Jesús dxenné̱ꞌ ca naca chee̱ da naca xrlátaje láweze
12
Ca lu zra naꞌ belezraga zane gaxúa benneꞌ caꞌ,
naꞌ dxululéajte̱ ljwezre̱ꞌ.
Naꞌ guzú lau Jesús dxe̱ꞌe̱ benneꞌ caꞌ dxusé̱dene̱ꞌ:
―Le guxúe xanneꞌ cuínale ca naca cua zichaj chee̱ xeta xtila chee̱ benneꞌ xudauꞌ fariseo caꞌ,
da naca na da dxuléꞌe na láweze da xrlátaje chee̱ benneꞌ caꞌ.
2 Quebe bi de̱ da dxundxu bagácheze da quebe guléꞌe laweꞌ,
ne quebe bi de̱ da nagache da quebe nu neze.
3 Chee̱ le̱ naꞌ,
xúgute̱ da gunle lu da chul-la,
xululéꞌe laweꞌ te zra,
naꞌ da gunle bagácheze lu xuꞌu naga naxézxujte̱ dxa xuꞌu,
wénqueze na lau xúgute̱ bénneache.
Nu dxal-laꞌ zrébedxu
4 Naꞌ gunná Jesús:
―Dxapaꞌ leꞌe,
bi ljwézraꞌdu caꞌ,
quebe dxal-laꞌ zrébele benneꞌ dxelute be̱laꞌ dxen chee̱ bénneache,
san gate te naꞌ,
québedxa xelezéquene̱ꞌ bi xelune̱ꞌ.
5 Naꞌa dxapaꞌ leꞌe nu dxal-laꞌ zrébele.
Le zrebe Bénneaꞌ gate te xequé̱ꞌe̱ xel-la nabán chee̱ bénneache,
nape̱ꞌ xel-la dxenná bea gudée̱ꞌ bénneache caꞌ lataj ba xaꞌ.
Aweꞌ,
Le̱ꞌ le zrebe.
6 ’¿Quebe taꞌu gazxuꞌ bxínnedauꞌ laweꞌ chupa dumí lásedauꞌ?
Dios quebe dxal-la lazre̱ꞌ netú bxínnedu caꞌ.
7 Cáꞌanqueze xicha xíchajle leꞌe xúgute̱ na zaj nababa na lau Dios.
Chee̱ le̱ naꞌ quebe zrébele.
Zácadxale leꞌe ca be̱ zante̱ bxínnedu caꞌ.
Benneꞌ dxelexeche̱be̱ꞌ zaj naque̱ꞌ chee̱ Jesús
8 Naꞌ gunná Jesús:
―Dxapaꞌ leꞌe,
xúgute̱ benneꞌ xelexeche̱be̱ꞌ zaj naque̱ꞌ chiaꞌ nedaꞌ lau bénneache,
cáꞌanqueze nedaꞌ,
Benneꞌ Gulje̱ꞌ Bénneache,
xeché̱bequezaꞌ chee̱ benneꞌ caꞌ lau gubáz chee̱ xabáa caꞌ chee̱ Dios,
9 san benneꞌ caꞌ quebe xelexeche̱be̱ꞌ chiaꞌ lau bénneache,
nédaꞌquezaꞌ quebe xeche̱baꞌ chee̱ꞌ lau gubáz chee̱ xabáa caꞌ chee̱ Dios.
10 ’Che nu benneꞌ bi nnie̱ꞌ chiaꞌ nedaꞌ,
Benneꞌ Gulje̱ꞌ Bénneache,
gunite lau Dios chee̱ꞌ,
naꞌ benneꞌ nnie̱ꞌ chee̱ Beꞌ Láꞌazxa,
quebe gunite lau Dios chee̱ bénneaꞌ.
