Da bse̱de Jesús ca da be̱n benneꞌ dxaza
13
Lu zra naꞌ bdxuaj Jesús xuꞌu,
naꞌ xeajdxéꞌe̱ dxuꞌa nísadauꞌ.
2 Naꞌ laweꞌ da belezraga benneꞌ zante̱ naga zua Jesús,
guxúꞌe̱ tu lu da dxedá laweꞌ nísadauꞌ,
ne gudxéꞌe̱ naꞌ.
Xúgute̱ benneꞌ caꞌ belexegáꞌane̱ꞌ dxuꞌa nísadauꞌ naꞌ.
3 Nadxa bse̱de Jesús benneꞌ caꞌ da zante̱ da bchálaje̱ꞌ,
dxenné̱ꞌ:
―Tu benneꞌ dxaza guzé̱ꞌe̱ zíaje̱ꞌ guza.
4 Dxácate̱ dxaze̱ꞌ,
bal-la bínnedu caꞌ xeajlechaze na dxuꞌa neza.
Naꞌ beleláꞌ bxínnedu caꞌ,
gulágubaꞌ bínnedu caꞌ.
5 Bal-la bínnedu caꞌ xeajlechaze na lu xiaj naga quebe dxéꞌteca xu.
Bínnedu caní chadí gulezría na laweꞌ da quebe dxéꞌteca xu.
6 Gate blaꞌ gubizra,
naꞌ gulecuade na.
Laweꞌ da quebe dxéꞌteca xu,
naꞌ gulebizre na.
7 Bal-la bínnedu caꞌ xeajlechaze na naga bezríale̱ꞌe̱ lba xecheꞌ,
naꞌ lba xecheꞌ caꞌ belegula na,
ne blule na da du caꞌ naze̱ꞌ.
8 Bal-la bínnedu caꞌ xeajlechaze na lu xu be̱be,
naꞌ belúnnale̱ꞌe̱ na.
Bal-la xágadu caꞌ belunna na tu gaxúa tu tu na,
naꞌ xebal-la na belunna na ga xun tu tu na,
naꞌ xebal-la na belunna na chi dxua tu tu na.
9 Che zua nágale,
le xene.
Dxenná Jesús bizr chee̱ naꞌ dxuchálaje̱ꞌ da dxululéꞌe na
10 Nadxa benneꞌ caꞌ dxuse̱de Jesús gulebigue̱ꞌ naga zue̱ꞌ Le̱ꞌ,
ne buluche̱be̱ꞌ Le̱ꞌ:
―¿Bizr chee̱ naꞌ dxuchálajle̱nuꞌ benneꞌ caꞌ da dxululéꞌe na?
11 Beche̱be Jesús,
dxenné̱ꞌ:
―Dios dxunne̱ꞌ lataj nézele leꞌe da nagache ca dxenná bea Le̱ꞌ xabáa,
san benneꞌ caní quebe dxuꞌe̱ lataj.
12 Benneꞌ nape̱ꞌ lateꞌ,
Dios gunézrujdxe̱ꞌ le̱ꞌ,
naꞌ gápale̱ꞌe̱,
san benneꞌ quebe bi nape̱ꞌ,
Dios wequé̱ꞌe̱ ca da du nape̱ꞌ.
13 Chee̱ le̱ naꞌ dxuchálajle̱naꞌ benneꞌ caní da dxululéꞌe na,
laweꞌ da cateꞌ dxelenné̱ꞌe̱ quebe dxeleléꞌene̱ꞌ.
Cateꞌ dxelenne̱ꞌ quebe dxeléajniꞌine̱ꞌ.
14 Ca naca da dxaca chee̱ benneꞌ caní dxaca na ca gunná Isaías,
bénneaꞌ bchálaje̱ꞌ waláz chee̱ Dios,
gunné̱ꞌ:
Da li wenle.
Cateꞌ dxenle quebe dxéajniꞌile.
Da li wannáꞌle.
Cateꞌ dxennaꞌle quebe dxeléꞌele.
15 Caní naca na laweꞌ da zaj naca lázrdau zideꞌ benneꞌ caní.
Quebe dxelaca lazre̱ꞌ xelenne̱ꞌ.
Dxulugácue̱ꞌ xiaj lawe̱ꞌ chee̱ quebe xeleléꞌene̱ꞌ.
Quebe dxelenne̱ꞌ,
naꞌ quebe dxeléajniꞌine̱ꞌ.
