Jesús dxenné̱ꞌ wabía xiꞌ xudauꞌ
24
Nadxa bedxúaj Jesús xudauꞌ,
naꞌ dxácate̱ dxexedxúaje̱ꞌ naꞌ,
gulebiga benneꞌ caꞌ dxusé̱dene̱ꞌ lau Jesús,
ne gulezú lawe̱ꞌ dxuluchálajle̱ne̱ꞌ Le̱ꞌ ca naca chee̱ xudauꞌ naꞌ.
2 Beche̱be Jesús:
―¿Dxeléꞌele xúgute̱ da caní?
Da li dxapaꞌ leꞌe,
netú xiaj caní quebe xegáꞌana zeajzría cuzru ljwezre na.
Ca naca na cuía xi na.
Ca naca da xelunna bea na ba za zra bze̱be
3 Nadxa xjaque̱ꞌ lu xiꞌa naga zaj ze̱ xaga olivo,
naꞌ gate dxeꞌ Jesús naꞌ,
benneꞌ caꞌ dxusé̱dene̱ꞌ belezrine̱ꞌ lau Le̱ꞌ,
ne bagácheze buluche̱be̱ꞌ Le̱ꞌ:
―Gunná netuꞌ.
¿Bata gaca da naꞌ?
¿Bi gunna bea na gate zrin zra xelaꞌu,
ne gate cheajsé̱ chee̱ xe̱zr la xu nigá?
4 Nadxa Jesús guzre̱ꞌ benneꞌ caꞌ:
―Le guxúe cuínale chee̱ quebe nu si xe̱ leꞌe.
5 Benneꞌ zan xelelé̱ꞌe̱.
Xelún lazre̱ꞌ xelenné̱ꞌ zaj naque̱ꞌ Cristo,
naꞌ xelezí xe̱ꞌe̱ benneꞌ zan.
6 Wenle leꞌe dxaca wedil-la,
ne waca wedil-la gátete̱ze naꞌ.
Quebe zrébele,
laweꞌ da dxal-laꞌ xelaca da caní.
Da caní quebe zaj naca na chee̱ zra bze̱be.
7 Tu cueꞌ xe̱zr la xu tíl-lale̱ na xetú cueꞌ xe̱zr la xu,
ne tu xe̱zre tíl-lale̱ na xetú xe̱zre.
Wataꞌ gubinaꞌ,
ne welataꞌ xízrawe̱ꞌ caꞌ,
ne wazrúꞌ gátete̱ze naꞌ.
8 Xúgute̱ da caní zaj naca na naga dxezú lau ca da xelezaca bénneache.
9 ’Nadxa xuludée̱ꞌ leꞌe naga si sácale,
naꞌ bál-lale welútequeze̱ꞌ.
Ca naca bénneache xelecuídene̱ꞌ leꞌe laweꞌ da dxunle da naca chiaꞌ.
10 Lu zra naꞌ benneꞌ zan québedxa xeléajle̱ꞌe̱ chiaꞌ,
naꞌ xelecuídene̱ꞌ le saꞌ ljwezre̱ꞌ,
ne xuludée̱ꞌ le saꞌ ljwezre̱ꞌ lu naꞌ benneꞌ guledábague̱ꞌ le̱ꞌ.
11 Weleláꞌ benneꞌ zan benneꞌ we̱n lazreꞌ.
Xelenné̱ꞌ dxuluchálaje̱ꞌ waláz chee̱ Dios,
naꞌ xelezí xe̱ꞌe̱ benneꞌ zante̱.
12 Laweꞌ da gátaꞌle̱ꞌe̱ da cale̱la,
benneꞌ zan québedxa xelezríꞌine̱ꞌ le saꞌ ljwezre̱ꞌ.
13 Bénneaꞌ zua chache̱ꞌ ca zrinte̱ zra bze̱be,
la bénneaꞌ.
