―¿Bizr chee̱ naꞌ dxexílajle leꞌe tu benneꞌ naca bane̱ꞌ láwela benneꞌ gate?

6 Quebe zue̱ꞌ nigá,

laweꞌ da ba bebane̱ꞌ.

Le gusá lázreꞌ da bchálajle̱ne̱ꞌ leꞌe gate ne zue̱ꞌ Galilea.

7 Gunné̱ꞌ:

“Benneꞌ Gulje̱ꞌ Bénneache dxal-laꞌ xuludée̱ꞌ Le̱ꞌ lu naꞌ benneꞌ dul-la caꞌ,

naꞌ xuludé̱ꞌe̱ Le̱ꞌ xaga béguaj,

naꞌ zra guxunneꞌ zra xebane̱ꞌ.”

8 Nadxa nuꞌula caꞌ xeajlesá lazre̱ꞌ ca naca da gunná Jesús.

9 Ca gudé besiáꞌque̱ꞌ dxuꞌa ba naꞌ,

naꞌ belexezrine̱ꞌ lu xe̱zre naꞌ,

naꞌ buluchálajle̱ne̱ꞌ benneꞌ chinéaj gubáz caꞌ chee̱ Jesús,

ne xúgute̱ benneꞌ caꞌ xezica,

ca naca da guca naꞌ.

10 Nuꞌula caꞌ xjaque̱ꞌ xeajlezenne̱ꞌ gubáz caꞌ,

zaj naque̱ꞌ María Magdalena,

ne Juana,

ne María xrna Jacobo,

ne xebal-la nuꞌula caꞌ.

11 Benneꞌ gubáz caꞌ guléquene̱ꞌ da xálaze dxelenná nuꞌula caní,

naꞌ quebe guléajle̱ꞌe̱ chee̱ꞌ.

12 Nadxa bdxuaj Pedro,

zeaj chégüe̱ꞌ dxuꞌa ba naꞌ,

naꞌ gate guné̱ꞌe̱ lu ba naꞌ,

bléꞌene̱ꞌ ladxeꞌ da bedxela Jesús xuꞌu na chaláꞌala,

naꞌ bezé̱ꞌe̱ zexíaje̱ꞌ xuꞌu naga guzé̱ꞌe̱,

dxexebánene̱ꞌ ca naca da guca.

13 Lu zra náꞌqueze,

zjaca chupa benneꞌ caꞌ busede Jesús xe̱zre Emaús,

da naca na láteꞌze zituꞌ naga zua Jerusalén.

14 Zjaque̱ꞌ dxuluchálaje̱ꞌ ca naca da guca lu zra caꞌ.

15 Dxácate̱ naꞌ dxuluchálaje̱ꞌ caní,

naꞌ Jesús náꞌqueze gubigue̱ꞌ cuita benneꞌ caꞌ,

naꞌ guzú lawe̱ꞌ zéajle̱ne̱ꞌ le̱ꞌ.

16 Quebe belexúnbeꞌe̱ Jesús,

laweꞌ da guzúa tu da guxúa na xiaj lau benneꞌ caꞌ.

17 Nadxa bche̱be Jesús benneꞌ caꞌ:

―¿Bizra da naꞌ dxuchálajle̱ ljwézrele dxácate̱ xuꞌule neza?

¿Bizr chee̱ naꞌ zale dxewíꞌine lázrele?

18 Tu benneꞌ caꞌ le̱ꞌ Cleofas beche̱be̱ꞌ:

―Xúgute̱ benneꞌ zaj nézene̱ꞌ ca da guca xe̱zre Jerusalén lu zra caní.

¿Nacuꞌ lueꞌ benneꞌ zituꞌ zuꞌ Jerusalén,

naꞌ tuze lueꞌ quebe nézenuꞌ ca da guca naꞌ?

19 Nadxa Le̱ꞌ guzre̱ꞌ benneꞌ caꞌ:

―¿Bizra guca naꞌ?

Gulé̱ꞌe̱ Le̱ꞌ:

―Da guca chee̱ Jesús,

benneꞌ Nazaret.

Guque̱ꞌ tu benneꞌ bchálaje̱ꞌ waláz chee̱ Dios,

naꞌ xel-la waca zren caꞌ be̱ne̱ꞌ,

ne bchálaje̱ꞌ dizraꞌ lau Dios,

ne lau xúgute̱ bénneache.

20 Naꞌ benneꞌ xíchaje̱ caꞌ chee̱ bxruze caꞌ,

ne benneꞌ xuꞌu laweꞌ chee̱ntuꞌ caꞌ buludée̱ꞌ Le̱ꞌ chee̱ gulechugue̱ꞌ chee̱ꞌ gatie̱ꞌ,

naꞌ buludé̱ꞌe̱ Le̱ꞌ xaga béguaj.

