞌ.

51 Tu bi cuideꞌ,

bi zéajle̱beꞌ Jesús,

ne nácubeꞌ tu ladxeꞌ laga,

gule̱l-la benneꞌ caꞌ le̱beꞌ.

52 Naꞌ bsanbeꞌ ladxeꞌ laga da nácubeꞌ,

naꞌ bzrúnnujbeꞌ gala xídezebeꞌ.

53 Nadxa beleché̱ꞌe̱ Jesús lau bxruze blau,

naꞌ belezraga xúgute̱ benneꞌ xíchaje̱ caꞌ chee̱ bxruze caꞌ ga naꞌ,

ne benneꞌ gula sina caꞌ,

ne benneꞌ caꞌ dxuluxuzájle̱ꞌe̱ da nadxixruj bea Dios.

54 Pedro nawe̱ꞌ Jesús zítuꞌla,

naꞌ bzrine̱ꞌ chaleꞌaj chee̱ lizre bxruze blau,

naga begáꞌane̱ꞌ tu zren nen zruza niꞌa naꞌ benneꞌ xuꞌu laweꞌ caꞌ,

dxuluxuché̱ꞌe̱ dxuꞌa xiꞌ.

55 Naꞌ bxruze blau,

ne xúgute̱ benneꞌ chee̱ xuꞌu laweꞌ blau chee̱ judío caꞌ gulíl-laje̱ꞌ tu da gagu na zria Jesús chee̱ xelezéquene̱ꞌ xuluzría xiꞌe̱ Le̱ꞌ chee̱ gatie̱ꞌ,

naꞌ quebe bi belezrélene̱ꞌ.

56 Benneꞌ zante̱ belún lazre̱ꞌ chee̱ Jesús.

Quebe bedxúaj dizraꞌ chee̱ꞌ tuze ca dxelenné̱ꞌ tue̱ꞌ ne xetúe̱ꞌ.

57 Bal-le̱ꞌ belase̱ꞌ,

naꞌ gulagu zría Jesús da we̱n lazreꞌ,

dxelenné̱ꞌ:

58 ―Netuꞌ ba bénnentuꞌ chee̱ꞌ,

gunné̱ꞌ:

“Nedaꞌ guchínnajaꞌ xudauꞌ nigá da belún bénneache,

naꞌ ca gaca chunna zra xechisaꞌ xetú xudauꞌ da quebe xelún bénneache.”

59 Cáꞌanqueze quebe butil-le ca da dxelenné̱ꞌ.

60 Nadxa bxruze blau guxase̱ꞌ ládujla xúgute̱ benneꞌ caꞌ,

naꞌ bche̱be̱ꞌ Jesús:

―¿Québequeze bi dizraꞌ dxuxuzriꞌu Lueꞌ?

¿Bizra da nigá dxelenné̱ꞌ chiuꞌ Lueꞌ?

61 Jesús guzúe̱ꞌ zrize,

ne gútuqueze bi dizraꞌ buzriꞌe̱.

Naꞌ bxruze blau bche̱be̱ꞌ Le̱ꞌ xecha lasa,

dxenné̱ꞌ:

―¿Nacuꞌ Lueꞌ Cristo,

Zriꞌine Dios Láꞌazxa?

62 Naꞌ gunná Jesús,

dxe̱ꞌe̱ le̱ꞌ:

―Aweꞌ,

caꞌ nacaꞌ.

Waléꞌele nedaꞌ,

Benneꞌ Gulje̱ꞌ Bénneache,

dxeꞌa chaláꞌa xabe̱la chee̱ Dios,

nape̱ꞌ dute̱ xel-la waca.

Waléꞌele nedaꞌ zezáꞌa lu beuj bza.

63 Nadxa bxruze blau gucheze̱ꞌ zra lane̱ꞌ,

naꞌ gunné̱ꞌ:

―¿Núzradxa nachínedxu benneꞌ xelagu zria Le̱ꞌ?

64 Leꞌe bache bénquezle ca dxenné̱ꞌ schanniꞌ chee̱ Dios.

¿Bi dxennale leꞌe xcaꞌ?

Xúgute̱ benneꞌ caꞌ gulenné̱ꞌ:

―Nabía xiꞌe̱ dxal-la gatie̱ꞌ.

65 Nadxa bal-la benneꞌ caꞌ gulezú lawe̱ꞌ dxuluzré̱ꞌe̱ Le̱ꞌ zrene̱ꞌ,

naꞌ bulucache̱ꞌ lau Jesús,

ne buluzálaje̱ꞌ Le̱ꞌ.

Dxelenné̱ꞌ:

―Gunné̱ xaꞌa nuzra dxue Lueꞌ.

Naꞌ benneꞌ zruza niꞌa naꞌ benneꞌ xuꞌu laweꞌ belúꞌe̱ lau Jesús.

66 Pedro guzúe̱ꞌ lu chaleꞌaj zrila,

naꞌ bzrin tu nuꞌula we̱n zrin chee̱ bxruze blau,

67 naꞌ ca bleꞌebeꞌ Pedro dxeꞌe̱ dxuꞌa xiꞌ dxuxuchéꞌe̱,

naꞌ gunnáꞌabeꞌ le̱ꞌ,

ne gúzrebeꞌ le̱ꞌ:

―Lueꞌ dxedále̱quezuꞌ Jesús,

benneꞌ Nazaret naꞌ.

68 Naꞌ beche̱be Pedro,

dxenné̱ꞌ:

―Quebe núnbeꞌa bénneaꞌ,

ne quebe nezdaꞌ nu chee̱ naꞌ dxuchálajuꞌ.

Naꞌ bedxúaj Pedro chaleꞌaj naga dxeluꞌe̱.

Nadxa gudxezre xjeaj.

69 Nadxa nuꞌula we̱n zrin chee̱ bxruze blau naꞌ gunnáꞌabeꞌ Pedro xecha lasa,

naꞌ gunabeꞌ,

dxe̱ꞌe̱beꞌ benneꞌ caꞌ zaj zre̱ꞌe̱ naꞌ:

―Benneꞌ nigá naque̱ꞌ tuze benneꞌ caꞌan.

70 Pedro xecha lasa bzue̱ꞌ Jesús chaláꞌala.

Xetú chíꞌidauꞌ benneꞌ caꞌ zaj zre̱ꞌe̱ naꞌ gulé̱ꞌe̱ Pedro xecha lasa:

―Da líqueze lueꞌ nacuꞌ tuze benneꞌ caꞌan laweꞌ da nacuꞌ benneꞌ chee̱ xe̱zre caꞌ zaj nababa Galilea.

Ca dxuchálajuꞌ naca bea na da naꞌ.

71 Nadxa Pedro guzú lawe̱ꞌ dxuzría xiꞌ cuine̱ꞌ,

ne be̱n chúchue̱ꞌ xrtizre̱ꞌ,

gunné̱ꞌ:

―Quebe núnbeꞌa bénneaꞌ dxennale leꞌe caꞌ.

72 Caꞌan guca,

gudxezre xjeaj da gudxupeꞌ lasa.

Nadxa Pedro xeajsá lazre̱ꞌ ca da guzre Jesús le̱ꞌ,

gunné̱ꞌ:

“Nédxudxa ca za cuezre xjeaj chupa lasa,

lueꞌ nnauꞌ chunna lasa quebe núnbeꞌu nedaꞌ.”

Naꞌ ca xeajsá lazre̱ꞌ da nigá,

gudxézrele̱ꞌe̱.