Da dxuléꞌe na ca naca chee̱ benneꞌ we̱n zrin quebe zaj naque̱ꞌ xrlátaje
12
Nadxa guzú lau Jesús dxuchálajle̱ne̱ꞌ benneꞌ caꞌ tu da dxuléꞌe na.
Dxe̱ꞌe̱ le̱ꞌ:
―Zua tu benneꞌ bde̱ꞌe̱ lba uva caꞌ lu xe̱zr la xu chee̱ꞌ,
naꞌ be̱ne̱ꞌ le̱ꞌaj chee̱ na.
Be̱ne̱ꞌ tu xiaj lutju naga guchuchuje̱ꞌ uva caꞌ,
ne be̱ne̱ꞌ tu bdupaꞌ naga cueꞌ benneꞌ guxúe̱ꞌ da caní.
’Nadxa bdee̱ꞌ xe̱zr la xu chee̱ꞌ naꞌ lu naꞌ benneꞌ we̱n zrin caꞌ chee̱ xelune̱ꞌ laꞌa lina chee̱ na,
naꞌ guzé̱ꞌe̱ zéaje̱ꞌ xe̱zre zituꞌ.
2 Ca gula zra chee̱ lina,
naꞌ gusel-le̱ꞌ tu bi we̱n zrin chee̱ꞌ cheajxezriꞌibeꞌ lu naꞌ benneꞌ we̱n zrin caꞌ ca naca lina da dxal-laꞌ xezíꞌ benneꞌ xranbeꞌ.
3 Naꞌ benneꞌ we̱n zrin caꞌ gule̱l-le̱ꞌ-beꞌ,
ne buluzalje̱ꞌ-beꞌ,
naꞌ belexesel-le̱ꞌ-beꞌ dáchezebeꞌ.
4 Nadxa xránabeꞌ gusel-le̱ꞌ bi we̱n zrin xula,
naꞌ bi nigá belúꞌe̱-beꞌ xiaj,
ne gulelé̱ꞌe̱ xíchajbeꞌ,
ne bulucháchale̱ne̱ꞌ-beꞌ.
5 Naꞌ xránabeꞌ naꞌ gusel-le̱ꞌ xetubeꞌ,
naꞌ bi nigá belútete̱ benneꞌ caꞌ le̱beꞌ.
Ca gudé naꞌ xránabeꞌ gusel-le̱ꞌ bi zandxa bi xula,
naꞌ cáꞌanqueze belúꞌe̱ bál-labeꞌ,
ne belútete̱ꞌ xebál-labeꞌ.
6 ’Xránabeꞌ zua tu zríꞌine̱ꞌ bi biu,
bi nazríꞌile̱ꞌe̱ne̱ꞌ,
naꞌ naga bzé̱bete̱ gusel-le̱ꞌ zríꞌine̱ꞌ nigá,
dxenné̱ꞌ lu xichaj lázrdawe̱ꞌ:
Dxal-laꞌ xelape̱ꞌ ba láꞌana zriꞌinaꞌ.
7 Benneꞌ we̱n zrin caꞌ gulenné̱ꞌ,
dxelé̱ ljwezre̱ꞌ:
“Bi nigá gueque chee̱beꞌ xe̱zr la xu nigá.
Gútete̱dxu-beꞌ naꞌa,
naꞌ dxiꞌu xegáꞌanale̱dxu da nigá.”
8 Caꞌan guca,
gule̱l-le̱ꞌ-beꞌ,
ne belútete̱ꞌ-beꞌ,
naꞌ gulebéaje̱ꞌ be̱l-laꞌ dxen chee̱beꞌ lu xe̱zr la xu naꞌ.
9 Nadxa Jesús gunábene̱ꞌ benneꞌ xudauꞌ caꞌ:
―¿Ájazra gun xrane xe̱zr la xu nigá?
Walé̱ꞌe̱,
naꞌ gútete̱ꞌ benneꞌ we̱n zrin caꞌ,
naꞌ gudée̱ꞌ xe̱zr la xu chee̱ꞌ lu naꞌ benneꞌ xula caꞌ.
10 Ba blábale da naxúaj na lu xiche chee̱ Dios.
Dxenná na:
Xiaj naꞌ da quebe buluchine benneꞌ we̱n xuꞌu,
xiaj naꞌ naca naꞌa xiaj blau chee̱ xuꞌu.