14 Ca naca dizraꞌ chaweꞌ nigá ca nna bea Dios,
zralaj na du gabíꞌi xe̱zr la xu chee̱ xelén ca naca benneꞌ chee̱ xúgute̱ cueꞌ xe̱zr la xu,
naꞌ te naꞌ cheajsé̱ chee̱ xe̱zr la xu nigá.
15 ’Benneꞌ gulabe̱ꞌ da nigá dxal-laꞌ chéajniꞌine̱ꞌ.
Daniel,
benneꞌ bchálaje̱ꞌ waláz chee̱ Dios,
bzuaje̱ꞌ ca naca chee̱ tu da dxezráꞌa Dios,
da dxuxrinnaj na.
Gate léꞌele da nigá zua na lataj láꞌazxa chee̱ xudauꞌ,
16 nadxa benneꞌ zaj zre̱ꞌe̱ xe̱zre caꞌ zaj nababa Judea dxal-laꞌ xuluzrúnnuje̱ꞌ,
ne chjaque̱ꞌ lu xiꞌa zren.
17 Che tu benneꞌ ze̱ꞌ chjuꞌu chee̱ꞌ,
quebe dxal-laꞌ xexétaje̱ꞌ bi cheajxeléaje̱ꞌ lu xuꞌu.
Dxal-laꞌ guzrúnnujte̱ꞌ.
18 Benneꞌ zue̱ꞌ le̱ꞌe̱ xixreꞌ quebe dxal-laꞌ xezrine̱ꞌ lizre̱ꞌ cheajxezriꞌe̱ xicha chee̱ꞌ da gácue̱ꞌ.
19 Edxugúa nuꞌula caꞌ zaj zre̱ꞌe̱ lu zra naꞌ zaj zue̱ꞌ ziꞌi,
ne nuꞌula caꞌ zaj nuꞌe̱ bidauꞌ,
ne dxelázrebeꞌ.
20 Le naba Dios quebe gun na ba xen guzrúnnujle beuꞌ zaga,
ne quegá lu zra dxupáꞌanale,
21 laweꞌ da che caꞌ gaca na,
naꞌ da zrénte̱dxa da xelezí saca bénneache ca da quebe ne xelezaque̱ꞌ ca guzú laute̱ zua xe̱zr la xu nigá,
ne québedxa bi xelezaque̱ꞌ caní ca te chee̱ da nigá.
22 Che Dios quebe guzáchie̱ꞌ zra caꞌ,
naꞌ netú quebe nu la.
Guzáchie̱ꞌ na chee̱ gácale̱ne̱ꞌ benneꞌ caꞌ bache nabéaje̱ꞌ chee̱ꞌ.
23 ’Chee̱ le̱ naꞌ,
quebe chéajle̱le che nu xe̱ leꞌe:
“Le nnaꞌxque,
nigá zua Cristo”,
u che nu xe̱ leꞌe:
“Le nnaꞌ xque,
naꞌla zue̱ꞌ.”
24 Caní dxapaꞌ leꞌe laweꞌ da xeleláꞌ benneꞌ zan,
benneꞌ guzrí xe̱ꞌe̱,
naꞌ xelenné̱ꞌ zaj naque̱ꞌ Cristo,
u zaj naque̱ꞌ benneꞌ dxuluchálaje̱ꞌ waláz chee̱ Dios,
naꞌ da zrente̱ xululéꞌene̱ꞌ,
ne xelune̱ꞌ xel-laꞌ waca zren caꞌ chee̱ xelezí xe̱ꞌe̱ benneꞌ caꞌ ba nabéaj Dios.
Caní xelune̱ꞌ che xelezéquene̱ꞌ.
25 Ba bchálajle̱naꞌ leꞌe caníqueze naꞌa quebe ne gaca na.
26 Chee̱ le̱ naꞌ,
che nu xe̱ leꞌe:
“Le nnaꞌxque,
naꞌ zue̱ꞌ le̱ꞌe̱ xixreꞌ”,
quebe chéajle naꞌ,
u che nu xe̱ leꞌe:
“Le nnaꞌxque,
lu xuꞌu nigá zue̱ꞌ”,
quebe chéajle̱le.
