DIZRAꞌ CHAWEꞌ CA NACA CHEE̱ JESUCRISTO
La benneꞌ caꞌ gulaque̱ꞌ xra gula chee̱ Cristo
1
Da caní zaj naca na la chee̱ benneꞌ zaj naque̱ꞌ xra wdé chee̱ Jesucristo.
Jesús nigá nababe̱ꞌ zriꞌine zre sua David,
ne zriꞌine zre sua Abraham.
2 Abraham nigá guque̱ꞌ xra Isaac.
Isaac nigá guque̱ꞌ xra Jacob.
Jacob nigá guque̱ꞌ xra Judá,
ne benneꞌ biche̱ꞌ caꞌ.
3 Judá nigá guque̱ꞌ xra Fares,
ne Zara,
naꞌ Tamar guque̱ꞌ xrna Fares,
ne Zara caní.
Fares nigá guque̱ꞌ xra Esrom.
Esrom nigá guque̱ꞌ xra Aram.
4 Aram nigá guque̱ꞌ xra Aminadab.
Aminadab nigá guque̱ꞌ xra Naasón.
Naasón nigá guque̱ꞌ xra Salmón.
5 Salmón nigá guque̱ꞌ xra Booz,
naꞌ Rahab guque̱ꞌ xrna Booz nigá.
Booz nigá guque̱ꞌ xra Obed,
naꞌ Rut guque̱ꞌ xrna Obed nigá.
Obed nigá guque̱ꞌ xra Isaí.
6 Isaí nigá guque̱ꞌ xra David,
benneꞌ wenná bea.
Wenná bea David nigá,
ne nuꞌula naꞌ nédxute̱ guque̱ꞌ zruꞌula Urías gulaque̱ꞌ xra xrna Salomón.
7 Salomón nigá guque̱ꞌ xra Roboam.
Roboam nigá guque̱ꞌ xra Abías.
Abías nigá guque̱ꞌ xra Asa.
8 Asa nigá guque̱ꞌ xra Josafat.
Josafat nigá guque̱ꞌ xra Joram.
Joram nigá guque̱ꞌ xra Uzías.
9 Uzías nigá guque̱ꞌ xra Jotam.
Jotam nigá guque̱ꞌ xra Acaz.
Acaz nigá guque̱ꞌ xra Ezequías.
10 Ezequías nigá guque̱ꞌ xra Manasés.
Manasés nigá guque̱ꞌ xra Amón
Amón nigá guque̱ꞌ xra Josías.
11 Josías nigá guque̱ꞌ xra Jeconías ne benneꞌ biche̱ꞌ caꞌ ca lu zra caꞌ gate benneꞌ Babilonia guleché̱ꞌe̱ benneꞌ Israel caꞌ lu xe̱zr la xu Babilonia.
12 Jeconías nigá guque̱ꞌ xra Salatiel.
Salatiel nigá guque̱ꞌ xra Zorobabel.
13 Zorobabel nigá guque̱ꞌ xra Abiud.
Abiud nigá guque̱ꞌ xra Eliaquim.
Eliaquim nigá guque̱ꞌ xra Azor.
14 Azor nigá guque̱ꞌ xra Sadoc.
Sadoc nigá guque̱ꞌ xra Aquim.
Aquim nigá guque̱ꞌ xra Eliud.
15 Eliud nigá guque̱ꞌ xra Eleazar.
Eleazar nigá guque̱ꞌ xra Matán.
Matán nigá guque̱ꞌ xra xetú benneꞌ le̱ꞌ Jacob.
16 Jacob nigá guque̱ꞌ xra José,
benneꞌ chee̱ María,
xrna Jesús,
Bénneaꞌ naque̱ꞌ Cristo.
17 Caní naca,
gulaca chidáꞌ cueꞌ bénneache gate guzú lau zua Abraham,
ca bzrinte̱ zra zua David,
naꞌ gulaca xechidáꞌ cueꞌ bénneache caꞌ gate guzú lau zua David,
ca bzrinte̱ zra gate naꞌ benneꞌ Babilonia caꞌ guleché̱ꞌe̱ benneꞌ Israel caꞌ lu xe̱zr la xu chee̱ꞌ,
naꞌ gulaca xechidáꞌ cueꞌ bénneache caꞌ gate guzú lau zra naꞌ,
ca bzrinte̱ zra gulaj Cristo.
Ca guca gate gulaj Cristo
18 Caní guca gate naꞌ gulaj Jesucristo.
María,
xrna Jesús ba naché̱bebeꞌ gácabeꞌ zruꞌula José.
Nédxula ca za xelenite̱ꞌ,
nuꞌula nigá ba zue̱ꞌ ziꞌi ne̱ chee̱ xel-laꞌ waca chee̱ Beꞌ Láꞌazxa chee̱ Dios.
19 José,
benneꞌ chee̱ María nigá,
naque̱ꞌ benneꞌ xrlátaje.
Quebe guca lazre̱ꞌ guléꞌene̱ꞌ ca ba naca chee̱ María lau benneꞌ xe̱zre caꞌ.
Guca lazre̱ꞌ gusane̱ꞌ le̱ꞌ bagácheze.
20 Dxácate̱ dxudé lazre̱ꞌ da nigá,
bleꞌe lau tu gubáz chee̱ xabáa,
gubáz chee̱ Xránadxu,
ga zua José naꞌ lu bchigala,
naꞌ guzre̱ꞌ le̱ꞌ:
―José,
zriꞌine zre sua David,
quebe zrebuꞌ siꞌ lu naꞌu María chee̱ gácabeꞌ zruꞌuluꞌ,
laweꞌ da bidu biu naꞌ sanbeꞌ zabeꞌ ne̱ chee̱ Beꞌ Láꞌazxa chee̱ Dios.
21 Zrúꞌuluꞌ gúxrubeꞌ tu bidu biu chee̱beꞌ,
naꞌ lueꞌ guꞌu labeꞌ Jesús.
Caní guꞌu labeꞌ laweꞌ da guselabeꞌ bénneache lu dul-la da zaj nabague̱ꞌ.
22 Xúgute̱ da caní gulaca caꞌ chee̱ guca ca da gunná Xránadxu lu dxuꞌa benneꞌ caꞌ buluchálaje̱ꞌ waláz chee̱ꞌ.
23 Caní gunné̱ꞌ:
Tu núꞌuladauꞌ gúadaubeꞌ sanbeꞌ tu bidu biu chee̱beꞌ,
naꞌ xeluꞌe̱ labeꞌ Emanuel.
Emanuel zéaje̱ na:
Dios zúale̱ne̱ꞌ dxiꞌu.