Jesús dxedil-le̱ꞌ benneꞌ xudauꞌ caꞌ
―Benneꞌ caꞌ dxuluxuzájle̱ꞌe̱ da nadxixruj bea Moisés,
ne benneꞌ xudauꞌ fariseo caꞌ zaj nape̱ꞌ xel-laꞌ dxenná bea xuluxuzájle̱ꞌe̱ da nadxixruj bea Moisés.
3 Chee̱ le̱ naꞌ le guzúa dizraꞌ chee̱ benneꞌ caní,
ne le gun xúgute̱ da xelenné̱ꞌ.
Quebe gunle ca da dxelún benneꞌ caꞌ,
laweꞌ da dxelenné̱ꞌ da caꞌ dxal-laꞌ gunle,
naꞌ quebe dxelúnqueze̱ꞌ na.
4 Dxelune̱ꞌ xua zíꞌile̱ꞌe̱ da quebe dxelezeque xelezúe bénneache,
ne dxelenná béꞌene̱ꞌ bénneache chee̱ xeluꞌe̱ na.
Benneꞌ caꞌ ne quebe dxuluzúe̱ꞌ na netú zrube ne̱ꞌe̱ chee̱ da dxuluzúe benneꞌ xubla.
5 Xúgute̱ da dxelún benneꞌ caꞌ naca na chee̱ xeleléꞌe bénneache.
Dxeledánnene̱ꞌ dxeluꞌe̱ luzxgue̱ꞌ,
ne ne̱ꞌe̱ ladxeꞌ laga naga naxúaj dizraꞌ chee̱ Dios,
ne dxelácue̱ꞌ zra lane̱ꞌ da zeajzé̱ luzre na tunna.
6 Dxelaca lazre̱ꞌ xelebéꞌe̱ naga ze̱ láweze naga dxelawe̱ꞌ,
ne naga naca blau lu xuꞌu caꞌ naga dxeledube̱ꞌ.
7 Dxelaca lazre̱ꞌ xelapa bénneache le̱ꞌ ba láꞌana la neza caꞌ,
ne xelé̱ꞌe̱ le̱ꞌ:
“Benneꞌ wese̱de.”
8 Naꞌa leꞌe,
quebe güele lataj nu xe̱ leꞌe,
“Benneꞌ wesede”,
laweꞌ da xúgute̱le nácale bi bíchele tule xetule,
ne tuze Benneꞌ dxusédene̱ꞌ leꞌe,
nedaꞌ,
Cristo.
9 Quebe nu xe̱le leꞌe:
Xrae,
lu xe̱zr la xu nigá,
laweꞌ da zua tuze Xrale,
Dios naꞌ zue̱ꞌ xabáa.
10 Quebe güele lataj nu xe̱ leꞌe:
Xran,
laweꞌ da zua tuze Xránale,
nedaꞌ,
Cristo.
11 Bénneaꞌ dxune̱ꞌ zrin chee̱ xezícadxale leꞌe nácadxe̱ꞌ blau ládujla leꞌe.
12 Bénneaꞌ dxucáꞌana szren cuine̱ꞌ wexéxrujla bénneaꞌ,
naꞌ bénneaꞌ dxaque̱ꞌ dxexruj lazreꞌ wegáꞌane̱ꞌ szren.
13 ’Edxugua leꞌe,
benneꞌ dxusé̱dele da nadxixruj bea na,
ne leꞌe,
benneꞌ fariseo caꞌ.
Láweze dxunle da xrlátaje.
Dxusézxujle neza chee̱ xabáa chee̱ quebe nu chuꞌu na.
Léꞌequeze quebe dxúꞌule,
ne quebe dxuele lataj benneꞌ dxelaca lazre̱ꞌ xeluꞌe̱.
14 ’Edxugua leꞌe,
benneꞌ dxusé̱dele da nadxixruj bea na,
ne leꞌe,
benneꞌ fariseo caꞌ.
Láweze dxunle da xrlátaje.
Dxegúale lizre nuꞌula caꞌ ba gulate benneꞌ biu chee̱ꞌ,
naꞌ chee̱ xuléꞌele xrlátaje cuínale,
dxuwízrale Dios xcha lu xudauꞌ.
chee̱ le̱ naꞌ da zrente̱ da guzría xi na leꞌe.
15 ’Edxugua leꞌe,
benneꞌ dxusé̱dele da nadxixruj bea na,
ne leꞌe,
benneꞌ fariseo caꞌ.
Láweze dxunle da xrlátaje.
