DIZRAꞌ CHAWEꞌ CA NACA CHEE̱ JESUCRISTO DA BZUAJ SAN MARCOS
Da bchalaj Juan, benneꞌ bchue̱ꞌ bénneache nisa
1
Caní guzú lau dizraꞌ chaweꞌ ca naca chee̱ Jesucristo,
Zriꞌine Dios.
2 Bzrin lazreꞌ da bzuaj Isaías,
benneꞌ bchálaje̱ꞌ waláz chee̱ Dios,
ca da gunná Dios:
¡Le nnaꞌxque nigá!
Nedaꞌ dxesel-laꞌ benneꞌ gubáz chiaꞌ,
benneꞌ cuía lawe̱ꞌ lau Lueꞌ.
Bénneaꞌ gupé̱ꞌe̱ neza naga teuꞌ chee̱ ilúnbeꞌe bénneache Lueꞌ.
3 Welénqueze chiꞌi benneꞌ dxebezre xe̱ꞌe̱ le̱ꞌe̱ xixreꞌ laweꞌ lataj.
Dxenné̱ꞌ:
“Le gupáꞌa neza naga te Xránadxu lu xichaj lázrdaule.
Le xebéaj li neza lase chee̱ꞌ caꞌ.”
4 Caní guca laweꞌ da blaꞌ Juan le̱ꞌe̱ xixreꞌ laweꞌ lataj,
naꞌ bchálaje̱ꞌ dizraꞌ chee̱ Dios,
ne gunné̱ꞌ dxal-laꞌ xeledxúa bénneache nisa,
naꞌ bchue̱ꞌ le̱ꞌ nisa,
benneꞌ caꞌ belexebíꞌi lazre̱ꞌ chee̱ gunite lau Dios dul-la da zaj nabagueꞌ.
Jesús es bautizado (Marcos 1.4-11)
5 Caꞌan guca,
guledxúaj bénneache zan lu xe̱zre Jerusalén,
ne xúgute̱ xe̱zre caꞌ zaj nababa Judea,
naꞌ xjaque̱ꞌ naga zua Juan,
naꞌ Juan nigá bchue̱ꞌ benneꞌ caꞌ nisa lu xe̱gu Jordán,
benneꞌ caꞌ gulexrúale̱pe̱ꞌ dul-la da zaj nabagueꞌ.
6 Caní guca zra lana Juan.
Gucue̱ꞌ zra lane̱ꞌ ladxeꞌ xicha zra camello,
bia dxelebía bénneache,
ne tu xpádxue̱ꞌ xide bchela le̱ꞌe̱.
Dxawe̱ꞌ biche xuaj,
ne dxéꞌaje̱ꞌ bzrínaꞌdauꞌ chee̱ bézudauꞌ.
7 Ca dxuchálaje̱ꞌ dizraꞌ chee̱ Dios,
dxenné̱ꞌ:
―Gate te chiaꞌ nedaꞌ,
naꞌ xida xetú benneꞌ,
bénneaꞌ nápadxe̱ꞌ xel-la dxenná bea ca nedaꞌ.
Quebe naca chiaꞌ xáchuaꞌ chee̱ lechjaꞌ zrele̱ꞌ.
8 Da lítega,
nedaꞌ bchuaꞌ leꞌe nisa.
Le̱ꞌ gune̱ꞌ da zéaje̱ xel-la dxedxúa nisa nigá,
guzúe̱ꞌ Beꞌ Láꞌazxa lu xichaj lázrdaule.
Ca da guca gate gudxúa Jesús nisa
9 Ca da guca lu zra caꞌ,
guzáꞌ Jesús lu xe̱zre Nazaret chee̱ ga nababa Galilea,
naꞌ bzrine̱ꞌ lau Juan.
Juan nigá bchue̱ꞌ Jesús nisa lu xe̱gu Jordán.
10 Gate bdxuaj Jesús lu nisa,
la bléꞌete̱ne̱ꞌ naxalaj xabáa,
ne bléꞌene̱ꞌ betaj Beꞌ Láꞌazxa.
