Dxugagu Jesús chua gaxúa benneꞌ biu
8
Ca lu zra caꞌ zaj nazraga benneꞌ zan,
naꞌ quebe bi de̱ da xelawe̱ꞌ.
Caꞌan guca gunné̱ Jesús benneꞌ caꞌ dxusé̱dene̱ꞌ,
naꞌ guzre̱ꞌ le̱ꞌ:
2 ―Nedaꞌ dxexache lazraꞌ benneꞌ caní laweꞌ da bache guca chunna zra zaj zre̱ꞌe̱ nigá nen nedaꞌ,
ne quebe bi de̱ da xelawe̱ꞌ.
3 Che caꞌ xesel-laꞌ le̱ꞌ lizre̱ꞌ quebe xelawe̱ꞌ,
naꞌ xelate niꞌa ne̱ꞌe̱ la neza laweꞌ da záꞌaca bal-le̱ꞌ zituꞌ.
4 Naꞌ belexeche̱be benneꞌ caꞌ dxuse̱de Jesús,
dxelé̱ꞌe̱ Le̱ꞌ:
―¿Ájazra gundxu gunézrujdxu da xelawe̱ꞌ nigá,
ga quebe nu chiláꞌ benneꞌ?
5 Jesús bche̱be̱ꞌ le̱ꞌ:
―¿Bal-la xeta xtila nápale leꞌe?
Benneꞌ caꞌ gulenné̱ꞌ:
―Gazre na.
6 Nadxa gunná beꞌe Jesús xelebéꞌ xúgute̱ bénneache caꞌ lu xu.
Nadxa guqué̱ꞌe̱ xeta xtila,
ne guzre̱ꞌ Dios:
―Xcalenuꞌ.
Nadxa bzúzruje̱ꞌ na,
ne bnézruje̱ꞌ na benneꞌ caꞌ dxusé̱dene̱ꞌ,
naꞌ benneꞌ caní gulísie̱ꞌ na láwela xúgute̱ bénneache caꞌ.
7 Zaj nápaqueze̱ꞌ tu chupa béladauꞌ.
Naꞌ Jesús gunabe̱ꞌ Dios gune̱ꞌ na chaweꞌ.
Nadxa gunná béꞌene̱ꞌ gulise benneꞌ caꞌ le̱ na.
8 Gulagu xúgute̱ bénneache caꞌ,
ne belezúale̱ꞌe̱ chaweꞌ.
Ca gudé naꞌ bulusuzré̱ꞌe̱ gazre xcuite xcaꞌa nen xeta bizruj da belegáꞌana.
9 Benneꞌ caꞌ gulawe̱ꞌ zaj naque̱ꞌ ca chua gaxúa benneꞌ biu.
Nadxa Jesús bze̱ꞌ benneꞌ caꞌ dizraꞌ.
10 Nadxa guxúꞌe̱ lu da dxedá laweꞌ nísadauꞌ nen benneꞌ caꞌ dxusé̱dene̱ꞌ.
Xjaque̱ꞌ lu xe̱zr la xu chee̱ benneꞌ xe̱zre Dalmanuta.
Dxelenabe̱ꞌ Jesús gune̱ꞌ tu xel-la waca
11 Nadxa belezrín benneꞌ xudauꞌ fariseo caꞌ ga naꞌ,
ne gulezú lawe̱ꞌ dxulutil-le̱ꞌ dizraꞌ nen Jesús.
Gulenabe̱ꞌ Jesús gune̱ꞌ tu xel-la waca da za xabáa,
chee̱ xelenézene̱ꞌ bi xel-la waca nape̱ꞌ.
12 Nadxa Jesús gucáꞌa dxgua lazre̱ꞌ,
gunné̱ꞌ:
―¿Bizr chee̱ naꞌ dxelenaba benneꞌ caní gunaꞌ tu xel-laꞌ waca da za xabáa?
Da li dxapaꞌ leꞌe,
québequeze bi xel-la waca gunaꞌ lau leꞌe.
13 Nadxa Jesús bcaꞌane̱ꞌ benneꞌ caꞌ,
naꞌ bexuꞌe̱ lu da dxedá laweꞌ nísadauꞌ,
dxexíaje̱ꞌ xecheláꞌa chee̱ nísadauꞌ.
Da naca ca cua zichaj chee̱ xeta xtila
14 Gulal-la lazreꞌ benneꞌ caꞌ dxuse̱de Jesús xeluꞌe̱ da xelawe̱ꞌ,
naꞌ zaj nuꞌe̱ tuze xeta xtila lu da dxedá laweꞌ nísadauꞌ.