Leꞌe dxedale du ca naca xe̱zr la xu nigá ne ca naca nísadauꞌ chee̱ siꞌ tu benneꞌ ca naca da zéajle̱le chee̱ Dios,
naꞌ gate bache dxunle na,
naꞌ dxugápadxale bénneaꞌ dul-la ca da nabágale leꞌe chee̱ cuía xiꞌe̱ lu lataj ba xaꞌ.
16 ’Edxugua leꞌe.
La chul-la nácale,
ne dxaca lázrele cuꞌule benneꞌ neza.
Dxennale che tu benneꞌ dxuzétaje̱ꞌ xudauꞌ,
quebe dxun na le̱ꞌ ba xen,
naꞌ che dxuzétaje̱ꞌ oro chee̱ xudauꞌ,
da naꞌ dxun na le̱ꞌ ba xen.
17 Nácale benneꞌ xala,
ne la chul-la.
¿Nula da naca na blaudxa,
oro,
che xudauꞌ naꞌ da dxucáꞌana na láꞌazxa oro naꞌ?
18 Cáꞌanqueze dxennale leꞌe che nu dxuzetaj cugu láꞌazxa,
quebe dxun na le̱ꞌ ba xen,
san che dxuzétaje̱ꞌ gunaꞌ da zria na laweꞌ cugu láꞌazxa,
da naꞌ dxun na le̱ꞌ ba xen.
19 Nácale benneꞌ xala ne la chul-la.
¿Nula da naca na blaudxa,
gunaꞌ naꞌ,
u cugu láꞌazxa naꞌ da dxucáꞌana na láꞌazxa gunaꞌ naꞌ?
20 Che nu benneꞌ dxuzétaje̱ꞌ cugu láꞌazxa,
quegaze cugu láꞌazxa dxuzétaje̱ꞌ,
san cáꞌanqueze dxuzétaje̱ꞌ ca naca da zria lawe na.
21 Bénneaꞌ dxuzétaje̱ꞌ xudauꞌ,
quegaze xudauꞌ naꞌ dxuzétaje̱ꞌ.
Cáꞌanqueze dxuzétaje̱ꞌ Dios zue̱ꞌ lataj naꞌ.
22 Cáꞌanqueze benneꞌ dxuzétaje̱ꞌ xabáa,
dxuzétaje̱ꞌ lataj naga zria Dios,
ne Diósqueze,
Bénneaꞌ zrie̱ꞌ lataj naꞌ dxuzétaje̱ꞌ.
23 ’Edxugua leꞌe,
benneꞌ dxusé̱dele da nadxixruj bea na,
ne leꞌe,
benneꞌ fariseo caꞌ.
Láweze dxunle da xrlátaje.
Dxunézrujle chee̱ xudauꞌ tu cueꞌ chee̱ da chi cueꞌ chee̱ xixruj weaj,
ne chee̱ bínnedu caꞌ chee̱ anís,
ne chee̱ cumín.
Quebe dxunle da zaj naca na blaudxa da zaj zua na lu da nadxixruj bea na,
ca naca chee̱ gácale xrlátaje,
ne chee̱ xexache lázrele le saꞌ ljwézrele,
ne chee̱ chéajle̱le chee̱ Dios.
Da caní zaj naca na da dxun na ba xen gunle,
ne quebe gusanle da caꞌ ba dxunle.
24 La chul-la nácale,
ne dxaca lázrele cuꞌule benneꞌ neza.
Dxecáꞌale da naca ca tu béꞌadauꞌ,
be̱ zrua laweꞌ da dxíꞌajle,
naꞌ quebe dxeque beꞌele dxíꞌajle da naca ca tu camello,
be̱ dxelaga benneache.
25 ’Edxugua leꞌe,
benneꞌ dxusé̱dele da nadxixruj bea na,
ne leꞌe,
benneꞌ fariseo caꞌ.
Láweze dxunle da xrlátaje.
Nácale ca zaj naca zrigaꞌ,
ne xéꞌena da dxíbele cúzreze na.
Luꞌule na quebe dxíbele.
Caní nácale laweꞌ da lu lázrdaule nácale ca gubán,
ne benneꞌ dxucude.
26 Benneꞌ fariseo la chul-la.
Nedxu le quibe luꞌule zrigaꞌ,
ne xéꞌena,
naꞌ cáꞌanqueze xegáꞌana chaweꞌ cúzrela.
27 ’Edxugua leꞌe,
benneꞌ dxusé̱dele da nadxixruj bea na,
ne leꞌe,
benneꞌ fariseo caꞌ.
