Dxelenabe̱ꞌ Jesús gune̱ꞌ tu xel-laꞌ waca chee̱ xabáa
16
Benneꞌ xudauꞌ fariseo caꞌ,
ne benneꞌ xudauꞌ saduceo caꞌ xjaque̱ꞌ naga zua Jesús chee̱ xuluxunéguene̱ꞌ Le̱ꞌ.
Chee̱ le̱ naꞌ gulenabe̱ꞌ Jesús gune̱ꞌ tu xel-laꞌ waca zrente̱ da za xabáa.
2 Jesús beche̱be̱ꞌ benneꞌ caꞌ:
―Xelateꞌ zua gubizra dxennale leꞌe:
“Gun chaweꞌ wxre laweꞌ da daꞌ beuj xrna zran xabáa.”
3 Che zílala dxennale:
“Quebe chaweꞌ gun naꞌa zra laweꞌ da dáꞌle̱ꞌe̱ beuj xrna zran xabáa.”
Leꞌe dxuléꞌe cuínale da quebe nácale.
Dxácaqueze dxennale ca naca da gun zran xabáa.
Quebe dxaca xuzájlaꞌale ca saꞌyeaj da dxaca naꞌa zra.
4 Benneꞌ we̱n da cale̱la caní,
benneꞌ zaj nabéaj xíchaje̱ꞌ Dios,
dxelenabe̱ꞌ gunaꞌ tu xel-laꞌ waca zrente̱.
Quebe xeleléꞌene̱ꞌ xetú xel-laꞌ waca.
Weleléꞌene̱ꞌ tuze da gaca na ca da guca chee̱ Jonás.
Nadxa bulucáꞌana Jesús benneꞌ caꞌ,
zjáꞌaque̱ꞌ.
Da dxelún benneꞌ xudauꞌ caꞌ da naca na ca cua zichaj chee̱ xeta xtila
5 Gate benneꞌ caꞌ dxuse̱de Jesús guladée̱ꞌ xechaláꞌa nísadauꞌ,
naꞌ gulal-la lazre̱ꞌ xeluꞌe̱ chizre̱ꞌ.
6 Jesús guzre̱ꞌ le̱ꞌ:
―Le nnaꞌxque.
Le guxúe cuínale ca naca chee̱ cua zichaj chee̱ xeta xtila chee̱ benneꞌ fariseo caꞌ,
ne chee̱ benneꞌ saduceo caꞌ.
7 Benneꞌ caꞌ dxuse̱de Jesús gulezú lawe̱ꞌ dxelé̱ ljwezre̱ꞌ:
―Caní dxenné̱ꞌ laweꞌ da quebe núadxu xeta xtila.
8 Jesús dxeque beꞌene̱ꞌ,
naꞌ guzre̱ꞌ le̱ꞌ:
―¿Bizr chee̱ naꞌ dxennale naca na laweꞌ da quebe núale xeta xtila?
Láteze dxéajle̱le chiaꞌ.
9 ¿Quebe ne chéajniꞌile,
ne quebe dxeajsá lázrele chee̱ da gazxuꞌ xeta xtila da bgawaꞌ gazxuꞌ cueꞌ chi gaxúa benneꞌ biu,
ne bal-la gaꞌ becáꞌale?
10 ¿Quebe dxeajsá lázrele chee̱ da gazre xeta xtila da bgawaꞌ tapa cueꞌ chi gaxúa benneꞌ biu caꞌ,
ne bal-la gaꞌ becáꞌale?
11 ¿Ájazra naꞌ quebe dxeque beꞌele quegá bchálajaꞌ chee̱ xeta xtila gate gunníaꞌ le guxúe cuínale ca naca chee̱ cua zichaj chee̱ xeta xtila chee̱ benneꞌ fariseo caꞌ,
ne chee̱ benneꞌ saduceo caꞌ?
12 Nadxa guleque béꞌene̱ꞌ quegá guzre Jesús le̱ꞌ xuluxúe cuine̱ꞌ chee̱ da naca cua zichaj chee̱ xeta xtila,
san ca naca da dxuluse̱de benneꞌ fariseo caꞌ,
ne benneꞌ saduceo caꞌ.
Pedro dxenné̱ꞌ Jesús naque̱ꞌ Cristo
13 Gate bzrin Jesús naga nababa xe̱zre Cesarea da be̱n Filipo,
naꞌ bche̱be̱ꞌ benneꞌ caꞌ dxusé̱dene̱ꞌ:
―¿Nuzra naꞌ dxelenná bénneache nacaꞌ nedaꞌ,
Benneꞌ Gulje̱ꞌ Bénneache?
14 Naꞌ benneꞌ caꞌ gulenné̱ꞌ:
―Bal-la benneꞌ dxelenné̱ꞌ nacuꞌ Juan,
bénneaꞌ bchue̱ꞌ bénneache nisa.
Xebal-le̱ꞌ dxelenné̱ꞌ nacuꞌ Elías,
naꞌ xebal-le̱ꞌ dxelennáqueze̱ꞌ nacuꞌ Jeremías,
u xetú benneꞌ bchálaje̱ꞌ waláz chee̱ Dios.
15 Nadxa guzre Jesús benneꞌ caꞌ:
―¿Gazra leꞌe?
¿Nuzra naꞌ dxennale nacaꞌ?