11 Da nigá be̱n Xránadxu,
naꞌ dxexebánedxu chee̱ na.
12 Nadxa gulaca lazre̱ꞌ xele̱l-le̱ꞌ Jesús laweꞌ da zaj nézene̱ꞌ bchálaje̱ꞌ da dxuléꞌe nigá chee̱ guléꞌene̱ꞌ ca zaj naca le̱ꞌ.
Quebe bi gulune̱ꞌ laweꞌ da gulezrebe̱ꞌ bi xelún benneꞌ xe̱zre caꞌ.
Chee̱ le̱ naꞌ bulusane̱ꞌ Jesús,
besíꞌaque̱ꞌ.
Da bchalaj Jesús chee̱ da dxuchizruj xuꞌu laweꞌ
13 Ca gudé naꞌ gulesel-le̱ꞌ lau Jesús bal-la benneꞌ xudauꞌ fariseo,
ne benneꞌ zaj de̱ꞌe̱ Herodes chee̱ gulebéaje̱ꞌ Le̱ꞌ dizraꞌ chee̱ xelezéquene̱ꞌ xelawe̱ꞌ Le̱ꞌ zria.
14 Benneꞌ caní belelé̱ꞌe̱ lau Jesús,
naꞌ gulé̱ꞌe̱ Le̱ꞌ:
―Benneꞌ wese̱de,
ba nézentuꞌ ca dxennáuꞌ da li,
ne quebe dxezíꞌu ca da dxelennaze bénneache,
laweꞌ da quebe dxennáꞌu Lueꞌ ca zaj naca cúzreze bénneache.
Da li naca ca dxusé̱denuꞌ bénneache da naca chee̱ Dios.
¿Dxunna da nadxixruj bea Dios lataj quízrujdxu da dxuchizruj benneꞌ dxenná bea Roma dxiꞌu,
che cabí?
¿Dxal-laꞌ quízrujdxu,
che quebe quízrujdxu?
15 Jesús dxéquebeꞌene̱ꞌ quegá du lazre̱ꞌ dxelenábene̱ꞌ Le̱ꞌ da nigá,
naꞌ guzre̱ꞌ le̱ꞌ:
―¿Bizr chee̱ naꞌ dxebéajle nedaꞌ dizraꞌ?
Le dajguá nigá tu dumí da dxízrujle chee̱ leꞌedaꞌ na.
16 Naꞌ bedajlegüé̱ꞌe̱ na,
naꞌ ca bleꞌe Jesús le̱ na,
naꞌ gunábene̱ꞌ le̱ꞌ:
―¿Nu lau daꞌ dumí nigá,
ne nu la naxúaj na nigá?
Naꞌ gulé̱ꞌe̱ Le̱ꞌ:
―Chee̱ benneꞌ dxenná bea Roma.
17 Nadxa Jesús guzre̱ꞌ benneꞌ caꞌ:
―Le gunezruj chee̱ benneꞌ dxenná bea Roma da naca chee̱ꞌ,
naꞌ le gunezruj chee̱ Dios da naca chee̱ Dios.
Naꞌ belexebánene̱ꞌ ca naca da bchalaj Jesús.
Da bchalaj Jesús ca xelexebán benneꞌ gate
18 Nadxa belezrín lau Jesús bal-la benneꞌ xudauꞌ saduceo.
Benneꞌ caní dxelenné̱ꞌ quebe xelexebán benneꞌ gate.
Caꞌan guca,
gulenábene̱ꞌ Jesús caní:
19 ―Benneꞌ wese̱de,
Moisés bzuaje̱ꞌ chee̱dxu da nadxixruj bea nigá:
“Che tu benneꞌ biu gatie̱ꞌ,
ne xegáꞌana zruꞌule̱ꞌ,
naꞌ quebe nu zua bi chee̱ bénneaꞌ,
naꞌ benneꞌ biche̱ꞌ dxal-laꞌ xequé̱ꞌe̱ nuꞌula naꞌ gute benneꞌ chee̱ꞌ chee̱ sua zriꞌine bénneaꞌ gutie̱ꞌ.”