Quebe dxelexílaje̱ꞌ nedaꞌ chee̱ xexunaꞌ le̱ꞌ.
16 ’Ba neza zrente̱ naca na chee̱le leꞌe laweꞌ da dxeléꞌele nen xiaj laule,
ne dxenle nen nágale.
17 Da li dxapaꞌ leꞌe,
benneꞌ zante̱,
benneꞌ caꞌ buluchálaje̱ꞌ waláz chee̱ Dios,
ne benneꞌ xrlátaje caꞌ gulaca lazre̱ꞌ xeleléꞌene̱ꞌ da caní dxeléꞌele leꞌe.
Quebe beleléꞌene̱ꞌ na.
Gulaca lazre̱ꞌ xelenne̱ꞌ da caní dxénnele leꞌe.
Quebe belenne̱ꞌ na.
Jesús dxuzéajniꞌine̱ꞌ benneꞌ caꞌ ca naca chee̱ benneꞌ dxaza
18 Naꞌ gunná Jesús:
―Le xenne ca zéaje̱ da naca chee̱ benneꞌ dxaza nigá.
19 Benneꞌ dxelenne̱ꞌ ca naca chee̱ Bénneaꞌ dxenná beꞌe̱ xabáa,
ne quebe dxeléajniꞌine̱ꞌ zaj naque̱ꞌ ca bínnedu caꞌ xeajlechaze na dxuꞌa neza.
Za da xriwe̱ꞌ ne dxugúa na ca naca dizraꞌ da ba gulezíꞌe̱ lu xichaj lázrdawe̱ꞌ.
20 Ca naca chee̱ bínnedu caꞌ xeajlechaze na lu xiaj,
da caní dxululéꞌe na ca naca chee̱ benneꞌ caꞌ dxeleziꞌe̱ dizraꞌ naꞌ du lazre̱ꞌ.
21 Ca naꞌ guca chee̱ bínnedu caꞌ,
quebe guca xuludé lue na,
ne quebe guzí bea na,
caꞌan dxaca chee̱ benneꞌ caní,
gate naꞌ bi da dxelezaque̱ꞌ,
u che nu zeajnáu ziꞌ xuzre̱ꞌ le̱ꞌ laweꞌ da zaj naziꞌe̱ dizraꞌ nigá,
naꞌ dxelexebigue̱ꞌ.
22 Bínnedu caꞌ xeajlechaze na ládujla xecheꞌ dxululéꞌe na ca naca chee̱ benneꞌ dxelenne̱ꞌ dizraꞌ nigá,
san dxelebéꞌle̱ꞌe̱ gunne xue da naca chee̱ xe̱zr la xu nigá,
naꞌ ca naca xel-laꞌ gunníꞌa dxezí xe̱ na benneꞌ caꞌ.
Xúgute̱ da caní dxuluzaga na dizraꞌ nigá,
naꞌ quebe dxun na da dxal-laꞌ gun dizraꞌ nigá lu xichaj lázrdawe̱ꞌ.
23 Ca naca chee̱ bínnedu caꞌ da xeajlechaze na lu xu be̱be,
da caní dxululéꞌe na ca naca chee̱ benneꞌ caꞌ dxelenne̱ꞌ dizraꞌ nigá,
ne dxeléajniꞌine̱ꞌ na,
naꞌ zaj naque̱ꞌ ca bínnedu caꞌ belúnnale̱ꞌe̱ na.
Bal-la benneꞌ zaj naque̱ꞌ ca bínnedu caꞌ belunna na tu gaxúa tu tu na,
naꞌ xebal-le̱ꞌ zaj naque̱ꞌ ca bínnedu caꞌ belunna na ga xun tu tu na,
naꞌ xebal-le̱ꞌ zaj naque̱ꞌ ca bínnedu caꞌ belunna na chi dxua tu tu na.
Da bchalaj Jesús ca naca chee̱ xixreꞌ zrinnaj da dxennáꞌqueze na ca dxennáꞌ xel-laꞌ zruaꞌ xtila
24 Nadxa bchalaj Jesús xetú da dxuléꞌe na,
dxenné̱ꞌ:
―Ca dxaca ga ni dxenná bea Dios naca na ca da guca gate tu benneꞌ guze̱ꞌ binne cháweꞌdauꞌ lu xe̱zr la xu chee̱ꞌ.
