Juan, benneꞌ dxuchúe̱ꞌ bénneache nisa, dxuchálaje̱ꞌ xrtizraꞌ Dios le̱ꞌe̱ xixreꞌ
3
Iza chinuꞌ ca dxenná bea Tiberio,
benneꞌ dxenná beꞌe ca naca xe̱zr la xu,
naꞌ Poncio Pilato dxenná beꞌe̱ naga nababa Judea,
naꞌ Herodes dxenná beꞌe̱ naga nababa Galilea,
naꞌ Felipe,
benneꞌ biche Herodes,
dxenná beꞌe̱ naga nababa Iturea,
ne Traconite,
naꞌ Lisanias dxenná beꞌe̱ naga nababa Abilinia.
2 Naꞌ Anás,
ne Caifás zaj naque̱ꞌ bxruze blau.
Ca lu zra naꞌ Dios bchálajle̱ne̱ꞌ Juan,
zriꞌine Zacarías,
naga zua Juan le̱ꞌe̱ xixreꞌ laweꞌ lataj.
3 Juan naꞌ gudée̱ꞌ ca naca xé̱zredu caꞌ zaj nnitanꞌ chaláꞌa weaj xe̱gu Jordán,
naꞌ dxe̱ꞌe̱ benneꞌ caꞌ dxal-laꞌ xelexebíꞌi lazre̱ꞌ,
ne xeledxúe̱ꞌ nisa chee̱ gunite lau Dios chee̱ xtul-leꞌ.
4 Caní guca ca naꞌ gunná Isaías,
benneꞌ bchálaje̱ꞌ waláz chee̱ Dios,
gunné̱ꞌ:
Nen tu chiꞌi bénneaꞌ dxenné̱ꞌ zizraj le̱ꞌe̱ xixreꞌ laweꞌ lataj.
Dxenné̱ꞌ:
Le gucueza neza naga te Xránadxu.
Le xulí chaweꞌ neza lase chee̱ꞌ.
5 Ca naca zrítudu caꞌ le xuzrá na.
Ca naca xiꞌa caꞌ,
ne xíꞌadu caꞌ xelexaca na tu li.
Neza xúcaꞌdu caꞌ xelexelí na.
Neza da quebe nalí xelexaca na tu li.
6 Ca naca bénneache xeleléꞌene̱ꞌ Benneꞌ Weselá sel-la Dios.
7 Gate benneꞌ caꞌ belezrine̱ꞌ lau Juan chee̱ xeledxúe̱ꞌ nisa,
naꞌ le̱ꞌ dxe̱ꞌe̱ benneꞌ caꞌ:
―Xrtia be̱la snia.
¿Bleꞌe nu benneꞌ leꞌe chee̱ cuásale ca naca xel-la dxezráꞌa chee̱ Dios da ba za?
8 Le gun da guléꞌe na ba bebíꞌi lázrele,
ne quebe nnale lu lázrdaule:
Nácantuꞌ xrtia ljwezre Abraham.
Nedaꞌ dxapaꞌ leꞌe,
Dios wazéquene̱ꞌ xexune̱ꞌ xiaj caní xrtia Abraham.
9 Xa waga ba de̱ cuásate̱ na chee̱ chugue̱ꞌ xaga caꞌ,
naꞌ xúgute̱ xaga da quebe dxelebía na da zixre chaweꞌ welechugue na,
naꞌ xuluzré̱ꞌe̱ na lu xiꞌ.
10 Nadxa benneꞌ caꞌ buluche̱be̱ꞌ le̱ꞌ:
―¿Bi dxal-laꞌ guntuꞌ?
11 Juan beche̱be̱ꞌ:
―Benneꞌ de̱ chupa zre̱ꞌ dxal-laꞌ gunézruje̱ꞌ tu na benneꞌ quebe de̱ chee̱ꞌ,
naꞌ benneꞌ de̱ da dxawe̱ꞌ dxal-laꞌ gunézruje̱ꞌ da gagu bénneaꞌ quebe bi de̱ chee̱ꞌ.
12 Cáꞌanqueze beleláꞌ benneꞌ wechizruj caꞌ chee̱ xeledxúe̱ꞌ nisa,
naꞌ buluche̱be̱ꞌ Juan:
―Benneꞌ wese̱de,
¿bi da dxal-laꞌ guntuꞌ netuꞌ?
13 Juan guzre̱ꞌ le̱ꞌ:
―Quebe guchízrujle da zrendxa ca da nadxixruj bea na.
14 Cáꞌanqueze bal-la benneꞌ dxjaque̱ꞌ wedil-la buluche̱be̱ꞌ le̱ꞌ:
―¿Gazra netuꞌ?
¿Bi da dxal-laꞌ guntuꞌ?
Juan beche̱be̱ꞌ:
―Quebe guchébele benneꞌ,
ne quebe gágule le̱ꞌ zria lu da we̱n lazreꞌ chee̱ cuale dumí chee̱ꞌ,
naꞌ le be nen cadite názrujle.
15 Benneꞌ zaj zre̱ꞌe̱ naꞌ zaj zue̱ꞌ ste̱be,
naꞌ dxuluche̱be̱ꞌ lu lázrdawe̱ꞌ che Juan naꞌ naque̱ꞌ Cristo,
benneꞌ nasel-la Dios.
16 Juan naꞌ gunné̱ꞌ:
―Nedaꞌ,
da li dxuchúaꞌ leꞌe nisa nen nisa.
Wida tu benneꞌ gune̱ꞌ da dxuléꞌe xel-la dxedxúa nisa nigá,
guzúe̱ꞌ leꞌe Beꞌ Láꞌazxa,
ne xiꞌ chee̱ꞌ.
Benneꞌ nigá nápadxe̱ꞌ xel-la dxenná bea ca nedaꞌ,
naꞌ quebe naca chiaꞌ cuéajaꞌ xel-la chee̱ꞌ da xuꞌu niꞌe̱.
17 Ba nuxre̱ꞌ da dxun beꞌ chee̱ꞌ,
naꞌ guchiꞌe̱ naga dxine̱ꞌ zruaꞌ xtila.
Naꞌ xutupe̱ꞌ zruaꞌ xtila,
guzráꞌ chawe̱ꞌ na lizre̱ꞌ.
Guzezxe̱ꞌ xizre chee̱ na lu xiꞌ da cabataꞌ xul-la na.
18 Ca naca dizraꞌ nigá,
ne xezícadxa dizraꞌ zan bchálajle̱ne̱ꞌ benneꞌ caꞌ ca naca dizraꞌ chaweꞌ chee̱ Dios.
19 Juan gudil-le̱ꞌ Herodes,
benneꞌ dxenná beꞌe̱,
laweꞌ da zúale̱ne̱ꞌ Herodías,
zruꞌula Felipe,
benneꞌ biche Herodes naꞌ,
ne laweꞌ da ba be̱ne̱ꞌ da zante̱ da cale̱la.
Nadxa Herodes
20 bé̱ndxaqueze̱ꞌ da cale̱la,
guluꞌe̱ Juan lizre xia.
Da guca gate gudxúa Jesús nisa
21 Gate ne dxuchúa Juan naꞌ bénneache nisa,
cáꞌanqueze Jesús gudxúe̱ꞌ nisa,
naꞌ gate dxuchálajle̱ne̱ꞌ Dios,
naꞌ bxalaj xabáa,
22 naꞌ betaj Beꞌ Láꞌazxa laweꞌ Jesús.
Bleꞌe lawe̱ꞌ ca tu bgugu chiche,
naꞌ ben tu chiꞌe̱ xabáa,
dxenné̱ꞌ:
―Lueꞌ nacuꞌ zriꞌinaꞌ nazríꞌite̱ lazraꞌ.
Dxezaca ba lázrele̱naꞌ Lueꞌ.
Bautizo de Jesús por Juan
Ca naca xra xrtau Jesucristo
23 Jesús nape̱ꞌ ca chi dxua iza gate guzú lawe̱ꞌ dxune̱ꞌ zrin chee̱ꞌ.
Dxeleque benneꞌ naque̱ꞌ zriꞌine José.
Naca Jesús zre sua Elí,
xra María.
24 Elí naꞌ guque̱ꞌ zriꞌine Matat,
Matat naꞌ guque̱ꞌ zriꞌine Leví,
Leví naꞌ guque̱ꞌ zriꞌine Melqui,
Melqui naꞌ guque̱ꞌ zriꞌine Jana,
Jana naꞌ guque̱ꞌ zriꞌine xetú José.
25 José nigá guque̱ꞌ zriꞌine Matatías,
Matatías naꞌ guque̱ꞌ zriꞌine Amós,
Amós naꞌ guque̱ꞌ zriꞌine Nahum,
Nahum naꞌ guque̱ꞌ zriꞌine Esli,
Esli naꞌ guque̱ꞌ zriꞌine Nagai.
26 Nagai naꞌ guque̱ꞌ zriꞌine Maat,
Maat naꞌ guque̱ꞌ zriꞌine xetú Matatías,
Matatías nigá guque̱ꞌ zriꞌine Semei,
Semei naꞌ guque̱ꞌ zriꞌine xetú José,
José nigá guque̱ꞌ zriꞌine Judá.
