Da dxuxrinnaj na bénneache
15
Nadxa benneꞌ fariseo caꞌ,
ne benneꞌ dxuluxuzájle̱ꞌe̱ da bdxixruj beꞌe Moisés,
benneꞌ caꞌ beledxuaje̱ꞌ lu xe̱zre Jerusalén,
gulebigue̱ꞌ lau Jesús,
naꞌ buluche̱be̱ꞌ Le̱ꞌ,
dxelenné̱ꞌ:
2 ―¿Bizr chee̱ naꞌ benneꞌ caꞌ dxusé̱denuꞌ quebe dxuluzúe̱ꞌ dizraꞌ ca naca da gulún xra xrtaudxu?
Quebe dxelíbequeze ne̱ꞌe̱ ca naca da zéajle̱ntuꞌ gate dxelawe̱ꞌ.
3 Jesús bche̱be̱ꞌ benneꞌ caꞌ,
gunné̱ꞌ:
―¿Bizr chee̱ naꞌ leꞌe quebe dxuzuale dizraꞌ da dxenná beꞌe Dios?
Dxunle ca naca da zéajle̱le.
4 Dios gunné̱ꞌ:
“Gudapa ba láꞌana xra xrnaꞌu.”
Cáꞌanqueze gunné̱ꞌ:
“Benneꞌ nne̱ꞌ schanniꞌ chee̱ xra xrne̱ꞌe̱,
le gute bénneaꞌ.”
5 Leꞌe dxennale waca xe̱ tu benneꞌ xra xrne̱ꞌe̱:
“Quebe séquedaꞌ bi gunnaꞌ leꞌe laweꞌ da ba guche̱be lazraꞌ gunézrujaꞌ Dios xúgute̱ da de̱ chiaꞌ.”
6 Dxennale che tu benneꞌ dxune̱ꞌ caní québedxa dxun na ba xen gácale̱ne̱ꞌ xra xrne̱ꞌe̱.
Caní dxunle leꞌe,
dxuzuale chalaꞌala da bdxixruj beꞌe Dios,
chee̱ gunle ca naca da zéajle̱le.
7 Leꞌe,
láweze dxunle da xrlátaje.
Da li naca da gunná Isaías,
bénneaꞌ bchálaje̱ꞌ waláz chee̱ Dios,
ca naca chee̱le leꞌe,
gunné̱ꞌ:
8 Benneꞌ caní dxelape̱ꞌ nedaꞌ ba láꞌana nen dxúꞌaze̱ꞌ.
Quebe dxelape̱ꞌ nedaꞌ ba láꞌana dute̱ lázrdawe̱ꞌ.
9 Dácheze naca dxelúe láꞌane̱ꞌ nedaꞌ.
Da gulenná beꞌene̱ꞌ bénneache naca na da caꞌ dxulusé̱dene̱ꞌ.
10 Nadxa Jesús gunné̱ꞌ benneꞌ caꞌ,
dxenné̱ꞌ:
―Le xene,
ne le chéajniꞌi.
11 Da dxuꞌu na dxuꞌa bénneache quegá le̱ na guxrinnaj na bénneache.
Da dxedxuaj na dxuꞌa bénneache naca na da dxuxrinnaj na bénneache.
12 Nadxa benneꞌ caꞌ dxuse̱de Jesús gulebigue̱ꞌ lau Le̱ꞌ.
Dxelé̱ꞌe̱ Le̱ꞌ:
―¿Nézenuꞌ gulaca tula benneꞌ xudauꞌ fariseo caꞌ gate belenne̱ꞌ da gunnáuꞌ?
13 Jesús guzre̱ꞌ benneꞌ caꞌ:
―Bítete̱ze xágadauꞌ da quebe guza Xraꞌ zue̱ꞌ xabáa,
welé̱pedaꞌ.
14 Le gusán benneꞌ caꞌ.
La chul-la zaj naque̱ꞌ,
ne dxulusiꞌe̱ neza le saꞌ ljwezre̱ꞌ la chul-la caꞌ.
Che tu la chul-la che̱ꞌe̱ le saꞌ ljwezre̱ꞌ la chul-la,
dxúpate̱ꞌ xelebixre̱ꞌ tu lu xe̱dxu.
