Da dxucáꞌana sban bénneache
7
Benneꞌ fariseo caꞌ nen bal-la benneꞌ dxuluxuzájle̱ꞌe̱ da bdxixruj beꞌe Moisés,
benneꞌ gusáꞌaque̱ꞌ Jerusalén,
belezríne̱ꞌ lau Jesús.
2 Benneꞌ caní beleléꞌene̱ꞌ ca dxelún bal-la benneꞌ dxuse̱de Jesús,
dxelawe̱ꞌ xeta ne quebe zaj naxibe ne̱ꞌe̱ ca dxelenná bea benneꞌ xudauꞌ caꞌ.
Chee̱ le̱ naꞌ gulenná benneꞌ Jerusalén caꞌ:
―Zaj naca sban naꞌ benneꞌ caꞌ dxuse̱de Jesús.
Nadxa gulezí tizre̱ꞌ le̱ꞌ.
3 Caní gulenná benneꞌ caꞌ laweꞌ da zjácale̱ benneꞌ xudauꞌ fariseo caꞌ,
ne xúgute̱ benneꞌ judío caꞌ ca naca da belún xra xtau benneꞌ caꞌ,
quebe dxelawe̱ꞌ xeta che quebe zaj naxibe ne̱ꞌe̱ zaneꞌ lasa.
4 Gate zjaque̱ꞌ laweꞌ xiꞌa waꞌu,
ca dxelexezrine̱ꞌ quebe dxelawe̱ꞌ xeta che quebe xelibe ne̱ꞌe̱ ca zaj nadxixruj bea benneꞌ xudauꞌ caꞌ.
Cáꞌanqueze de̱dxa da zante̱ da zjácale̱ne̱ꞌ,
ca xexadxe zrigaꞌ da dxeléꞌaje̱ꞌ,
ne zruaga,
ne zriga xéꞌena,
ne da naga dxelásie̱ꞌ.
5 Nadxa benneꞌ fariseo caꞌ,
ne benneꞌ caꞌ dxuluxuzájle̱ꞌe̱ da bdxixruj beꞌe Moisés gulenábene̱ꞌ Jesús:
―¿Bizr chee̱ naꞌ quebe zjácale̱ benneꞌ caꞌ dxusé̱denuꞌ ca naca da gulún benneꞌ gula?
Dxelawe̱ꞌ xeta,
zaj naca sban ne̱ꞌe̱.
6 Naꞌ beche̱be Jesús:
―Láweze dxunle da xrlátaje.
Lu lázrdaule xuꞌule da cale̱la.
Cháwedauꞌ bchálajqueze Isaías ca nácale leꞌe gate naꞌ bzuaje̱ꞌ caní:
Bénneache caní dxelúe láꞌane̱ꞌ nedaꞌ nen dxúꞌaze̱ꞌ.
Xichaj lázrdawe̱ꞌ caꞌ zaj nacuasa na nedaꞌ.
7 Níteze naca xel-la ba láꞌana da dxeluꞌe̱ nedaꞌ,
laweꞌ da dxulusé̱dene̱ꞌ da zaj nadxixruj bea bénneacheze.
8 Caní naca xcaꞌ,
leꞌe dxuzúale chaláꞌala ca da nadxixruj bea Dios,
naꞌ zéajle̱le ca naca da gulún bénneache ca dxíbele zruaga,
ne zrigaꞌ chee̱le,
ne zánete̱ da caní da dxunle.
9 Naꞌ gunnadxe̱ꞌ,
dxe̱ꞌe̱ benneꞌ caꞌ:
―Chalaꞌala dxuzúale ca da nadxixruj bea Dios chee̱ zéajle̱le ca naca da tu dxúnzquezle.
10 Caní gunná Moisés naꞌ:
“Gudapa ba láꞌana xra xrnaꞌu.”
Cáꞌanqueze gunné̱ꞌ:
“Che tu benneꞌ nne̱ꞌ schanniꞌ chee̱ xreꞌ,
che xrneꞌe̱,
con gátequeze bénneaꞌ.”
11 Leꞌe dxennale,
“Che tu benneꞌ xe̱ꞌe̱ xra xrne̱ꞌe̱:
Corbán,”
da zéaje̱ na,
quebe gaca gácale̱naꞌ leꞌe laweꞌ da bache bnézrujaꞌ chee̱ Dios ca naca da de̱ chiaꞌ.
