Bi caꞌ dxuse̱de Jesús dxelequé̱ꞌe̱ dau zruaꞌ xtila gate naca zra dxulupáꞌana judío
12
Ca lu zra naꞌ xuꞌu Jesús neza zéaje̱ꞌ ládujla naga de̱ xel-laꞌ zruaꞌ xtila,
ne naca zra dxulupáꞌana benneꞌ judío.
Dxeledún benneꞌ caꞌ dxuse̱de Jesús,
naꞌ gulezú lawe̱ꞌ dxelálaje̱ꞌ dau naga zria zruaꞌ xtila,
ne dxelawe̱ꞌ na.
2 Gate beleléꞌe benneꞌ xudauꞌ fariseo caꞌ da caní,
naꞌ gulé̱ꞌe̱ Jesús:
―Gunáꞌ xque ca dxelún benneꞌ caꞌ dxusé̱denuꞌ,
dxelune̱ꞌ zrin da quebe naca chee̱ꞌ xelune̱ꞌ lu zra dxupáꞌanadxu.
3 Jesús guzre̱ꞌ benneꞌ caꞌ:
―¿Quebe ne gulábale leꞌe ca be̱n David gate naꞌ le̱ꞌ,
ne benneꞌ ljwezre̱ꞌ caꞌ guledune̱ꞌ?
4 Guxúꞌe̱ lu xuꞌu chee̱ Dios,
ne gulawe̱ꞌ xeta xtila láꞌazxa,
da quebe zaj naca chee̱ꞌ xelawe̱ꞌ,
le̱ꞌ,
ne benneꞌ ljwezre̱ꞌ caꞌ,
san tuze bxruze caꞌ zaj naca chee̱ꞌ xelawe̱ꞌ na.
5 ¿Quebe ne gulábale da naxúaj na lu da bdxixruj beꞌe Moisés ca dxelún bxruze caꞌ lu xudauꞌ,
dxelune̱ꞌ zrin chee̱ xudauꞌ lu zra dxupáꞌanadxu,
ne quebe zaj nabague̱ꞌ zria?
6 Nedaꞌ dxapaꞌ leꞌe,
de̱ tu da naca blaudxa ca xudauꞌ nigá.
7 ¿Quebe ne chéajniꞌile ca zéaje̱ da naxúaj na lu xiche chee̱ Dios?
Dxenná na:
Nedaꞌ dxaca lazraꞌ xexache lázrele le saꞌ ljwézrele,
ne quegá gútele be̱ xíxreꞌdu caꞌ lu cugu chiaꞌ.
La ba guxéajniꞌile da nigá,
quebe ne guzría xile bénneache quebe zaj nabague̱ꞌ dul-la.
8 Chee̱ le̱ naꞌ,
nedaꞌ,
Benneꞌ Gulje̱ꞌ Bénneache,
napaꞌ xel-laꞌ dxenná bea dxunaꞌ zrin chiaꞌ lu zra dxupáꞌanadxu.
Dxexún Jesús tu benneꞌ zua zri ne̱ꞌe̱
9 Nadxa Jesús bezé̱ꞌe̱ naꞌ,
naꞌ guxúꞌe̱ tu lu xuꞌu naga dxelúe láꞌane̱ꞌ Dios.
10 Zua tu benneꞌ zua zri ne̱ꞌe̱ ga naꞌ.
Benneꞌ judío caꞌ gulaca lazre̱ꞌ xelezrelne̱ꞌ ájala xelune̱ꞌ chee̱ gaca xelagu zrie̱ꞌ chee̱ Jesús.
Chee̱ le̱ naꞌ gulenábene̱ꞌ Le̱ꞌ:
―¿Dxunna Dios lataj xexundxu benneꞌ we̱ꞌ lu zra dxupáꞌanadxu?
11 Jesús guzre̱ꞌ benneꞌ caꞌ:
―Nútete̱ze benneꞌ zue̱ꞌ ládujla leꞌe,
che zua tu zrilaꞌ chee̱ꞌ,
ne che bíxrebaꞌ tu xe̱dxu situj lu zra dxupáꞌanadxu,
¿quebe chéaje̱ꞌ cheajxeléaje̱ꞌ-baꞌ xcaꞌ?
12 Da zrendxa zaca tu benneꞌ quez ca tu zrilaꞌ.
Caꞌan naca dxunna Dios lataj gundxu tu da xrlátaje lu zra dxupáꞌanadxu.
13 Nadxa Jesús guzre̱ꞌ benneꞌ we̱ꞌ naꞌ:
―Bli naꞌu.
Ca blí ne̱ꞌe̱,
naꞌ bexaca na ca ne̱ꞌe̱ xetú.
14 Nadxa beledxúaj benneꞌ xudauꞌ fariseo caꞌ,
ne gulezú lawe̱ꞌ dxelílaje̱ꞌ ájala xelune̱ꞌ xelútie̱ꞌ Jesús.