21 Netuꞌ guleza lázrentuꞌ Le̱ꞌ naque̱ꞌ Benneꞌ dxal-laꞌ guselé̱ꞌ xe̱zr la xu Israel.

Naꞌa,

ba zeaj chunna zra guca da caꞌ.

22 Bal-la nuꞌula caꞌ ládujla netuꞌ buluzúaqueze̱ꞌ netuꞌ lu da ste̱be,

laweꞌ da xjaque̱ꞌ dxaníꞌsise̱ꞌ dxuꞌa ba chee̱ꞌ naꞌ,

23 naꞌ gate quebe belexezrelne̱ꞌ Le̱ꞌ,

naꞌ belexelé̱ꞌe̱ naga zúantuꞌ,

ne gulenné̱ꞌ beleléꞌene̱ꞌ chupa gubáz chee̱ xabáa caꞌ bululéꞌe lawe̱ꞌ nuꞌula caꞌ,

naꞌ gulé̱ꞌe̱ le̱ꞌ nabán Jesús.

24 Nadxa bal-la benneꞌ ljwézrentuꞌ caꞌ xjaque̱ꞌ dxuꞌa ba naꞌ,

naꞌ beleléꞌene̱ꞌ cáte̱ze naꞌ gulenná nuꞌula caꞌ,

san quebe beleléꞌene̱ꞌ Jesús.

25 Nadxa gunná Jesús:

―Leꞌe quebe dxéajniꞌile,

naꞌ ne naca zideꞌ lázrdaule chee̱ quebe chéajle̱le xúgute̱ da gulenná benneꞌ caꞌ buluchálaje̱ꞌ waláz chee̱ Dios.

26 ¿Quebe dxal-laꞌ saca Cristo da caní nédxudxa ca xegáꞌane̱ꞌ szren?

27 Nadxa guzú lawe̱ꞌ dxuzéajniꞌine̱ꞌ benneꞌ caꞌ ca naca xúgute̱ da naxúaj lu xiche chee̱ Dios naga dxuchalaj na chee̱ Le̱ꞌ.

Guzú lawe̱ꞌ lu xiche caꞌ chee̱ Moisés,

naꞌ ne zéajdxaqueze na lu xiche caꞌ chee̱ benneꞌ caꞌ buluchálaje̱ꞌ waláz chee̱ Dios.

28 Gate belezrine̱ꞌ lu xe̱zre naga zjaque̱ꞌ,

Jesús be̱ne̱ꞌ ca benneꞌ zeajte̱ze̱ꞌ xuꞌe̱ neza.

29 Naꞌ benneꞌ caꞌ buluxucáꞌane̱ꞌ Le̱ꞌ xadía,

dxelenné̱ꞌ:

―Begáꞌanale̱ netuꞌ,

laweꞌ da ba zeaj dxezréꞌ,

ne ba dxeꞌ xrínnequeze naꞌa.

Nadxa Jesús guxúꞌule̱ne̱ꞌ benneꞌ caꞌ.

30 Gate naꞌ dxéꞌle̱ne̱ꞌ le̱ꞌ dxelawe̱ꞌ,

guqué̱ꞌe̱ xeta xtila,

ne bzúzruje̱ꞌ na,

naꞌ guzre̱ꞌ Dios “Xcalenuꞌ”,

ne bnézruje̱ꞌ na benneꞌ caꞌ.

31 Laꞌ náꞌqueze becuasa ca naca da guxúa na xiaj lau benneꞌ caꞌ,

naꞌ belexúnbeꞌe̱ Jesús,

san laꞌ náꞌqueze benite Le̱ꞌ lau benneꞌ caꞌ.

32 Naꞌ gulé̱ ljwezre̱ꞌ:

―¿Quebe guzúa xel-la dxebé lu lázrdaudxu gate ze̱ꞌe̱ dxuchálajle̱ne̱ꞌ dxiꞌu tu neza,

ne bzéajniꞌine̱ꞌ dxiꞌu ca naca da naxúaj lu xiche chee̱ Dios?

33 Nadxa,

ne québedxa gulezrene̱ꞌ,

belexeguꞌe̱ neza,

zeajxaque̱ꞌ Jerusalén,

naga beleléꞌene̱ꞌ zaj nazraga benneꞌ chinéaj gubáz caꞌ,

ne benneꞌ ljwezre̱ꞌ caꞌ.

34 Benneꞌ caꞌ zaj nazrague̱ꞌ naꞌ gulé̱ꞌe̱ benneꞌ chupa caꞌ:

―Da li bebán Xránadxu,

naꞌ Simón ba bléꞌene̱ꞌ Le̱ꞌ.

35 Nadxa benneꞌ chupa caꞌ buluzenne̱ꞌ le̱ꞌ ca naca da guca la neza,

ne ca belexúnbeꞌe̱ Jesús gate bzúzruje̱ꞌ xeta xtila naꞌ.

