19
Nadxa Pilato guqué̱ꞌe̱ Jesús,
naꞌ bdxixruj béꞌene̱ꞌ xeluꞌe̱ Le̱ꞌ xideꞌ.
2 Benneꞌ dxjaque̱ꞌ wedil-la buluzríe̱ꞌ xichaj Jesús tu daꞌ belune̱ꞌ zruze xaga xecheꞌ,
ne bulugácue̱ꞌ Le̱ꞌ tu ladxeꞌ bzawe.
Jesús condenado a muerte (Juan 19.1-16)
―¡Gaca ba lueꞌ,
wenná bea chee̱ judío caꞌ!
Nadxa belúꞌe̱ dxuꞌa lau Jesús.
4 Nadxa bdxuaj Pilato da xula,
ne guzre̱ꞌ benneꞌ caꞌ:
―¡Le nnaꞌxque!
Dxebéajaꞌ benneꞌ nigá chee̱ nézele quebe dxezreldaꞌ bi da zrinnaj nabague̱ꞌ.
5 Bdxuaj Jesús zria xíchaje̱ꞌ da naca zruze xaga xecheꞌ,
ne nacue̱ꞌ ladxeꞌ bzawe naꞌ.
Nadxa Pilato guzre̱ꞌ benneꞌ caꞌ:
―Nigá zua bénneaꞌ.
6 Gate benneꞌ xíchaje̱ caꞌ chee̱ bxruze caꞌ,
ne xraꞌaga we̱n zrin chee̱ꞌ caꞌ beleléꞌene̱ꞌ Jesús,
naꞌ gulezú lawe̱ꞌ dxelenné̱ꞌ zizraj:
―¡Bde̱ꞌe̱ xaga béguaj!
¡Bde̱ꞌe̱ xaga béguaj!
Pilato guzre̱ꞌ benneꞌ caꞌ:
―Le che̱ꞌe̱,
ne le gudé̱ꞌe̱ xaga béguaj léꞌequeze,
laweꞌ da quebe dxezreldaꞌ bi da zrinnaj nabague̱ꞌ.
7 Naꞌ benneꞌ judío caꞌ belexeche̱be̱ꞌ:
―Netuꞌ nápantuꞌ tu da nadxixruj bea na,
ne ca dxenná na dxal-laꞌ gatie̱ꞌ laweꞌ da dxun cuine̱ꞌ Zriꞌine Dios.
―¿Gazra benneꞌ Lueꞌ?
Quebe bi beche̱be Jesús.
10 Nadxa guzre Pilato Le̱ꞌ:
―¿Quebe dxexeche̱buꞌ chiaꞌ?
¿Quebe nézenuꞌ Lueꞌ napaꞌ nedaꞌ xel-laꞌ dxenná bea gudáꞌa Lueꞌ xaga béguaj,
ne napaꞌ xel-laꞌ dxenná bea gusanaꞌ Lueꞌ?
11 Beche̱be Jesús:
―Quebe bi xel-laꞌ dxenná bea napuꞌ bi gunuꞌ chiaꞌ chela ca be̱nna Dios lueꞌ xel-laꞌ dxenná bea nigá.
Chee̱ le̱ naꞌ,
bénneaꞌ bdee̱ꞌ nedaꞌ lu naꞌu dul-la zrendxa nabague̱ꞌ ca lueꞌ.
12 Lu zra naꞌte̱ gudilaj lazreꞌ Pilato ájala gune̱ꞌ gusane̱ꞌ Jesús,
san benneꞌ judío caꞌ gulenné̱ꞌ zizraj:
―Che gusanuꞌ benneꞌ nigá,
quebe nacuꞌ César tuze,
bénneaꞌ dxenná bea Roma.
Nu benneꞌ dxun cuine̱ꞌ wenná bea dxedábague̱ꞌ César.
13 Nadxa Pilato,
gate benne̱ꞌ da nigá,
bdxixruj béꞌene̱ꞌ xelexebéaje̱ꞌ Jesús,
naꞌ gudxéꞌe̱ lataj blau chee̱ꞌ,
da zua lataj naꞌ nazí le na Gabata nen dizraꞌ hebreo,
da zéaje̱ na chaleꞌaj xiaj taꞌa.
14 Naca na zra za zrin Laní Pascua,
ca du wagubizra.
Nadxa Pilato guzre̱ꞌ benneꞌ judío caꞌ:
―Nigá zua wenná bea chee̱le.
15 Naꞌ benneꞌ caꞌ gulenné̱ꞌ zizraj:
―¡Gatie̱ꞌ!
¡Gatie̱ꞌ!
¡Bde̱ꞌe̱ xaga béguaj!
Pilato guzre̱ꞌ benneꞌ caꞌ:
―¿Gudáꞌa wenná bea chee̱le xaga béguaj?