Da gunná tu benneꞌ bchálaje̱ꞌ waláz chee̱ Dios ca dxal-laꞌ gaca chee̱ Jesús
15 Gate gúquebeꞌe Jesús da nigá,
naꞌ bezé̱ꞌe̱ naꞌ,
naꞌ benneꞌ zante̱ zjácale̱ne̱ꞌ Le̱ꞌ.
Bexún Jesús xúgute̱ benneꞌ we̱ꞌ zaj zre̱ꞌe̱ ládujla benneꞌ caꞌ.
16 Jesús gunné̱ xúene̱ꞌ benneꞌ caꞌ quebe nu xululéꞌene̱ꞌ nu naca Le̱ꞌ.
17 Caní guca ca da gunná Isaías,
benneꞌ bchálaje̱ꞌ waláz chee̱ Dios,
gunné̱ꞌ:
18 Benneꞌ nigá naque̱ꞌ we̱n zrin chiaꞌ,
benneꞌ ba gucáꞌa.
Benneꞌ nigá nazríꞌidaꞌ,
ne dxezaca ba lázrele̱naꞌ Le̱ꞌ.
Guzúaquezaꞌ xichaj lázrdawe̱ꞌ Beꞌ Láꞌazxa chiaꞌ.
Guzenne̱ꞌ bénneache xúgute̱ xe̱zr la xu ca dxuchiꞌa da dxaca.
19 Quebe tíl-lale̱queze̱ꞌ bénneache,
ne quebe cuézrexe̱ꞌe̱.
Netú benneꞌ quebe xenne̱ꞌ chiꞌe̱ la neza.
20 Quebe quichje̱ꞌ tu xia da ba nachaj,
ne quebe xusul-le̱ꞌ xiꞌ da ba dxaca wexul-la na,
ca zrindxa zra xuzúe̱ꞌ xel-laꞌ dxenná bea chaweꞌ chee̱ꞌ.
21 Bénneache xúgute̱ xe̱zr la xu xuluxrén lázrequeze̱ꞌ Le̱ꞌ.
Dxelenné̱ꞌ napa Jesús xel-laꞌ dxenná bea chee̱ da xriwe̱ꞌ
22 Nadxa guleché̱ꞌe̱ lau Jesús tu benneꞌ la chul-la,
benneꞌ quebe dxaca nnie̱ꞌ,
laweꞌ da xuꞌe̱ beꞌ xriwe̱ꞌ.
Jesús bexune̱ꞌ benneꞌ nigá,
naꞌ beléꞌene̱ꞌ,
ne benníe̱ꞌ.
23 Xúgute̱ benneꞌ caꞌ belexebánene̱ꞌ,
gulenné̱ꞌ:
―¿Naca benneꞌ nigá Zriꞌine David zra?
24 Gate belén benneꞌ xudauꞌ fariseo da nigá,
naꞌ gulenné̱ꞌ:
―Benneꞌ nigá dxebéaje̱ꞌ beꞌ xriwe̱ꞌ,
dxuchínene̱ꞌ xel-laꞌ dxenná bea chee̱ Beelzebú,
xrane beꞌ xriwe̱ꞌ caꞌ.
25 Dxeque beꞌe Jesús ca da dxelenné̱ꞌ,
dxelé̱ꞌe̱ ljwezre̱ꞌ,
naꞌ guzre̱ꞌ le̱ꞌ:
―Lu xuꞌu laweꞌ chee̱ gátete̱ze xe̱zre,
che xelaca chupa laꞌa benneꞌ xuꞌu laweꞌ caꞌ,
ne bal-le̱ꞌ xeledíl-lale̱ne̱ꞌ xezícadxe̱ꞌ,
naꞌ wexul-la wenite xel-laꞌ dxenná bea chee̱ benneꞌ caꞌ.
Cáꞌanqueze che tu xe̱zre benneꞌ,
u tu cueꞌ xrtía ljwezre xelaque̱ꞌ chupa laꞌa,
ne xeledíl-lale̱ne̱ꞌ le saꞌ ljwezre̱ꞌ,
wenítequeze xe̱zre naꞌ,
u xrtía ljwezre caꞌ.
26 Cáꞌanqueze,
che Satanás,
da xriwe̱ꞌ,
dxebéaje na ljwezre da xriwe̱ꞌ,
le̱ze na dxexún na chupa laꞌa cuina na.
¿Ájazra gácaqueze nna bea na?
27 Leꞌe dxennale chiaꞌ dxebéajaꞌ beꞌ xriwe̱ꞌ caꞌ,
dxuchínedaꞌ xel-laꞌ dxenná bea chee̱ Beelzebú da xriwe̱ꞌ.
