2 ―Ca da gaca xabáa naga dxenná bea Dios naca na ca da guca gate tu benneꞌ wenná bea be̱ne̱ꞌ tu laní wechaga naꞌ chee̱ bi biu chee̱ꞌ.

3 Gusel-le̱ꞌ benneꞌ we̱n zrin chee̱ꞌ caꞌ cheajletupe̱ꞌ benneꞌ caꞌan gunné̱ꞌ lizre̱ꞌ,

san benneꞌ caꞌ quebe gulaca lazre̱ꞌ xédajgaque̱ꞌ.

4 Nadxa gusél-ladxe̱ꞌ benneꞌ we̱n zrin chee̱ꞌ caꞌ,

benneꞌ xula.

Dxe̱ꞌe̱ le̱ꞌ:

“Le xe̱ benneꞌ caꞌ gunníaꞌ,

ba nucuezaꞌ xel-laꞌ wagu.

Ba gunná beꞌedaꞌ xelútie̱ꞌ be̱zre caꞌ,

ne be̱ dxelanne,

naꞌ ca naca na bache de̱.

Dxal-laꞌ xelelé̱ꞌe̱ nigá naga zraꞌ wechaga naꞌ.”

5 Benneꞌ caꞌ gunné̱ꞌ quebe gulaca lazre̱ꞌ xédajgaque̱ꞌ.

Tu benneꞌ caꞌ guxíaje̱ꞌ lu xe̱zr la xu chee̱ꞌ,

ne xetú benneꞌ guxíaje̱ꞌ we̱te.

6 Xebal-la benneꞌ caꞌ gule̱le̱ꞌ bi we̱n zrin caꞌ chee̱ wenná bea naꞌ,

naꞌ bulucháchale̱ne̱ꞌ-beꞌ,

ne belútete̱ꞌ-beꞌ.

7 Nadxa wenná bea naꞌ bzráꞌale̱ꞌe̱,

naꞌ gusel-le̱ꞌ benneꞌ chee̱ꞌ caꞌ,

benneꞌ zjaca wedil-la xeajlegué̱tie̱ꞌ benneꞌ we̱te benneꞌ caꞌ,

ne xeajlezézxeꞌte̱ꞌ lazreꞌ benneꞌ caꞌ.

8 Nadxa guzre̱ꞌ bi we̱n zrin chee̱ꞌ caꞌ:

“Bal-la bi de̱ ba de̱ chee̱ wechaga naꞌ,

naꞌ benneꞌ caꞌ gunníaꞌ quebe zaj naca chee̱ꞌ xelelé̱ꞌe̱.

9 Le chjaca neza zriꞌa caꞌ,

ne le nne̱ xúgute̱ benneꞌ léꞌele,

chee̱ xelelé̱ꞌe̱ laní chee̱ wechaga naꞌ.”

10 Benneꞌ we̱n zrin caꞌ xjaque̱ꞌ la neza caꞌ,

naꞌ xeajletupe̱ꞌ xúgute̱ bénneache,

benneꞌ beleléꞌene̱ꞌ zaj naque̱ꞌ benneꞌ cale̱la,

ne benneꞌ xrlátaje.

Caꞌan guca guzrate̱ xuꞌu naꞌ bénneache.

11 Nadxa wenná bea naꞌ guxúꞌe̱ xeajné̱ꞌe̱ benneꞌ caꞌ gunné̱ꞌ,

naꞌ bléꞌene̱ꞌ tu benneꞌ dxeꞌe̱ naꞌ,

quebe naziꞌe̱ zra lane̱ꞌ chee̱ laní chee̱ wechaga naꞌ.

12 Guzre̱ꞌ le̱ꞌ:

“Lueꞌ,

benneꞌ,

¿ájazra guca guxúꞌu nigá,

ne quebe naziꞌu zra lanuꞌ chee̱ laní wechaga naꞌ?”

Bénneaꞌ gudxéꞌe̱ zrize.

13 Nadxa wenná bea naꞌ guzre̱ꞌ bi zaj zúabeꞌ ga naꞌ,

“Le guchéaj niꞌa ne̱ꞌe̱,

ne le guzale̱ꞌ chaléꞌajla naga naca chul-la,

naga cuezre̱ꞌ,

ne xáguxaꞌate̱ lazxe̱ꞌ.”