20 Gulezráꞌ gazre benneꞌ biche̱ꞌ.
Benneꞌ nedxu bchaga naꞌabeꞌ,
naꞌ gútebeꞌ quebe nu zríꞌinebeꞌ zua.
21 Naꞌ benneꞌ gudxupeꞌ bequé̱ꞌe̱ nuꞌula naꞌ,
naꞌ cáꞌanqueze gutie̱ꞌ quebe nu zríꞌine̱ꞌ zúaqueze.
Cáꞌanqueze guca chee̱ benneꞌ guxunneꞌ.
22 Caꞌan guca,
benneꞌ gazre caní gulezúale̱ne̱ꞌ nuꞌula naꞌ,
naꞌ netue̱ꞌ quebe nu zríꞌine̱ꞌ guzúa.
Naga xeajse̱te̱ na gútete̱ nuꞌulaꞌ.
23 Naꞌa xcaꞌ,
gate naꞌ xelexebán benneꞌ gate,
¿nula benneꞌ biu caní gaque̱ꞌ benneꞌ chee̱ nuꞌula naꞌ,
laweꞌ da gulezúale̱ benneꞌ gazre caꞌ le̱ꞌ?
24 Nadxa Jesús guzre̱ꞌ benneꞌ caꞌ:
―Nanítele leꞌe laweꞌ da quebe núnbeale da naxúaj na lu xiche chee̱ Dios,
ne quebe nézele ca naca xel-la waca chee̱ Dios.
25 Gate naꞌ xelexebán benneꞌ gate,
québedxa xuluchaga ne̱ꞌe̱,
ne québedxa xuluchaga naꞌ bi nuꞌula caꞌ.
Xelaque̱ꞌ ca zaj naca gubáz chee̱ xabáa.
26 Naꞌa,
ca naca chee̱ benneꞌ gate che xelexebane̱ꞌ,
¿quebe ne gulábale ca da naxúaj na lu xiche chee̱ Moisés ca gunná Dios gate naꞌ bchálajle̱ne̱ꞌ Moisés tu lu xágadauꞌ da dxala xiꞌ?
Gunná Dios caní:
“Nedaꞌ nacaꞌ Dios chee̱ Abraham,
ne chee̱ Isaac,
ne chee̱ Jacob.”
27 Dios naque̱ꞌ Dios,
quegá chee̱ benneꞌ gate caꞌ.
Naque̱ꞌ Dios chee̱ benneꞌ ban caꞌ.
Caꞌan naca,
álega nanítele leꞌe.
Da nadxixruj bea Dios da naca blau
28 Naꞌ zé̱queze tu benneꞌ dxuxuzájle̱ꞌe̱ da nadxixruj bea Dios,
naꞌ benne̱ꞌ da dxuchalaj Jesús,
ne nézene̱ꞌ bzriꞌe̱ dizraꞌ chaweꞌ,
naꞌ gunábene̱ꞌ Le̱ꞌ:
―¿Bizra da nadxixruj beꞌe Dios naca na da blaudxa?
29 Naꞌ Jesús guzre̱ꞌ le̱ꞌ:
―Da bdxixruj beꞌe̱ da naca na da blaudxa ca xúgute̱ dxenná na caní:
Le xene benneꞌ Israel.
Xránadxu Dios tuze naque̱ꞌ.
30 Bzriꞌi Xranuꞌ Dios du lazruꞌ,
ne nen dute̱ bénneꞌdu xuꞌu,
ne nen dute̱ xichaj lázrdaꞌu,
ne nen dute̱ xel-la wal-la da napuꞌ.
Da nigá naca da nadxixruj bea da blaudxa,
31 naꞌ da nadxixruj bea gudxupeꞌ nácaqueze na ca le̱ na,
da dxenná na caní:
Bzriꞌi benneꞌ xula ca nazríꞌi cuinuꞌ.
Quebe zua xetú da nadxixruj bea da naca blaudxa ca da chupa caní.
32 Nadxa gunná bénneaꞌ dxuxuzájle̱ꞌe̱ da nadxixruj bea Dios,
dxe̱ꞌe̱ Jesús:
―Caꞌan xanne naca ca beche̱buꞌ,
Benneꞌ dxuse̱de.
Da li naca ca dxennáuꞌ.