16 Gunná Simón Pedro:
―Lueꞌ nacuꞌ Cristo,
Zriꞌine Dios ban.
17 Beche̱be Jesús:
―Ba neza zren naca na chiuꞌ Simón,
zriꞌine Jonás.
Netú benneꞌ quebe ne guléꞌene̱ꞌ lueꞌ da nigá,
san Xraꞌ zua xabáa,
Le̱ꞌ bléꞌene̱ꞌ lueꞌ.
18 Nedaꞌ dxapaꞌ lueꞌ,
nacuꞌ Pedro,
da zéaje̱ na tu xiaj,
naꞌ laweꞌ xiaj xre nigá guzúaꞌ benneꞌ xeleajlí lazre̱ꞌ nedaꞌ,
naꞌ xel-laꞌ dxenná bea chee̱ da xriwe̱ꞌ quebe seque na gucuꞌuj na benneꞌ caꞌ.
19 Nedaꞌ gunnaꞌ lueꞌ da naca na zren xia chee̱ xel-laꞌ dxenná bea chee̱ xabáa,
naꞌ da guchéajuꞌ lueꞌ lu xe̱zr la xu nigá gaca na da ba nadxéajqueze na xabáa,
naꞌ da xese̱zruꞌ lueꞌ lu xe̱zr la xu nigá gaca na da ba naxé̱zrequeze na xabáa.
20 Nadxa Jesús gunná béꞌene̱ꞌ benneꞌ caꞌ dxusé̱dene̱ꞌ chee̱ quebe nu xelé̱ꞌe̱ naca Le̱ꞌ Cristo.
Jesús dxuchálaje̱ꞌ ca gaca gate gatie̱ꞌ
21 Lu zra náꞌqueze guzú lau Jesús dxuzéajniꞌine̱ꞌ benneꞌ caꞌ dxusé̱dene̱ꞌ dxal-laꞌ xexíaje̱ꞌ xe̱zre Jerusalén,
naꞌ benneꞌ gula caꞌ,
ne benneꞌ xíchaje̱ caꞌ chee̱ bxruze caꞌ,
ne benneꞌ dxuluxuzájle̱ꞌe̱ da nadxixruj bea Dios wulusaca ziꞌe̱ Le̱ꞌ.
Naꞌ guzre̱ꞌ benneꞌ caꞌ dxusé̱dene̱ꞌ welute benneꞌ Jerusalén caꞌ Le̱ꞌ.
Nadxa gate gaca chunna zra xebane̱ꞌ.
22 Nadxa Pedro guléaje̱ꞌ Jesús chaláꞌala,
ne guzú lawe̱ꞌ dxedil-le̱ꞌ Le̱ꞌ,
dxenné̱ꞌ:
―Dios quebe guꞌe̱ lataj,
Xran.
Cabataꞌ gaca chiuꞌ da caní.
23 Jesús bexéchaje̱ꞌ,
naꞌ guzre̱ꞌ Pedro:
―Gucuasa cuitaꞌ nedaꞌ,
lueꞌ,
da xriwe̱ꞌ,
laweꞌ da nacuꞌ tu da dxusunegue na nedaꞌ.
Quebe dxulaba lazruꞌ ca dxun Dios.
Ca dxun bénneache dxulaba lazruꞌ.
24 Nadxa Jesús guzre̱ꞌ benneꞌ caꞌ dxusé̱dene̱ꞌ:
―Che nu benneꞌ dxaca lazre̱ꞌ gaque̱ꞌ nedaꞌ tuze,
dxal-laꞌ guzúe̱ꞌ chaláꞌala da naca chee̱ꞌ,
ne guzúa cuine̱ꞌ chee̱ gatie̱ꞌ,
naꞌ nadxa gaca xídale̱ne̱ꞌ nedaꞌ.
25 Bénneaꞌ dxaca lazre̱ꞌ gapa chiꞌe̱ xel-laꞌ nabán chee̱ꞌ gunitie̱ꞌ na.
Bénneaꞌ gunitie̱ꞌ xel-laꞌ nabán chee̱ꞌ laweꞌ da dxune̱ꞌ zrin chiaꞌ,
benneꞌ nigá zruéꞌene̱ꞌ xel-laꞌ nabán du lazreꞌ.
26 ¿Bízraqueze ba neza naca na chee̱ tu benneꞌ che gataꞌ chee̱ꞌ xúgute̱ xel-laꞌ gunníꞌa da de̱ lu xe̱zr la xu nigá,
naꞌ cuía xiꞌe̱ lau Dios?
Quebe bi gaca quizruj tu benneꞌ chee̱ la bénneꞌdu xuꞌe lau Dios.
27 Nedaꞌ,
Benneꞌ Gulje̱ꞌ Bénneache widaꞌ xecha lasa nen xel-laꞌ szren chee̱ Xraꞌ,
ne nen gubáz chee̱ xabáa caꞌ.
Nadxa xuzría chee̱ tu tu benneꞌ ca naca da zaj nun tu tue̱ꞌ.
28 Da li dxapaꞌ leꞌe,
bal-la benneꞌ zaj zre̱ꞌe̱ nigá quebe xelatie̱ꞌ cadxa xeleléꞌene̱ꞌ nedaꞌ,
Benneꞌ Gulje̱ꞌ Bénneache,
xidaꞌ xedajnná beꞌa.