15 Nadxa Pedro guzre̱ꞌ Jesús:
―Bzéajniꞌi netuꞌ ca naca chee̱ da dxuléꞌe nigá.
16 Gunná Jesús:
―¿Cáꞌanqueze leꞌe quebe dxéajniꞌile?
17 ¿Quebe nézele xúgute̱ da dxuꞌu na dxúꞌadxu zeaj na le̱ꞌe̱dxu,
naꞌ te naꞌ xedxuaj na?
18 Da dxedxuaj na dxúꞌadxu naca na da zaꞌ lu xichaj lázrdaudxu.
Da nigá naca na da dxuxrinnaj na bénneache.
19 Lu xichaj lázrdau bénneache dxeledxuaj da dxezá lazre̱ꞌ da cale̱la,
ca naca xel-laꞌ we̱te benneꞌ,
ne ca naca xel-laꞌ zuale̱ zruꞌula benneꞌ xula,
ne ca naca da sban da dxelún bénneache,
ne ca naca xel-laꞌ gubán,
ne xel-laꞌ we̱n lazreꞌ,
ne xel-laꞌ wetupa dizraꞌ bizruj.
20 Da caní dxuluxrinnaj na bénneache.
Che tu benneꞌ quebe dxexibe ne̱ꞌe̱ ca da zéajle̱le gate dxawe̱ꞌ xeta,
da nigá quebe dxuxrinnaj na le̱ꞌ.
Tu nuꞌula zituꞌ dxéajle̱ꞌe̱ chee̱ Jesús
21 Nadxa bedxuaj Jesús naꞌ,
zexíaje̱ꞌ chalaꞌa naga zaj nababa xe̱zre Tiro,
ne xe̱zre Sidón.
22 Tu nuꞌula Canaán zue̱ꞌ naꞌ ze̱ꞌe̱ dxebezre xe̱ꞌe̱ cúzrela Jesús,
dxenné̱ꞌ:
―Xran,
Zriꞌine David,
bexache lazreꞌ nedaꞌ.
Xuꞌubeꞌ beꞌ xriwe̱ꞌ zriꞌinaꞌ nuꞌula,
ne cátitega dxezácabeꞌ.
23 Quebe bi beche̱be Jesús.
Nadxa belezrín benneꞌ caꞌ dxusé̱dene̱ꞌ,
ne gulataꞌ xuene̱ꞌ Le̱ꞌ,
gulé̱ꞌe̱ Le̱ꞌ:
―Bsel-la nuꞌula nigá laweꞌ da ze̱ꞌe̱ dxebezre xe̱ꞌe̱ cúzrudxu.
24 Nadxa gunná Jesús:
―Dios gusel-le̱ꞌ nedaꞌ gácale̱zaꞌ benneꞌ Israel caꞌ zaj naque̱ꞌ ca zrílaꞌdu caꞌ zaj nanítebaꞌ.
25 Gubiga nuꞌula naꞌ naga zua Jesús,
ne bzu zribe̱ꞌ lau Le̱ꞌ,
ne dxe̱ꞌe̱ Le̱ꞌ:
―Xran,
gúcale̱ nedaꞌ.
26 Jesús guzre̱ꞌ le̱ꞌ:
―Quebe naca xrlátaje cáꞌadxu da dxelagu zríꞌinedxu,
chee̱ gunézrujdxu na bécudu caꞌ.
27 Nadxa nuꞌula naꞌ guzre̱ꞌ Jesús:
―Aweꞌ,
Xran,
san bécudu caꞌ dxeláguquezebaꞌ da bízrujdu caꞌ dxelexruj zran naga dxelagu xránabaꞌ.
28 Nadxa Jesús guzre̱ꞌ le̱ꞌ:
―Núꞌuladu,
da zrente̱ naca xel-laꞌ dxeajlí lazreꞌ chiuꞌ.
Gaca ca dxaca lazruꞌ.
Lu zra náꞌqueze bexaca zríꞌine̱ꞌ núꞌuladu naꞌ.
Jesús dxexune̱ꞌ benneꞌ zante̱ benneꞌ we̱ꞌ
29 Jesús guzé̱ꞌe̱ naꞌ,
gudée̱ꞌ dxuꞌa nísadauꞌ chee̱ Galilea.
