Ca guca gate bebán Jesús
28
Ca gudé chee̱ zra dxulupáꞌana judío caꞌ,
ca za dxaníꞌ zra nedxu,
naꞌ María Magdalena,
ne xetú María naꞌ xjaque̱ꞌ xeajlenné̱ꞌe̱ ba chee̱ Jesús.
2 Chadite guzrúꞌle̱ꞌe̱ na laweꞌ da betaj tu gubáz chee̱ xabáa chee̱ Xránadxu,
naꞌ bzrine̱ꞌ dxuꞌa ba naꞌ,
ne bequé̱ꞌe̱ xíajtaꞌa zren naꞌ da zrua na dxuꞌa ba naꞌ,
naꞌ gudxéꞌe̱ lawe na.
3 Gubáz naꞌ dxácatite legale̱ꞌ,
ne naca chiche zra lane̱ꞌ ca bezxeꞌ.
4 Gate beleléꞌe benneꞌ dxjaque̱ꞌ wedil-la gubáz chee̱ xabáa naꞌ,
naꞌ belezrízene̱ꞌ xel-laꞌ dxelezrebe,
ne belexegáꞌane̱ꞌ ca benneꞌ gate caꞌ.
5 Nadxa gunná gubáz chee̱ xabáa naꞌ,
dxe̱ꞌe̱ nuꞌula caꞌ:
―Quebe zrébele.
Nezdaꞌ dxexílajle Jesús,
bénneaꞌ gudé̱ꞌe̱ xaga béguaj.
6 Quebe zue̱ꞌ nigá laweꞌ da ba bebane̱ꞌ,
cáte̱ze naꞌ gunné̱ꞌ.
Le da nnaꞌle lu ba naga gulegúꞌe̱ Le̱ꞌ.
7 Le cheajxáquezega,
le cheaje̱zre benneꞌ caꞌ bsé̱dene̱ꞌ ba bebane̱ꞌ ládujla benneꞌ gate,
naꞌ chéaje̱ꞌ ga nababa Galilea nédxudxa ca leꞌe.
Naꞌ léꞌele Le̱ꞌ.
Da nigá naca na da nabagaꞌa xapaꞌ leꞌe.
8 Nadxa nuꞌula caꞌ besiáꞌque̱ꞌ dxuꞌa ba naꞌ,
zeajxaca chégüe̱ꞌ.
Dxelezrebe̱ꞌ,
ne dxelebene̱ꞌ.
Zjaque̱ꞌ zeajlegue̱zre̱ꞌ benneꞌ caꞌ bse̱de Jesús.
9 Dxácate̱ naꞌ Jesús bchague̱ꞌ nuꞌula caꞌ,
ne bgape̱ꞌ le̱ꞌ diuzre.
Belezrine̱ꞌ lau Jesús,
dxelúe láꞌane̱ꞌ Le̱ꞌ,
ne bulunide̱ꞌ niꞌa Jesús.
10 Le̱ꞌ guzre̱ꞌ nuꞌula caꞌ:
―Quebe zrébele.
Le chjaca,
le cheajé̱zre bi bíchaꞌdauꞌ caꞌ dxal-laꞌ chjaque̱ꞌ naga nababa Galilea.
Naꞌ xelexeléꞌene̱ꞌ nedaꞌ.
Ca da gulenná benneꞌ dxjaque̱ꞌ wedil-la
11 Dxácate̱ zjaca nuꞌula caꞌ,
naꞌ benneꞌ caꞌ dxjaca wedil-la guluꞌe̱ xe̱zre,
ne buluchálajle̱ne̱ꞌ benneꞌ xíchaje̱ caꞌ chee̱ bxruze caꞌ ca da guca.
12 Benneꞌ xíchaje̱ caꞌ buluchálajle̱ne̱ꞌ benneꞌ gula sina caꞌ chee̱ xelune̱ꞌ tuze dizraꞌ.
Nadxa bulunézruje̱ꞌ benneꞌ dxjaque̱ꞌ wedil-la dumí zrente̱.
13 Dxelenné̱ꞌ:
―Le nna leꞌe beleláꞌ benneꞌ caꞌ bse̱de Jesús naꞌ chizrela,
dxácate̱ dxásele leꞌe,
naꞌ belexexúꞌe̱ be̱l-laꞌ dxen chee̱ꞌ.
14 Che benneꞌ dxenná be̱ꞌe̱ naꞌ xenne̱ꞌ da nigá,
netuꞌ guchálajle̱ntuꞌ le̱ꞌ,
ne gucáꞌana cháwentuꞌ chee̱ quebe bi gaca chee̱le leꞌe.
15 Nadxa benneꞌ dxjaque̱ꞌ wedil-la gulezíꞌ lu ne̱ꞌe̱ dumí naꞌ,
naꞌ besiáꞌque̱ꞌ belune̱ꞌ ca bache zaj nézene̱ꞌ.
Da nigá naca na ca dxelenná judío caꞌ zéajte̱ lu zra naꞌa zra.
Jesús dxesel-le̱ꞌ benneꞌ gubáz chee̱ꞌ caꞌ
16 Nadxa xjaca benneꞌ chinéaj caꞌ bse̱de Jesús,
naꞌ belezrine̱ꞌ lu xiꞌa naga ba guzre Jesús le̱ꞌ.
17 Gate beleléꞌene̱ꞌ Jesús,
naꞌ bulucáꞌana szrene̱ꞌ Le̱ꞌ.
Bal-le̱ꞌ gulaca chupa lazre̱ꞌ.
18 Nadxa Jesús gubigue̱ꞌ naga zaj zraꞌ benneꞌ caꞌ,
naꞌ guzre̱ꞌ le̱ꞌ:
―Nedaꞌ ba nazíꞌ lu naꞌa ca naca xel-laꞌ dxenná bea xabáa,
ne lu xe̱zr la xu nigá.
19 Chee̱ le̱ naꞌ le chjaca,
le cheajchálajle̱ benneꞌ zaj zre̱ꞌe̱ du ca naca xe̱zr la xu nigá,
ne le cheajsé̱dene̱ꞌ ca naca da bsé̱dedaꞌ leꞌe.
Le guchúe̱ꞌ le̱ꞌ nisa lu La Xraꞌ,
ne lu La Zríꞌine̱ꞌ,
ne lu La Beꞌ Láꞌazxa.
20 Le gusé̱de-ne̱ꞌ xelaque̱ꞌ wezúa dizraꞌ ca naca da ba gunná beꞌedaꞌ leꞌe,
naꞌ nedaꞌ tu súale̱zquezaꞌ leꞌe xúgute̱ zra cadxa cheajsé̱ chee̱ xe̱zr la xu nigá.
¡Caꞌan gaca na!