Satanás da xriwe̱ꞌ dxilaj lazreꞌ na ájala gusebaga na Jesús dul-la
4
Jesús,
zúale̱ Beꞌ Láꞌazxa Le̱ꞌ,
bezé̱ꞌe̱ xe̱gu Jordán,
naꞌ guché̱ Beꞌ Láꞌazxa Le̱ꞌ le̱ꞌe̱ xixreꞌ laweꞌ lataj.
2 Naꞌ guzúe̱ꞌ chua zra,
naꞌ Satanás da xriwe̱ꞌ gudilaj lazreꞌ na ájala si xe̱ na Le̱ꞌ.
Quebe bi gudagu Jesús da chua zra caꞌ,
naꞌ ca gudé naꞌ gudune̱ꞌ.
3 Nadxa gunná da xriwe̱ꞌ,
guzre na Le̱ꞌ:
―Che da li nacuꞌ Lueꞌ Zriꞌine Dios,
be̱n xelexaca xiaj caní xeta xtila.
4 Naꞌ beche̱be Jesús:
―Naxúajqueze na lu xiche chee̱ Dios,
dxenné̱ꞌ:
Quegá nen xeta xtílaze gaca ban bénneache,
san cáꞌanqueze nen xrtizraꞌ Dios gaca ban bénneache.
5 Nadxa da xriwe̱ꞌ guché̱ na Jesús tu xiꞌa sibe,
naꞌ chadite̱ bleꞌe na Le̱ꞌ xúgute̱ cueꞌ xe̱zr la xu da zaj nnita lu xe̱zr la xu nigá,
6 naꞌ guzre na Le̱ꞌ:
―Nedaꞌ gunnaꞌ Lueꞌ ca naca xel-la dxenná bea nigá,
ne xel-la szren chee̱ xúgute̱ xe̱zr la xu caní,
laweꞌ da zaj xuꞌu da caní lu naꞌa nedaꞌ,
naꞌ gunézrujaꞌ na nu dxaca lazraꞌ gunézrujaꞌ na.
7 Gunnaꞌ na chiuꞌ che lueꞌ guzú zribuꞌ lawaꞌ,
ne gucáꞌana szrenuꞌ nedaꞌ.
8 Jesús beche̱be̱ꞌ:
―Gucuasa lueꞌ,
Satanás,
laweꞌ da dxenná xiche chee̱ Dios,
dxe̱ꞌe̱ bénneache:
“Bcaꞌana szren Xranuꞌ Dios,
ne be̱n zrin chee̱ tuze Le̱ꞌ.”
9 Nadxa da xriwe̱ꞌ naꞌ guché̱ na Jesús lu xe̱zre Jerusalén,
naꞌ bcuén na Le̱ꞌ xichaj zeꞌe xudauꞌ,
naꞌ guzre na Le̱ꞌ:
―Che da li naꞌ nacuꞌ Zriꞌine Dios,
guxriteꞌ nigá cheajxe̱zuꞌ lu xu,
10 laweꞌ da lu xiche chee̱ Dios dxenné̱ꞌ:
Dios gusebague̱ꞌ gubáz chee̱ xabáa chee̱ꞌ caꞌ xuluxue̱ꞌ Lueꞌ.
11 Xelechísaqueze̱ꞌ Lueꞌ nen ne̱ꞌe̱,
chee̱ quebe gaca we̱ꞌ niꞌu laweꞌ xiaj caꞌ.
12 Jesús beche̱be̱ꞌ:
―Cáꞌanqueze naxúaj na lu xiche chee̱ Dios,
dxe̱ꞌe̱ bénneache:
“Quebe guchínenuꞌ ca dxaca lazruꞌ Xranuꞌ Dios.”
13 Gate da xriwe̱ꞌ québedxa bezrela lazreꞌ na ájala gun zréaje na Jesús,
naꞌ becuasa na tu chiꞌi.
El Diablo Tienta a Jesús
Jesús dxune̱ꞌ zrin chee̱ꞌ naga nababa Galilea
14 Naꞌ Jesús bezrine̱ꞌ Galilea,
ba nápale̱ꞌe̱ xel-la waca chee̱ Beꞌ Láꞌazxa,
naꞌ ca naca xé̱zredu caꞌ zaj nababa naꞌ buluchálaj bénneache ca naca xel-la waca chee̱ꞌ.
15 Jesús bsé̱dene̱ꞌ benneꞌ caꞌ tu tu lu xudauꞌ caꞌ,
naꞌ xúgute̱ꞌ belúe láꞌane̱ꞌ Le̱ꞌ.
Jesús dxexezrine̱ꞌ Nazaret
16 Nadxa Jesús bezrine̱ꞌ Nazaret,
xe̱zre naga bgule̱ꞌ.
Lu zra dxulupáꞌana benneꞌ judío caꞌ guxúꞌe̱ lu xuꞌu ga naꞌ dxelezraga benneꞌ judío caꞌ,
ca xuꞌu lawe̱ꞌ dxune̱ꞌ,
chee̱ gulabe̱ꞌ da naxúaj na lu xiche chee̱ Dios.
17 Buludée̱ꞌ Lu ne̱ꞌe̱ xiche naga naxúaj dizraꞌ bzuaj Isaías,
benneꞌ bchálaje̱ꞌ waláz chee̱ Dios,
naꞌ gate gusálaje̱ꞌ na,
naꞌ blabe̱ꞌ naga naxúaj da dxenná:
18 Beꞌ Láꞌazxa chee̱ Xránadxu zúale̱ne̱ꞌ nedaꞌ,
laweꞌ da guqué̱ꞌe̱ nedaꞌ chee̱ guchálajle̱naꞌ benneꞌ baxacheꞌ caꞌ dizraꞌ chaweꞌ chee̱ꞌ.
Gusel-le̱ꞌ nedaꞌ chee̱ xexunaꞌ benneꞌ caꞌ quebe chaweꞌ zaj zue̱ꞌ,
ne chee̱ guzendaꞌ benneꞌ ba zaj nadxéaje̱ꞌ lu da zrinnaj,
waca xelelé̱ꞌ,
ne chee̱ xexunaꞌ lau benneꞌ la chul-la caꞌ,
ne chee̱ guseláꞌ benneꞌ dxelezaca ziꞌe̱,
19 ne chee̱ guzendaꞌ bénneache ba bzrin zra Xránadxu Dios gucáꞌane̱ꞌ le̱ꞌ chaweꞌ.
20 Nadxa Jesús butube̱ꞌ xiche naꞌ,
naꞌ bdee̱ꞌ na lu naꞌ benneꞌ dxuxúe̱ꞌ xuꞌu naꞌ,
naꞌ bebéꞌe̱.
Xúgute̱ benneꞌ zaj zre̱ꞌe̱ lu xuꞌu naꞌ dxelenné̱ꞌe̱ Le̱ꞌ,
21 naꞌ Jesús guzú lawe̱ꞌ dxe̱ꞌe̱ benneꞌ caꞌ:
―Naꞌa zra guca ca da naxúaj na laule leꞌe.
22 Xúgute̱ꞌ gulenné̱ꞌ chaweꞌ chee̱ Jesús,
ne belexebánene̱ꞌ ca naca dizraꞌ chaweꞌ da dxuchalaje̱ꞌ.
Naꞌ buluche̱be ljwezre̱ꞌ:
―¿Quegá benneꞌ nigá zriꞌine José?
23 Jesús guzre̱ꞌ le̱ꞌ:
―Da líqueze leꞌe we̱le nedaꞌ dizraꞌ nigá:
Lueꞌ,
benneꞌ dxexúnuꞌ benneꞌ we̱ꞌ caꞌ,
bexún cuinuꞌ,
ne xe̱le nedaꞌ:
Ca da bénentuꞌ be̱nuꞌ lu xe̱zre Capernaum,
cáꞌanqueze be̱n na lázriuꞌ nigá naꞌa.
