2 Pilato gunábene̱ꞌ Jesús:

―¿Nacuꞌ Lueꞌ wenná bea chee̱ judío caꞌ?

Naꞌ beche̱be Jesús:

―Caꞌ naca na,

ca ba gunnáuꞌ lueꞌ.

3 Naꞌ benneꞌ xíchaje̱ caꞌ chee̱ bxruze caꞌ gulawe̱ꞌ zria Jesús da zante̱.

4 Nadxa Pilato gunábene̱ꞌ Jesús xecha lasa:

―¿Quebe bi dizraꞌ dxuzriꞌu?

Gunnáꞌxque ca da zánete̱ da dxelawe̱ꞌ zria Lueꞌ.

5 Jesús quebe bi dizraꞌ ca buzriꞌe̱.

Caꞌ guca,

bebánele̱ꞌe̱ Pilato.

6 Pilato zua tu da dxúnqueze̱ꞌ tu iza tu iza gate dxaca Laní Pascua.

Dxusane̱ꞌ tu benneꞌ xuꞌe̱ lizre xia,

nútete̱ze benneꞌ xelenaba bénneache caꞌ le̱ꞌ.

7 Lu xuꞌu lizre xia naꞌ xuꞌu tu benneꞌ le̱ꞌ Barrabás,

benneꞌ nune̱ꞌ tu zren benneꞌ caꞌ belutie̱ꞌ benneꞌ caꞌ,

gate naꞌ gudíl-lale̱ne̱ꞌ benneꞌ Roma caꞌ.

8 Naꞌ belezrín lau Pilato benneꞌ xe̱zre caꞌ,

ne gulezú lawe̱ꞌ dxelenabe̱ꞌ lau Pilato gune̱ꞌ ca dxúnqueze̱ꞌ.

9 Naꞌ beche̱be Pilato:

―¿Dxaca lázrele leꞌe gusanaꞌ bénneaꞌ naque̱ꞌ wenná bea chee̱ judío caꞌ?

10 Caní gunná Pilato laweꞌ da dxeque beꞌene̱ꞌ buludée̱ꞌ benneꞌ xíchaje̱ caꞌ chee̱ bxruze caꞌ Jesús lu ne̱ꞌe̱ laweꞌ da dxelaque̱ꞌ zreꞌe lazreꞌ Le̱ꞌ.

11 Naꞌ benneꞌ xíchaje̱ caꞌ chee̱ bxruze caꞌ beleché̱ꞌe̱ benneꞌ xe̱zre caꞌ,

ne gulegúꞌu xel-le̱ꞌ le̱ꞌ chee̱ xelexenabe̱ꞌ lau Pilato gusane̱ꞌ Barrabás.

12 Nadxa Pilato gunábene̱ꞌ benneꞌ caꞌ:

―¿Bi dxaca lázrele leꞌe gunaꞌ chee̱ bénneaꞌ naque̱ꞌ wenná bea chee̱ judío caꞌ?

13 Nadxa belexeche̱be̱ꞌ,

gulenné̱ꞌ zizraj:

―Bde̱ꞌe̱ xaga béguaj.

14 Naꞌ Pilato bche̱be̱ꞌ benneꞌ caꞌ:

―¿Bizra da cale̱la nun benne?

Xecha lasa gulenné̱ꞌ zizraj:

―Bde̱ꞌe̱ xaga béguaj.

15 Nadxa Pilato bsane̱ꞌ Barrabás laweꞌ da dxaca lazre̱ꞌ xegáꞌane̱ꞌ chaweꞌ nen benneꞌ xe̱zre caꞌ.

Naꞌ ca gudé naꞌ bsebague̱ꞌ benneꞌ caꞌ xeline̱ꞌ Jesús tu xide,

naꞌ bdee̱ꞌ Le̱ꞌ lu naꞌ benneꞌ caꞌ chee̱ xuludé̱ꞌe̱ Le̱ꞌ xaga béguaj.

16 Nadxa benneꞌ dxjaque̱ꞌ wedil-la guleché̱ꞌe̱ Jesús lu chaleꞌaj xuꞌu laweꞌ,

naꞌ bulutupe̱ꞌ xúgute̱ ljwezreꞌ benneꞌ dxjaque̱ꞌ wedil-la lataj naꞌ.

17 Naꞌ bulugácue̱ꞌ Jesús tu ladxeꞌ bzawe,

ne buluzríe̱ꞌ xíchaje̱ꞌ tu da zaj nune̱ꞌ nen zruze xaga xecheꞌ.

18 Nadxa gulezú lawe̱ꞌ dxelenné̱ꞌ zizraj:

―¡Gaca ba wenná bea chee̱ judío caꞌ!

