Dxexebán Jesús ládujla benneꞌ gate
16
Ca gudé zra dxulupáꞌane̱ꞌ,
naꞌ María Magdalena,
ne Salomé,
ne María,
xrna Jacobo,
gulezíꞌe̱ da dxelá zixre chee̱ cheajleluꞌe̱ Jesús.
2 Naꞌ bál-laꞌla zra nedxu chee̱ da gazre zra belezrine̱ꞌ dxuꞌa ba gate naꞌ za dxalaj gubizra.
3 Naꞌ gulenné̱ꞌ,
dxelé̱ꞌ ljwezre̱ꞌ:
―¿Nuzra cua xiaj da naxezxuj ba?
4 Ca gulenné̱ꞌe̱,
naꞌ beleléꞌene̱ꞌ xiaj zren naꞌ da bulusézxuje̱ꞌ ba,
ba nadúa na.
5 Ca guluꞌe̱ lu ba,
naꞌ beleléꞌene̱ꞌ tu benneꞌ dxeꞌe̱ chaláꞌa xabe̱la,
nácue̱ꞌ zra lane̱ꞌ tunna da chiche,
naꞌ belezrebe̱ꞌ.
6 Naꞌ gunná benneꞌ nigá,
dxe̱ꞌe̱ nuꞌula caꞌ:
―Quebe zrébele.
Leꞌe dxexílajle Jesús,
benneꞌ Nazaret,
bénneaꞌ gudé̱ꞌe̱ le̱ꞌe̱ xaga béguaj.
Bache bebán bénneaꞌ.
Québedxa xuꞌe̱ nigá.
Le nnaꞌ lataj naga gulexrúe̱ꞌ Le̱ꞌ.
7 Le chjaca naꞌa,
le cheaje̱zre benneꞌ caꞌ bsé̱dene̱ꞌ,
ne Pedro cuía lau Jesús chéaje̱ꞌ naga nababa Galilea ca leꞌe.
Naꞌ xeléꞌequezle Le̱ꞌ ca ba gunnáqueze̱ꞌ.
8 Nadxa nuꞌula caꞌ buluzrúnnuje̱ꞌ,
besíꞌaque̱ꞌ dxuꞌa ba laweꞌ da belezrébele̱ꞌe̱.
Quebe nu gulé̱queze̱ꞌ ca da guca na laweꞌ da dxelezrébele̱ꞌe̱.
Jesús dxuléꞌe lau María Magdalena
9 Ca gudé bebán Jesús ládujla benneꞌ gate ca guxaníꞌ zra nedxu chee̱ da gazre zra,
naꞌ bleꞌe lawe̱ꞌ zate caꞌ María Magdalena,
nuꞌula naꞌ bebéaj Jesús gazre beꞌ xriwe̱ꞌ guxúꞌe̱.
10 Nuꞌula nigá guxíaje̱ꞌ xeaje̱zre̱ꞌ benneꞌ caꞌ gulaque̱ꞌ Jesús tuze,
zaj zre̱ꞌe̱ baxácheze,
ne dxelebezre̱ꞌ.
11 Gate naꞌ gulenne̱ꞌ nabán Jesús,
naꞌ ba bleꞌe nuꞌula nigá Le̱ꞌ,
quebe guléajle̱ꞌe̱.
Dxuléꞌe lau Jesús chupa benneꞌ bsé̱dene̱ꞌ
12 Ca gudé naꞌ bleꞌe lau Jesús nazrala chupa benneꞌ caꞌ bsé̱dene̱ꞌ zaj xuꞌe̱ neza le̱ꞌe̱ xixreꞌ.
13 Benneꞌ caní belexebiꞌe̱,
naꞌ xeajlegue̱zre̱ꞌ benneꞌ xezícala.
Cáꞌanqueze benneꞌ caní quebe guléajle̱ꞌe̱.
Jesús dxusebague̱ꞌ benneꞌ gubáz chee̱ꞌ caꞌ da dxal-laꞌ xelune̱ꞌ
14 Ca gudédxa,
naꞌ bleꞌe lau Jesús chinéaj benneꞌ caꞌ bsé̱dene̱ꞌ ca zaj dxeꞌe̱ dxelawe̱ꞌ,
naꞌ gudil-le̱ꞌ le̱ꞌ laweꞌ da quebe guléajle̱ꞌe̱ ba bebane̱ꞌ,
ne laweꞌ da zaj naque̱ꞌ lázrdau zideꞌ laweꞌ da quebe guléajle̱ꞌe̱ chee̱ benneꞌ caꞌ belexeléꞌene̱ꞌ Le̱ꞌ ca gudé bebane̱ꞌ.
15 Naꞌ gunné̱ꞌ,
dxe̱ꞌe̱ benneꞌ caꞌ:
―Le chjaca du ca naca xe̱zr la xu.
Le cuꞌu lban chee̱ dizraꞌ chaweꞌ chiaꞌ chee̱ xelénqueze xúgute̱ bénneache.
16 Benneꞌ chéajle̱ꞌe̱,
ne chue̱ꞌ nisa,
la bénneaꞌ,
naꞌ benneꞌ quebe chéajle̱ꞌe̱,
wabía xiꞌ bénneaꞌ.
17 Da dxelunna bea caní xululéꞌe benneꞌ caꞌ xeléajle̱ꞌe̱ chiaꞌ,
xuluchínene̱ꞌ La nedaꞌ chee̱ xelexebéaje̱ꞌ beꞌ xriwe̱ꞌ.
Xuluchálaje̱ꞌ dizraꞌ nazrala.
18 Welúxrue̱ꞌ be̱laꞌ caꞌ,
ne che xeléꞌaje̱ꞌ da gute benneꞌ,
quebe bi xeléquene̱ꞌ.
Cáꞌanqueze wuluxrúa ne̱ꞌe̱ benneꞌ quebe chaweꞌ zaj zue̱ꞌ,
naꞌ xelexexaque̱ꞌ.
Dxexe̱pe Jesús xabáa
19 Ca gudé bchálaj Xránadxu Jesús nen benneꞌ caꞌ,
naꞌ Dios bechise̱ꞌ Le̱ꞌ xabáa,
naꞌ gudxéꞌe̱ chaláꞌa xabe̱la chee̱ Dios.
20 Nadxa benneꞌ caꞌ guledxúaje̱ꞌ,
xeajleluꞌe̱ lban chee̱ dizraꞌ chaweꞌ nigá du ca naca xe̱zr la xu nigá.
Lé̱queze Xránadxu gúcale̱ne̱ꞌ le̱ꞌ,
naꞌ bdxixruj beꞌe̱ dizraꞌ chee̱ꞌ ne̱ chee̱ xel-la waca caꞌ da za xabáa da belune̱ꞌ.
¡Caꞌan gaca na!