27 Ca dxun tu xesa guziuꞌ,
dxe̱pe na naga dxalaj gubizra,
naꞌ dxeléꞌedxu na naga dxebía gubizra,
caꞌan gaca gate xidaꞌ nedaꞌ,
Benneꞌ Gulje̱ꞌ Bénneache.
28 Gátete̱ze de̱ tu da nate,
naꞌ dxelexezraga laba caꞌ.
Ca da gaca gate ba zua xeláꞌ Benneꞌ Gulje̱ꞌ Bénneache
29 Naꞌ gunná Jesús:
―Gate bache guca zra naꞌ gate xelezaca ziꞌ bénneache,
nadxa gubizra chul-la na naga zua na,
naꞌ beuꞌ quebe gusení na,
naꞌ belaj xelexruj na,
naꞌ xelezrízequeze ca naca da zaj naca na szren da dxeledáꞌ lu beꞌ.
30 Nadxa léꞌele zran xabáa da guléꞌe na ba zua xeláꞌa nedaꞌ,
Benneꞌ Gulje̱ꞌ Bénneache,
naꞌ ca naca bénneache zaj zre̱ꞌe̱ xe̱zr la xu xelebézrequeze̱ꞌ.
Nadxa xeleléꞌene̱ꞌ nedaꞌ,
Benneꞌ Gulje̱ꞌ Bénneache,
zezáꞌa lu beuj zran xabáa,
zúale̱ nedaꞌ dute̱ xel-laꞌ dxenná bea,
ne da xabáa.
31 Nadxa sél-laquezaꞌ gubáz chee̱ xabáa chiaꞌ caꞌ,
naꞌ xulucuézre̱ꞌ zizraj lúzubaꞌ chee̱ xuluxutupe̱ꞌ benneꞌ caꞌ ba nabéajaꞌ chiaꞌ dapa saca chee̱ xe̱zr la xu nigá,
ne du ca naca xe̱zr la xu nigá.
32 ’Le guse̱de ca naca da dxuléꞌe xaga higo.
Gate dxelexedxéꞌene zruze na,
ne dxezría na lagaꞌ dxeꞌene,
ba nézele ba za xaca beuꞌ la.
33 Cáꞌanqueze gate léꞌele dxelaca xúgute̱ da caní,
dxal-laꞌ nézele gágute̱ ba zua cheajsé̱ chee̱ xe̱zr la xu,
ne ba zua gaca na.
34 Da li dxapaꞌ leꞌe,
xúgute̱ da caní xelaca na nédxula gate quebe ne xelate bénneache zaj zre̱ꞌe̱ lu zra naꞌ.
35 Xabáa ne xe̱zr la xu weledé chee̱ na.
Dizraꞌ chiaꞌ quebe te chee̱ na.
36 ’Gate za zra naꞌ,
ne bila zra naꞌ,
quebe nu neze,
quegá gubáz chee̱ xabáa zaj zre̱ꞌe̱ xabáa,
ne nedaꞌ,
Zriꞌine Dios.
Tuze Xradxu Dios nézene̱ꞌ gate zrin zra naꞌ.
37 ’Ca guca lu zra caꞌ gate zua Noé,
cáꞌanqueze gaca na gate xeláꞌa nedaꞌ,
Benneꞌ Gulje̱ꞌ Bénneache.
38 Ca lu zra caꞌ gate quebe ne gun Dios nisa xiuj da guzría xi na bénneache,
gulezráꞌ bénneache caꞌ dxeléꞌaj dxelawe̱ꞌ,
ne dxuluchaga ne̱ꞌe̱,
ne dxulunézruje̱ꞌ zríꞌine̱ꞌ caꞌ chee̱ xuluchaga naꞌbeꞌ,
cadxa bzrin zra guxúꞌu Noé lu da zren naꞌ dxedá laweꞌ nísadauꞌ da nazí le na arca.
