Dxelezrín benneꞌ sina caꞌ lu xe̱zre Jerusalén
2
Bidauꞌ Jesús gúlajbeꞌ lu xe̱zre Belén da nababa xe̱zr la xu Judea gate dxenná bea benneꞌ le̱ꞌ Herodes ga naꞌ.
Nadxa belezrín benneꞌ caꞌ lu xe̱zre Jerusalén,
benneꞌ záꞌaque̱ꞌ chaláꞌa naga dxalaj gubizra,
zaj naque̱ꞌ benneꞌ sina gula.
Visita de los magos (Mateo 2.1-23)
―¿Ga zua bidu naꞌ ba gúlajbeꞌ chee̱ gácabeꞌ benneꞌ nna béꞌene̱ꞌ benneꞌ judío caꞌ?
Gate zuantuꞌ chaláꞌa naga dxalaj gubizra bléꞌentuꞌ belaj chee̱beꞌ,
naꞌ blaꞌntuꞌ nigá chee̱ gúe láꞌana gúe szrentuꞌ-beꞌ.
3 Ca guneze Herodes,
benneꞌ wenná bea,
da nigá,
naꞌ guzúe̱ꞌ ste̱be,
ne cáꞌanqueze guca chee̱ xúgute̱ benneꞌ zaj zre̱ꞌe̱ Jerusalén.
4 Nadxa Herodes,
wenná bea naꞌ,
btupe̱ꞌ xúgute̱ benneꞌ xíchaje̱ chee̱ bxruze caꞌ,
ne benneꞌ dxuluxuzájle̱ꞌe̱ da nadxixruj bea Dios,
naꞌ gunábene̱ꞌ benneꞌ caꞌ:
―¿Gazra naꞌ galaj Cristo?
5 Benneꞌ caní gulé̱ꞌe̱ le̱ꞌ:
―Lu xe̱zre Belén da nababa xe̱zr la xu Judea,
laweꞌ da bzuaj caní tu benneꞌ bchálaje̱ꞌ waláz chee̱ Dios,
gate naꞌ gunné̱ꞌ:
6 Lueꞌ,
Belén chee̱ xe̱zre caꞌ zaj nababa na Judá,
nacuꞌ lueꞌ xe̱zre da quebe naca na da bzé̱bedxa
ládujla benneꞌ caꞌ dxelenná beꞌene̱ꞌ xe̱zr la xu Judá nigá,
laweꞌ da ládujla bénneache chiuꞌ dxuaj tu benneꞌ nna beꞌe̱,
naꞌ guxúequeze̱ꞌ bénneache chiaꞌ,
benneꞌ Israel.
7 Nadxa Herodes,
wenná bea naꞌ,
bláwizre̱ꞌ bagácheze benneꞌ sina gula caꞌ,
naꞌ gunábene̱ꞌ le̱ꞌ bátala bleꞌe lau belaj naꞌ beleléꞌene̱ꞌ.
8 Nadxa gusel-le̱ꞌ benneꞌ caꞌ chjaque̱ꞌ xe̱zre Belén,
ne guzre̱ꞌ le̱ꞌ:
―Le chjaca naꞌ,
ne le naba xanneꞌ chee̱ bidu naꞌ,
naꞌ ca cheajxrácale-beꞌ,
naꞌ le guzén nedaꞌ chee̱ chaꞌa nedaꞌ gúe láꞌana gúe szrenaꞌ-beꞌ.
9 Ca bexuzre belén benneꞌ sina gula ca da gunná Herodes,
wenná bea,
nadxa besiáꞌque̱ꞌ,
naꞌ belaj da beleléꞌene̱ꞌ gate zaj zre̱ꞌe̱ chaláꞌa naga dxalaj gubizra zeaj na lau le̱ꞌ,
naꞌ bzrinte̱ na,
ne guzúa na naga zua bidu naꞌ.
10 Gate benneꞌ sina gula caꞌ beleléꞌene̱ꞌ belaj naꞌ,
nadxa gulebéle̱ꞌe̱ne̱ꞌ.
11 Ca guluꞌe̱ lu xuꞌu,
beleléꞌene̱ꞌ bidu naꞌ,
ne xrnabeꞌ María.
Nadxa buluzú zribe̱ꞌ dxelúe láꞌana dxelúe szrene̱ꞌ bidu naꞌ.
Nadxa gulesálaje̱ꞌ xua chee̱ꞌ caꞌ,
ne bulunézruje̱ꞌ-beꞌ oro,
ne xalaj zixre,
ne mirra da naca na zichaj.
12 Ca gudé naꞌ,
Dios guzre̱ꞌ benneꞌ caꞌ lu bchigala québedxa xelexedée̱ꞌ naga zua Herodes.
Chee̱ le̱ na belexequé̱ꞌe̱ neza xula,
belexezrine̱ꞌ lazrie̱ꞌ.
