Jesús dxexune̱ꞌ tu benneꞌ quebe gaca se̱ꞌe̱
2
Ca gudé chupa chunna zra,
naꞌ guxúꞌu Jesús xecha lasa lu xe̱zre Capernaum.
Belénne bénneache zua Jesús tu lu xuꞌu.
2 La belezrágate̱ benneꞌ zante̱ naga zua Jesús.
Caꞌan guca,
québedxa guque lu xuꞌu,
ne dxa xuꞌu.
Bchalaj Jesús xrtizra Dios.
3 Naꞌ belezrín tapa benneꞌ lu xuꞌu naga zua Jesús,
zaj nuꞌe̱ tu benneꞌ quebe gaca se̱ꞌe̱.
4 Laweꞌ da quebe gulezéquene̱ꞌ xelezrine̱ꞌ lau Jesús,
laweꞌ da zaj zraꞌ bénneache zante̱ ga naꞌ,
naꞌ gulesáluje̱ꞌ chjuꞌu chee̱ xuꞌu naga zua Jesús.
Naꞌ bululétaje̱ꞌ daꞌa da zrua benneꞌ naꞌ quebe gaca se̱ꞌe̱.
5 Laweꞌ da dxeque beꞌe Jesús ca dxeleajlí lazreꞌ benneꞌ caꞌ Le̱ꞌ,
naꞌ gunné̱ꞌ,
dxe̱ꞌe̱ bénneaꞌ quebe gaca se̱ꞌe̱:
―Zríꞌinaꞌdauꞌ,
ba nanite lau dul-la da nabaguꞌ.
6 Zaj dxeꞌe bal-la benneꞌ ga naꞌ,
benneꞌ dxuluxuzájle̱ꞌe̱ da nadxixruj bea Dios,
naꞌ gulenné̱ lanze̱ꞌ:
7 ―¿Bizr chee̱ naꞌ dxuchalaj caní benneꞌ nigá?
Dxucáꞌana dítaje̱ꞌ Xránadxu Dios.
¿Núzraqueze gaca gunite lau dul-la da zaj nabaga bénneache?
Tuze Dios naꞌ.
8 Dxeque beꞌe Jesús lu lázrdawe̱ꞌ ca dxelenné̱ lane̱ꞌ chee̱ꞌ,
naꞌ gunné̱ꞌ:
―¿Bizr chee̱ naꞌ dxéquele caní?
9 ¿Bizra dizraꞌ quebe naca na sté̱bela xapaꞌ benneꞌ nigá quebe gaca se̱ꞌe̱?
¿Naca na ste̱be xapaꞌ le̱ꞌ,
ba nanite lau dul-la nabaguꞌ?
Cabí.
¿U che ste̱be xapaꞌ le̱ꞌ,
bexasa,
becáꞌa da denuꞌ,
ne bexíaj?
10 Naꞌa,
chee̱ nézele leꞌe nedaꞌ,
Benneꞌ Gulje̱ꞌ Bénneache,
napaꞌ xel-la dxenná bea lu xe̱zr la xu gunite lawaꞌ dul-la da zaj nabaga bénneache.
Naꞌ gunná Jesús,
dxe̱ꞌe̱ bénneaꞌ.
11 ―Lueꞌ dxapaꞌ,
bexasa,
becáꞌa daꞌa chiuꞌ,
ne bexíaj lizruꞌ.
12 Caꞌan guca,
la bexásate̱ꞌ,
naꞌ bequé̱ꞌe̱ daꞌa chee̱ꞌ,
ne bedxúaje̱ꞌ lau xúgute̱ bénneache.
Caꞌan guca,
xúgute̱ benneꞌ caꞌ belexebánene̱ꞌ,
naꞌ belúe láꞌane̱ꞌ Xránadxu Dios.
Dxelenné̱ꞌ:
―Cabataꞌ ne léꞌedxu gaca na ca guca da nigá.
Dxenné̱ Jesús benneꞌ le̱ꞌ Leví
13 Ca gudé naꞌ bedxúaj Jesús zéaje̱ꞌ dxuꞌa nísadauꞌ,
naꞌ xúgute̱ bénneache lu xe̱zre caꞌ belezrine̱ꞌ lau Le̱ꞌ.
Nadxa bsé̱dene̱ꞌ benneꞌ caꞌ xrtizra Dios.
14 Ca gudé Jesús naꞌ,
bleꞌeneꞌ Leví,
zriꞌine Alfeo,
dxeꞌe̱ lataj chee̱ wechizruj.
Naꞌ gunná Jesús,
dxe̱ꞌe̱ le̱ꞌ:
―Be̱n nedaꞌ tuze.
La guxásate̱ Leví,
guxíajle̱ne̱ꞌ Jesús.
15 Caꞌ guca,
gate gudxéꞌ Jesús dxawe̱ꞌ lizre Leví,
naꞌ zánete̱ benneꞌ wechizruj,
ne benneꞌ dul-la caꞌ gulebéꞌe̱ dxelágule̱ne̱ꞌ tu zren nen Jesús,
ne benneꞌ caꞌ dxusé̱dene̱ꞌ.
Caní naca laweꞌ da zjácale̱ benneꞌ zante̱ Jesús.
16 Nadxa benneꞌ caꞌ dxuluxuzájle̱ꞌe̱ da nadxixruj bea Dios,
ne benneꞌ fariseo caꞌ,
gate beleléꞌene̱ꞌ ca da dxun Jesús,
dxágule̱ne̱ꞌ benneꞌ wechizruj caꞌ,
ne benneꞌ dul-la caꞌ,
naꞌ gulenné̱ꞌ,
dxelé̱ꞌe̱ benneꞌ caꞌ dxuse̱de Jesús:
―¿Bizra da nigá?
Dxagu dxéꞌajle̱ne̱ꞌ benneꞌ wechizruj caꞌ,
ne benneꞌ dul-la caꞌ.
17 Ca ben Jesús da nigá,
gunné̱ꞌ:
―Benneꞌ chaweꞌ caꞌ quebe dxelechínene̱ꞌ benneꞌ dxexún bénneache.
Benneꞌ we̱ꞌ caꞌ dxelechínene̱ꞌ bénneaꞌ.
Quegá blaꞌa dxennéaꞌ benneꞌ xrlátaje caꞌ.
Benneꞌ dul-la caꞌ dxennéaꞌ.
Ca dxal-laꞌ xelún bénneache gate dxelune̱ꞌ gubasa
18 Ca guca lu zra naꞌ,
belún gubasa benneꞌ caꞌ dxuse̱de Juan,
ne benneꞌ caꞌ dxuluse̱de benneꞌ fariseo caꞌ.
Naꞌ belezrín benneꞌ caꞌ,
bedajlegue̱zre̱ꞌ Jesús:
―¿Bizr chee̱ naꞌ dxelún gubasa benneꞌ caꞌ dxuse̱de Juan,
ne benneꞌ caꞌ dxuluse̱de benneꞌ fariseo caꞌ,
naꞌ benneꞌ caꞌ dxusé̱denuꞌ Lueꞌ quebe dxelune̱ꞌ gubasa?
¿Bizr chee̱ naꞌ?
19 Naꞌ Jesús guzre̱ꞌ benneꞌ caꞌ:
―¿Waca xelún gubasa benneꞌ zaj zre̱ꞌe̱ laní chee̱ wechaga naꞌ dxácate̱ naꞌ zua benneꞌ wechaga naꞌ nen le̱ꞌ?
Dxácate̱ naꞌ zua wechaga naꞌ nen le̱ꞌ quebe gaca xelune̱ꞌ gubasa.
20 Wazrín tu zra gate dua benneꞌ wechaga naꞌ.
Lu zra naꞌ xelune̱ꞌ gubasa.
21 ’Quegá nu benneꞌ xudé̱ꞌe̱ tu ladxeꞌ cube le̱ꞌe̱ zradxu gula.
Che caꞌan gune̱ꞌ,
ladxeꞌ cube da xudé̱ꞌe̱ wazrube xu na da gula,
naꞌ wachézadxa na.
22 Cáꞌanqueze,
quegá nu benneꞌ que̱ꞌe̱ xrise uva wal-la cube lu bzude xide gula.
Che caꞌan gune̱ꞌ,
naꞌ xrise uva wal-la cube naꞌ wacheza na bzude xide gula,
naꞌ walalaj xrise uva wal-la,
ne cuía xi bzude xide naꞌ.
Xrise uva wal-la cube lu bzude xide cube dxal-laꞌ chuzruj na.
Benneꞌ caꞌ dxuse̱de Jesús dxelíchaje̱ꞌ dau chee̱ zruaꞌ xtila zra dxulupáꞌana judío caꞌ
23 Gate gudé Jesús naga ze̱ zruaꞌ xtila zra dxulupáꞌana benneꞌ judío caꞌ,
náꞌate̱ naꞌ benneꞌ caꞌ dxuse̱de Jesús,
ca zaj xuꞌe̱ neza,
gulezú lawe̱ꞌ dxelíchaje̱ꞌ dau naga zria zruaꞌ xtila.
24 Nadxa benneꞌ fariseo caꞌ gulé̱ꞌe̱ Jesús:
―Gunnáꞌxque.
¿Bizr chee̱ naꞌ dxelune̱ꞌ zrin da quebe dxal-laꞌ xelune̱ꞌ zra dxupáꞌanadxu?
25 Jesús guzre̱ꞌ benneꞌ caꞌ:
―¿Cabataꞌ ne gulábale ca da be̱n David gate gudune̱ꞌ,
ne bxázrjene̱ꞌ da gagu le̱ꞌ,
ne da gugawe̱ꞌ benneꞌ caꞌ zaj zrále̱ne̱ꞌ le̱ꞌ?
26 Guxúꞌe̱ lu xuꞌu chee̱ Dios gate naca Abiatar bxruze blau,
naꞌ David gudawe̱ꞌ xeta xtila da dxeluꞌe̱ lau Dios,
da quebe dxal-laꞌ gagu benneꞌ xula,
san tuze bxruze caꞌ zaj naca chee̱ꞌ xelawe̱ꞌ na.
Naꞌ bnézrujte̱ David da gulagu benneꞌ caꞌ zrále̱ne̱ꞌ le̱ꞌ chee̱ xeta xtila naꞌ.
27 Cáꞌanqueze gunná Jesús,
dxe̱ꞌe̱ benneꞌ caꞌ: