Dxal-laꞌ xelexebíꞌi lazreꞌ bénneache
13
Ca lu zra naꞌ belezrín bal-la benneꞌ lau Jesús,
naꞌ buluzenne̱ꞌ Le̱ꞌ ca be̱n Pilato,
be̱tie̱ꞌ bal-la benneꞌ Galilea,
naꞌ bchague̱ꞌ dxen chee̱ benneꞌ caꞌ nen dxen chee̱ be̱ xixreꞌ,
bea caꞌ ba belutie̱ꞌ chee̱ xuluzríe̱ꞌ dxen chee̱ na lau Dios.
2 Naꞌ Jesús guzre̱ꞌ le̱ꞌ:
―¿Dxéquele leꞌe caní gulezaca benneꞌ caꞌ laweꞌ da zaj nácadxe̱ꞌ benneꞌ dul-la ca benneꞌ caꞌ xezícala zaj zre̱ꞌe̱ xe̱zre caꞌ zaj nababa Galilea?
3 Dxapaꞌ leꞌe:
Cabí,
naꞌ che quebe xebíꞌi lázrele leꞌe,
xúgute̱le leꞌe cuía xile.
4 ¿Dxéquele leꞌe benneꞌ chinu chunna caꞌ gulatie̱ꞌ gate guzría cha xuꞌu sibe le̱ꞌ da nazí le na Siloé zaj nabágadxe̱ꞌ dul-la ca xezícala benneꞌ caꞌ zaj zre̱ꞌe̱ xe̱zre Jerusalén?
5 Dxapaꞌ leꞌe:
Cabí,
naꞌ che leꞌe quebe xebíꞌi lázrele,
cáꞌanqueze leꞌe wabía xile.
Xaga higo da quebe dxebía na da zixre
6 Nadxa Jesús bchálajle̱ne̱ꞌ benneꞌ caꞌ da dxuléꞌe nigá,
dxenné̱ꞌ:
―Tu benneꞌ zua tu xaga higo chee̱ꞌ zua na lu xe̱zr la xu chee̱ꞌ,
naꞌ xeajné̱ꞌe̱ na che zría na,
naꞌ quebe bi bezrélene̱ꞌ.
7 Nadxa guzre̱ꞌ benneꞌ dxun zrin lu xe̱zr la xu chee̱ꞌ:
“Gunnáꞌxque,
chun ízate̱ ba bidaꞌ dxennáꞌa che zria xaga nigá,
ne quebe bi bezréledaꞌ.
¡Guchugu na!
¿Bizr chee̱ naꞌ nulán na xe̱zr la xu nigá?”
8 Bénneaꞌ dxun zrin chee̱ xe̱zr la xu naꞌ beche̱be̱ꞌ:
“Xran,
bcaꞌana na xetú iza naꞌa.
Guzúlujdxaꞌ zran na,
ne cuaꞌa na be̱be.
9 Nen da naꞌ,
gúnnalja na,
san che cabí,
naꞌ chuguꞌ na.”
Jesús dxexune̱ꞌ tu nuꞌula nalegu cuzre̱ꞌ
10 Gate naca zra dxulupáꞌana judío caꞌ,
naꞌ zua Jesús tu lu xuꞌu naga dxelezraga judío caꞌ dxusé̱dene̱ꞌ benneꞌ caꞌ,
11 naꞌ zua naꞌ tu nuꞌula xuꞌe̱ we̱ꞌ ba guca chinu chunna iza.
Tu beꞌ xriwe̱ꞌ nun na le̱ꞌ cuzru legu,
naꞌ quebe dxácaqueze̱ꞌ xelíe̱ꞌ.
12 Gate bleꞌe Jesús le̱ꞌ,
naꞌ gunné̱ꞌ le̱ꞌ,
ne guzre̱ꞌ le̱ꞌ:
―Nuꞌula,
ba bexacuꞌ chee̱ xízrawe̱ꞌ chiuꞌ.