Che naca na caꞌ,
¿Nuzra dxúnnaqueze xel-laꞌ dxenná bea chee̱ benneꞌ caꞌ zaj naca leꞌe tuze chee̱ xelebéaje̱ꞌ beꞌ xriwe̱ꞌ caꞌ?
Chee̱ le̱ naꞌ lé̱queze̱ꞌ dxululéꞌete̱ne̱ꞌ nanéguele leꞌe.
28 Che nedaꞌ dxebéajaꞌ beꞌ xriwe̱ꞌ caꞌ dxuchínedaꞌ xel-laꞌ waca chee̱ Beꞌ Láꞌazxa chee̱ Dios,
da nigá dxunna bea na ba blaꞌ xel-laꞌ dxenná bea chee̱ Dios ládujla leꞌe.
29 ’¿Ájazra gun tu benneꞌ chuꞌe̱ lizre tu benneꞌ wal-la chee̱ que̱ꞌe̱ da de̱ chee̱ꞌ che nédxula quebe guchéaje̱ꞌ niꞌa naꞌ bénneaꞌ?
Che gune̱ꞌ caní,
naꞌ wazéquene̱ꞌ que̱ꞌe̱ da de̱ chee̱ bénneaꞌ.
30 ’Nu benneꞌ quebe dxácale̱ne̱ꞌ nedaꞌ,
dxedábague̱ꞌ nedaꞌ,
naꞌ benneꞌ quebe dxexezígale̱ne̱ꞌ nedaꞌ,
dxexúsie̱ꞌ na.
31 ’Chee̱ le̱ naꞌ dxapaꞌ leꞌe,
gunite lau Dios chee̱ bénneache xúgute̱ dul-la zaj nabague̱ꞌ,
ne xúgute̱ da cale̱la da dxelenné̱ꞌ,
san che xelenné̱ꞌ schanniꞌ chee̱ Beꞌ Láꞌazxa,
cabataꞌ gunite lau Dios chee̱ꞌ.
32 Nútete̱ze benneꞌ,
che bi nnie̱ꞌ schanníꞌ chiaꞌ nedaꞌ,
Benneꞌ Gulje̱ꞌ Bénneache,
Dios gunite lawe̱ꞌ chee̱ꞌ,
san che tu benneꞌ nnie̱ꞌ schanniꞌ chee̱ Beꞌ Láꞌazxa,
québequeze gunite lau Dios chee̱ꞌ lu xe̱zr la xu nigá ne cáꞌanqueze lu xe̱zr la xu da za zaꞌ.
Da dxun tu benneꞌ dxuleꞌe na ca naque̱ꞌ
33 Naꞌ gunná Jesús:
―Che naca chaweꞌ tu xaga,
dxebía na da zixre chaweꞌ,
naꞌ che naca tu xaga bize,
dxebía na da zixre bize.
Caꞌan naca,
tu xaga naca bea na ne̱ chee̱ da zixre da dxebía na.
34 Leꞌe,
be̱ snia caꞌ.
¿Ájazra gunle leꞌe nne̱le da xrlátaje che leꞌe nácaquezle benneꞌ we̱n da cale̱la xcaꞌ?
Ca da dxedxuaj dxúꞌadxu naca na ca da zua na lu xichaj lázrdaudxu.
35 Benneꞌ xrlátaje dxenné̱ꞌ da naca xrlátaje laweꞌ da zua da xrlátaje lu xichaj lázrdawe̱ꞌ,
naꞌ benneꞌ we̱n da cale̱la dxenné̱ꞌ da cale̱la laweꞌ da zua da cale̱la lu xichaj lázrdawe̱ꞌ.
36 Nedaꞌ dxapaꞌ leꞌe,
lu zra guchiꞌa Dios,
xúgute̱ bénneache xuludée̱ꞌ ca da gulenné̱ꞌ,
tu tu dizraꞌ xala da gulenné̱ꞌ.
37 Ca naca dizraꞌ da ba gunníuꞌ,
Dios guchiꞌe̱ chiuꞌ,
naꞌ Le̱ꞌ nnáqueze̱ꞌ che xedxúajuꞌ xrlátaje,
u che webaguꞌ zria.
Bénneache we̱n da cale̱la caꞌ dxelenábene̱ꞌ Jesús gune̱ꞌ tu xel-laꞌ waca chee̱ xabáa
38 Nadxa bal-la benneꞌ xudauꞌ fariseo,
ne benneꞌ dxuluxuzájle̱ꞌe̱ da nadxixruj bea Dios gulé̱ꞌe̱ Jesús:
―Benneꞌ Wese̱de,
dxaca lázrentuꞌ leꞌentuꞌ chiuꞌ gunuꞌ tu xel-laꞌ waca da za xabáa.