25 Gate dxelase xúgute̱ꞌ,
naꞌ bzrin tu benneꞌ dxezré̱ꞌe̱ le̱ꞌ,
ne xeajaze̱ꞌ binne xixreꞌ zrinnaj láwela zruaꞌ xtila,
naꞌ bezé̱ꞌe̱.
26 Gate naꞌ bgula xel-laꞌ zruaꞌ xtila,
ne blaꞌ dau chee̱ na,
cáꞌanqueze blaꞌ xixreꞌ zrinnaj caꞌ.
27 Nadxa benneꞌ we̱n zrin caꞌ xeajlegue̱zre̱ꞌ xrane na,
dxelé̱ꞌe̱ le̱ꞌ:
“Xran,
guzuꞌ binne cháweꞌdauꞌ lu xe̱zr la xu chiuꞌ.
¿Gazra guzá xixreꞌ zrinnaj caní?”
28 Gunná xránabeꞌ:
“Tu benneꞌ dxezré̱ꞌe̱ nedaꞌ be̱ne̱ꞌ da nigá.”
Nadxa benneꞌ we̱n zrin caꞌ buluche̱be̱ꞌ le̱ꞌ:
“¿Dxaca lazruꞌ chéajntuꞌ cheajlé̱pentuꞌ xixreꞌ zrinnaj caꞌ?”
29 Le̱ꞌ guzre̱ꞌ we̱n zrin caꞌ:
“Quebe gaca na.
Gate naꞌ lázrule xixreꞌ zrinnaj caꞌ,
walázrute̱le xel-laꞌ zruaꞌ xtila.
30 Xelegúladxa na cháweꞌla tu zren ca xecáꞌadxadxu zruaꞌ xtila.
Nadxa nna beꞌedaꞌ benneꞌ we̱n zrin caꞌ xelequé̱ꞌe̱ nedxu xixreꞌ zrinnaj caꞌ,
naꞌ xuluchéaje̱ꞌ xelune̱ꞌ tu xrúnujdu weaj chee̱ guzézxedxu na.
Nadxa xelelape̱ꞌ zruaꞌ xtila naꞌ,
ne xezrá chaweꞌ na lizraꞌ.”
Da bchalaj Jesús ca naca chee̱ binne mostaza
31 Nadxa bchalaj Jesús xetú da dxuléꞌe na,
dxenné̱ꞌ:
―Da dxaca chee̱ benneꞌ dxelezíꞌ lu ne̱ꞌe̱ nna beꞌe Dios le̱ꞌ naca na ca da guca gate tu benneꞌ guze̱ꞌ binne mostaza lu xe̱zr la xu chee̱ꞌ.
32 Da li binne mostaza nigá naca na da bízrujdxa laweꞌ xúgute̱ binne caꞌ.
Gate ba nagula na naca na tu xaga zrendxa laweꞌ xúgute̱ xixreꞌ cuan.
Dxaca na ca tu xaga zren naga dxelezequeꞌ cheajlezría bxínnedu caꞌ xrúꞌunebaꞌ lu zruze na.
Da bchalaj Jesús ca naca chee̱ cua zichaj chee̱ xeta xtila
33 Nadxa bchalaj Jesús xetú da dxuléꞌe na,
dxenné̱ꞌ:
―Da dxaca chee̱ benneꞌ dxelezíꞌ lu ne̱ꞌe̱ nna beꞌe Dios le̱ꞌ naca na ca da guca gate tu nuꞌula bchixre cua zichaj chee̱ xeta xtila laweꞌ chunna xaga cua zruaꞌ xtila,
naꞌ dute̱ na guxasa na bliche.
Ca bchine Jesús da dxuléꞌe na caní
34 Xúgute̱ da caní bchálajle̱ Jesús benneꞌ caꞌ,
dxuchálaje̱ꞌ da dxululéꞌe na,
naꞌ quebe bchálajle̱ne̱ꞌ benneꞌ caꞌ che quebe bchálaje̱ꞌ da dxululéꞌe na.
35 Caní guca ca da gunná benneꞌ bchálaje̱ꞌ waláz chee̱ Dios,
gunné̱ꞌ:
Guchálajaꞌ ca naca da dxuléꞌe na da guchálajaꞌ.
Guléꞌedaꞌ ca naca da nagache gate guzrete̱ xe̱zr la xu.