14 Benneꞌ zante̱ gunníaꞌ,

naꞌ bábaze̱ꞌ zaj naca chee̱ꞌ xeluꞌe̱ nigá.

15 Nadxa benneꞌ fariseo caꞌ besiáꞌque̱ꞌ,

ne belune̱ꞌ tuze dizraꞌ xelebéaje̱ꞌ Jesús dizraꞌ chee̱ xelezéquene̱ꞌ xelawe̱ꞌ zría chee̱ꞌ.

16 Nadxa gulesel-le̱ꞌ bal-la benneꞌ caꞌ zaj naque̱ꞌ fariseo caꞌ tuze,

ne bal-la benneꞌ caꞌ zaj de̱ꞌe̱ Herodes,

chee̱ zeajlegue̱zre̱ꞌ Jesús:

―Benneꞌ wese̱de,

nézentuꞌ dxenníuꞌ da li,

ne dxusé̱denuꞌ da li da zaj naca chee̱ Dios,

ne quebe dxezrebuꞌ bi xelenná bénneache,

ne quebe dxennáꞌu ca da zaj napa bénneache.

17 Gunná xque.

¿Aja dxéquenuꞌ lueꞌ?

¿Dxun na ba xen quízrujdxu da dxuluchizruj benneꞌ caꞌ nasel-la César,

benneꞌ zituꞌ,

che cabí?

18 Jesús ba nézene̱ꞌ ca da dxelaca lazre̱ꞌ xelune̱ꞌ chee̱ꞌ,

naꞌ guzre̱ꞌ benneꞌ caꞌ:

―Leꞌe,

láweze dxunle da xrlátaje.

¿Bizr chee̱ naꞌ dxuzúale da guzría xi na nedaꞌ?

19 Le guléꞌe nedaꞌ dumí naꞌ da dxízrujle chee̱ wechizruj.

Nadxa bulunézruje̱ꞌ Le̱ꞌ tu dumí chee̱ xe̱zre Roma.

20 Gate bléꞌene̱ꞌ na,

naꞌ Jesús bche̱be̱ꞌ benneꞌ caꞌ:

―¿Nuzra lau ni,

ne le̱ꞌ da naxúaj na nigá?

21 Belexeche̱be̱ꞌ:

―Chee̱ César naꞌ.

Naꞌ guzre Jesús benneꞌ caꞌ:

―Le gunezruj chee̱ César da naca chee̱ César,

ne le gunezruj chee̱ Dios da naca chee̱ꞌ.

22 Gate belenne̱ꞌ da nigá,

naꞌ belexebánene̱ꞌ,

ne besiáꞌque̱ꞌ naga zua Jesús.

23 Zra náꞌqueze belezrín bal-la benneꞌ saduceo caꞌ naga zua Jesús.

Benneꞌ saduceo caꞌ dxelenné̱ꞌ quebe xelexebán benneꞌ gate.

Gulé̱ꞌe̱ Jesús:

24 ―Benneꞌ wese̱de,

Moisés gunné̱ꞌ che tu benneꞌ nuchaga ne̱ꞌe̱ gatie̱ꞌ,

ne quebe nu bidu chee̱ꞌ chiláꞌ,

naꞌ bi biche̱ꞌ dxal-laꞌ guchaga naꞌabeꞌ nen nuꞌula gute benneꞌ biu chee̱ꞌ naꞌ chee̱ sua tu bi chee̱ benneꞌ ba gutie̱ꞌ.

25 Naga zúantuꞌ gulezráꞌ gazre benneꞌ gulácabeꞌ zriꞌine tuze benneꞌ.

Bi nedxu bchaga naꞌabeꞌ,

naꞌ gútebeꞌ.

Bi gudxupeꞌ bchaga naꞌabeꞌ nen nuꞌula naꞌ gute benneꞌ biu chee̱ꞌ laweꞌ da quebe nu zriꞌine bi nedxu naꞌ gúlajbeꞌ.

26 Cáꞌanqueze gúcaqueze na chee̱ bi gudxupeꞌ,

naꞌ gudé naꞌ chee̱ bi guxunneꞌ,

naꞌ cáꞌanqueze guca chee̱ xúgute̱ bi gazre caꞌ.

27 Ca gudé naꞌ,

naꞌ gute nuꞌula naꞌ.