12 Che caꞌan dxenné̱ꞌ,
nadxa leꞌe québedxa dxuꞌule le̱ꞌ lataj gácale̱ne̱ꞌ xra xrne̱ꞌe̱.
13 Gate dxunle caní dxuzúale chaláꞌala xrtizra Dios,
chee̱ gunle ca da zéajle̱le.
Naꞌ zéajquezle dxunle zánete̱ da zaj naca na caní.
14 Xecha lasa gunné̱ Jesús bénneache caꞌ,
naꞌ gunné̱ꞌ,
dxe̱ꞌe̱ le̱ꞌ:
―Le guzé̱ nágale xúgute̱le,
ne le chéajniꞌi.
15 Netú da dxeꞌaj dxagu benneꞌ quebe seque gucáꞌana na le̱ꞌ sban.
Da dxedxuaj na lu xichaj lázrdau bénneache,
le̱ naꞌ dxucáꞌana na le̱ꞌ sban.
16 Leꞌe zua nágale,
le xene.
17 Gate gucuasa Jesús naga zaj zraꞌ benneꞌ caꞌ,
naꞌ guxúꞌe̱ lu xuꞌu.
Nadxa benneꞌ caꞌ dxusé̱dene̱ꞌ gulenábene̱ꞌ Le̱ꞌ ca naca chee̱ da dxuléꞌe nigá.
18 Nadxa gunná Jesús,
dxe̱ꞌe̱ le̱ꞌ:
―¿Cáꞌanqueze leꞌe quebe dxéajniꞌile?
¿Quebe dxéajniꞌile xúgute̱ da dxeꞌaj dxagu bénneache quebe seque gucáꞌana na le̱ꞌ sban
19 laweꞌ da quebe dxuꞌu na lu xichaj lázrdawe̱ꞌ.
Dxuꞌu na lu le̱ꞌe̱,
naꞌ dxedxuaj na?
―Ca naca da dxedxuaj na lu xichaj lázrdau bénneache,
le̱ naꞌ dxucáꞌana na le̱ꞌ sban
21 laweꞌ da lu xichaj lázrdau bénneaꞌ dxeledxúaj ca da cale̱la da dxuwía lazre̱ꞌ,
ne dul-la da dxucáꞌana ditaj xel-la wechaga naꞌ,
ne dul-la chee̱ da sban,
ne we̱te benneꞌ,
22 ne xel-la gubán,
ne da dxezá lazreꞌ gapa da naca chee̱ benneꞌ xula,
ne da cale̱la caꞌ,
ne xel-la wezrí xe̱ꞌ,
ne da dxezá lazreꞌ da sban,
ne xel-la zre̱ꞌe lazreꞌ,
ne xel-la wechalaj dizraꞌ bizruj,
ne xel-la dxun szren cuina,
ne xel-la dxuchalaj bigaze.
23 Xúgute̱ da cale̱la caní dxeledxúaj na lu xichaj lázrdau bénneache,
ne dxuluxrinnaj na le̱ꞌ.
Tu nuꞌula quebe naca judío dxeajlí lazre̱ꞌ Jesús
24 Naꞌ bezáꞌa Jesús naga zue̱ꞌ,
guxíaje̱ꞌ lu xe̱zre caꞌ zaj nababa xe̱zre Tiro,
ne xe̱zre Sidón.
Guxúꞌu Jesús tu lu xuꞌu,
ne quegá guca lazre̱ꞌ nu xene.
Quebe guca gache̱ꞌ.
25 La gunézete̱ tu nuꞌula zua Jesús naꞌ.
Nuꞌula nigá zua tu zríꞌine̱ꞌ nuꞌula,
xuꞌubeꞌ beꞌ xriwe̱ꞌ.
Blaꞌ nuꞌulaꞌ naga zua Jesús,
ne bzu zribe̱ꞌ lawe̱ꞌ.
26 Nuꞌula nigá quebe naque̱ꞌ nuꞌula judío.
Naque̱ꞌ nuꞌula chee̱ tu xe̱zre nababa xe̱zr la xu Sirofenicia.