13 Nadxa guxrúa ne̱ꞌe̱ nuꞌula naꞌ,
naꞌ la náꞌqueze nuꞌula naꞌ belite̱ꞌ,
naꞌ guzú lawe̱ꞌ dxue láꞌane̱ꞌ Dios.
14 Naꞌ benneꞌ xíchaje̱ chee̱ xuꞌu naꞌ bzre̱ꞌe̱ laweꞌ da bexún Jesús nuꞌula naꞌ lu zra dxulupáꞌane̱ꞌ,
naꞌ guzre̱ꞌ benneꞌ zaj zre̱ꞌe̱ naꞌ:
―Xrupa zra dxal-laꞌ gundxu zrin.
Lu zra caꞌ waca xídale xexácale,
quegá lu zra dxupáꞌanadxu.
15 Nadxa Xránadxu beche̱be̱ꞌ:
―Leꞌe,
benneꞌ dxelún láweze da xrlátaje,
¿quebe dxesé̱zrele leꞌe be̱zre chee̱le u burro chee̱le lu zra dxupáꞌanadxu chjuaꞌle-baꞌ xeléꞌajbaꞌ nisa?
16 Núꞌula nigá naque̱ꞌ xrtia Abraham,
naꞌ da xriwe̱ꞌ nuchéaj na le̱ꞌ lu xízrawe̱ꞌ nigá ba zeaj chinu chunna iza,
naꞌ ¿quebe dxal-laꞌ xebéajaꞌ xízrawe̱ꞌ da nuchéaj na le̱ꞌ lu zra dxupáꞌanadxu?
17 Gate gunná Jesús da nigá,
xúgute̱ benneꞌ dxeledábague̱ꞌ Le̱ꞌ belexeduéꞌene̱ꞌ,
naꞌ xúgute̱ benneꞌ xezícadxa gulebene̱ꞌ gate beleléꞌene̱ꞌ ca naca da zrente̱ da dxun Jesús.
Sanación en el Sabbat
Da dxuléꞌe na ca naca chee̱ bínnedauꞌ chee̱ mostaza
18 Nadxa gunná Jesús:
―¿Aja naca xel-la dxenná bea chee̱ Dios,
ne bi gutil-le lé̱bedaꞌ na?
19 Naca na ca tu bínnedauꞌ chee̱ mostaza,
tu benneꞌ dxaze̱ꞌ na lu xe̱zr la xu chee̱ꞌ,
naꞌ dxegula na,
ne dxácate̱ na ca tu xaga zren,
naꞌ bxínnedu caꞌ dxuluzríabaꞌ xrúꞌunebaꞌ lu zruze na caꞌ.
El Reino de Dios como una Semilla de Mostaza
Da dxuléꞌe na ca naca chee̱ cua zichaj chee̱ xeta xtila
20 Cáꞌanqueze gunná Jesús:
―¿Bizra gutil-le lé̱bedaꞌ xel-la dxenná bea chee̱ Dios?
21 Naca na ca cua zichaj chee̱ xeta xtila tu nuꞌula dxuchague̱ꞌ na chunna xaga de xezaj,
naꞌ dxuchazra na ca naca cua naꞌ.
Dxa xuꞌu lechideꞌ
(Mt. 7.13-14, 21-23)
22 Dxácate̱ xuꞌu Jesús neza zexíaje̱ꞌ xe̱zre Jerusalén,
dxusé̱dene̱ꞌ bénneache lu xe̱zre caꞌ,
ne xé̱zredu caꞌ naga dxedée̱ꞌ.
23 Naꞌ bche̱be tu benneꞌ Le̱ꞌ:
―Xran,
¿bábaze benneꞌ xelelá?
Beche̱be Jesús:
24 ―Le gun ba xuzre chuꞌule dxa xuꞌu lechideꞌ,
laweꞌ da dxapaꞌ leꞌe,
benneꞌ zan xelaca lazre̱ꞌ xeluꞌe̱ naꞌ,
naꞌ quebe xelezéquene̱ꞌ.
