Dumí da bnezruj tu nuꞌula xacheꞌ ba gute benneꞌ chee̱ꞌ
21
Gate zua Jesús chaleꞌaj xudauꞌ,
bléꞌene̱ꞌ benneꞌ gunníꞌa caꞌ dxelegúꞌe̱ dumí lu xíꞌina chee̱ xudauꞌ.
2 Naꞌ bléꞌene̱ꞌ tu nuꞌula naque̱ꞌ benneꞌ xacheꞌ,
ne ba gute benneꞌ chee̱ꞌ,
guluꞌe̱ chupa dumídauꞌ.
3 Naꞌ gunná Jesús:
―Da li dxapaꞌ leꞌe,
nuꞌula xacheꞌ nigá gulúꞌudxe̱ꞌ da zrendxa ca benneꞌ gunníꞌa caní,
4 laweꞌ da dxelegúꞌu benneꞌ caꞌ chee̱ da dxutínneze na,
san nuꞌula nigá,
lu xel-la baxacheꞌ chee̱ꞌ bnézruje̱ꞌ ca naca da nape̱ꞌ da nunte̱ gawe̱ꞌ.
Ofrenda de una Viuda
Jesús dxuchálaje̱ꞌ ca gaca gate cuía xiꞌ xudauꞌ
5 Bal-la benneꞌ dxuluchálaje̱ꞌ ca naca chee̱ xudauꞌ naꞌ,
ne chee̱ xiaj xrtante̱ da zaj zrále̱ꞌe̱ na zeꞌe xudauꞌ naꞌ,
ne chee̱ da xrtan da bulunezruj benneꞌ chee̱ xudauꞌ naꞌ.
Nadxa gunná Jesús,
dxe̱ꞌe̱ le̱ꞌ:
6 ―Wazrín zra gate xelebía xiꞌ xúgute̱ da caní dxeléꞌele,
ne quebe xegáꞌana netú xiaj cuzru ljwezre na.
Da xululéꞌe na gate cheajsé̱ chee̱ xe̱zr la xu nigá
7 Nadxa benneꞌ caꞌ buluche̱be̱ꞌ Jesús:
―Benneꞌ Wese̱de,
¿bata gaca da naꞌ?
¿Bi guléꞌe na gate ba za xelaca da caní?
8 Jesús gunné̱ꞌ:
―Le guxúe xanneꞌ cuínale,
ne quebe güele lataj nu si xe̱ leꞌe,
laweꞌ da xeleláꞌ benneꞌ zante̱ benneꞌ xulusíꞌ cuine̱ꞌ Laꞌ nedaꞌ,
xelenné̱ꞌ zaj naque̱ꞌ Cristo,
ne xelenné̱ꞌ ba bzrin zra.
Quebe chéajle̱le benneꞌ caꞌ.
9 Gate xénele dxaca wedil-la,
ne xeledábague̱ꞌ bénneache xuꞌu laweꞌ,
quebe zrébele,
laweꞌ da dxal-laꞌ gaca da caní nedxu,
san quebe ne zrin zra cheajsé̱ chee̱ xe̱zr la xu nigá.
10 Nadxa guzre̱ꞌ benneꞌ caꞌ:
―Bénneache tu xe̱zr la xu xeledíl-lale̱ bénneache xetú xe̱zr la xu,
naꞌ benneꞌ tu xe̱zre xeledíl-lale̱ benneꞌ xetú xe̱zre.
11 Wazrúꞌle̱ꞌe̱queze,
ne gácale̱ꞌe̱ gubinaꞌ,
ne gátaꞌle̱ꞌe̱ xízrawe̱ꞌ du ca nácaqueze,
naꞌ zran xabáa léꞌele da guchébequeze na leꞌe,
ne xel-la waca zriꞌa caꞌ.
12 ’Nédxudxa gate quebe ne gaca da caní xelé̱laqueze̱ꞌ leꞌe,
ne xeláu ziꞌ xúzrequeze̱ꞌ leꞌe.
Xeleché̱ꞌe̱ leꞌe lu xuꞌu caꞌ ga dxelezrague̱ꞌ chee̱ xelechugue̱ꞌ ca xelune̱ꞌ chee̱le,
naꞌ xelegúꞌe̱ leꞌe lizre xia,
ne xeleché̱ꞌe̱ leꞌe lau benneꞌ wenná bea caꞌ,
ne lau benneꞌ xuꞌu laweꞌ caꞌ laweꞌ da nácale nedaꞌ tuze.
13 Gate gaca da caní gataꞌ lataj guchálajle̱le benneꞌ caꞌ ca naca chiaꞌ nedaꞌ.
14 Le guzúa chacha lázrdaule,
quebe gucuézale nédxula da dxal-laꞌ nne̱le,
15 laweꞌ da gunnaꞌ nedaꞌ leꞌe dizraꞌ,
ne xel-la sina da quebe xelezeque benneꞌ dxeledábague̱ꞌ leꞌe bi xelenné̱ꞌ chee̱ na.
16 Wuludéqueze bénneache leꞌe lu naꞌ benneꞌ dxeledábague̱ꞌ leꞌe.
Caní xelúnqueze xra xrnale,
ne bi bíchele,
ne xrtia ljwézrele,
ne bi ljwézrele caꞌ.
Welútequeze̱ꞌ bál-lale leꞌe,
17 naꞌ xúgute̱ bénneache welecuídene̱ꞌ leꞌe laweꞌ da nácale nedaꞌ tuze,
18 san quebe nite tu xicha xíchajle lau Dios.