Dxuléꞌe lawe̱ꞌ ca tu bgúgudu chiche,
naꞌ bzrine̱ꞌ ca li xichaj Jesús.
11 Ben tu chiꞌi da za xabáa,
da dxenná na:
―Lueꞌ nacuꞌ Zriꞌinaꞌ.
Nazríꞌidaꞌ Lueꞌ,
ne dxezaca ba lázrele̱daꞌ Lueꞌ.
Dxaca lazreꞌ Satanás da xriwe̱ꞌ gun ga baga Jesús dul-la
12 Nadxa Beꞌ Láꞌazxa guché̱ꞌe̱ Jesús le̱ꞌe̱ xixreꞌ laweꞌ lataj.
13 Guzúa Jesús le̱ꞌe̱ xixreꞌ laweꞌ lataj chua zra chua xe̱la.
Naꞌ bzrin Satanás da xriwe̱ꞌ,
ne guca lazreꞌ na gun na baga Jesús dul-la.
Guzúa Jesús naga zaj zraꞌ be̱ xixreꞌ be̱ snia,
naꞌ gubáz chee̱ xabáa chee̱ Dios gulácale̱ne̱ꞌ Jesús.
Jesús dxezú lawe̱ꞌ dxusé̱dene̱ꞌ bénneache
14 Ca gudé guxúꞌu Juan lizre xia,
naꞌ bzrin Jesús lu xe̱zre caꞌ zaj nababa Galilea,
ne dxuchálajle̱ne̱ꞌ bénneache dizraꞌ chaweꞌ ca dxenná bea Dios.
15 Gunná Jesús:
―Ba bzrin zra.
Ba zua báguze gate nna bea Dios xe̱zr la xu nigá.
Chee̱ le̱ naꞌ,
le xebíꞌi lazreꞌ,
ne le cheajlí lazreꞌ dizraꞌ chaweꞌ nigá.
Dxenné̱ Jesús tapa benneꞌ wezén bela chee̱ xelaque̱ Le̱ꞌ tuze
16 Gate gudá Jesús dxuꞌa nísadauꞌ chee̱ Galilea,
naꞌ bléꞌene̱ꞌ Simón,
ne Andrés,
biche Simón naꞌ.
Benneꞌ caní dxuluzale̱ꞌ xixruj bela chee̱ꞌ lu nísadauꞌ laweꞌ da zaj naque̱ꞌ wezén bela.
17 Naꞌ gunná Jesús:
―Le gun nedaꞌ tuze,
naꞌ guzúaꞌ leꞌe gácale we̱n zrin chiaꞌ.
Cheajxrile bénneache ca dxunle dxezenle bela.
18 La bulucáꞌanate̱ꞌ xixruj chee̱ꞌ caꞌ,
naꞌ zjácale̱ne̱ꞌ Jesús.
19 Nadxa gudé Jesús xelateꞌ ca naꞌla,
naꞌ bléꞌene̱ꞌ Jacobo,
ne Juan,
benneꞌ caꞌ zaj naque̱ꞌ zriꞌine Zebedeo.
Zaj zre̱ꞌe̱ lu da dxedá laweꞌ nísadauꞌ,
dxelexexune̱ꞌ xixruj bela chee̱ꞌ caꞌ.
20 Ca gunné̱ Jesús Jacobo,
ne Juan,
naꞌ la bulucáꞌanate̱ꞌ xre̱ꞌ Zebedeo ne we̱n zrin chie̱ꞌ caꞌ zaj zre̱ꞌe̱ lu da dxedá laweꞌ nísadauꞌ,
naꞌ zjácale̱ne̱ꞌ Jesús.
