―Benneꞌ nigá naque̱ꞌ Juan,

bénneaꞌ bchue̱ꞌ bénneache nisa.

Ba bebane̱ꞌ ládujla benneꞌ gate.

Chee̱ le̱ naꞌ nape̱ꞌ xel-laꞌ waca zren nigá.

3 Caní gunné̱ꞌ laweꞌ da gude̱la Herodes nigá Juan naꞌ,

ne bchéaje̱ꞌ le̱ꞌ du xia,

ne guluꞌe̱ le̱ꞌ lizre xia.

Be̱ne̱ꞌ caní ne̱ chee̱ Herodías,

zruꞌula Felipe,

biche Herodes naꞌ.

4 Caní be̱ne̱ꞌ laweꞌ da guzre Juan le̱ꞌ:

―Quebe naca chiuꞌ súale̱nuꞌ nuꞌula nigá.

5 Herodes guca lazre̱ꞌ gutie̱ꞌ le̱ꞌ,

san dxezrebe̱ꞌ da xelún bénneache caꞌ laweꞌ da dxeléquene̱ꞌ naca Juan benneꞌ dxuchálaje̱ꞌ waláz chee̱ Dios.

6 Gate bzrin zra dxezría iza Herodes,

naꞌ belune̱ꞌ laní chee̱ꞌ,

naꞌ bxaꞌa bi nuꞌula chee̱ Herodías naꞌ,

naꞌ bezaca ba lazreꞌ Herodes naꞌ da dxunbeꞌ.

7 Chee̱ le̱ naꞌ Herodes guche̱be lazre̱ꞌ lau benneꞌ caꞌ gunézruje̱ꞌ ca da naba bi núꞌuladu naꞌ.

8 Laweꞌ da ba guzre xrnabeꞌ le̱beꞌ,

naꞌ gunabeꞌ:

―Be̱nna nigá xichaj Juan,

bénneaꞌ bchue̱ꞌ bénneache nisa.

Gulúꞌu na tu lu xéꞌena.

9 Nadxa guzúa ste̱be Herodes,

bénneaꞌ dxenná beꞌe̱,

san laweꞌ da ba guche̱be lazre̱ꞌ,

naꞌ benneꞌ zaj zre̱ꞌe̱ dxágule̱ne̱ꞌ le̱ꞌ belenne̱ꞌ caꞌ,

chee̱ le̱ naꞌ guzre̱ꞌ tu benneꞌ we̱n zrin chee̱ꞌ gunézruje̱ꞌ na le̱beꞌ.

10 Gunná béꞌene̱ꞌ nu benneꞌ guchugue̱ꞌ xichaj Juan naga xuꞌe̱ lizre xia.

11 Nadxa xeajlexríꞌe̱ xíchaje̱ꞌ tu lu xéꞌena,

ne bulunézruje̱ꞌ na bi núꞌuladu naꞌ,

naꞌ le̱beꞌ bnézrujbeꞌ na xrnabeꞌ.

12 Nadxa belezrín benneꞌ caꞌ bse̱de Juan,

naꞌ belexúꞌe̱ le̱ꞌ,

ne xeajlecache̱ꞌ le̱ꞌ.

Nadxa xjaque̱ꞌ xeajlegue̱zre̱ꞌ Jesús.

13 Gate ben Jesús da naꞌ,

naꞌ bezé̱ꞌe̱ naꞌ,

bexuꞌe̱ tu lu da dxedá laweꞌ nísadauꞌ,

naꞌ bzrine̱ꞌ tu naga quebe nu zraꞌ benneꞌ.

Gate belén bénneache,

naꞌ gusiáꞌque̱ꞌ niꞌe̱,

naꞌ belezrine̱ꞌ naga zua Jesús.

14 Gate bedxúaj Jesús lu da dxedá laweꞌ nísadauꞌ,

naꞌ bléꞌene̱ꞌ benneꞌ zante̱,

ne bexache lazre̱ꞌ le̱ꞌ,

naꞌ bexune̱ꞌ benneꞌ caꞌ quebe chaweꞌ zaj zue̱ꞌ.

15 Gate ba za xrinne,

benneꞌ caꞌ dxuse̱de Jesús gulebigue̱ꞌ lau Le̱ꞌ,

dxelenné̱ꞌ:

―Lataj nigá quebe bi de̱,

ne ba dxedé zra.

Bze̱ benneꞌ caní dizraꞌ chee̱ chjaque̱ꞌ xé̱zredu caꞌ,

ne xelezíꞌe̱ da xelawe̱ꞌ.

16 Jesús guzre̱ꞌ le̱ꞌ:

―Quebe dxun na ba xen chjaque̱ꞌ.

Le gunezruj leꞌe da xelawe̱ꞌ.

17 Benneꞌ caꞌ gulé̱ꞌe̱ Le̱ꞌ:

―Gázxuze xeta xtila de̱ chee̱dxu nigá,

ne chúpaze bela.

18 Jesús guzre̱ꞌ benneꞌ caꞌ:

―Le gunna na nigá.

19 Nadxa gunná béꞌene̱ꞌ gulebéꞌ benneꞌ zan caꞌ laweꞌ zrie̱.

Guqué̱ꞌe̱ xeta xtila,

ne bela caꞌ,

naꞌ gunné̱ꞌe̱ xabaala,

ne guzre̱ꞌ Dios:

“Xcalenuꞌ.”