25 Ca te naꞌ chasa xrane xuꞌu,
ne gusézxuje̱ꞌ dxa xuꞌu,
naꞌ leꞌe zrale chaléꞌajla nne̱le dxuꞌa dxa xuꞌu naꞌ,
nnale:
“Xran,
gusalaj chúꞌuntuꞌ.”
Naꞌ le̱ꞌ xeche̱be̱ꞌ:
“Quebe nezdaꞌ ga benneꞌ leꞌe.”
26 Nadxa su láuquezle leꞌe nnale:
“Güeꞌe gudágule̱ntuꞌ lueꞌ,
naꞌ lueꞌ bsé̱denuꞌ lu neza chee̱ntuꞌ caꞌ.”
27 Le̱ꞌ xeche̱be̱ꞌ:
“Dxapaꞌ leꞌe,
quebe nezdaꞌ ga benneꞌ leꞌe.
Le cuasa cuitaꞌ nedaꞌ,
xúgute̱le leꞌe dxunle da cale̱la.”
28 Naꞌ cuézrele,
ne xagu xáꞌate̱ lázxale gate léꞌele Abraham,
ne Isaac,
ne Jacob,
ne xúgute̱ benneꞌ caꞌ gulenné̱ꞌ waláz chee̱ Dios,
zaj zue̱ꞌ naga dxenná bea Dios,
naꞌ leꞌe zrale chaléꞌajla.
29 Weleláꞌ benneꞌ zaj zre̱ꞌe̱ dapa saca chee̱ xe̱zr la xu nigá,
naꞌ xelebéꞌe̱ xelawe̱ꞌ naga dxenná bea Dios.
30 Nadxa bal-la benneꞌ zaj naque̱ꞌ bzé̱bedxa naꞌa xelaque̱ꞌ benneꞌ blau,
naꞌ benneꞌ zaj naque̱ꞌ blau naꞌa xelaque̱ꞌ bzé̱bedxa.
Dxebezre Jesús chee̱ xe̱zre Jerusalén
31 Lu zra náꞌqueze,
belezrín lau Jesús bal-la benneꞌ fariseo caꞌ,
naꞌ gulé̱ꞌe̱ Le̱ꞌ:
―Bezáꞌ nigá,
laweꞌ da dxaca lazreꞌ Herodes gutie̱ꞌ Lueꞌ.
32 Jesús beche̱be̱ꞌ:
―Le chjaca cheajgué̱zrele benneꞌ wilaj lazreꞌ cale̱la naꞌ:
“Naꞌa,
ne wxre xebéajaꞌ beꞌ xriwe̱ꞌ caꞌ lu xichaj lázrdau benneꞌ caꞌ,
ne xexunaꞌ benneꞌ we̱ꞌ caꞌ,
naꞌ wizraj suedaꞌ.”
33 Dxun na ba xen chéajle̱naꞌ neza chiaꞌ naꞌa,
ne wxre,
ne wizraj,
laweꞌ da quebe gaca gate tu benneꞌ dxenné̱ꞌ waláz chee̱ Dios che quebe xelute benneꞌ Jerusalén le̱ꞌ.
34 “Jerusalén,
Jerusalén,
leꞌe naꞌ dxútele benneꞌ dxelenné̱ꞌ waláz chee̱ Dios,
ne dxuzríale xiaj benneꞌ gubáz caꞌ dxesel-la Dios.
Zaneꞌ lasa guca lazraꞌ gutupaꞌ bi chee̱le caꞌ ca dxun bedxuj,
dxutúpabaꞌ bédxujdu caꞌ zran xrílabaꞌ,
san quebe guca lázrele.
35 ¡Le nnaꞌxque,
naꞌa!
Lízrele leꞌe xegáꞌana na cáꞌaze.
Dxapaꞌ leꞌe québedxa xeléꞌele nedaꞌ ca zrindxa zra nnale:
¡Láꞌazxa naca Bénneaꞌ ze̱ꞌe̱ lu La Xránadxu!”