Dxaca lazreꞌ da xriwe̱ꞌ gun na baga Jesús zria
4
Nadxa Beꞌ Láꞌazxa chee̱ Dios la guché̱ꞌte̱ꞌ Jesús le̱ꞌe̱ xixreꞌ laweꞌ lataj naga gúe lazreꞌ da xriwe̱ꞌ gun zréaje na Le̱ꞌ.
2 Quebe bi gudagu Jesús chua zra chua xe̱la,
naꞌ ca gudé naꞌ gudune̱ꞌ.
3 Nadxa da xriwe̱ꞌ bzrin na naga zua Jesús chee̱ gun zréaje na Le̱ꞌ,
naꞌ dxe̱ na Le̱ꞌ:
―Che Lueꞌ nacuꞌ Zriꞌine Dios,
gunná beꞌe xiaj caní xelexaca na xeta xtila.
4 Jesús beche̱be̱ꞌ:
―Lu xiche chee̱ Dios dxenné̱ꞌ:
“Quebe gaca ban nu benneꞌ gawe̱ꞌ xétaze,
san nen xúgute̱ dizraꞌ chee̱ Dios gaca bane̱ꞌ.”
5 Nadxa da xriwe̱ꞌ guché̱ na Jesús lu xe̱zre láꞌazxa Jerusalén,
naꞌ bzua na Le̱ꞌ xíchajte̱ xudauꞌ,
6 naꞌ guzre na Le̱ꞌ:
―Che Lueꞌ nacuꞌ Zriꞌine Dios,
guxriteꞌ nigá,
laweꞌ da dxenná lu xiche chee̱ Dios:
Dios nna béꞌene̱ꞌ gubáz chee̱ xabáa chee̱ꞌ caꞌ
chee̱ xelácale̱ne̱ꞌ Lueꞌ.
Welexechise̱ꞌ Lueꞌ nen ne̱ꞌe̱
chee̱ quebe gunuꞌ ziꞌ niꞌu lu xiaj caꞌ.
7 Naꞌ gunná Jesús:
―Cáꞌanqueze dxenná lu xiche chee̱ Dios,
dxe̱ꞌe̱ bénneache:
“Quebe guchínenuꞌ Xranuꞌ Dios cáte̱ze dxaca lazruꞌ.”
8 Nadxa da xriwe̱ꞌ guché̱ na Le̱ꞌ tu lu xiꞌa sibe,
naꞌ bleꞌe na Le̱ꞌ ca naca xúgute̱ cueꞌ xe̱zr la xu zaj nnita lu xe̱zr la xu,
ne ca naca xel-laꞌ guniꞌa chee̱ na.
9 Naꞌ gunná da xriwe̱ꞌ,
dxe̱ na Le̱ꞌ:
―Xúgute̱ da caní gunnaꞌ chiuꞌ che guzú zribuꞌ gucáꞌana szrenuꞌ nedaꞌ.
10 Nadxa Jesús guzre̱ꞌ na:
―Bexíaj,
da xriwe̱ꞌ,
laweꞌ da dxenná Dios lu xiche chee̱ꞌ,
dxe̱ꞌe̱ bénneache:
“Bcaꞌana szren Xranuꞌ Dios,
ne be láꞌana tuze Le̱ꞌ.”
11 Nadxa da xriwe̱ꞌ becuasa na lau Jesús,
naꞌ belezrín gubáz chee̱ xabáa chee̱ Dios,
ne bulunézruje̱ꞌ da dxechine Jesús.
Dxuzú lau Jesús dxuchálaje̱ꞌ xrtizraꞌ Dios naga nababa Galilea
12 Gate ben Jesús xuꞌu Juan lizre xia,
naꞌ bezé̱ꞌe̱ zexíaje̱ꞌ naga nababa Galilea.
13 Quebe bgaꞌana Jesús xe̱zre Nazaret.
Xeajsúe̱ꞌ lu xe̱zre Capernaum da zua na dxuꞌa nísadauꞌ naga zaj zraꞌ xrtia Zabulón,
ne xrtia Neftalí.
14 Caní guca ca da bzuaj Isaías,
benneꞌ bchálaje̱ꞌ waláz chee̱ Dios,
gunné̱ꞌ:
15 Lu xe̱zr la xu chee̱ Zabulón,
ne chee̱ Neftalí,
naga zrua neza da zeaj na dxuꞌa nísadauꞌ,
chaláꞌa naga dxalaj gubizra xechaláꞌa xe̱gu Jordán.
Naga nababa Galilea,
naga zaj zraꞌ benneꞌ quebe zaj naque̱ꞌ judío.