11 ’Gate xeleché̱ꞌe̱ leꞌe lau benneꞌ xíchaje̱ chee̱ xudauꞌ,
u lau benneꞌ dxuchiꞌe̱ da dxaca,
u lau benneꞌ xuꞌu laweꞌ,
quebe cueꞌle gunne xue bi xeché̱bele u bi nnale,
12 laweꞌ da gate zrin zra dxal-laꞌ nne̱le,
Beꞌ Láꞌazxa guléꞌene̱ꞌ leꞌe da dxal-laꞌ nne̱le.
Da ste̱be chee̱ xel-la gunníꞌa
13 Tu benneꞌ ládujla benneꞌ caꞌ guzre̱ꞌ Jesús:
―Benneꞌ Wese̱de,
guzre bi bichaꞌ gúnnabeꞌ chiaꞌ da xexal-laꞌ chee̱ da guca chee̱ xrantuꞌ.
14 Jesús guzre̱ꞌ-beꞌ:
―Benneꞌ,
¿zua nu bzua nedaꞌ ca benneꞌ dxuchiꞌe̱ da dxaca u ca benneꞌ le̱ꞌe̱ xe̱zr la xu?
15 Nadxa guzre̱ꞌ benneꞌ caꞌ:
―¡Le naꞌ xque!
¡Le guxúe xanneꞌ cuínale chee̱ quebe gucúdele!
Xel-la nabán chee̱ nu benneꞌ quebe zua na lu da nápale̱ꞌe̱.
16 Nadxa bchalaj Jesús da dxuléꞌe nigá,
gunné̱ꞌ:
―Guzúa tu benneꞌ gunníꞌa,
naꞌ xe̱zr la xu chee̱ꞌ bnézrujle̱ꞌe̱ na.
17 Naꞌ benneꞌ gunníꞌa naꞌ guzú lawe̱ꞌ dxenné̱ꞌ:
¿Bizra gunaꞌ?
Québedxa de̱ naga guzráꞌa lina chiaꞌ nigá.
18 Nadxa dxenné̱ꞌ:
“¡Ba nezdaꞌ ca da gunaꞌ!
Guchínnajaꞌ naga dxezráꞌ lina chiaꞌ,
chee̱ gunaꞌ da zríꞌadxa,
naꞌ guzráꞌa naꞌ ca naca lina chiaꞌ nigá,
ne ca naca da ba napaꞌ.
19 Nadxa nníquezaꞌ nédaꞌquezaꞌ:
Ba dé̱le̱ꞌe̱ chiuꞌ da zante̱ chee̱ zaneꞌ iza.
Bezíꞌ lazreꞌ.
Güeꞌe gudagu,
ne gubé.”
20 Naꞌ Dios guzre̱ꞌ bénneaꞌ:
“Lueꞌ,
benneꞌ zideꞌ,
lu zreꞌ naꞌa zreꞌ gatiuꞌ,
naꞌ da nuzráꞌ chawuꞌ,
quebe nézenuꞌ nu chee̱ gaca na.”
21 Caꞌan dxaca chee̱ benneꞌ dxutupe̱ꞌ xel-la gunníꞌa da gaca cheé̱queze̱ꞌ.
Naque̱ꞌ ca tu benneꞌ xacheꞌ lau Dios.
Dios dxuxúe̱ꞌ bi chee̱ꞌ caꞌ
22 Ca gudé naꞌ,
Jesús guzre̱ꞌ benneꞌ caꞌ dxusé̱dene̱ꞌ:
―Dxapaꞌ leꞌe,
quebe cueꞌle gunne xue ca naca da gágule chee̱ gaca banle,
ne ca naca zra lánale da gácule.
23 Xel-la nabán chee̱le zácadxa na ca da gágule,
naꞌ be̱l-laꞌ dxen chee̱le zácadxa na ca zra lánale.
24 Le nnaꞌxque ca dxaca chee̱ bxínnedu caꞌ.
Quebe dxelázabaꞌ,
ne quebe dxelelápabaꞌ,
ne quebe zaj zua naga dxuluxuzrabaꞌ,
naꞌ Diósqueze̱ꞌ dxuxiꞌaj dxugawe̱ꞌ-baꞌ.