36 Ne dxuluchálajte̱ꞌ caní gate bleꞌe lau Jesús gachaj laweꞌ benneꞌ caꞌ,

naꞌ bgape̱ꞌ le̱ꞌ diuzre,

dxenné̱ꞌ:

―Xela dxebeza zri lazreꞌ súale̱ na leꞌe.

37 Naꞌ benneꞌ caꞌ belexruse̱ꞌ,

ne belezrébele̱ꞌe̱.

Guléquene̱ꞌ dxeleléꞌene̱ꞌ bxinne dxe̱la.

38 Naꞌ Jesús guzre̱ꞌ benneꞌ caꞌ:

―¿Bizr chee̱ naꞌ dxezrébele?

¿Bizr chee̱ naꞌ dxaca chupa lázrele?

39 Le naꞌ naꞌa caní,

ne le naꞌ niꞌa.

Nédaꞌquezaꞌ naꞌ.

Le gutá nedaꞌ,

ne le guxúe xque nedaꞌ.

Tu bxinne dxe̱la quebe napa na be̱laꞌ zrita,

ca dxeléꞌele leꞌe napaꞌ nedaꞌ.

40 Ca dxe̱ꞌe̱ benneꞌ caꞌ da nigá,

naꞌ bléꞌene̱ꞌ le̱ꞌ ne̱ꞌe̱,

ne niꞌe̱.

41 Benneꞌ caꞌ québequeze dxeléajle̱ꞌe̱ chee̱ꞌ laweꞌ da dxelebéle̱ꞌe̱ne̱ꞌ,

ne dxelexebánele̱ꞌe̱ne̱ꞌ,

naꞌ guzre Jesús le̱ꞌ:

―¿De̱ lateꞌ da gawaꞌ nigá?

42 Nadxa bulunézruje̱ꞌ Le̱ꞌ lateꞌ be̱laꞌ guzrúa xiꞌ,

ne lateꞌ da zixre che bézudauꞌ,

43 naꞌ gucáꞌa Jesús da caꞌ,

ne gudawe̱ꞌ na lau benneꞌ caꞌ.

44 Nadxa guzre̱ꞌ benneꞌ caꞌ:

―Da ba guca chiaꞌ naca na ca da guchaꞌ leꞌe gate ne zúale̱quezaꞌ leꞌe,

gunnéaꞌ dxal-laꞌ gaca li ca naca xúgute̱ da naxúaj lu da bdxixruj beꞌe Moisés,

ne lu xiche naga zaj naxúaj salmo caꞌ,

ne lu xiche caꞌ chee̱ benneꞌ caꞌ buluchálaje̱ꞌ waláz chee̱ Dios.

45 Nadxa bzéajniꞌine̱ꞌ benneꞌ caꞌ ca da naxúaj lu xiche chee̱ Dios,

46 naꞌ guzre̱ꞌ benneꞌ caꞌ:

―Caní naxúaj na dxal-laꞌ gate Cristo,

naꞌ zra guxunneꞌ zra dxal-laꞌ xebane̱ꞌ ládujla benneꞌ gate caꞌ,

47 naꞌ lu La Le̱ꞌ dxal-laꞌ xuluchalaj bénneache lau xúgute̱ xe̱zr la xu caꞌ.

Su lau gunle na lu xe̱zre Jerusalén,

xe̱le bénneache dxal-laꞌ xelexebíꞌi lazre̱ꞌ chee̱ gunite lau Dios dul-la zaj nabaga benneꞌ caꞌ.

48 Leꞌe nácale benneꞌ xelexeche̱be̱ꞌ da caní.

49 ¡Le nnaꞌxque!

Nedaꞌ sel-laꞌ chee̱le ca da guche̱be lazreꞌ Xraꞌ.

Le xegáꞌana nigá lu xe̱zre Jerusalén,

cadxa siꞌle xel-la waca da za xabáa.

50 Nadxa Jesús beche̱ꞌe̱ benneꞌ caꞌ,

belexedxúaje̱ꞌ Jerusalén,

xeajxaque̱ꞌ xe̱zre Betania,

naꞌ guchisa naꞌ Jesús,

ne gunabe̱ꞌ gaca chaweꞌ chee̱ benneꞌ caꞌ.

51 Ne dxúntee̱ꞌ caꞌ,

naꞌ bezé̱ꞌe̱ naga zaj zraꞌ benneꞌ caꞌ,

begüéne̱ꞌ zexíaje̱ꞌ xabáa.

52 Ca bexuzre belúe láꞌane̱ꞌ Le̱ꞌ,

besiáꞌque̱ꞌ zeajxaque̱ꞌ Jerusalén lu dute̱ xel-la dxelebé,

53 naꞌ gulezráqueze̱ꞌ chaleꞌaj xudauꞌ dxelúe láꞌane̱ꞌ Dios.

Caꞌ naca na.