Jesús dxexebane̱ꞌ ládujla benneꞌ gate
20
Zra nedxu,
guxíaj María Magdalena dxuꞌa ba naꞌ dxaníꞌsise̱ꞌ,
gate ne nachúl-late̱,
naꞌ bléꞌene̱ꞌ québedxa naduse xiaj dxuꞌa ba naꞌ.
2 Nadxa bexíaj chégüe̱ꞌ naga zua Simón Pedro nen xetú benneꞌ bse̱de Jesús,
bénneaꞌ bzriꞌidxe̱ꞌ Jesús,
naꞌ guzre̱ꞌ benneꞌ caꞌ:
―Ba belequé̱ꞌe̱ Xránadxu lu ba naꞌ,
ne quebe nézentuꞌ ga xeajlelúꞌe̱ Le̱ꞌ.
3 Nadxa Pedro,
ne bénneaꞌ xetú beledxúaje̱ꞌ zjaque̱ꞌ dxuꞌa ba naꞌ.
4 Dxúpate̱ꞌ zjaca chégüe̱ꞌ tu zren,
san bénneaꞌ xetú guzá chégudxe̱ꞌ ca Pedro,
ne bzrine̱ꞌ nédxudxa dxuꞌa ba naꞌ.
5 Naꞌ xeajsé̱ꞌ su dxúꞌala xeajnné̱ꞌe̱ lu ba naꞌ,
naꞌ bléꞌene̱ꞌ ladxeꞌ da buluchele̱ꞌ Jesús xuꞌu na naꞌ,
san quebe guxúꞌe̱ lu ba naꞌ.
6 Ca gudé naꞌ,
bzrin Simón Pedro,
naꞌ guxúꞌe̱ lu ba naꞌ.
Cáꞌanqueze le̱ꞌ bléꞌene̱ꞌ ladxeꞌ naꞌ xuꞌu na naꞌ,
7 ne bléꞌene̱ꞌ ladxeꞌ da buluchele̱ꞌ xichaj Jesús,
quebe xuꞌu na tu zren nen ladxeꞌ da bedxela na le̱ꞌ.
Nadube na,
dxeꞌ na chaláꞌala.
8 Nadxa cáꞌanqueze guxúꞌu bénneaꞌ xetú,
bénneaꞌ bzrin nedxu dxuꞌa ba naꞌ,
naꞌ bléꞌene̱ꞌ ladxeꞌ caꞌ,
ne guxéajle̱ꞌe̱.
9 Quebe ne xeléajniꞌine̱ꞌ da naxúaj na lu xiche chee̱ Dios da dxenná na xebán Jesús ládujla benneꞌ gateꞌ.
10 Nadxa benneꞌ caꞌ bse̱de Jesús belexezrine̱ꞌ xuꞌu naga zaj zre̱ꞌe̱.
Jesús dxuléꞌe lawe̱ꞌ María Magdalena
11 María begáꞌane̱ꞌ dxuꞌa ba naꞌ,
dxebezre̱ꞌ.
Ca dxebezre̱ꞌ naꞌ,
naꞌ gulégüe̱ꞌ dxenné̱ꞌe̱ lu ba naꞌ,
12 naꞌ bléꞌene̱ꞌ chupa gubáz chee̱ xabáa zaj nácue̱ꞌ zra lane̱ꞌ chiche,
zaj dxeꞌe̱ naga guxúꞌu Jesús.
Tue̱ꞌ dxeꞌe̱ naga guzrúa xichaj Jesús,
naꞌ xetúe̱ꞌ dxeꞌe̱ zeaj zranle ga guzrúa niꞌa Le̱ꞌ.
13 Naꞌ buluche̱be gubáz chee̱ xabáa caꞌ María naꞌ:
―Nuꞌula,
¿bizr chee̱ naꞌ dxebezruꞌ?
Le̱ꞌ guzre̱ꞌ gubáz chee̱ xabáa caꞌ:
―Laweꞌ da belúꞌe̱ Xranaꞌ,
ne quebe nezdaꞌ ga xeajlelúꞌe̱ Le̱ꞌ.
14 Caní dxenné̱ꞌ,
naꞌ bzéchaj xíchaje̱ꞌ,
ne bléꞌene̱ꞌ Jesús ze̱ꞌ caꞌala,
san quebe nézene̱ꞌ che Jesús naꞌ.
15 Nadxa Jesús bche̱be̱ꞌ María naꞌ:
―Núꞌuladauꞌ,
¿bizr chee̱ naꞌ dxebezruꞌ?
¿Nu dxexílajuꞌ?
María gúquene̱ꞌ naque̱ꞌ benneꞌ dxáꞌane̱ꞌ xaga caꞌ zaj ze̱ naꞌ,
naꞌ guzre̱ꞌ Le̱ꞌ:
―Benneꞌ,
che lueꞌ biꞌu Le̱ꞌ,
gunná ga xeajlúꞌu Le̱ꞌ,
chee̱ cheajxezriꞌa Le̱ꞌ.
16 Nadxa Jesús guzre̱ꞌ nuꞌula naꞌ:
―María.
María naꞌ bexéchaje̱ꞌ,
ne guzre̱ꞌ Le̱ꞌ nen dizraꞌ hebreo:
―¡Raboni!
Dizraꞌ nigá zéaje̱ na:
Benneꞌ Dxuse̱de.