Zácadxale leꞌe ca bxínnedu caꞌ.
25 ¿Núlale leꞌe séquele gusetunna cuínale xetú ben laweꞌ da dxebéꞌle̱ꞌe̱le gunne xue?
26 Che quebe gaca gunle tu da naca da dauze,
¿bizr chee̱ naꞌ dxebeꞌle gunne xue chee̱ da caꞌ xezícala?
27 ’Le nnaꞌxque ca dxelegula xiaj xrtandu caꞌ.
Quebe dxelún na zrin,
ne quebe dxelún na du ladxeꞌ,
naꞌ dxapaꞌ leꞌe,
wenná bea Salomón quebe gucue̱ꞌ da xrtandxa ca tu xiajdu caní.
28 Che Dios dxugacue̱ꞌ caní xíxreꞌdu caꞌ,
da zaj zua naꞌa le̱ꞌe̱ xixreꞌ,
naꞌ wxre xelezxe na,
¿quegá gundxe̱ꞌ chee̱le leꞌe,
benneꞌ dxeléajle̱ꞌe̱ láteze chiaꞌ?
29 Chee̱ le̱ naꞌ,
quebe cueꞌle gunne xue ca naca da gágule,
u ca naca da xíꞌajle,
ne quebe súale ste̱be.
30 Caꞌ naca na,
laweꞌ da ca naca benneꞌ caꞌ zaj zre̱ꞌe̱ xe̱zr la xu dxelexílaje̱ꞌ ca naca da caní,
san leꞌe,
zua Xrale xabáa ba nézene̱ꞌ nachínnele ca naca da caní.
31 Le cueꞌ gunne xue nna bea Dios lu xichaj lázrdaule,
naꞌ sile ca naca da caní.
Enseñando Sobre Oración y Fe
Da gunníꞌa da dxegúꞌu cháwedxu xabáa
32 Naꞌ gunná Jesús:
―Quebe zrébele,
zrílaꞌdu chiaꞌ,
bábaze nácale leꞌe.
Xrale Dios dxezaca ba lazre̱ꞌ gunne̱ꞌ chee̱le lataj naga dxenná beꞌe̱.
33 Le gute da nápale,
naꞌ le gunezruj benneꞌ xacheꞌ caꞌ.
Caꞌan gaca,
guzrale na naga quebe te chee̱ na,
naꞌ gápale da gunníꞌa xabáa da quebe xedú,
naga quebe gaca chuꞌu gubán,
ne quebe gaca xelúꞌu béadu caꞌ xulutebaꞌ na.
34 Naga nuzúale xel-la gunníꞌa chee̱le,
naꞌ súaqueze lázrdaule.
Dxal-laꞌ gupáꞌa cuínadxu
35 Naꞌ gunná Jesús:
―Le gupáꞌa cuínale,
ne le gugala xiꞌ chee̱le.
36 Le gaca ca benneꞌ we̱n zrin caꞌ dxelebeze̱ꞌ xrane̱ꞌ xezrine̱ꞌ lu laní chee̱ wechaga naꞌ,
naꞌ nne̱ꞌ dxuꞌa dxa xuꞌu naꞌ.
37 Ba neza zrente̱ naca na chee̱ benneꞌ we̱n zrin caꞌ,
benneꞌ caꞌ xedajxraca xrane̱ꞌ le̱ꞌ dxelenaze̱ꞌ gate xezrine̱ꞌ.
Da li dxapaꞌ leꞌe,
xrane̱ꞌ naꞌ cueche̱ꞌ benneꞌ caꞌ xelawe̱ꞌ,
naꞌ guzúa cuine̱ꞌ chee̱ que̱ꞌe̱ da xelagu benneꞌ we̱n zrin caꞌ.