15 Nadxa Jesús gunná béꞌene̱ꞌ,
dxe̱ꞌe̱ benneꞌ caꞌ:
―¡Le nnaꞌxque nigá!
Le guxúe cuínale da naca cua zichaj chee̱ xeta xtila chee̱ benneꞌ xudauꞌ fariseo caꞌ,
ne ca naca cua zichaj chee̱ xeta xtila chee̱ Herodes.
16 Nadxa benneꞌ caꞌ dxuse̱de Jesús gulé̱ ljwezre̱ꞌ:
―Le̱ꞌ dxenné̱ꞌ caní laweꞌ da quebe de̱ xeta xtila gágudxu.
17 Dxeque beꞌe Jesús da dxelenné̱ꞌ,
naꞌ guzre̱ꞌ le̱ꞌ:
―¿Bizr chee̱ naꞌ dxennale quebe de̱ xeta xtila gágudxu?
¿Quebe ne chéajniꞌile ne quebe dxeque beꞌele?
¿Nácale̱ꞌe̱ zideꞌ lázrdaule?
18 ¿Quebe dxeléꞌele nen xiaj laule,
ne quebe dxenle nen nágale?
¿Quebe dxeajsá lázrele?
19 Gate naꞌ bgawaꞌ chi xun gaxúa benneꞌ biu nen gazxuꞌ xeta xtila,
¿bal-la xcuite xcaꞌa xeta bizruj da becáꞌale?
Benneꞌ caꞌ gulenné̱ꞌ:
―Chazrinnu na.
20 Naꞌ gunná Jesús:
―Naꞌ gate naꞌ bgawaꞌ chua gaxúa benneꞌ biu nen gazre xeta xtila,
¿bal-la xcuite xcaꞌa da zaj zrate̱ becáꞌale?
Le̱ꞌ gulenné̱ꞌ:
―Gazre na.
21 Nadxa Jesús guzre̱ꞌ benneꞌ caꞌ:
―¿Ne la gázqueze quebe dxéajniꞌile?
Jesús dxexune̱ꞌ tu benneꞌ la chul-la
22 Ca gudé naꞌ Jesús,
ne benneꞌ caꞌ dxusé̱dene̱ꞌ belexezrine̱ꞌ lu xe̱zre Betsaida,
naꞌ benneꞌ Betsaida guleché̱ꞌe̱ tu benneꞌ la chul-la lau Jesús,
naꞌ gulataꞌ xuene̱ꞌ Le̱ꞌ guté̱ꞌ le̱ꞌ.
23 Jesús gudele̱ꞌ naꞌ benneꞌ la chul-la,
ne bebéaje̱ꞌ le̱ꞌ dxuꞌa xe̱zre.
Naꞌ btupe̱ꞌ zrene̱ꞌ lu xiaj lawe̱ꞌ,
ne guxrúa ne̱ꞌe̱ le̱ꞌ.
Naꞌ bche̱be̱ꞌ le̱ꞌ chete dxeléꞌene̱ꞌ.
24 Benneꞌ la chul-la gunné̱ꞌe̱,
naꞌ gunné̱ꞌ:
―Dxeléꞌedaꞌ benneꞌ caꞌ,
zaj naque̱ꞌ ca weaj xaga,
naꞌ dxesíꞌaque̱ꞌ.
25 Nadxa Jesús guxrúa ne̱ꞌe̱ xiaj lawe̱ꞌ da xula,
naꞌ benneꞌ naꞌ gunnáꞌ dxgüe̱ꞌ.
Naꞌ bexaque̱ꞌ,
ne xúgute̱ bache dxeléꞌene̱ꞌ cháwedauꞌ.
26 Nadxa Jesús besel-le̱ꞌ le̱ꞌ lizre̱ꞌ,
dxe̱ꞌe̱ le̱ꞌ:
―Quebe chuꞌu lu xe̱zre nigá,
ne quebe nu xuꞌu caní.
Pedro dxenné̱ꞌ naca Jesús benneꞌ nasel-la Dios
27 Ca gudé naꞌ Jesús,
ne benneꞌ caꞌ dxusé̱dene̱ꞌ xjaque̱ꞌ lu xé̱zredu caꞌ zaj nababa xe̱zre Cesarea naga dxenná bea Filipo.
Dxácate̱ zaj xuꞌe̱ neza bche̱be Jesús benneꞌ caꞌ:
―¿Nuzra naꞌ dxelenná benneꞌ nacaꞌ nedaꞌ?
28 Belexeche̱be̱ꞌ:
―Bal-la benneꞌ dxelenné̱ꞌ nacuꞌ Juan,
bénneaꞌ bchue̱ꞌ bénneache nisa.