Belexeche̱be benneꞌ xíchaje̱ caꞌ chee̱ bxruze caꞌ:
―Netuꞌ zua tuze wenná bea chee̱ntuꞌ.
¡César!
16 Nadxa Pilato bdee̱ꞌ Jesús lu naꞌ benneꞌ caꞌ chee̱ te̱ꞌe̱ xaga béguaj,
naꞌ guleché̱ꞌe̱ Jesús.
La crucifixión (Juan 19.17-37)
Jesús dxedé̱ꞌe̱ xaga béguaj
17 Naꞌ bdxuaj Jesús nuꞌe̱ xaga béguaj chee̱ chéaje̱ꞌ lataj naꞌ nazí le na Zrita Xichaj Benneꞌ Gate,
naꞌ nen dizraꞌ hebreo nazí le na Gólgota.
18 Buludé̱ꞌe̱ Jesús xaga béguaj lataj naꞌ,
naꞌ tu zren nen Jesús buludé̱ꞌe̱ xechupa benneꞌ xaga béguaj caꞌ chaláꞌa weaj naga daꞌ Jesús.
19 Pilato bdxixruj béꞌene̱ꞌ buluzúe̱ꞌ le̱ꞌe xaga béguaj xichaj Jesús da dxenná na:
Jesús,
Benneꞌ Nazaret,
Wenná Bea Chee̱ Judío Caꞌ.
20 Zaneꞌ benneꞌ judío caꞌ bululabe̱ꞌ da naꞌ laweꞌ da zua lataj naꞌ naga buludé̱ꞌe̱ Jesús xaga béguaj gáguze naga dxeꞌ xe̱zre naꞌ,
naꞌ da naꞌ naxúaj na nen dizraꞌ hebreo,
ne nen dizraꞌ griego,
ne nen dizraꞌ latín.
21 Chee̱ le̱ naꞌ benneꞌ xíchaje̱ caꞌ chee̱ bxruze chee̱ judío caꞌ gulé̱ꞌe̱ Pilato:
―Quebe guzúajuꞌ na:
Wenná Bea Chee̱ Judío Caꞌ.
Bzuaj na:
Le̱ꞌ Gunné̱ꞌ Naque̱ꞌ Wenná Bea Chee̱ Judío Caꞌ.
22 Beche̱be Pilato:
―Da bzuajaꞌ,
ba naxúajqueze na.
23 Ca gudé buludáꞌ benneꞌ dxjaque̱ꞌ wedil-la Jesús xaga béguaj,
naꞌ belexequé̱ꞌe̱ zra lane̱ꞌ,
ne belebeque̱ꞌ na tapa cueꞌ,
tu cueꞌ weaj chee̱ tu tu benneꞌ dxjaque̱ꞌ wedil-la.
Belecáꞌaqueze̱ꞌ ladxeꞌ dxexrúa cuzre̱ꞌ da quebe nadía na.
Tu ca nácheze na.
24 Chee̱ le̱ naꞌ benneꞌ dxjaque̱ꞌ wedil-la gulé̱ ljwezre̱ꞌ:
―Quebe chézadxu na.
Cwéajdxu da gunna bea na chee̱ laꞌ nu xala le̱ na.
Caꞌan guca,
guca li da naxúaj na lu xiche chee̱ Dios,
da dxenná na:
Belexelé̱ꞌe̱ zra lanaꞌ,
ne guléaje̱ꞌ da gunna bea na chee̱ le̱ na.
Caní belún benneꞌ dxjaque̱ꞌ wedil-la.
25 Gáguze naga zua xaga béguaj chee̱ Jesús ze̱ xrna Jesús nen bi bila xrne̱ꞌe̱,
ne María,
zruꞌula Cleofas,
ne María Magdalena.
26 Gate bleꞌe Jesús xrne̱ꞌe̱,
ne cuita xrne̱ꞌe̱ naꞌ ze̱ Juan,
benneꞌ bse̱de Jesús,
bénneaꞌ nazriꞌidxe̱ꞌ,
naꞌ guzre̱ꞌ xrne̱ꞌe̱:
―Núꞌuladauꞌ,
naꞌ ze̱ zriꞌinuꞌ.
27 Nadxa guzre Jesús bénneaꞌ:
―Naꞌ ze̱ xrnaꞌu.
Zra naꞌte̱ benneꞌ nigá beche̱ꞌe̱ nuꞌula naꞌ lizre̱ꞌ.
Dxate Jesús
28 Ca gudé gunná Jesús da nigá,
laweꞌ da nézene̱ꞌ xúgute̱ na ba guca li,
ne chee̱ guca li ca naxúaj na lu xiche chee̱ Dios,
gunné̱ꞌ:
―Dxebíledaꞌ.