Zua tuze Dios,
ne quebe nu zua xetú ca Le̱ꞌ,
33 naꞌ che zriꞌidxu Dios du lázredxu,
ne nen dute̱ xichaj lázrdaudxu,
ne nen dute̱ bénneꞌdu xúꞌudxu,
ne nen dute̱ xel-la wal-la da nápadxu,
ne che zriꞌidxu benneꞌ xula ca nazríꞌi cuínadxu,
da caní zaj zácadxa na ca xúgute̱ be̱ xixreꞌ caꞌ dxútedxu-baꞌ lau Dios,
ne ca xúgute̱ da dxuzézxedxu lu cugu chee̱ Dios.
34 Nadxa Jesús,
ca benne̱ꞌ bchálaje̱ꞌ chaweꞌ,
naꞌ guzre̱ꞌ le̱ꞌ:
―Xeláteze ne de̱ na chee̱ nna bea Dios xichaj lázrdaꞌu.
Naꞌ québedxa nu bexazre nábene̱ꞌ Le̱ꞌ dizraꞌ caꞌ.
¿Nu zríꞌine̱ꞌ naca Cristo?
35 Jesús dxusé̱dene̱ꞌ benneꞌ caꞌ lu xudauꞌ,
naꞌ gunné̱ꞌ:
―¿Bizr chee̱ naꞌ dxelenná benneꞌ dxuluxuzájle̱ꞌe̱ da nadxixruj bea Dios naca Cristo zriꞌine David?
36 David náꞌqueze ca bzéajniꞌi Beꞌ Láꞌazxa le̱ꞌ,
gunné̱ꞌ:
Xránadxu Dios guzre̱ꞌ Xranaꞌ:
“Gudxéꞌe chaláꞌa xabe̱la chiaꞌ,
ca zrin zra ba nuzúaꞌ benneꞌ dxeledábague̱ꞌ lueꞌ,
chee̱ na beꞌenuꞌ le̱ꞌ.”
37 Che David náꞌqueze dxenné̱ꞌ:
“Xranaꞌ”,
¿ájala chee̱ naꞌ naque̱ꞌ zríꞌine̱ꞌ?
Benneꞌ zan caꞌ du lazre̱ꞌ buluzé̱ nague̱ꞌ chee̱ꞌ.
Jesús dxuléꞌene̱ꞌ zaj nachixre benneꞌ caꞌ dxuluxuzájle̱ꞌe̱ da nadxixruj bea Dios
38 Ca dxuse̱de Jesús benneꞌ caꞌ,
naꞌ gunné̱ꞌ:
―Le gapa chiꞌi cuínale chee̱ benneꞌ caꞌan dxuluxuzájle̱ꞌe̱ da nadxixruj bea Dios.
Benneꞌ caní dxeledánene̱ꞌ dxelácue̱ꞌ zra lane̱ꞌ tunna,
ne dxeledánene̱ꞌ xulugapa bénneache le̱ꞌ diuzre nen dizraꞌ ba láꞌana lau bénneache caꞌ.
39 Benneꞌ caní dxeledánene̱ꞌ dxelebéꞌe̱ lataj blau lu xuꞌu naga dxelezraga benneꞌ dxelúe láꞌane̱ꞌ Dios,
ne dxeledánene̱ꞌ dxelebéꞌe̱ lataj blau naga dxelawe̱ꞌ xrcheꞌ.
40 Benneꞌ caní dxelegüe̱ꞌ lizre xrlataj nuꞌula caꞌ ba gulate benneꞌ chee̱ꞌ,
naꞌ chee̱ xululéꞌe cuine̱ꞌ ca benneꞌ xrlátaje,
dxelune̱ꞌ xel-la dxuluwizraj Dios tunna.
Le̱ꞌ zaj nabágadxe̱ꞌ zria.
Dumí da gulúꞌu nuꞌula xacheꞌ ba gute benneꞌ chie̱ꞌ
41 Tu lasa gate naꞌ dxeꞌ Jesús lu xudauꞌ cuita naga dxelegúꞌe̱ dumí,
naꞌ dxenné̱ꞌe̱ ca dxelún benneꞌ caꞌ dxelegúꞌe̱ dumí,
ne ca dxelún benneꞌ gunníꞌa caꞌ,
dxelegúꞌe̱ dumí zren.
La ofrenda de la viuda (Marcos 12.41)