Tu benneꞌ xuꞌe̱ beꞌ xriwe̱ꞌ
21 Gate gul-la na guluꞌe̱ lu xe̱zre Capernaum,
naꞌ gate bzrin zra dxulupáꞌana benneꞌ judío caꞌ,
guxúꞌu Jesús lu xuꞌu naga dxelúe láꞌana judío caꞌ Dios,
ne bsé̱dene̱ꞌ benneꞌ caꞌ zaj zre̱ꞌe̱ naꞌ.
22 Belexebánene̱ꞌ ca naca da dxuse̱de Jesús le̱ꞌ laweꞌ da dxuchálaje̱ꞌ nen dute̱ xel-la dxenná bea,
ne quegá ca dxuluchalaj benneꞌ caꞌ dxuluxuzájle̱ꞌe̱ da nadxixruj bea Dios.
23 Nadxa blaꞌ tu benneꞌ xuꞌe̱ beꞌ xriwe̱ꞌ lu xuꞌu naꞌ,
naꞌ gudxezre xaꞌa na lu dxuꞌa bénneaꞌ.
24 Gunná na:
―¿Bizra nápantuꞌ chiuꞌ,
Jesús,
benneꞌ Nazaret?
¿Zaꞌu guzría xiꞌu netuꞌ?
Ba nézquezdaꞌ nu nacuꞌ.
Benneꞌ Láꞌazxa chee̱ Dios nacuꞌ.
25 Jesús gudil-le̱ꞌ na,
gunné̱ꞌ:
―Zrize guzúa.
Bedxúaj lu be̱l-laꞌ dxen chee̱ benneꞌ nigá.
26 Nadxa beꞌ xriwe̱ꞌ naꞌ bxrízele̱ꞌe̱ na bénneaꞌ,
ne gudxezre xáꞌale̱ꞌe̱ na,
naꞌ bedxúaj na.
27 Belexebánele̱ꞌe̱ xúgute̱ benneꞌ zaj zre̱ꞌe̱ naꞌ,
dxelé̱ ljwezre̱ꞌ:
―¿Bizra dizraꞌ cube da nigá?
Dute̱ xel-la dxenná bea chee̱ꞌ dxenná beꞌene̱ꞌ beꞌ xriwe̱ꞌ caꞌ,
naꞌ dxuluzúa na dizraꞌ chee̱ꞌ.
28 La bzrílujte̱ dizraꞌ chee̱ xel-la waca chee̱ Jesús du ca naca xe̱zre caꞌ zaj nababa Galilea.
Jesús dxexune̱ꞌ xrnaꞌ zruꞌula Pedro
29 Ca belexedxúaje̱ꞌ lu xuꞌu naꞌ chee̱ judío caꞌ,
naꞌ belezrine̱ꞌ lizre Simón,
ne Andrés.
Jacobo ne Juan dxelune̱ꞌ Jesús tu zren.
30 Lu xuꞌu naꞌ de̱ xrnaꞌ zruꞌula Simón,
xuꞌe̱ da la.
La buluchálajle̱te̱ꞌ Jesús ca dxaca chee̱ nuꞌula nigá.
31 Le̱ꞌ la bé̱xrute̱ꞌ ne̱ꞌe̱,
bechise̱ꞌ le̱ꞌ.
La bedxúajte̱ da la da xuꞌe̱,
naꞌ bseniꞌe̱ da gulawe̱ꞌ.
Jesús dxexune̱ꞌ bénneache zan
32 Ca gula guzré zra naꞌ,
ca guzría gubizra,
naꞌ guleché̱ꞌe̱ xúgute̱ benneꞌ we̱ꞌ lau Jesús,
ne benneꞌ caꞌ zaj xuꞌe̱ beꞌ xriwe̱ꞌ.
33 Ca naca benneꞌ xe̱zre gulebigue̱ꞌ dxa xuꞌu naga zua Jesús.
34 Jesús bexune̱ꞌ zánete̱ benneꞌ we̱ꞌ ca zaj naca xízrawe̱ꞌ da xuꞌu tu tue̱ꞌ,
ne bebéaje̱ꞌ zaneꞌ beꞌ xriwe̱ꞌ zaj xuꞌu bénneache caꞌ.
Quebe be̱ꞌe̱ lataj beꞌ xriwe̱ꞌ caꞌ xelenné̱ na laweꞌ da zaj núnbea na Le̱ꞌ.
Dxuchalaj Jesús lau bénneache zaj zre̱ꞌe̱ Galilea
35 Ca bebán Jesús bál-lala,
ne nachúl-late̱,
bedxúaje̱ꞌ guzé̱ꞌe̱ zéaje̱ꞌ tu lataj naga nadacheꞌ bénneache,
naꞌ bchálajle̱ne̱ꞌ Dios.
36 Simón Pedro,
ne benneꞌ caꞌ zaj zrále̱ne̱ꞌ le̱ꞌ belexexílaje̱ꞌ Jesús.
37 Ca xeajlexraque̱ꞌ Jesús,
naꞌ gulé̱ꞌe̱ Le̱ꞌ:
―Xúgute̱ bénneache dxelexexílaje̱ꞌ Lueꞌ.
38 Naꞌ gunná Jesús:
―Chéajdxu xe̱xre walizre caꞌ chee̱ guchálajle̱naꞌ benneꞌ caꞌ xrtizra Dios.
Chee̱ le̱ naꞌ beljaꞌ.
39 Lu xuꞌu caꞌ naga dxelúe láꞌana judío caꞌ Dios,
da caꞌ zaj zua tu tu xe̱zre caꞌ chee̱ ga nababa Galilea,
bchalaj Jesús dizraꞌ chee̱ Dios,
ne bebéaje̱ꞌ xízrawe̱ꞌ xriwe̱ꞌ caꞌ da zaj xuꞌu benneꞌ we̱ꞌ caꞌ.
Jesús dxexune̱ꞌ tu benneꞌ dxéꞌene̱ꞌ xízrawe̱ꞌ guzruꞌ
40 Nadxa bzrin lau Jesús tu benneꞌ dxéꞌene̱ꞌ xízrawe̱ꞌ guzruꞌ,
naꞌ bzu zribe̱ꞌ,
ne gutaꞌ xuene̱ꞌ Le̱ꞌ,
dxenné̱ꞌ:
―Che Lueꞌ dxaca lazruꞌ,
waca xexunuꞌ nedaꞌ.
41 Jesús bexache lazre̱ꞌ le̱ꞌ,
naꞌ bli ne̱ꞌe̱,
gudane̱ꞌ le̱ꞌ.
Dxenné̱ꞌ:
―Dxaca lazraꞌ.
Naꞌa dxexacuꞌ.
42 Ca gunné̱ꞌ caní,
la becuásate̱ xízrawe̱ꞌ naꞌ,
naꞌ begáꞌane̱ꞌ chaweꞌ.
43 Nadxa Jesús bsízrene̱ꞌ le̱ꞌ,
naꞌ besel-le̱ꞌ le̱ꞌ.
44 Caní gunné̱ꞌ:
―Quebe nu xuꞌu ca da guca chiuꞌ.
Guxíaj lau bxruze xeajléꞌe cuinuꞌ,
ne bnezruj ca naca da gunná beꞌe Moisés xelún benneꞌ caꞌ xelexexaque̱ꞌ.
Caní gunuꞌ chee̱ xeleléꞌene̱ꞌ ba bexacuꞌ naꞌa.
45 Nadxa benneꞌ nigá,
ca bezé̱ꞌe̱,
guzú lawe̱ꞌ dxuchálajle̱ne̱ꞌ tu tu benneꞌ ca guca chee̱ꞌ bexaque̱ꞌ.
Caꞌan guca,
québedxa guca chuꞌu Jesús zaca bal-la lau lu xe̱zre.
Begáꞌane̱ꞌ le̱ꞌe̱ xixreꞌ laweꞌ lataj.
Bénneache chee̱ xúgute̱ xe̱zre caꞌ belezrine̱ꞌ lau Jesús naga zue̱ꞌ.