Guluéne̱ꞌ tu lu xiꞌa,
ne gudxéꞌe̱ naꞌ.
30 Benneꞌ zan belezrine̱ꞌ naga zua Jesús,
zaj naché̱ꞌe̱ benneꞌ zrinnaj caꞌ,
ne benneꞌ la chul-la caꞌ,
ne benneꞌ quebe dxaca xelenné̱ꞌ,
ne benneꞌ zan zaj nadxugu niꞌa naꞌ,
ne zánedxa benneꞌ we̱ꞌ.
Buluzré̱ꞌe̱ benneꞌ caꞌ lau Jesús,
naꞌ Le̱ꞌ bexune̱ꞌ le̱ꞌ.
31 Caꞌan guca belexebane benneꞌ caꞌ gate beleléꞌene̱ꞌ dxelenné̱ꞌ benneꞌ caꞌ quebe guca xelenné̱ꞌ nédxula,
ne belexexaca benneꞌ caꞌ gulaque̱ꞌ benneꞌ niꞌa naꞌ dxugu,
ne dxeledá benneꞌ caꞌ gulaque̱ꞌ benneꞌ zrinnaj,
ne dxeleléꞌe benneꞌ caꞌ gulaque̱ꞌ benneꞌ la chul-la.
Gulezú lawe̱ꞌ dxelúe láꞌane̱ꞌ Dios chee̱ benneꞌ Israel caꞌ.
Jesús dxugawe̱ꞌ tapa cueꞌ tu gaxúa benneꞌ biu
32 Nadxa Jesús gunné̱ꞌ benneꞌ caꞌ dxusé̱dene̱ꞌ.
Dxe̱ꞌe̱ le̱ꞌ:
―Dxexache lazraꞌ chee̱ benneꞌ caní laweꞌ da ba zeaj chunna zra zrále̱ne̱ꞌ nedaꞌ nigá,
ne quebe bi de̱ da xelawe̱ꞌ.
Quebe dxaca lazraꞌ xesel-laꞌ le̱ꞌ chee̱ cheajxaque̱ꞌ lizre̱ꞌ quebe ne xelawe̱ꞌ chee̱ quebe xelate niꞌa ne̱ꞌe̱ la neza.
33 Nadxa benneꞌ caꞌ dxuse̱de Jesús gulé̱ꞌe̱ Le̱ꞌ:
―¿Ájazra guntuꞌ zrélentuꞌ da xelagu cátite̱ benneꞌ zan caní?
Lataj nigá quebe nu chiláꞌ benneꞌ zua lizre̱ꞌ nigá.
34 Jesús bche̱be̱ꞌ benneꞌ caꞌ,
dxenné̱ꞌ:
―¿Bal-la xeta xtila nápale?
Benneꞌ caꞌ belexeche̱be̱ꞌ:
―Gazre na,
ne xetú chupa béladauꞌ.
35 Nadxa Jesús gunná béꞌene̱ꞌ benneꞌ zan caꞌ xelebéꞌe̱ lu xu.
36 Guqué̱ꞌe̱ da gazre xeta xtila,
ne béladu caꞌ,
naꞌ guzre̱ꞌ Dios:
“Xcalenuꞌ.”
Nadxa bzúzruje̱ꞌ na,
ne bnézruje̱ꞌ na benneꞌ caꞌ dxusé̱dene̱ꞌ,
naꞌ benneꞌ caꞌ gulísie̱ꞌ na chee̱ benneꞌ zan caꞌ.
37 Xúgute̱ꞌ gulawe̱ꞌ,
ne belélajte̱ne̱ꞌ.
Gudé naꞌ bulusuzrate̱ꞌ gazre gaꞌ da bízrujdu caꞌ zaj nagáꞌana.
38 Benneꞌ gulagu zaj naque̱ꞌ tapa cueꞌ chi gaxúa benneꞌ biu,
ne quebe nu blaba nuꞌula,
ne bidu caꞌ.
39 Gudé naꞌ Jesús bze̱ꞌ benneꞌ zan caꞌ dizraꞌ,
naꞌ bexuꞌe̱ lu da dxedá laweꞌ nísadauꞌ zexíaje̱ꞌ naga nababa xe̱zre Magdala.