28 Gate xelexebán benneꞌ gate,

¿nula bi gazre caní gácabeꞌ benneꞌ chee̱ nuꞌula naꞌ laweꞌ da tu tu bi gazre caꞌ bchaga naꞌabeꞌ nen nuꞌula naꞌ?

29 Jesús beche̱be̱ꞌ:

―Leꞌe dxeque zréajele laweꞌ da quebe núnbeale da naxúaj na lu xiche láꞌazxa,

ne ca naca xel-laꞌ waca chee̱ Dios.

30 Gate zrin zra xelexebán benneꞌ gate,

québedxa xuluchaga naꞌ bénneache,

ne québedxa xelútie̱ꞌ bi nuꞌula chee̱ xuluchaga naꞌabeꞌ.

Xelaque̱ꞌ ca zaj naca gubáz chee̱ xabáa chee̱ Dios.

31 Ca naca na che dxal-laꞌ xelexebán benneꞌ gate,

¿quebe ne gulábale leꞌe ca gunná Dios?

Gunné̱ꞌ:

32 “Nedaꞌ nacaꞌ Dios chee̱ Abraham,

ne Dios chee̱ Isaac,

ne Dios chee̱ Jacob.”

Dios quebe naque̱ꞌ Dios chee̱ benneꞌ gate,

san naque̱ꞌ Dios chee̱ benneꞌ ban,

benneꞌ caꞌ ba gulatie̱ꞌ lu xe̱zr la xu nigá.

33 Gate belenne̱ꞌ da nigá,

naꞌ belexebane benneꞌ caꞌ ca naca da dxuse̱de Jesús.

34 Gate benneꞌ fariseo caꞌ guleque béꞌene̱ꞌ ba bzua zri Jesús benneꞌ saduceo caꞌ,

naꞌ belezrague̱ꞌ.

35 Tu benneꞌ caꞌ,

benneꞌ naque̱ꞌ benneꞌ dxuxuzájle̱ꞌe̱ da nadxixruj bea na,

guca lazre̱ꞌ guxúe̱ꞌ ájala nne̱ Jesús.

Bche̱be̱ꞌ Le̱ꞌ:

36 ―Benneꞌ wese̱de,

¿bizrla da gunná beꞌe Dios naca blau?

37 Beché̱be Jesús:

―Dxal-laꞌ zriꞌinuꞌ Xranuꞌ Dios dute̱ xichaj lázrdaꞌu,

ne dute̱ bénneꞌdu xuꞌu,

ne dute̱ xel-laꞌ dxéajniꞌi chiuꞌ.

38 Da nigá naca da nadxixruj bea da blaudxa,

ne da dxundxa na ba xen.

39 Da nadxixruj bea da gudxupeꞌ nácaqueze na caꞌ,

da dxenná na:

Bzriꞌi le saꞌ ljwezruꞌ ca nazríꞌi cuinuꞌ.

40 Che tu benneꞌ dxune̱ꞌ ca zaj naca chupa da nadxixruj bea caní,

dxune̱ꞌ ca naca xúgute̱ da nadxixruj bea da bzuaj Moisés,

ne ca naca xúgute̱ da buluse̱de benneꞌ caꞌ buluchálaje̱ꞌ waláz chee̱ Dios.

41 Dxácate̱ ne zaj nazraga benneꞌ fariseo caꞌ naꞌ,

42 Jesús bche̱be̱ꞌ le̱ꞌ:

―¿Ájala dxéquele leꞌe chee̱ Cristo?

¿Nuzra zriꞌine naque̱ꞌ?

Benneꞌ caꞌ gulé̱ꞌe̱ Le̱ꞌ:

―Zriꞌine David naꞌ.

43 Nadxa guzre Jesús benneꞌ caꞌ:

―¿Ájazra naꞌ David gate bchálaje̱ꞌ chee̱ Cristo dxe̱ꞌe̱ Le̱ꞌ:

Xran?

Gate gunná David da nigá bchálaje̱ꞌ da bleꞌe Beꞌ Láꞌazxa le̱ꞌ.

Caní naca da naꞌ gunná David:

46 Quebe nu benneꞌ guca xeché̱bequeze̱ꞌ chee̱ꞌ,

naꞌ ze lau zra naꞌ netú québedxa nu bexazre bi guché̱bedxa Le̱ꞌ.