Jesús dxuzéajniꞌine̱ꞌ ca naca chee̱ da dxuléꞌe na chee̱ xixreꞌ zrinnaj da dxennáꞌqueze na ca dxennáꞌ xel-laꞌ zruaꞌ xtila
36 Nadxa Jesús bze̱ꞌ benneꞌ caꞌ dizraꞌ,
naꞌ guxúꞌe̱ lu xuꞌu.
Benneꞌ caꞌ dxuse̱de Jesús gulebigue̱ꞌ lau Le̱ꞌ,
naꞌ gulé̱ꞌe̱ Le̱ꞌ:
―Bzéajniꞌi netuꞌ da dxuléꞌe na ca naca chee̱ xixreꞌ zrinnaj da dxennáꞌqueze na ca dxennáꞌ xel-laꞌ zruaꞌ xtila.
37 Nadxa Jesús guzre̱ꞌ benneꞌ caꞌ:
―Bénneaꞌ dxaze̱ꞌ binne cháweꞌdauꞌ nigá naque̱ꞌ Benneꞌ Gulje̱ꞌ Bénneache.
38 Naga dxaze̱ꞌ binne nigá naca na lu xichaj lázrdau bénneache.
Binne cháweꞌdu caꞌ zaj naca benneꞌ caꞌ dxenná beꞌe Dios,
naꞌ xixreꞌ zrinnaj caꞌ zaj naca na benneꞌ caꞌ zaj naque̱ꞌ chee̱ da xriwe̱ꞌ.
39 Bénneaꞌ dxezré̱ꞌe̱ xrane xe̱zr la xu naꞌ,
ne xeajaze̱ꞌ xixreꞌ zrinnaj naque̱ꞌ da xriwe̱ꞌ náꞌqueze.
Zra xelelape̱ꞌ naca na zra bze̱be chee̱ xe̱zr la xu nigá,
naꞌ benneꞌ caꞌ xelelape̱ꞌ zruaꞌ xtila naꞌ zaj naque̱ꞌ gubáz chee̱ xabáa chee̱ Dios.
40 Ca belexequé̱ꞌe̱ xixreꞌ zrinnaj caꞌ,
ne buluzré̱ꞌe̱ na lu xiꞌ chee̱ xelezxe na,
caꞌan gácaqueze lu zra bze̱be naꞌ.
41 Nedaꞌ,
Benneꞌ Gulje̱ꞌ Bénneache,
sel-laꞌ gubáz chee̱ xabáa chiaꞌ caꞌ chee̱ xulucuase̱ꞌ naga nna beꞌa xúgute̱ benneꞌ caꞌ dxuluxrínnajte̱ꞌ benneꞌ xula,
ne benneꞌ caꞌ dxelune̱ꞌ da cale̱la.
42 Nadxa gubáz chee̱ xabáa caꞌ xuluzré̱ꞌe̱ benneꞌ caꞌ dxelune̱ꞌ da cale̱la lu xiꞌ gabila naga xelebezre̱ꞌ,
ne xeláguxaꞌate̱ lazxe̱ꞌ.
43 Nadxa benneꞌ caꞌ dxelune̱ꞌ da xrlátaje ca da dxenná beꞌe Dios xelácaqueze̱ꞌ ca gubizra naga dxenná bea Dios,
Xra benneꞌ caꞌ.
Che leꞌe zua nágale,
le xene.
Da dxuléꞌe na ca naca chee̱ tu xel-laꞌ gunníꞌa da nagache
44 Naꞌ gunná Jesús:
―Naga dxenná bea Dios naca na ca tu xel-laꞌ gunníꞌa da nagache na tu lu xe̱zr la xu.
Tu benneꞌ bezrélene̱ꞌ xel-laꞌ gunníꞌa nigá,
naꞌ bucache̱ꞌ na.
Ne zúale̱ꞌe̱ xel-laꞌ dxebé zexíaje̱ꞌ xeajxé̱tie̱ꞌ xúgute̱ da nape̱ꞌ,
naꞌ beziꞌe̱ xe̱zr la xu naꞌ.
Da dxuléꞌe na ca naca tu bga da zácale̱ꞌe̱ na
45 Naꞌ gunná Jesús:
―Naga dxenná bea Dios naca na ca tu da dxexilaj tu benneꞌ we̱te,
dxexílaje̱ꞌ bga caꞌ da zaj zaca na.