19 Naꞌ belúꞌe̱ xichaj Jesús nen tu xia xtila,

ne buluzré̱ꞌe̱ Le̱ꞌ zrene̱ꞌ.

Naꞌ buluzú zribe̱ꞌ lawe̱ꞌ,

dxelape̱ꞌ Le̱ꞌ ba láꞌana.

20 Ca gudé bulucáꞌana dítaje̱ꞌ Le̱ꞌ caní,

naꞌ belexeguꞌe̱ ladxeꞌ bzawe,

naꞌ buluxugácue̱ꞌ Le̱ꞌ zra láꞌanaqueze̱ꞌ.

Nadxa belexebéaje̱ꞌ Le̱ꞌ chee̱ chjaque̱ꞌ naga xuludé̱ꞌe̱ Le̱ꞌ xaga béguaj.

21 Tu benneꞌ chee̱ xe̱zre Cirene le̱ꞌ Simón,

xra Alejandro,

ne Rufo,

zezé̱ꞌe̱ le̱ꞌe̱ xixreꞌ,

naꞌ ca bedée̱ꞌ naꞌ,

naꞌ bulusebague̱ꞌ le̱ꞌ guꞌe̱ xaga béguaj chee̱ Jesús.

22 Guleché̱ꞌe̱ Jesús tu lataj nazí le na Gólgota,

da zéaje̱ na “Lataj Chee̱ Zrita Xichaj Benneꞌ Gate.”

23 Nadxa bulunézruje̱ꞌ Jesús xrise uva wal-la da nachixre da slaꞌ chee̱ mirra.

Jesús quebe guꞌe̱ na.

24 Nadxa buludé̱ꞌe̱ Le̱ꞌ xaga béguaj,

naꞌ benneꞌ dxjaque̱ꞌ wedil-la gulebéaje̱ꞌ da guléꞌe na nule̱ꞌ xelexale̱ꞌ zra lana Jesús,

naꞌ bila xelexúa tu tue̱ꞌ.

25 Guca che zílala gate naꞌ buludé̱ꞌe̱ Jesús xaga béguaj.

26 Buludé̱ꞌe̱ da naxúaj xichaj xaga béguaj chee̱ Jesús da dxuléꞌe na da nabague̱ꞌ,

da naxúaj na caní:

“Wenná Bea Chee̱ Judío Caꞌ.”

27 Cuita Jesús buludé̱ꞌe̱ le̱ꞌe xaga béguaj caꞌ chupa benneꞌ gubán,

tue̱ꞌ chaláꞌa xabe̱la chee̱ꞌ,

ne xetúe̱ꞌ chaláꞌa xéglala chee̱ꞌ.

28 Caꞌan guca,

guca li ca da naxúaj na lu xiche chee̱ Dios naga dxenné̱ꞌ caní:

“Buluzue̱ꞌ Le̱ꞌ tu zren nen benneꞌ we̱n da zrinnaj caꞌ.”

29 Naꞌ benneꞌ dxeledée̱ꞌ naꞌ gulenné̱ꞌ schanniꞌ chee̱ Jesús,

ne buluté̱ꞌ xíchaje̱ꞌ,

dxelenné̱ꞌ:

―Aweꞌ.

Guchínnajuꞌ Lueꞌ xudauꞌ chee̱ntuꞌ,

naꞌ gate gaca chunna zra,

naꞌ xechisuꞌ na.

30 Bselá cuinuꞌ naꞌa,

ne bexetaj le̱ꞌe xaga béguaj naꞌ.

31 Cáꞌanqueze belún benneꞌ xíchaje̱ caꞌ chee̱ bxruze caꞌ,

ne benneꞌ dxuluxuzájle̱ꞌe̱ da nadxixruj bea Dios.

Belún le̱ꞌ chee̱ Jesús,

dxelé̱ꞌ ljwezre̱ꞌ:

―Benneꞌ xula bselá benne,

san Le̱ꞌ québequeze dxezéquene̱ꞌ guselá cuine̱ꞌ.

32 Lueꞌ,

Cristo,

wenná bea chee̱ benneꞌ Israel,

bexetaj le̱ꞌe̱ xaga béguaj naꞌ chee̱ leꞌentuꞌ,

naꞌ chéajle̱ntuꞌ chiuꞌ.

Cáꞌanqueze belún benneꞌ caꞌ zaj de̱ꞌe̱ le̱ꞌe xaga béguaj caꞌ tu zren nen Jesús,

gulenné̱ꞌ schanniꞌ chee̱ꞌ.

33 Ca bzrin wagubizra,

naꞌ guchul-la dute̱ lu xe̱zr la xu nigá tu chiꞌi wal-la gula.