17 Jesús guzre̱ꞌ María naꞌ:
―Bsan nedaꞌ laweꞌ da quebe ne xegüénaꞌ naga zua Xraꞌ.
Bexíaj,
xeajxe̱zre bi bíchaꞌdauꞌ caꞌ,
benneꞌ caꞌ bsé̱dedaꞌ,
xegüénaꞌ naga zua Xraꞌ,
ne nácaqueze̱ꞌ Xrale.
Naque̱ꞌ Dios chiaꞌ,
ne Dios chee̱le.
18 Nadxa bexíaj María Magdalena,
xeajzenne̱ꞌ benneꞌ caꞌ bse̱de Jesús ba bléꞌene̱ꞌ Jesús,
naꞌ Le̱ꞌ guzre̱ꞌ le̱ꞌ da caní.
Jesús dxuléꞌe lawe̱ꞌ benneꞌ caꞌ bsé̱dene̱ꞌ
19 Lu zra náꞌqueze,
da naca na zra nedxu chee̱ da gazre zra,
naꞌ chizrela zaj nazraga benneꞌ caꞌ bse̱de Jesús,
ne zaj nusézxuje̱ꞌ dxa xuꞌu caꞌ laweꞌ da dxelezrebe̱ꞌ judío blau caꞌ.
Naꞌ guxúꞌu Jesús,
guzé̱ꞌ laduj benneꞌ caꞌ,
naꞌ bgape̱ꞌ benneꞌ caꞌ diuzre,
dxenné̱ꞌ:
―Le gapa xel-laꞌ dxebeza zri lazreꞌ.
Jesús se aparece a los discípulos (Juan 20.19-31)
20 Ca gudé gunná Jesús da nigá,
naꞌ bléꞌene̱ꞌ benneꞌ caꞌ ne̱ꞌe̱,
ne le̱ꞌe̱ naga gudé xia naꞌ.
Benneꞌ caꞌ bse̱de Jesús gulebéle̱ꞌe̱ne̱ꞌ gate beleléꞌene̱ꞌ Xránadxu.
21 Nadxa Jesús guzre̱ꞌ benneꞌ caꞌ xecha lasa:
―Le gapa xel-laꞌ dxebeza zri lazreꞌ.
Cáte̱ze gusel-la Xraꞌ nedaꞌ,
cáꞌanqueze dxusel-laꞌ nedaꞌ leꞌe.
22 Nadxa blube̱ꞌ lau benneꞌ caꞌ ne guzre̱ꞌ le̱ꞌ:
―Le siꞌ Beꞌ Láꞌazxa chee̱ Dios.
23 Benneꞌ caꞌ dxunite laule leꞌe chee̱ dul-la zaj nabague̱ꞌ ba bnite lau Dios chee̱ꞌ,
naꞌ benneꞌ caꞌ quebe dxunite laule leꞌe chee̱ dul-la zaj nabague̱ꞌ,
quebe bunite lau Dios chee̱ꞌ.
Tomás dxeléꞌene̱ꞌ Xránadxu ba bebane̱ꞌ
24 Tomás,
tu benneꞌ chazrinnu caꞌ bse̱de Jesús,
bénneaꞌ le̱ꞌ Bi Lideꞌ,
quebe zue̱ꞌ nen benneꞌ caꞌ xezícadxa gate bleꞌe lau Jesús.
25 Ca gudé naꞌ gulé̱ꞌe̱ Tomás naꞌ:
―Ba bléꞌentuꞌ Xránadxu.
Gunná Tomás:
―Che quebe leꞌedaꞌ ne̱ꞌe̱ naga guledé bdiduj caꞌ,
ne gudéaꞌ zrube naꞌa lu xe̱dxu chee̱ bdiduj caꞌ,
ne gudéaꞌ naꞌa le̱ꞌe̱ naga gudé xia naꞌ,
québequeze chéajle̱ꞌa.
26 Ca guca xrunuꞌ zra,
benneꞌ caꞌ bse̱de Jesús zaj nazrágaqueze̱ꞌ lu xuꞌu naꞌ xetú lasa,
naꞌ zua Tomás nen benneꞌ caꞌ.
Nadxa,
lácala zaj naxezxuj dxa xuꞌu caꞌ,
bleꞌe lau Jesús lau benneꞌ caꞌ,
ne guzé̱ꞌ laduj le̱ꞌ,
naꞌ bgape̱ꞌ le̱ꞌ diuzre,
gunné̱ꞌ:
―Le gapa xel-laꞌ dxebeza zri lazreꞌ.
27 Nadxa Jesús guzre̱ꞌ Tomás:
―Bde zrube naꞌu nigá,
ne gunnáꞌ naꞌa nigá.
Be̱nna naꞌu,
bde na le̱ꞌa nigá.
Québedxa gun chupa lazruꞌ,
san guxéajle̱.
28 Nadxa beche̱be Tomás:
―Xranaꞌ,
ne Dios chiaꞌ.
29 Jesús guzre̱ꞌ le̱ꞌ:
―Tomás,
naꞌa dxéajle̱ꞌu laweꞌ da ba bléꞌenuꞌ nedaꞌ.
Ba neza zrente̱ naca na chee̱ benneꞌ caꞌ dxeléajle̱ꞌe̱ chiaꞌ lácala quebe ne xeleléꞌene̱ꞌ nedaꞌ.
Da dxaca lazreꞌ Juan gun xiche nigá