38 Lácala xezrine̱ꞌ dxe̱la u dxaníꞌsise̱ꞌ,
che xedajxraque̱ꞌ le̱ꞌ dxelennaze̱ꞌ,
ba neza naca na chee̱ benneꞌ we̱n zrin caꞌ.
39 Dxal-laꞌ nézele da nigá,
che xrane xuꞌu gunézene̱ꞌ bi zra zrin gubán,
naꞌ quebe gasie̱ꞌ chee̱ quebe guꞌe̱ lataj quíduje̱ꞌ lizre̱ꞌ chee̱ cuane̱ꞌ da nape̱ꞌ.
40 Cáꞌanqueze leꞌe,
le sua ban lazreꞌ,
laweꞌ da gate québela nézele,
xeláꞌa nedaꞌ,
Benneꞌ Gulje̱ꞌ Bénneache.
Benneꞌ we̱n zrin li lazreꞌ, ne benneꞌ we̱n zrin quebe naqueꞌ li lazreꞌ
41 Nadxa Pedro bche̱be̱ꞌ Jesús:
―Xran,
¿bchálajuꞌ da dxuléꞌe nigá chee̱ nétuꞌze,
che chee̱ xúgute̱ benneꞌ?
42 Xránadxu gunné̱ꞌ:
―¿Nuzra naca we̱n zrin li lazreꞌ,
bénneaꞌ dxucáꞌana xrane̱ꞌ lu ne̱ꞌe̱ benneꞌ zaj zraꞌ lizre̱ꞌ chee̱ gunézruje̱ꞌ da xelagu benneꞌ caꞌ gate zrin zra chee̱ na?
43 Ba neza naca na chee̱ benneꞌ we̱n zrin naꞌ,
gate xezrín xrane̱ꞌ,
xedajxraque̱ꞌ le̱ꞌ dxune̱ꞌ ca da nabague̱ꞌ.
44 Da li dxapaꞌ leꞌe,
xrane̱ꞌ gucáꞌane̱ꞌ lu ne̱ꞌe̱ xúgute̱ da nape̱ꞌ.
45 Che benneꞌ we̱n zrin naꞌ dxéquene̱ꞌ wazré xrane̱ꞌ xelé̱ꞌe̱,
ne su lawe̱ꞌ gusaca ziꞌe̱ benneꞌ we̱n zrin xezica caꞌ,
ne nuꞌula we̱n zrin caꞌ,
ne su lawe̱ꞌ xiꞌaj gawe̱ꞌ,
ne súzrene̱ꞌ,
46 nadxa xrane̱ꞌ xelé̱ꞌe̱ lu zra quebe dxebeze̱ꞌ le̱ꞌ,
ne lu zra quebe nézene̱ꞌ,
naꞌ gusaca zíꞌle̱ꞌe̱ le̱ꞌ,
ne chugue̱ꞌ chee̱ꞌ saque̱ꞌ ca xelezaca benneꞌ caꞌ quebe zaj naque̱ꞌ chee̱ Dios.
47 ’Benneꞌ we̱n zrin naꞌ nézene̱ꞌ ca da dxaca lazreꞌ xrane̱ꞌ san quebe nucueze̱ꞌ,
ne quebe dxuzúe̱ꞌ dizraꞌ,
benneꞌ nigá gudée̱ꞌ le̱ꞌ ba xaꞌ.
48 Benneꞌ we̱n zrin naꞌ quebe nézene̱ꞌ da naꞌ,
ne dxune̱ꞌ da dxusebaga na le̱ꞌ zria,
benneꞌ nigá tée̱ꞌ láteze xel-la ziꞌ.
Che tu benneꞌ dxezíꞌle̱ꞌe̱ da dxunezruj Dios le̱ꞌ,
Dios wanábale̱ꞌe̱ le̱,
naꞌ bénneaꞌ Dios nuxrén lazre̱ꞌ le̱ꞌ da zrente̱,
Dios wanné̱ xúele̱ꞌe̱ne̱ꞌ le̱ꞌ.