39 Quebe guleque béꞌene̱ꞌ ca da dxal-laꞌ gaca na,
cadxa bzrin zra guca xiuj naꞌ,
ne be̱te na ca naca benneꞌ caꞌ.
Cáꞌanqueze gaca gate xeláꞌa nedaꞌ,
Benneꞌ Gulje̱ꞌ Bénneache.
40 Ca lu zra caꞌ xelezráꞌ chupa benneꞌ biu le̱ꞌe̱ xixreꞌ.
Tue̱ꞌ xeché̱ꞌe̱,
naꞌ xetúe̱ꞌ xegáꞌane̱ꞌ.
41 Xelezráꞌ chupa nuꞌula dxelútue̱ꞌ.
Tue̱ꞌ xeché̱ꞌe̱,
naꞌ xetúe̱ꞌ xegáꞌane̱ꞌ.
42 ’Le sua leꞌe ban lazreꞌ laweꞌ da quebe nézele bi zra xeláꞌa nedaꞌ,
Xránale.
43 Da nigá dxal-laꞌ nézele:
Che tu xrane xuꞌu nézene̱ꞌ bi zra chizrela zrin gubán,
waxíchaje̱ꞌ bchigala,
ne quebe guꞌe̱ lataj xusalaj benneꞌ gubán lizre̱ꞌ chee̱ cuane̱ꞌ.
44 Chee̱ le̱ naꞌ,
le sua leꞌe ban lazreꞌ laweꞌ da xeláꞌa nedaꞌ,
Benneꞌ Gulje̱ꞌ Bénneache,
gate québela dxéquele caꞌ.
Benneꞌ we̱n zrin li lazreꞌ, ne benneꞌ we̱n zrin quebe naque̱ꞌ li lazreꞌ
45 Naꞌ gunná Jesús:
―¿Nuzra naꞌ benneꞌ we̱n zrin li lazreꞌ ne dxéajniꞌine̱ꞌ,
bénneaꞌ xrane̱ꞌ dxucáꞌanale̱ne̱ꞌ le̱ꞌ benneꞌ zaj zre̱ꞌe lizre̱ꞌ chee̱ gunézruje̱ꞌ da xelawe̱ꞌ gate zrin zra chee̱ na?
46 Ba neza naca na chee̱ benneꞌ we̱n zrin naꞌ,
gate xezrín xrane̱ꞌ,
léꞌene̱ꞌ le̱ꞌ dxune̱ꞌ ca naca da nabague̱ꞌ.
47 Da li dxapaꞌ leꞌe,
xrane̱ꞌ gucáꞌanale̱ne̱ꞌ le̱ꞌ ca naca da nape̱ꞌ.
48 Che benneꞌ we̱n zrin naꞌ gaque̱ꞌ benneꞌ we̱n da cale̱la,
ne guéquene̱ꞌ quebe xeláꞌ ze̱ xrane̱ꞌ,
49 ne che su lawe̱ꞌ gusaca ziꞌe̱ xezícala benneꞌ we̱n zrin caꞌ,
ne xiꞌaj gágule̱ne̱ꞌ benneꞌ dxelezuzre̱ꞌ,
50 nadxa xrane̱ꞌ xezrine̱ꞌ zra gate québela dxebeze̱ꞌ.
Gaca na zra quebe nézene̱ꞌ,
51 naꞌ gusaca zíꞌle̱ꞌe̱ le̱ꞌ.
Chugue̱ꞌ chee̱ꞌ gaque̱ꞌ tuze benneꞌ caꞌ dxelune̱ꞌ láweze da xrlátaje.
Cuezre̱ꞌ,
ne xáguxaꞌate̱ lazxe̱ꞌ.