34 Ca gudé naꞌ,

naꞌ gunná Jesús zizraj:

―Eloi,

Eloi,

¿lama sabactani?

Da nigá zéaje̱ na:

“Dios chiaꞌ,

Dios chiaꞌ,

¿bizr chee̱ naꞌ nusanuꞌ nedaꞌ?”

35 Bal-la benneꞌ caꞌ zaj zre̱ꞌe̱ naꞌ belenne̱ꞌ na,

naꞌ gulenné̱ꞌ:

―Le xene.

Dxenné̱ꞌ Elías,

bénneaꞌ bchálaje̱ꞌ waláz chee̱ Dios.

36 Nadxa tu benneꞌ guzá chégüe̱ꞌ,

naꞌ xeajláꞌawaje̱ꞌ lu xrise uva zichaj tu da dxezrupe na nisa,

naꞌ bzue̱ꞌ na laweꞌ tu xia xtila da bcuene̱ꞌ dxuꞌa Jesús chee̱ xiꞌaje̱ꞌ,

naꞌ gunná benneꞌ nigá:

―Cuézadxu.

Guxúexquedxu che wida Elías chee̱ xulétaje̱ꞌ Le̱ꞌ.

37 Nadxa Jesús gudxezre xe̱ꞌe̱,

naꞌ gútete̱ꞌ.

38 Ca náꞌqueze gudxeza ladxeꞌ da ze̱ lu xudauꞌ,

guca na chúpala.

Gucáꞌa na dxaꞌla,

bedxúajte̱ na zriꞌla.

39 Naꞌ benneꞌ dxenná beꞌe̱ lu wedil-la,

benneꞌ ze̱ꞌ lau Jesús,

gate naꞌ bléꞌene̱ꞌ ca gudxezre xe̱ꞌe̱,

ne ca guca gútete̱ꞌ,

naꞌ gunné̱ꞌ:

―Da líqueze benneꞌ nigá guque̱ꞌ Zriꞌine Dios.

40 Cáꞌanqueze zaj ze̱ naꞌ bal-la nuꞌula dxelenné̱ꞌe̱ zítuꞌla.

Ládujla nuꞌula caní zaj ze̱ María Magdalena,

ne Salomé,

ne María,

xrna Jacobo cuideꞌ ne José.

41 Nuꞌula caní gusáꞌacale̱ne̱ꞌ Jesús,

ne gulácale̱ne̱ꞌ Le̱ꞌ gate naꞌ gudé̱ꞌ naga nababa Galilea.

Cáꞌanqueze zaj ze̱ naꞌ zánedxa nuꞌula xula,

nuꞌula caꞌ belezrine̱ꞌ Jerusalén tu zren nen Jesús.

42-43 Ca za chizrela bzrin José,

benneꞌ Arimatea ga naꞌ.

Benneꞌ nigá naque̱ꞌ benneꞌ blau ládujla benneꞌ caꞌ chee̱ xuꞌu laweꞌ blau chee̱ judío caꞌ.

Cáꞌanqueze le̱ꞌ dxebeze̱ꞌ zra laꞌ Dios chee̱ nna beꞌe̱.

Laweꞌ da naca zra dxulucueze̱ꞌ,

zra nedxu chee̱ zra dxulupáꞌane̱ꞌ,

du lazre̱ꞌ guxúꞌe̱ lau Pilato,

naꞌ gunabe̱ꞌ siꞌe̱ lataj xexuꞌe̱ Jesús.

44 Bebánele̱ꞌe̱ Pilato ca bénnene̱ꞌ ba gute Jesús,

naꞌ gunné̱ꞌ benneꞌ dxenná beꞌe̱ lu wedil-la naꞌ chee̱ gunabe̱ꞌ che ba guca caꞌ.

45 Gate bénneaꞌ dxenná beꞌe̱ lu wedil-la gunné̱ꞌ caꞌan guca,

nadxa Pilato bnézruje̱ꞌ José lataj bexuꞌe̱ Jesús.

46 Nadxa José guziꞌe̱ tu ladxeꞌ xtila laga,

naꞌ bulétaje̱ꞌ Jesús,

ne bulazre̱ꞌ Le̱ꞌ ladxeꞌ xtila naꞌ.

Naꞌ gúxrue̱ꞌ Jesús tu lu ba da ba gude̱ne̱ꞌ le̱ꞌe̱ xiaj xre,

naꞌ bsézxuje̱ꞌ ba naꞌ nen tu xiaj zren.

47 María Magdalena,

ne María,

xrna José beleléꞌequezne̱ꞌ naga bulucache̱ꞌ Jesús.