29 Zua naꞌ tu dxeꞌe nupe zichaj,
naꞌ bulusubise̱ꞌ tu da dxezrupe na nupe zichaj naꞌ,
ne buluzúe̱ꞌ na laweꞌ tu xia tunna,
naꞌ buluzúe̱ꞌ na dxuꞌa Jesús.
30 Naꞌ Jesús guzrupe̱ꞌ nupe zichaj naꞌ,
naꞌ gunné̱ꞌ:
―Ba guca li ca naca na.
Nadxa bse dxuꞌa xíchaje̱ꞌ,
gutie̱ꞌ.
Tu benneꞌ dxeje̱ꞌ wedil-la dxechizie̱ꞌ xia lachúꞌu Jesús
31 Naca na zra za zrin Laní Pascua,
naꞌ judío caꞌ quebe gulaca lazre̱ꞌ xelexegáꞌana benneꞌ caꞌ le̱ꞌe̱ xaga béguaj caꞌ lu zra dxulupáꞌane̱ꞌ laweꞌ da naca zra naꞌ tu zra blau.
Chee̱ le̱ naꞌ gulenabe̱ꞌ lau Pilato dxixruj béꞌene̱ꞌ xelíchaje̱ꞌ niꞌa benneꞌ caꞌ zaj de̱ꞌe̱ xaga béguaj caꞌ,
ne xelexequé̱ꞌe̱ le̱ꞌ le̱ꞌe̱ xaga béguaj caꞌ.
32 Nadxa tu benneꞌ caꞌ dxjaque̱ꞌ wedil-la gudíchaje̱ꞌ niꞌa benneꞌ nedxu naꞌ,
ne cáꞌanqueze chee̱ benneꞌ xetú de̱ꞌe̱ cuita Jesús.
33 Gate bzrine̱ꞌ naga daꞌ Jesús,
bléꞌene̱ꞌ ba gutie̱ꞌ,
naꞌ chee̱ le̱ naꞌ quebe gudíchaje̱ꞌ niꞌe̱.
34 Tu benneꞌ caꞌ dxjaque̱ꞌ wedil-la guchízie̱ꞌ xia chee̱ꞌ lachúꞌu Jesús,
naꞌ bdxuaj dxen,
ne nisa naꞌ.
35 Benneꞌ dxuchalaj da nigá naque̱ꞌ benneꞌ bléꞌene̱ꞌ na,
ne dxuchálaje̱ꞌ da li,
ne nézene̱ꞌ dxenné̱ꞌ da li,
chee̱ cáꞌanqueze leꞌe chéajle̱le chee̱ Jesús.
36 Da caní guca na chee̱ guca li ca da naxúaj na lu xiche chee̱ Dios,
da dxenná na:
Quebe gulíchaje̱ꞌ netú zrita chee̱ꞌ.
37 Xetú da naxúaj na lu xiche chee̱ Dios dxenná na:
Weleléꞌene̱ꞌ bénneaꞌ belune̱ꞌ we̱ꞌ.
Dxulucache̱ꞌ Jesús
38 Ca gudé naꞌ José,
benneꞌ xe̱zre Arimatea,
xeajnabe̱ꞌ Pilato guꞌe̱ le̱ꞌ lataj xexuꞌe̱ Jesús.
José naque̱ꞌ tu benneꞌ guque̱ꞌ Jesús tuze,
san bagácheze laweꞌ da bzrebe̱ꞌ judío blau caꞌ.
Pilato be̱ꞌe̱ le̱ꞌ lataj,
naꞌ bexuꞌe̱ Jesús.
La resurrección (Juan 19.38-20.18)
39 Cáꞌanqueze Nicodemo,
bénneaꞌ xeajchálajle̱ne̱ꞌ Jesús chizrela,
bzrine̱ꞌ naꞌ,
nuꞌe̱ tu gaxúa xiaj nedxe,
ne tu da dxelále̱ꞌe̱ zixre.
40 Nadxa José,
ne Nicodemo belexequé̱ꞌe̱ Jesús,
naꞌ buluchele̱ꞌ Le̱ꞌ ladxeꞌ nen nedxe naꞌ ca naca da zjácale̱ benneꞌ judío caꞌ da dxelune̱ꞌ chee̱ benneꞌ gateꞌ,
gate naꞌ dxulucache̱ꞌ le̱ꞌ.
41 Lataj naꞌ naga buludé̱ꞌe̱ Jesús xaga béguaj zua tu lataj naga zaj ze̱ xaga caꞌ,
naꞌ láwela lataj naꞌ zua tu ba cube le̱ꞌe̱ xiaj naꞌ,
naga quebe nu ne chúꞌuqueze benneꞌ gateꞌ.
42 Lu ba naꞌ beleguꞌe̱ Jesús laweꞌ da zua ba naꞌ gáguze,
ne laweꞌ da ba dxebía gubizra,
ne ba zua su lau zra dxulupáꞌana judío caꞌ.