27 Judá naꞌ guque̱ꞌ zriꞌine Joana,
Joana naꞌ guque̱ꞌ zriꞌine Resa,
Resa naꞌ guque̱ꞌ zriꞌine Zorobabel,
Zorobabel naꞌ guque̱ꞌ zriꞌine Salatiel,
Salatiel naꞌ guque̱ꞌ zriꞌine Neri.
28 Neri naꞌ guque̱ꞌ zriꞌine xetú Melqui,
Melqui nigá guque̱ꞌ zriꞌine Adi,
Adi naꞌ guque̱ꞌ zriꞌine Cosam,
Cosam naꞌ guque̱ꞌ zriꞌine Elmodam,
Elmodam naꞌ guque̱ꞌ zriꞌine Er,
29 Er naꞌ guque̱ꞌ zriꞌine Josué,
Josué naꞌ guque̱ꞌ zriꞌine Eliezer,
Eliezer naꞌ guque̱ꞌ zriꞌine Jorim,
Jorim naꞌ guque̱ꞌ zriꞌine xetú Matat,
30 Matat nigá guque̱ꞌ zriꞌine xetú Leví,
Leví nigá guque̱ꞌ zriꞌine Simeón,
Simeón naꞌ guque̱ꞌ zriꞌine xetú Judá,
Judá nigá guque̱ꞌ zriꞌine xetú José,
José nigá guque̱ꞌ zriꞌine Jonán,
Jonán naꞌ guque̱ꞌ zriꞌine Eliaquim,
31 Eliaquim naꞌ guque̱ꞌ zriꞌine Melea,
Melea naꞌ guque̱ꞌ zriꞌine Mainán,
Mainán naꞌ guque̱ꞌ zriꞌine Matata,
Matata naꞌ guque̱ꞌ zriꞌine Natán.
32 Natán naꞌ guque̱ꞌ zriꞌine David,
David naꞌ guque̱ꞌ zriꞌine Isaí,
Isaí naꞌ guque̱ꞌ zriꞌine Obed,
Obed naꞌ guque̱ꞌ zriꞌine Booz,
Booz naꞌ guque̱ꞌ zriꞌine Salmón,
Salmón naꞌ guque̱ꞌ zriꞌine Naasón.
33 Naasón naꞌ guque̱ꞌ zriꞌine Aminadab,
Aminadab naꞌ guque̱ꞌ zriꞌine Aram,
Aram naꞌ guque̱ꞌ zriꞌine Esrom,
Esrom naꞌ guque̱ꞌ zriꞌine Fares,
Fares naꞌ guque̱ꞌ zriꞌine xetú Judá,
34 Judá nigá guque̱ꞌ zriꞌine Jacob,
Jacob naꞌ guque̱ꞌ zriꞌine Isaac,
Isaac naꞌ guque̱ꞌ zriꞌine Abraham,
Abraham naꞌ guque̱ꞌ zriꞌine Taré,
Taré naꞌ guque̱ꞌ zriꞌine Nacor.
35 Nacor naꞌ guque̱ꞌ zriꞌine Serug,
Serug naꞌ guque̱ꞌ zriꞌine Ragau,
Ragau naꞌ guque̱ꞌ zriꞌine Peleg,
Peleg naꞌ guque̱ꞌ zriꞌine Heber,
Heber naꞌ guque̱ꞌ zriꞌine Sala,
36 Sala naꞌ guque̱ꞌ zriꞌine Cainán,
Cainán naꞌ guque̱ꞌ zriꞌine Arfaxad,
Arfaxad naꞌ guque̱ꞌ zriꞌine Sem,
Sem naꞌ guque̱ꞌ zriꞌine Noé,
Noé naꞌ guque̱ꞌ zriꞌine Lamec,
37 Lamec naꞌ guque̱ꞌ zriꞌine Matusalén,
Matusalén naꞌ guque̱ꞌ zriꞌine Enoc,
Enoc naꞌ guque̱ꞌ zriꞌine Jared,
Jared naꞌ guque̱ꞌ zriꞌine Mahalaleel,
Mahalaleel naꞌ guque̱ꞌ zriꞌine xetú Cainán.
38 Cainán naꞌ guque̱ꞌ zriꞌine Enós,
Enós naꞌ guque̱ꞌ zriꞌine Set,
Set naꞌ guque̱ꞌ zriꞌine Adán,
Adán naꞌ guque̱ꞌ ca zríꞌinequeze Dios.