24 Nadxa gunná Jesús:
―Da li dxapaꞌ leꞌe,
tu benneꞌ dxuchálaje̱ꞌ waláz chee̱ Dios,
quebe nu dxue le̱ꞌ ba láꞌana lazrie̱ꞌ.
25 Dxapaꞌ leꞌe,
gulezráꞌ nuꞌula zan ba gulate benneꞌ chee̱ꞌ lu xe̱zr la xu Israel ca lu zra guzúa Elías,
benneꞌ bchálaje̱ꞌ waláz chee̱ Dios,
gate naꞌ quebe guca xiuj chun iza xugachaj,
ne gúcale̱ꞌe̱ gubinaꞌ ca naca xe̱zr la xu naꞌ.
26 Dios quebe gusel-le̱ꞌ Elías lau netú nuꞌula,
nate benneꞌ chee̱ꞌ,
zue̱ꞌ xe̱zr la xu Israel.
Gusel-le̱ꞌ le̱ꞌ lau tu nuꞌula,
nate benneꞌ chee̱ꞌ,
zue̱ꞌ lu xe̱zre Sarepta,
da zua na gagu naga dxeꞌ xe̱zre Sidón.
27 Cáꞌanqueze gulezráꞌ benneꞌ zan benneꞌ dxeledxéꞌene̱ꞌ we̱ꞌ guzruꞌ lu xe̱zr la xu Israel ca lu zra guzúa Eliseo,
benneꞌ bchálaje̱ꞌ waláz chee̱ Dios,
naꞌ netúe̱ꞌ quebe bexaque̱ꞌ.
Tuze Naamán,
benneꞌ xe̱zr la xu Siria bexaque̱ꞌ.
28 Gate belén benneꞌ caꞌ zaj zre̱ꞌe̱ xuꞌu naꞌ da nigá,
naꞌ belezráꞌale̱ꞌe̱.
29 Naꞌ gulase̱ꞌ,
ne belexebéaje̱ꞌ Jesús xe̱zre naꞌ,
naꞌ beleché̱ꞌe̱ Le̱ꞌ dxuꞌa chjéaj naga zria xe̱zre naꞌ,
chee̱ xuludxixre̱ꞌ Le̱ꞌ naꞌ.
30 Naꞌ Jesús bedée̱ꞌ ládujla benneꞌ caꞌ,
naꞌ bezé̱ꞌe̱ zexíaje̱ꞌ.
Jesús Proclama el Cumplimiento de las Escrituras
Jesús dxexune̱ꞌ tu benneꞌ xuꞌe̱ beꞌ xriwe̱ꞌ
31 Nadxa Jesús bexíaje̱ꞌ Capernaum,
tu xe̱zre nababa Galilea,
naꞌ guzú lawe̱ꞌ dxusé̱dene̱ꞌ benneꞌ caꞌ lu zra láꞌazxa chee̱ judío caꞌ.
32 Belexebánene̱ꞌ ca naca da dxusé̱dene̱ꞌ,
laweꞌ da dxuchálaje̱ꞌ ca tu benneꞌ nape̱ꞌ xel-la dxenná bea.
―Bsan netuꞌ.
¿Bizr chee̱ naꞌ dxunuꞌ netuꞌ ze̱de,
Jesús,
benneꞌ Nazaret?
¿Zaꞌu guzría xiꞌu netuꞌ?
Nedaꞌ núnbeꞌa Lueꞌ,
ne nezdaꞌ nacuꞌ benneꞌ láꞌazxa chee̱ Dios.
35 Jesús gudil-le̱ꞌ beꞌ xriwe̱ꞌ naꞌ,
dxenné̱ꞌ:
―Zrize guzúa.
Bsan benneꞌ biu nigá.
Nadxa beꞌ xriwe̱ꞌ naꞌ gudín na bénneaꞌ xu lau xúgute̱ benneꞌ caꞌ,
naꞌ bedxúaj na lu xichaj lázrdau bénneaꞌ,
ne quebe bi be̱n na chee̱ꞌ.
36 Xúgute̱ꞌ belexebánene̱ꞌ,
naꞌ gulé̱ꞌ ljwezre̱ꞌ:
―¿Bizra dizraꞌ da caní?
Benneꞌ nigá dxenná béꞌene̱ꞌ beꞌ xriwe̱ꞌ caꞌ nen dute̱ xel-la dxenná bea chee̱ꞌ,
ne nen xel-la waca,
naꞌ beꞌ xriwe̱ꞌ caꞌ dxeledxúaj na.
37 Naꞌ buluchálaje̱ꞌ ca naca chee̱ Jesús xúgute̱ lu xe̱zre caꞌ zaj nababa naꞌ.
Jesús dxexune̱ꞌ xrna zruꞌula Pedro
38 Nadxa bedxúaj Jesús lu xuꞌu naꞌ,
naꞌ guxúꞌe̱ lizre Simón.
Xrna zruꞌula Simón naꞌ quebe chaweꞌ zue̱ꞌ,
xúꞌule̱ꞌe̱ da la,
naꞌ gulataꞌ xuene̱ꞌ Jesús xexune̱ꞌ le̱ꞌ.
39 Jesús gubigue̱ꞌe̱ cuite̱ꞌ,
naꞌ gudil-le̱ꞌ da la naꞌ,
naꞌ bedxúaj na.
Ca náꞌqueze bexásate̱ꞌ,
naꞌ guzú lawe̱ꞌ dxuseniꞌe̱ da xelawe̱ꞌ.
Jesús dxexune̱ꞌ benneꞌ zan quebe chaweꞌ zaj zue̱ꞌ
40 Ca dxebía gubizra,
benneꞌ caꞌ zaj nnitaꞌ benneꞌ quebe chaweꞌ zaj zue̱ꞌ lizre̱ꞌ belúꞌe̱ le̱ꞌ lau Jesús,
naꞌ Le̱ꞌ bze̱ ne̱ꞌe̱ tu tu benneꞌ caꞌ,
ne bexune̱ꞌ le̱ꞌ.
41 Cáꞌanqueze zánete̱ beꞌ xriwe̱ꞌ belexedxúaj na lu xichaj lázrdau benneꞌ caꞌ.
Dxelenná na:
―Lueꞌ nacuꞌ Zriꞌine Dios.
Jesús gudil-le̱ꞌ beꞌ xriwe̱ꞌ caꞌ.
Quebe be̱ꞌe̱ na lataj xelenné̱ na,
laweꞌ da zaj neze na naca Le̱ꞌ Cristo.
Jesús dxuchálaje̱ꞌ naga nababa Galilea
42 Ca dxaníꞌsise̱ꞌ,
bdxuaj Jesús xe̱zre naꞌ,
guxíaje̱ꞌ naga xeajsúe̱ꞌ tuze̱ꞌ.
Naꞌ benneꞌ caꞌ belexexílaje̱ꞌ Le̱ꞌ,
naꞌ belezrine̱ꞌ xuluzague̱ꞌ Le̱ꞌ chee̱ quebe xeze̱ꞌe̱.
43 Jesús gunné̱ꞌ:
―Dxun na ba xen guzendaꞌ bénneache xezícadxa xe̱zrdu caꞌ ca dxenná bea Dios,
laweꞌ da chee̱ gunaꞌ caní gusel-le̱ꞌ nedaꞌ.
44 Caꞌan guca gudá Jesús ca naca xe̱zre caꞌ zaj nababa Galilea,
naꞌ bchálaje̱ꞌ lu xuꞌu naga dxelezraga judío caꞌ lu xe̱zre caꞌ.