Bzrine̱ꞌ lau Jesús,
naꞌ gunabe̱ꞌ Le̱ꞌ xebéaje̱ꞌ beꞌ xriwe̱ꞌ da xuꞌu zríꞌine̱ꞌ nuꞌula.
27 Gunná Jesús,
dxe̱ꞌe̱ nuꞌulaꞌ:
―Be̱ꞌ lataj xelagu nedxu zriꞌine benneꞌ lu xuꞌu,
laweꞌ da quebe naca chaweꞌ cúadxu xeta xtila chee̱ bidu caꞌ,
ne gunézrujdxu na chee̱ bécudu caꞌ.
28 Naꞌ gunná nuꞌulaꞌ:
―Aweꞌ,
Xran,
san bécudu caꞌ zaj zraꞌ zran ga dxelágubeꞌ dxeláguquezbaꞌ xeta bizruj da dxuluzexruj bidu caꞌ.
29 Nadxa gunná Jesús:
―Ne̱ chee̱ dizraꞌ da ba gunnéuꞌ,
bexíaj naꞌa.
Bache bedxúaj beꞌ xriwe̱ꞌ lu be̱l-laꞌ dxen chee̱ zriꞌinuꞌ nuꞌula.
30 Gate bezrín nuꞌulaꞌ lizre̱ꞌ,
naꞌ bléꞌene̱ꞌ zríꞌine̱ꞌ nuꞌula de̱beꞌ lu da naga dxásebeꞌ,
naꞌ beꞌ xriwe̱ꞌ ba bedxúaj na lu be̱l-laꞌ dxen chee̱beꞌ.
Dxexún Jesús tu benneꞌ nacuézrue̱ꞌ, ne quebe dxaca nnie̱ꞌ
31 Nadxa bedxúaj Jesús,
bezé̱ꞌe̱ naga nababa xe̱zre Tiro,
naꞌ gudétie̱ꞌ naga nababa xe̱zre Sidón,
ne xe̱zre caꞌ zaj nababa Decápolis,
naꞌ bezrine̱ꞌ dxuꞌa nísadauꞌ chee̱ xe̱zr la xu Galilea.
32 Nadxa bedajleguáꞌ benneꞌ caꞌ tu benneꞌ nacuézrue̱ꞌ,
ne quebe dxaca nnie̱ꞌ,
naꞌ gulenábe̱ꞌ Jesús xrua ne̱ꞌe̱ benneꞌ nigá.
33 Guché̱ Jesús benneꞌ nigá chaláꞌala naga zaj zraꞌ benneꞌ caꞌ,
naꞌ bdie̱ꞌ zrube ne̱ꞌe̱ lu naga bénneaꞌ,
naꞌ bzre̱ꞌe̱ zrene̱ꞌ,
ne bte̱ꞌ laweꞌ luzre bénneaꞌ.
34 Nadxa la gunnáꞌte̱ꞌ xabáa,
ne gucáꞌa lazre̱ꞌ,
gunné̱ꞌ:
―Efata.
Dizxaꞌ nigá zéaje̱ na:
Bxalaj.
35 Ca gunné̱ꞌ caní,
naꞌ bxalaj naga benneꞌ cuezru nigá,
ne bexaca luzre̱ꞌ.
Nadxa guca bchálaje̱ꞌ.
36 Naꞌ gunná Jesús,
dxe̱ꞌe̱ benneꞌ caꞌ quebe nu xelé̱ꞌe̱ ca da be̱ne̱ꞌ.
Lácala gunná beꞌene̱ꞌ le̱ꞌ caní,
buluchílujdxe̱ꞌ dizraꞌ ca da be̱ne̱ꞌ.
37 Benneꞌ caꞌ zaj zraꞌ naꞌ belexebánele̱ꞌe̱ne̱ꞌ,
dxelenné̱ꞌ:
―Xúgute̱ dxune̱ꞌ cháwedauꞌ.
Dxexune̱ꞌ benneꞌ cuezru caꞌ,
naꞌ dxelénte̱ne̱ꞌ,
ne dxexune̱ꞌ benneꞌ caꞌ quebe dxaca nnie̱ꞌ,
naꞌ dxelenné̱tie̱ꞌ.