19 Che sua cháchale,
naꞌ gápale xel-la nabán.
20 ’Gate léꞌele zaj naxechaj benneꞌ dxjaque̱ꞌ wedil-la xe̱zre Jerusalén,
naꞌ nézele ba za cuía xiꞌ xe̱zre nigá.
21 Lu zra naꞌ,
benneꞌ zaj zre̱ꞌe̱ xe̱zre caꞌ zaj nababa Judea dxal-laꞌ xuluzrúnnuje̱ꞌ chjaque̱ꞌ lu xiꞌa caꞌ,
naꞌ benneꞌ zaj zre̱ꞌe̱ xe̱zre Jerusalén dxal-laꞌ xeledxúaje̱ꞌ naꞌ,
naꞌ benneꞌ zaj zre̱ꞌe̱ le̱ꞌe̱ xixreꞌ quebe dxal-laꞌ xelexezrine̱ꞌ xe̱zre naꞌ.
22 Lu zra caꞌ Dios gudée̱ꞌ benneꞌ caꞌ lu da ziꞌ da xaꞌ,
naꞌ gaca li ca naca da naxúaj na lu xiche chee̱ Dios ca dxal-laꞌ gaca chee̱ benneꞌ caꞌ.
23 Edxugúa nuꞌula zaj zue̱ꞌ ziꞌi lu zra caꞌ,
ne nuꞌula caꞌ zaj nuxre̱ꞌ bidu dxelázrebeꞌ,
laweꞌ da gátaꞌle̱ꞌe̱ da xelezaca bénneache caꞌ,
naꞌ gaca tu da ba xaꞌ zrente̱ chee̱ benneꞌ caꞌ.
24 Bal-le̱ꞌ xelatie̱ꞌ lu wedil-la naꞌ,
naꞌ xebal-le̱ꞌ xeleché̱ꞌe̱ le̱ꞌ zaj nadxéaje̱ꞌ tu tu xe̱zr la xu caꞌ,
naꞌ benneꞌ zituꞌ caꞌ xululéaje̱ꞌ xe̱zre Jerusalén cadxa cheajsé̱ chee̱ zra xelenná bea benneꞌ zituꞌ caꞌ.
Ca gaca gate xeláꞌ Benneꞌ Gulje̱ꞌ Bénneache
25 Naꞌ gunná Jesús:
―Lu zra naꞌ xelataꞌ da xululéꞌe na lau gubizra,
ne lau beuꞌ,
ne lau belaj caꞌ,
naꞌ lu xe̱zr la xu xelezúa ste̱be benneꞌ caꞌ,
ne xelezrebe̱ꞌ ca naca schagaꞌ da gun nísadauꞌ,
ne xeajxruza chee̱ na.
26 Benneꞌ caꞌ xelate niꞌa ne̱ꞌe̱ ne̱ chee̱ xel-la dxelezrebe gate xulusá lazre̱ꞌ ca da dxal-laꞌ gaca lu xe̱zr la xu,
ne ca naca da zaj zraꞌ zran xabáa,
da zaj napa xel-la waca xelezrízequeze na.
27 Lu zra naꞌ xeleléꞌequezne̱ꞌ nedaꞌ,
Benneꞌ Gulje̱ꞌ Bénneache,
xeláꞌa tu lu beuj,
nen dute̱ xel-la waca zren,
ne da xabáa chiaꞌ.
28 Gate su lau gaca da caní,
le gun dipa lázrele,
ne le chisa xíchajle,
laweꞌ da ba za zrin zra lale lu da dxaca chee̱le.
29 Nadxa bchalaj Jesús tu da dxuléꞌe na,
gunné̱ꞌ:
―Le nnaꞌxque xaga higo,
u bítete̱ze xaga.
30 Gate léꞌele ba dxezría na lagaꞌ dxeꞌene,
nézquezle leꞌe ba za xaca beuꞌ la.
31 Cáꞌanqueze,
gate léꞌele gaca da caní,
dxal-laꞌ nézele ba zua gagu zra nna bea Dios.
32 ’Da li dxapaꞌ leꞌe,
xúgute̱ da caní xelaca na nédxudxa gate quebe ne xelate bénneache zaj zraꞌ lu zra naꞌa zra.
33 Xabáa,
ne xe̱zr la xu weledé chee̱ na,
san dizraꞌ chiaꞌ quebe te chee̱ na.
34 Le guxúe xanneꞌ cuínale,
quebe güele lataj xelúꞌu lu xichaj lázrdaule da cale̱la caꞌ ca naca xel-la dxagu xrata,
ne xel-la dxezuzre,
ne xel-la dxezá lazreꞌ da naca chee̱ xe̱zr la xu nigá,
chee̱ quebe gácale ca tu benneꞌ nachúl-lene̱ꞌ lu xichaj lázrdawe̱ꞌ gate zrin zra naꞌ,
35 ne chee̱ quebe gaca na ca tu da que̱la na leꞌe,
laweꞌ da caní gaca chee̱ xúgute̱ benneꞌ zaj zre̱ꞌe̱ lu xe̱zr la xu nigá.
36 Le sua leꞌe ban lazreꞌ,
ne le naba lau Dios chee̱ gaca lale lu da dxal-laꞌ gaca lu xe̱zr la xu nigá,
ne chee̱ gaca guléꞌe cuínale du lázrele lawaꞌ nedaꞌ,
Benneꞌ Gulje̱ꞌ Bénneache.