Dxelaca benneꞌ chupa laꞌa ne̱ chee̱ Jesús
49 Naꞌ gunná Jesús:
―Nedaꞌ blaꞌa guzrenaꞌ xiꞌ lu xe̱zr la xu nigá,
naꞌ la guzredaꞌ ba dxala xiꞌ naꞌ.
50 Dxal-laꞌ chuꞌa lu xel-la gute ca dxuꞌu tu benneꞌ lu nisa gate dxedxúe̱ꞌ nisa,
naꞌ téle̱ꞌa xel-la ziꞌ cadxa gácatequeze na.
51 ¿Dxéquele leꞌe zaꞌ nedaꞌ cuꞌa xel-la dxebeza zri lazreꞌ lu xe̱zr la xu nigá?
Dxapaꞌ leꞌe:
Cabí.
Zaꞌa chee̱ gunaꞌ benneꞌ chupa laꞌa.
52 Naꞌa su lau,
gazxuꞌ benneꞌ zaj zre̱ꞌe̱ tu xuꞌu xelaque̱ꞌ chupa laꞌa.
Chunne̱ꞌ xeledábague̱ꞌ chupe̱ꞌ,
naꞌ chupe̱ꞌ xeledábague̱ꞌ chunne̱ꞌ.
53 Xra tu bi biu tábague̱ꞌ bi biu chee̱ꞌ,
naꞌ bi biu naꞌ tábagabeꞌ xrabeꞌ.
Xrna tu bi nuꞌula tábague̱ꞌ bi nuꞌula chee̱ꞌ,
naꞌ bi nuꞌula naꞌ tábagabeꞌ xrnabeꞌ.
Tau zriꞌine tu nuꞌula tábague̱ꞌ zruꞌa lizre̱ꞌ,
naꞌ zruꞌa lizre̱ꞌ naꞌ tábague̱ꞌ tau zríꞌine̱ꞌ.
Da dxululéꞌe na ca da gaca lu zra naꞌa zra
54 Naꞌ Jesús guzre̱ꞌ benneꞌ caꞌ:
―Gate leꞌe dxeléꞌele daꞌ beuj naga dxebía gubizra,
naꞌ dxennale,
waca xiuj,
ne caꞌ dxaca.
55 Gate dxaca beꞌ za na chaláꞌa naga dxedé gubizra beuꞌ zaga caꞌ,
naꞌ dxennale waca da la,
ne dxaca caꞌ.
56 Leꞌe,
benneꞌ dxunle láweze da xrlátaje.
Leꞌe nézele nnale ca da gaca zran xabáa,
ne lu xe̱zr la xu nigá,
san quebe dxezéquele xuzájlaꞌale da dxululéꞌe na ca gaca chee̱le lu zra naꞌa zra.
Dxal-laꞌ xezúadxu lu xel-la dxebeza zri lazreꞌ nen benneꞌ dxedábague̱ꞌ dxiꞌu
57 Naꞌ gunná Jesús:
―¿Bizr chee̱ naꞌ quebe dxeque beꞌele da naca xrlátaje?
58 Che nu benneꞌ dxaca lazre̱ꞌ guzúe̱ꞌ lueꞌ lau benneꞌ dxuchiꞌe̱,
naꞌ gate chéajle̱nuꞌ le̱ꞌ chee̱ zrinle lau bénneaꞌ,
be̱n ba xen xezúꞌ lu xel-la dxebeza zri lazreꞌ nen bénneaꞌ dxácate̱ xuꞌule neza,
chee̱ quebe che̱ꞌe̱ lueꞌ lau bénneaꞌ,
naꞌ bénneaꞌ gudée̱ꞌ lueꞌ lu naꞌ benneꞌ gusézxuje̱ꞌ lueꞌ lizre xia.
59 Dxapaꞌ lueꞌ quebe xedxúajuꞌ naꞌ cadxa quízrujuꞌ ca da dxebaguꞌ.