39 Naꞌ guzre Jesús benneꞌ caꞌ:
―Bénneache we̱n da cale̱la,
benneꞌ zaj naque̱ꞌ chupa lazreꞌ,
dxelenábene̱ꞌ nedaꞌ gunaꞌ tu xel-laꞌ waca da za xabáa.
Quebe xeleléꞌequezne̱ꞌ tu xel-laꞌ waca,
san tuze ca da dxunna bea na ca da guca chee̱ Jonás,
benneꞌ bchálaje̱ꞌ waláz chee̱ Dios.
40 Ca guca chee̱ Jonás,
guxúꞌe̱ lu le̱ꞌe̱ bela zren chunna zra chunna xe̱la,
cáꞌanqueze gaca chiaꞌ nedaꞌ,
Benneꞌ Gulje̱ꞌ Bénneache,
waxúꞌuquezaꞌ lu xe̱dxu ba chunna zra chunna xe̱la.
41 Benneꞌ gulezré̱ꞌe̱ xe̱zre Nínive welexásaqueze̱ꞌ lu zra guchiꞌa Dios gate guchiꞌe̱ chee̱ bénneache zaj zre̱ꞌe̱ naꞌa,
naꞌ benneꞌ Nínive caꞌ xululéꞌene̱ꞌ zaj nabaga zria benneꞌ caní laweꞌ da belexebíꞌi lazreꞌ benneꞌ Nínive gate naꞌ bchalaj Jonás dizraꞌ chee̱ Dios lau benneꞌ caꞌ,
naꞌ blaudxa ca Jonás naꞌ naca Benneꞌ zue̱ꞌ nigá.
42 Cáꞌanqueze nuꞌula naꞌ gunná beꞌe̱ chaláꞌa naga dxedá gubizra beuꞌ zaga caꞌ wexásaqueze̱ꞌ lu zra guchiꞌa Dios gate guchiꞌe̱ chee̱ bénneache zaj zre̱ꞌe̱ naꞌa,
naꞌ nuꞌula naꞌ guléꞌene̱ꞌ zaj nabaga zria benneꞌ caní laweꞌ da bezé̱ꞌe̱ naga naca zítuꞌte̱ chee̱ xe̱zr la xu nigá chee̱ xenne̱ꞌ dizraꞌ sina da bchalaj Salomón,
naꞌ blaudxa ca Salomón naꞌ naca Benneꞌ zue̱ꞌ nigá.
Ca naca chee̱ beꞌ xriwe̱ꞌ da bexúꞌu na tu benneꞌ
43 Naꞌ gunná Jesús:
―Gate tu beꞌ xriwe̱ꞌ dxedxuaj na tu benneꞌ,
naꞌ dxedá na lataj naga nabizre,
dxexilaj na naga xezíꞌ lazreꞌ na,
naꞌ che quebe xezrele na,
naꞌ dxenná na lu xichaj lázrdau na:
44 “Webiꞌa xexáꞌa lizraꞌ naga bedxúajaꞌ.”
Ca xezrín na,
leꞌe na benneꞌ naꞌ,
naque̱ꞌ ca tu xuꞌu da naxíajlbe̱ luꞌule na,
ne nalúa na,
ne nagáꞌana chawe na.
45 Nadxa cheaj na cheajxezrí na xegazre beꞌ xriwe̱ꞌ da zaj naca na xríwe̱dxa ca le̱ na,
naꞌ xúgute̱ na dxelúꞌu na lu bénneaꞌ,
naꞌ naca chee̱ benneꞌ naꞌ da calé̱ladxa ca guca chee̱ꞌ nedxu.
Cáꞌanqueze gaca chee̱ bénneache we̱n da cale̱la caní.
Benneꞌ zaj naque̱ꞌ ca xrna Jesús, ne ca benneꞌ biche̱ꞌ caꞌ
46 Jesús ne zue̱ꞌ dxuchálajle̱ne̱ꞌ benneꞌ caní gate belezrín xrne̱ꞌe̱ ne benneꞌ biche̱ꞌ caꞌ ga naꞌ.
Gulezré̱ꞌe̱ chaléꞌajla,
ne dxelaca lazre̱ꞌ xuluchálajle̱ne̱ꞌ Jesús.
47 Nadxa tu benneꞌ guzre̱ꞌ Jesús:
―Xrnaꞌu,
ne bi bichuꞌ caꞌ zaj zre̱ꞌe̱ chaléꞌajla.
Dxelaca lazre̱ꞌ xuluchálajle̱ne̱ꞌ Lueꞌ.
48 Jesús guzre̱ꞌ benneꞌ nigá:
―¿Núnbeale nuzra naꞌ xrnaꞌa,
ne bi bíchaꞌdauꞌ caꞌ?
49 Nadxa bleꞌe Jesús benneꞌ caꞌ dxusé̱dene̱ꞌ,
dxenné̱ꞌ: