Juan dxeguꞌe̱ lban le̱ꞌe̱ xixreꞌ laweꞌ lataj
3
Ca lu zra caꞌ blaꞌ Juan,
bénneaꞌ bchue̱ꞌ bénneache nisa,
dxeguꞌe̱ lban le̱ꞌe̱ xixreꞌ laweꞌ lataj naga nababa Judea.
2 Dxenné̱ꞌ:
―Le xebíꞌi lazreꞌ laweꞌ da ba zua gáguze zra nna bea Dios lu xe̱zr la xu nigá.
3 Juan nigá naque̱ꞌ bénneaꞌ bchalaj Isaías chee̱ꞌ.
Isaías bchálaje̱ꞌ waláz chee̱ Dios gate bzuaje̱ꞌ caní:
Dxene chiꞌi benneꞌ dxebezre xe̱ꞌe̱ le̱ꞌe̱ xixreꞌ laweꞌ lataj,
dxenné̱ꞌ:
Le gucáꞌana chaweꞌ neza naga te Xránadxu.
Le xulí neza lase caꞌ lau Le̱ꞌ naga tée̱ꞌ.
4 Zra lana Juan nigá nune na xicha zra camello,
ne bazxu dxuꞌa le̱ꞌe̱ chee̱ꞌ naca na xide,
naꞌ dxawe̱ꞌ biche xuaj,
ne bzrínaꞌdauꞌ chee̱ bézudauꞌ.
5 Belezrín benneꞌ belenne̱ꞌ ca da dxuchalaj Juan,
benneꞌ záꞌaque̱ꞌ xe̱zre Jerusalén,
ne benneꞌ chee̱ xúgute̱ xe̱zre caꞌ zaj nababa Judea,
ne benneꞌ záꞌaque̱ꞌ xé̱zredu caꞌ zaj nnita gáguze xe̱gu Jordán.
6 Ca gulexrúale̱pe̱ꞌ dul-la chee̱ꞌ,
Juan nigá bchue̱ꞌ benneꞌ caꞌ nisa lu xe̱gu Jordán.
7 Gate bleꞌe Juan benneꞌ zan benneꞌ xudauꞌ fariseo,
ne benneꞌ xudauꞌ saduceo záꞌaque̱ꞌ chee̱ xelexedxúe̱ꞌ nisa,
naꞌ guzre̱ꞌ benneꞌ caꞌ:
―Leꞌe,
be̱ snia.
¿Zua nu guzre leꞌe guzrúnnajle da ba xaꞌ da zaꞌ?
8 Le gun da xrlátaje da xelunna bea na ba bebíꞌi lázrele.
9 Quebe guéquele lale,
dxennale leꞌeze:
“Nalatuꞌ laweꞌ da nácantuꞌ xrtia Abraham.”
Nedaꞌ dxapaꞌ leꞌe:
Dios waca xexune̱ꞌ xiaj caní zriꞌine xrtia Abraham.
10 Leꞌe nácale ca xaga caꞌ.
Xia waga bache nalá na chee̱ chugu na xaga caꞌ,
naꞌ xúgute̱ xaga caꞌ quebe dxelebía na da zixre chaweꞌ welechugue na,
naꞌ xelezxe na lu xiꞌ.
11 Da li nedaꞌ dxuchúaꞌ leꞌe nisa,
da dxunna bea na ba bebíꞌi lázrele,
san Bénneaꞌ ze̱ꞌe̱ ca te chiaꞌ nedaꞌ,
Le̱ꞌ gune̱ꞌ ca da zéaje̱ xel-laꞌ dxedxúa nisa,
guzúe̱ꞌ leꞌe Dios Beꞌ Láꞌazxa,
ne xiꞌ chee̱ꞌ.
Benneꞌ nigá nácadxe̱ꞌ blau ca nedaꞌ,
naꞌ quebe zacaꞌ cuéajzaꞌ zrele̱ꞌ xuꞌu niꞌe̱.
12 Cáꞌanqueze nácale ca zruaꞌ xtila.
Benneꞌ nigá ba nuꞌe̱ da dxun beꞌ,
cuéaje̱ꞌ xrte zruaꞌ xtila naꞌ,
naꞌ xebéaje̱ꞌ chaláꞌala xizre chee̱ na,
naꞌ xuzrá chawe̱ꞌ zruaꞌ xtila naꞌ lu daꞌa chee̱ na,
san guzezxe̱ꞌ xizre naꞌ lu xiꞌ da quebe xexula na.
Da guca gate gudxúa Jesús nisa
13 Nadxa Jesús bezé̱ꞌe̱ naga nababa Galilea,
naꞌ bezrine̱ꞌ dxuꞌa xe̱gu Jordán naga zua Juan chee̱ guchúe̱ꞌ Le̱ꞌ nisa.
14 Nédxute̱ Juan quebe guca lazre̱ꞌ,
naꞌ dxe̱ꞌe̱ Jesús:
―Lueꞌ dxal-laꞌ guchúꞌu nedaꞌ nisa.
Quebe zacaꞌ nedaꞌ guchúaꞌ Lueꞌ nisa.
15 Jesús guzre̱ꞌ le̱ꞌ:
―Be̱ꞌ lataj gaca caní naꞌa.
Dxun na ba xen gundxu xúgute̱ da xrlátaje lau Dios.
Nadxa Juan be̱ne̱ꞌ caꞌ.
16 Gate bexuzre gudxúa Jesús nisa,
naꞌ la bxálajte̱ xabáa,
naꞌ bleꞌe Juan Beꞌ Láꞌazxa chee̱ Dios dxétaje̱ꞌ ca tu gugu chíchidauꞌ,
zeajsúabaꞌ lawe Jesús.
17 Nadxa ben tu chiꞌi lu beꞌ,
gunné̱ꞌ:
―Benneꞌ nigá naque̱ꞌ Zríꞌinequezaꞌ nazríꞌite̱ lazraꞌ.
Dxezaca ba lázrele̱naꞌ Le̱ꞌ.