Benneꞌ xula dxelenné̱ꞌ nacuꞌ Elías,
bénneaꞌ bchálaje̱ꞌ waláz chee̱ Dios.
Benneꞌ xula dxelenné̱ꞌ nacuꞌ tu benneꞌ xula bchálaje̱ꞌ waláz chee̱ Dios.
29 Nadxa Jesús bche̱be̱ꞌ le̱ꞌ:
―¿Gazra leꞌe?
¿Nuzra dxennale leꞌe nacaꞌ nedaꞌ?
Pedro gunné̱ꞌ:
―Lueꞌ nacuꞌ Cristo,
benneꞌ nasel-la Dios.
30 Nadxa gunná beꞌe Jesús benneꞌ caꞌ.
Gunné̱ꞌ:
―Quebe nu xe̱le caꞌ.
Dxuchalaj Jesús ca dxal-laꞌ gatie̱ꞌ
31 Nadxa guzú lau Jesús dxuléꞌene̱ꞌ benneꞌ caꞌ ca dxal-laꞌ sácaꞌle̱ꞌe̱ Le̱ꞌ,
Benneꞌ Gulje̱ꞌ Bénneache,
ne ca xelún benneꞌ gula chee̱ judío caꞌ,
ne benneꞌ xíchaje̱ caꞌ chee̱ bxruze caꞌ,
ne benneꞌ dxuluxuzájle̱ꞌe̱ da nadxixruj bea Dios,
xuluzúe̱ꞌ Le̱ꞌ chaláꞌala.
Nadxa guzre̱ꞌ le̱ꞌ welútie̱ꞌ Le̱ꞌ,
san xebane̱ꞌ zra guxunne zra.
32 Da nigá guzre̱ꞌ le̱ꞌ caníqueze.
Nadxa Pedro guché̱ꞌe̱ Jesús chaláꞌala,
ne guzú lawe̱ꞌ dxedil-le̱ꞌ Le̱ꞌ.
33 Jesús bexéchaje̱ꞌ,
ne gunné̱ꞌe̱ benneꞌ caꞌ dxusé̱dene̱ꞌ,
naꞌ gudil-le̱ꞌ Pedro,
dxe̱ꞌe̱ le̱ꞌ:
―Gucuasa cuitaꞌ nigá,
lueꞌ,
da xriwe̱ꞌ.
Quebe dxéquenuꞌ da nigá ca dxun Dios.
Ca dxun bénneache dxunuꞌ.
34 Nadxa Jesús gunné̱ꞌ benneꞌ caꞌ dxusé̱dene̱ꞌ,
ne xúgute̱ bénneache caꞌ,
naꞌ guzre̱ꞌ le̱ꞌ:
―Che núlale dxaca lázrele gunle nedaꞌ tuze,
dxal-laꞌ guzúale chaláꞌala xúgute̱ da dxezá lázrele leꞌe,
ne gácale ca tu benneꞌ zéaje̱ꞌ chee̱ te̱ꞌe̱ xaga béguaj,
naꞌ gunle nedaꞌ tu zren.
35 Che tu benneꞌ dxaca lazre̱ꞌ guselé̱ꞌ xel-la nabán chee̱ꞌ,
benneꞌ nigá gunitie̱ꞌ xel-la nabán chee̱ꞌ.
Bénneaꞌ gunitie̱ꞌ xel-la nabán chee̱ꞌ ne̱ chiaꞌ nedaꞌ,
ne ne̱ chee̱ dizraꞌ chaweꞌ chiaꞌ,
benneꞌ nigá guselé̱ꞌ xel-la nabán chee̱ꞌ.
36 Che tu benneꞌ gape̱ꞌ xúgute̱ da naca chee̱ xe̱zr la xu nigá,
naꞌ gunitie̱ꞌ bénneꞌdu xuꞌe̱,
¿bízraqueze da ba neza gaca na chee̱ bénneaꞌ?
37 Quebe bi gaca gunezruj tu benneꞌ chee̱ guselé̱ꞌ bénneꞌdu xuꞌe̱.
38 Che tu benneꞌ gapa stuꞌe̱ chiaꞌ nedaꞌ,
ne chee̱ dizraꞌ chaweꞌ chiaꞌ lau bénneꞌ caní,
benneꞌ dxulucáꞌana Dios,
ne dxelún dul-la,
la gaze nedaꞌ,
Benneꞌ Gulje̱ꞌ Bénneache,
gapa stúꞌquezaꞌ chee̱ bénneaꞌ gate xidaꞌ nen xel-la szren chee̱ Xraꞌ,
ne nen gubáz chee̱ xabáa láꞌazxa caꞌ.