16 Bénneache zaj zraꞌ lu da chul-la beleléꞌene̱ꞌ tu da dxusaníle̱ꞌe̱ na,
naꞌ benneꞌ zaj zraꞌ naga xuꞌu zrul-la chee̱ xel-laꞌ gute
ba bsaníꞌ tu xiꞌ naga zaj zre̱ꞌe̱.
17 Ca lu zra naꞌ guzú lau Jesús dxeguꞌe̱ lban,
dxenné̱ꞌ:
―Le xebíꞌi lázrele,
laweꞌ da ba zua gáguze zra nna bea Dios lu xe̱zr la xu nigá.
Jesús dxuláwizre̱ꞌ tapa benneꞌ wezén bela
18 Gate naꞌ zeaj Jesús dxuꞌa nísadauꞌ ga nababa Galilea,
naꞌ bléꞌene̱ꞌ chupa benneꞌ.
Tue̱ꞌ le̱ꞌ Simón,
ne zua xetú le̱ꞌ Pedro,
naꞌ xetúe̱ꞌ le̱ꞌ Andrés,
biche Simón naꞌ.
Benneꞌ caní zaj naque̱ꞌ benneꞌ wezén bela,
naꞌ dxuluzale̱ꞌ xixruj bela chee̱ꞌ lu nisa.
19 Nadxa Jesús dxe̱ꞌe̱ benneꞌ caní:
―Le gun nedaꞌ tuze,
naꞌ gunaꞌ leꞌe benneꞌ gutúpale chiaꞌ bénneache ca dxunle dxezenle bela.
20 La bulucáꞌanate̱ꞌ xixruj chee̱ꞌ caꞌ,
naꞌ zjácale̱ne̱ꞌ Jesús.
21 Xelátedauze gusáꞌaque̱ꞌ,
naꞌ bleꞌe Jesús xechupa benneꞌ.
Tue̱ꞌ le̱ꞌ Jacobo,
ne xetúe̱ꞌ le̱ꞌ Juan,
biche Jacobo nigá.
Zaj naque̱ꞌ zriꞌine Zebedeo,
ne zaj xuꞌe̱ tu lu da dxedá laweꞌ nísadauꞌ nen xre̱ꞌ,
dxelexún chawe̱ꞌ xixruj chee̱ꞌ.
Jesús bláwizre̱ꞌ le̱ꞌ,
22 naꞌ la bulucáꞌanate̱ꞌ da dxedá laweꞌ nísadauꞌ naꞌ,
ne xre̱ꞌ,
naꞌ zjácale̱ne̱ꞌ Jesús.
Jesús dxusé̱dene̱ꞌ bénneache naga nababa Galilea
23 Zeaj Jesús xúgute̱ xe̱zre zaj nababa Galilea,
naꞌ tu tu xe̱zre caꞌ dxuzéajniꞌine̱ꞌ bénneache lu xuꞌu caꞌ naga dxulucáꞌana szren benneꞌ judío caꞌ Dios.
Naꞌ dxeguꞌe̱ lban ca nna bea Dios,
ne dxexune̱ꞌ xúgute̱ benneꞌ caꞌ ca zaj naca xízrawe̱ꞌ cha chee̱ꞌ.
24 Caꞌan guca,
xúgute̱ benneꞌ chee̱ xe̱zr la xu Siria belenne̱ꞌ ca da dxun Jesús,
naꞌ belezrine̱ꞌ lau Jesús,
zaj naché̱ꞌe̱ benneꞌ we̱ꞌ caꞌ,
benneꞌ zaj xuꞌe̱ xízrawe̱ꞌ,
ne benneꞌ zaj zue̱ꞌ lu xel-laꞌ dxudía,
ne benneꞌ zaj xuꞌe̱ beꞌ xriwe̱ꞌ,
ne benneꞌ zaj xuꞌe̱ chunaꞌ,
ne benneꞌ zaj naxrúꞌunie̱ꞌ bine,
naꞌ bexún Jesús xúgute̱ benneꞌ caní.
25 Zjácale̱ benneꞌ zan Le̱ꞌ,
benneꞌ zaj nababe̱ꞌ xe̱zre caꞌ zaj nababa Galilea,
ne benneꞌ záꞌaque̱ꞌ xe̱zre Decápolis caꞌ,
ne benneꞌ Jerusalén,
ne benneꞌ zaj nababe̱ꞌ xe̱zre caꞌ zaj nababa Judea,
ne benneꞌ záꞌaque̱ꞌ xechaláꞌala xe̱gu Jordán naga dxalaj gubizra.