Nadxa bzúzruje̱ꞌ xeta xtila,

ne bnézruje̱ꞌ na benneꞌ caꞌ dxusé̱dene̱ꞌ,

naꞌ benneꞌ caꞌ gulísie̱ꞌ na láwela benneꞌ zan caꞌ.

20 Xúgute̱ꞌ gulawe̱ꞌ,

ne gulélajene̱ꞌ.

Ca gudé naꞌ bulusuzré̱ꞌe̱ chazrinnu gaꞌ da bízrujdu caꞌ zaj nagáꞌana.

21 Benneꞌ gulawe̱ꞌ na zaj naque̱ꞌ chi xun gaxúa benneꞌ biu,

ne quebe nu blaba nuꞌula,

ne bidu caꞌ.

22 Nadxa gunná beꞌe Jesús benneꞌ caꞌ dxusé̱dene̱ꞌ xeluꞌe̱ lu da dxedá laweꞌ nísadauꞌ chee̱ xelague̱ꞌ nísadauꞌ nédxudxa ca Le̱ꞌ chee̱ xelexezrine̱ꞌ xéchalaꞌa nísadauꞌ naꞌ,

dxácate̱ Le̱ꞌ dxuzé̱ benneꞌ zan caꞌ dizraꞌ.

23 Ca gudé bze̱ꞌ dizraꞌ benneꞌ zan caꞌ,

naꞌ guluéne̱ꞌ tu lu xiꞌa xeajchálajle̱ne̱ꞌ Dios naga zue̱ꞌ tuze̱ꞌ.

Gate guxrinne zua Jesús tuze̱ꞌ naꞌ.

24 Dxácate̱ naꞌ ba zeaj da naꞌ dxedá laweꞌ nísadauꞌ gachaj láweꞌte̱ nísadauꞌ naꞌ.

Nadxa guxasa xeajxruza chee̱ nísadauꞌ naꞌ,

da dxutá na da dxedá laweꞌ nísadauꞌ naꞌ,

laweꞌ da dxácale̱ꞌe̱ beꞌ,

ne quebe dxue na lataj sa na.

25 Gate gudé dxe̱la gubiga Jesús naga zaj zre̱ꞌe̱,

zéaje̱ꞌ laweꞌ nisa.

26 Gate beleléꞌe benneꞌ caꞌ dxedá Jesús laweꞌ nisa,

naꞌ belezrebe̱ꞌ,

naꞌ lu xel-laꞌ dxelezrebe gulebézrexe̱ꞌe̱,

gulenné̱ꞌ:

―Da dxedá dxe̱la naꞌ.

27 Jesús guzre̱ꞌ benneꞌ caꞌ:

―Le gun dipa lázrele.

Nedaꞌ nigá.

Quebe zrébele.

28 Naꞌ gunná Pedro,

dxe̱ꞌe̱ Jesús:

―Xran,

che Lueꞌ naꞌ,

gunná beꞌe xidaꞌ laweꞌ nisa naga zuꞌ naꞌte.

29 Jesús guzre̱ꞌ le̱ꞌ:

―Gudá xcaꞌ.

Nadxa Pedro bdxúaje̱ꞌ lu da dxedá laweꞌ nísadauꞌ,

ne guzú lawe̱ꞌ dxezé̱ꞌe̱ laweꞌ nisa chee̱ zrine̱ꞌ naga zua Jesús.

30 Gate dxeque beꞌene̱ꞌ ca dxun beꞌ naꞌ,

naꞌ bzrebe̱ꞌ,

ne guzú lau dxazie̱ꞌ lu nísadauꞌ naꞌ.

Caꞌan guca gudxezre xe̱ꞌe̱,

gunné̱ꞌ:

―Xran,

becáꞌa nedaꞌ.

31 Nadxa becáꞌa Jesús ne̱ꞌe̱,

ne guzre̱ꞌ le̱ꞌ:

―Látega dxeajlí lazruꞌ nedaꞌ.

¿Bizr chee̱ naꞌ be̱n chupa lazruꞌ?

32 Gate belexegüene̱ꞌ lu da dxedá laweꞌ nísadauꞌ,

naꞌ bebéꞌ zri beꞌ naꞌ.

33 Nadxa benneꞌ caꞌ zaj zre̱ꞌe̱ lu da dxedá laweꞌ nísadauꞌ naꞌ buluzú zribe̱ꞌ lau Jesús,

dxelé̱ꞌe̱ Le̱ꞌ:

―Da li nacuꞌ Zriꞌine Dios.

34 Guledée̱ꞌ xecha laꞌa nísadauꞌ,

naꞌ belezrine̱ꞌ lu xe̱zr la xu chee̱ benneꞌ Genesaret caꞌ.

35 Gate benneꞌ caꞌ zaj zre̱ꞌe̱ xe̱zre naꞌ belexexúnbeꞌe̱ Jesús,

naꞌ buludée̱ꞌ dizraꞌ xezícala xé̱zredu caꞌ,

naꞌ guleché̱ꞌe̱ xúgute̱ benneꞌ we̱ꞌ naga zua Jesús.

36 Gulataꞌ xuene̱ꞌ Jesús guꞌe̱ lataj xulutá benneꞌ caꞌ zra lane̱ꞌ naze.

Xúgute̱ benneꞌ buluté̱ꞌ zra lane̱ꞌ belexexaque̱ꞌ.