Láweze dxunle da xrlátaje.
Nácale ca tu ba chiche da nalá na xrtante̱ cúzrela,
naꞌ luꞌule na nazrate̱ na zrita chee̱ benneꞌ gateꞌ,
ne xúgute̱ da sgute.
28 Caꞌan nácale leꞌe.
Cúzrela nalaꞌle ca benneꞌ xlátaje̱,
naꞌ lu lázrdaule nazrate̱ na da we̱n lazreꞌ,
ne da cale̱la da dxunle.
29 ’Edxugua leꞌe,
benneꞌ dxusé̱dele da nadxixruj bea na,
ne leꞌe,
benneꞌ fariseo caꞌ.
Láweze dxunle da xrlátaje.
Dxucáꞌanale cháwedauꞌ ba caꞌ naga zaj nagache benneꞌ caꞌ buluchálaje̱ꞌ waláz chee̱ Dios,
ne dxuele lechítaje̱ luꞌa chee̱ benneꞌ xrlátaje caꞌ.
30 Dxennale:
“Chela netuꞌ ba zúantuꞌ gate naꞌ gulezráꞌ xra xrtauntuꞌ caꞌ,
quebe gúcale̱ntuꞌ benneꞌ caꞌ belutie̱ꞌ benneꞌ caꞌ buluchálaje̱ꞌ waláz chee̱ Dios.”
31 Gate dxennale caꞌ,
leꞌe dxexúnbeaquezle nácale zriꞌine zre sua benneꞌ caꞌ belutie̱ꞌ benneꞌ caꞌ buluchálaje̱ꞌ waláz chee̱ Dios.
32 Dxusexúzrele dxunle ca da gulezú lau belún xra xrtáule caꞌ.
33 ’Be̱ snia nácale,
ne xrtia be̱ snia.
¿Ájazra gunle chee̱ gáchele lu da ziꞌ da xaꞌ chee̱ lataj ba xaꞌ?
34 Chee̱ le̱ naꞌ nedaꞌ sel-laꞌ chee̱le benneꞌ caꞌ xuluchálaje̱ꞌ waláz chee̱ Dios,
ne benneꞌ sina caꞌ,
ne benneꞌ caꞌ xulusé̱dene̱ꞌ leꞌe.
Léꞌequeze gútele,
ne gudáꞌle xaga béguaj bal-la benneꞌ caꞌ,
naꞌ xebal-le̱ꞌ gunle le̱ꞌ ziꞌ lu xudauꞌ caꞌ,
naꞌ gau ziꞌ xúzrele le̱ꞌ tu xe̱zre xetú xe̱zre.
35 Caꞌan gaca,
leꞌe bágale zria chee̱ xel-laꞌ gute chee̱ xúgute̱ benneꞌ xrlátaje caꞌ belute xra xrtáule caꞌ,
gate guzú lau na nu be̱te Abel,
benneꞌ xrlátaje,
ne naga bzrinte̱ bé̱tele Zacarías ládujla naga zua lataj láꞌazxa chee̱ xudauꞌ ne lataj naga dxuluzezxe̱ꞌ be̱ xíxreꞌdu caꞌ,
be̱ dxelegúꞌe̱ lu cugu chee̱ Dios.
36 Da li dxapaꞌ leꞌe,
bénneache zaj zre̱ꞌe̱ naꞌa xelebague̱ꞌ zria chee̱ xúgute̱ da caní.
Jesús dxebezre̱ꞌ chee̱ xe̱zre Jerusalén
37 Nadxa gunná Jesús:
―Jerusalén,
Jerusalén,
leꞌe naꞌ dxútele benneꞌ caꞌ dxuluchálaje̱ꞌ waláz chee̱ Dios,
ne dxuzríale xiaj benneꞌ gubáz caꞌ dxesel-la Dios naga zúale.
Zaneꞌ lásate̱ guca lazraꞌ gutupaꞌ zríꞌinele chiaꞌ ca dxun bedxuj,
dxutúpabaꞌ be dxéꞌenedauꞌ zran xrílabaꞌ,
san quebe guca lázrele.
38 Le nnaꞌxque naꞌa,
lízrele xelexegáꞌana na dácheze,
39 laweꞌ da dxapaꞌ leꞌe,
québedxa léꞌele nedaꞌ cadxa zrin zra nnale:
Laꞌazxa naca bénneaꞌ ze̱ꞌe̱ waláz chee̱ Xránadxu.