46 Gate dxezrélene̱ꞌ tu da zácale̱ꞌe̱,
naꞌ zexíaje̱ꞌ zeajxé̱tie̱ꞌ xúgute̱ da nape̱ꞌ,
naꞌ siꞌe̱ bga naꞌ.
Da dxuléꞌe na ca naca tu xixruj bela
47 Naꞌ gunná Jesús:
―Ca naca chee̱ benneꞌ caꞌ xelexúꞌe̱ naga dxenná bea Dios,
naca na ca tu xixruj bela,
da dxuluzale̱ꞌ lu nísadauꞌ,
naꞌ dxelezene̱ꞌ zaneꞌ cueꞌ bela.
48 Gate dxezrá xixruj naꞌ,
naꞌ benneꞌ caꞌ dxelezene̱ꞌ bela dxelexequé̱ꞌe̱ na dxuꞌa nísadauꞌ,
naꞌ dxelebéꞌe̱ dxelexebée̱ꞌ bela caꞌ.
Bela chaweꞌ caꞌ dxuluxuzré̱ꞌe̱-baꞌ lu xcuite,
naꞌ bela xala caꞌ dxeledxúꞌune̱ꞌ-baꞌ.
49 Caꞌan gaca lu zra bze̱be naꞌ.
Xeledxúaj gubáz chee̱ xabáa caꞌ,
xelexebéaje̱ꞌ benneꞌ caꞌ dxelune̱ꞌ da cale̱la ládujla benneꞌ xrlátaje caꞌ.
50 Xuluzré̱ꞌe̱ benneꞌ caꞌ dxelune̱ꞌ da cale̱la lu xiꞌ gabila,
naga xelebezre̱ꞌ,
ne xeláguxaꞌate̱ lazxe̱ꞌ.
Da zaca ca da zaj naca na da cube, ne da zaj naca na da gula
51 Nadxa bche̱be Jesús benneꞌ caꞌ,
dxenné̱ꞌ:
―¿Dxéajniꞌile leꞌe xúgute̱ da caní?
Benneꞌ caꞌ gulenné̱ꞌ:
―Aweꞌ,
Xran.
52 Nadxa guzre̱ꞌ benneꞌ caꞌ:
―Gate tu benneꞌ dxusé̱dene̱ꞌ da nadxixruj bea Dios,
ne nazé̱dene̱ꞌ ca dxenná bea Dios,
naque̱ꞌ ca tu benneꞌ xrane xuꞌu nézene̱ꞌ cuéaje̱ꞌ da zaj naca na da cube,
ne da zaj naca na da gula ládujla da nuzrá chawe̱ꞌ.
Jesús dxexezrine̱ꞌ Nazaret
53 Gate bexuzre bchalaj Jesús da dxuléꞌe na caní,
naꞌ bezé̱ꞌe̱ naꞌ.
54 Bezrine̱ꞌ naga naca lazrie̱ꞌ.
Naꞌ guzú lawe̱ꞌ dxusé̱dene̱ꞌ benneꞌ caꞌ zaj zre̱ꞌe̱ lu xudauꞌ chee̱ xe̱zre naꞌ,
naꞌ belexebanne benneꞌ caꞌ,
gulenné̱ꞌ:
―¿Gazra bse̱de benneꞌ nigá xel-laꞌ sina nigá?
¿Ájazra dxune̱ꞌ xel-laꞌ waca caní?
55 Benneꞌ nigá naque̱ꞌ zriꞌine gubizre xaga,
naꞌ naca xrne̱ꞌe̱ María.
Naque̱ꞌ bi biche Jacobo,
ne José,
ne Simón,
ne Judas.
56 Bi zane̱ꞌ zaj zue̱ꞌ nigá nen dxiꞌu.
¿Ájazra naꞌ dxaca dxune̱ꞌ da caní?
57 Chee̱ le̱ naꞌ buluzúe̱ꞌ Jesús chaláꞌala.
Jesús guzre̱ꞌ benneꞌ caꞌ:
―Xúgute̱ benneꞌ xula dxelape̱ꞌ ba láꞌana tu benneꞌ dxuchálaje̱ꞌ waláz chee̱ Dios.
Benneꞌ lazrie̱ꞌ,
ne xrtia ljwezre̱ꞌ quebe dxelúne̱ꞌ caꞌ.
58 Jesús quebe bé̱nteque̱ꞌ naꞌ xel-laꞌ waca caꞌ laweꞌ da quebe guléajle̱ꞌe̱ chee̱ꞌ.