Ca guca beleché̱ꞌe̱ Jesús lu xe̱zr la xu Egipto
13 Ca gudé besíꞌaca benneꞌ sina gula caꞌ,
nadxa tu gubáz chee̱ xabáa,
gubáz chee̱ Xránadxu bleꞌe lawe̱ꞌ José lu bchigala,
naꞌ guzre̱ꞌ le̱ꞌ:
―Guxasa.
Becáꞌa bidu naꞌ,
ne xrnabeꞌ,
naꞌ le chjaca lu xe̱zr la xu Egipto,
naꞌ xegáꞌanuꞌ ga naꞌ ca zrindxa zra xapaꞌ lueꞌ xetú.
Caní dxal-laꞌ gunuꞌ laweꞌ da wexilaj Herodes bidu nigá chee̱ gutie̱ꞌ-beꞌ.
14 Nadxa José guxase̱ꞌ,
naꞌ chizrélala beche̱ꞌe̱ bidu naꞌ,
ne xrnabeꞌ,
naꞌ bexuꞌe̱-beꞌ lu xe̱zr la xu Egipto.
15 Gulezré̱ꞌe̱ naꞌ ca bzrindxa zra gute Herodes.
Caní guca ca naca da gunná Xránadxu lu dxuꞌa benneꞌ bchálaje̱ꞌ waláz chee̱ꞌ,
gunné̱ꞌ:
“Xuláwizraꞌ bi biu chiaꞌ chee̱ xedxúajbeꞌ lu xe̱zr la xu Egipto.”
Dxenná beꞌe Herodes benneꞌ caꞌ xelútie̱ꞌ bidu biu caꞌ
16 Gate gúquebeꞌe Herodes gulezí xe̱ benneꞌ sina caꞌ le̱ꞌ,
naꞌ bzráꞌale̱ꞌe̱,
ne gunná béꞌene̱ꞌ benneꞌ caꞌ xelútie̱ꞌ xúgute̱ bi biu dxéꞌenedauꞌ,
ca zrinte̱ bidu caꞌ ba zaj zua chup iza,
bidu caꞌ zaj zrabeꞌ xe̱zre Belén,
ne bidu caꞌ zaj zrabeꞌ lu xé̱zredu caꞌ zaj naxechaj na xe̱zre Belén naꞌ.
Caní be̱n Herodes cáte̱ze buluzén benneꞌ sina gula caꞌ le̱ꞌ ca naca zra naꞌ beleléꞌene̱ꞌ belaj naꞌ.
17 Caꞌan guca ca da bzuaj Jeremías,
bénneaꞌ bchálaje̱ꞌ waláz chee̱ Dios ba guca zanꞌ iza,
gunné̱ꞌ:
18 Guca tu schaga lu xe̱zre Ramá.
Guca webezre,
ne gulebezre xache̱ꞌ.
Raquel naꞌ dxebézrele̱ꞌe̱ chee̱ bi chee̱ꞌ caꞌ.
Québequeze dxaca lazre̱ꞌ xexaca zrene̱ꞌ
laweꞌ da ba gulate bi chee̱ꞌ caꞌ.
19 Ca gudé gute Herodes,
naꞌ tu gubáz chee̱ xabáa,
gubáz chee̱ Xránadxu bleꞌe lawe̱ꞌ José lu bchigala naga zue̱ꞌ Egipto,
naꞌ guzre̱ꞌ le̱ꞌ:
20 ―Guxásache.
Beche̱ꞌe̱ bidu chiuꞌ nigá,
ne xrnabeꞌ.
Bexíaj lu xe̱zr la xu Israel,
laweꞌ da ba gulate benneꞌ caꞌ gulaca lazre̱ꞌ xelútie̱ꞌ bidu nigá.
21 Nadxa guxasa José,
naꞌ beche̱ꞌe̱ bidu naꞌ,
ne xrnabeꞌ,
naꞌ belexezrine̱ꞌ lu xe̱zr la xu Israel.
22 Ca guneze José dxenná bea Arquelao naga nababa Judea waláz chee̱ xre̱ꞌ,
Herodes naꞌ,
naꞌ bzrebe José xexíaje̱ꞌ ga naꞌ.
Nadxa bexíaje̱ꞌ naga nababa Galilea ca da ba guzre gubáz chee̱ xabáa le̱ꞌ lu bchigala.
23 Ca bezrine̱ꞌ naꞌ,
naꞌ bexíaje̱ꞌ cheajxezúe̱ꞌ lu xe̱zre Nazaret.
Caní guca ca da gulenná benneꞌ caꞌ buluchálaje̱ꞌ waláz chee̱ Dios,
gulenné̱ꞌ Jesús nigá si le̱ꞌ benneꞌ Nazaret.