Da dxuléꞌe na ca naca chee̱ chi nuꞌula cuideꞌ
25
Gunná Jesús:
―Ca gaca chee̱ benneꞌ xeluꞌe̱ naga dxenná bea Dios xabáa naca na ca da guca chee̱ chi nuꞌula cuideꞌ caní.
Gulequé̱ꞌe̱ xiꞌ chee̱ꞌ caꞌ,
chee̱ chjaque̱ꞌ laní chee̱ wechaga naꞌ,
dxelebeze̱ꞌ bátala xeláꞌ benneꞌ wechaga naꞌ.
2 Gazxuꞌ nuꞌula caní gulaque̱ꞌ gat lazreꞌ,
naꞌ xegazxuꞌ nuꞌula caní zaj naque̱ꞌ ban lazreꞌ.
3 Nuꞌula caꞌ quebe zaj naque̱ꞌ ban lazreꞌ belúꞌe̱ xiꞌ chee̱ꞌ caꞌ,
san quebe belúꞌe̱ da za zxezxe na da xelegué̱ꞌe̱ lu xiꞌ chee̱ꞌ caꞌ.
4 Nuꞌula ban lazreꞌ caꞌ belúꞌe̱ xiꞌ chee̱ꞌ caꞌ,
ne da za zxezxe na da xelegué̱ꞌe̱ na.
5 Laweꞌ da guzré benneꞌ wechaga naꞌ,
naꞌ gulaca wase ca zaj naque̱ꞌ,
naꞌ xúgute̱ꞌ gulasie̱ꞌ.
6 Dxe̱la ben tu chiꞌi benneꞌ dxebezre xe̱ꞌe̱,
dxenné̱ꞌ:
“Ba zaꞌ wechaga naꞌ.
Le dxuaj siꞌ lu naꞌle le̱ꞌ.”
7 Xúgute̱ nuꞌula cuideꞌ caní gulase̱ꞌ,
naꞌ gulezú lawe̱ꞌ bulugale̱ꞌ xiꞌ chee̱ꞌ caꞌ.
8 Nadxa gazxuꞌ nuꞌula caꞌ quebe zaj naque̱ꞌ ban lazreꞌ gulé̱ꞌe̱ gazxuꞌ nuꞌula ban lazreꞌ caꞌ:
“Le gunna lateꞌ da za zxezxe na chee̱ntuꞌ,
laweꞌ da ba dxelexula xiꞌ chee̱ntuꞌ.”
9 Nuꞌula ban lazreꞌ caꞌ belexeche̱be̱ꞌ:
“Quebe gaca,
laweꞌ da che gúnnantuꞌ lateꞌ chee̱le,
quebe gaca na da dxechínnentuꞌ netuꞌ,
ne da dxechínnele leꞌe.
Le chjácala naga dxutie̱ꞌ na,
ne le cheajxrí chee̱le.”
10 Dxácate̱ zjaca nuꞌula caꞌ quebe zaj naque̱ꞌ ban lazreꞌ,
naꞌ bezrín wechaga naꞌ.
Nuꞌula ban lazreꞌ caꞌ guluꞌe̱ nen le̱ꞌ lu laní chee̱ wechaga naꞌ,
naꞌ bsezxuj dxa xuꞌu naꞌ.
11 Gudé naꞌ belexezrín xegazxuꞌ nuꞌula caꞌ,
naꞌ gulenné̱ꞌ:
“Xran,
Xran,
gusalaj chúꞌuntuꞌ.”
12 Le̱ꞌ beche̱be̱ꞌ:
“Cabataꞌ.
Da líqueze quebe núnbeꞌa leꞌe.”
13 Nadxa Jesús guzre̱ꞌ benneꞌ caꞌ:
―Le sua leꞌe ban lazreꞌ,
laweꞌ da quebe nézele bi zra,
u bi xel-laꞌ xeláꞌa nedaꞌ,
Benneꞌ Gulje̱ꞌ Bénneache.
Da dxuléꞌe na ca naca chee̱ benneꞌ gulezíꞌe̱ dumí
14 Naꞌ gunná Jesús:
―Ca gaca chee̱ benneꞌ xeluꞌe̱ naga dxenná bea Dios xabáa,
naca na ca da guca gate tu benneꞌ zue̱ꞌ chee̱ se̱ꞌe̱ chéaje̱ꞌ zituꞌ,
naꞌ gunné̱ꞌ bi we̱n zrin chee̱ꞌ caꞌ,
ne bcáꞌanale̱ne̱ꞌ bi we̱n zrin caꞌ dumí chee̱ꞌ.
15 ’Tu bi caꞌ bnézruje̱ꞌ gazxuꞌ cueꞌ dumí,
naꞌ xetubeꞌ bnézruje̱ꞌ chupa cueꞌ dumí,
naꞌ xetubeꞌ bnézruje̱ꞌ tu cueꞌ dumí.
Bnézruje̱ꞌ chee̱ tu tubeꞌ ca da xelezéquebeꞌ xuluchínebeꞌ na.
Nadxa guzé̱ꞌe̱ zéaje̱ꞌ zituꞌ.
16 Bi we̱n zrin naꞌ guziꞌbeꞌ gazxuꞌ cueꞌ dumí bchínebeꞌ dumí naꞌ,
naꞌ beziꞌbeꞌ xegazxuꞌ cueꞌ dumí.
17 Cáꞌanqueze bi we̱n zrin naꞌ guziꞌbeꞌ chupa cueꞌ dumí,
beziꞌbeꞌ xechupa cueꞌ dumí.
18 Bi we̱n zrin naꞌ guzíꞌbeꞌ tu cueꞌ dumí naꞌ guxíajbeꞌ,
ne bcáchebeꞌ dumí chee̱ xránabeꞌ tu lu xe̱dxu da be̱nbeꞌ lu xu.
19 ’Zaneꞌ iza ba guca gate bezrín xrane bi we̱n zrin caꞌ,
naꞌ guzú lawe̱ꞌ dxeziꞌe̱ da bdee̱ꞌ lu naꞌ bi we̱n zrin caꞌ.
20 Nedxu bzrin bi we̱n zrin naꞌ guzíꞌbeꞌ gazxuꞌ cueꞌ dumí,
naꞌ bnézrujbeꞌ xránabeꞌ xegazxuꞌ cueꞌ dumí,
naꞌ gúzrebeꞌ le̱ꞌ:
“Xran,
be̱nnuꞌ nedaꞌ gazxuꞌ cueꞌ dumí.
Nigá de̱ xegazxuꞌ cueꞌ da beziꞌa nen dumí chiuꞌ.”
21 Naꞌ xránabeꞌ guzre̱ꞌ le̱beꞌ:
“Da chaweꞌ be̱nuꞌ.
Nacuꞌ tu bi we̱n zrin xrlátaje,
ne li lazreꞌ.
Gucuꞌ li lazreꞌ lu lateꞌ da be̱nnaꞌ lueꞌ,
naꞌ gúnnaquezaꞌ lueꞌ da zréndxaqueze.
Guxúꞌu naga zuaꞌ nedaꞌ,
ne gubéle̱ꞌe̱.”
22 Gudé naꞌ bzrin bi we̱n zrin naꞌ guziꞌbeꞌ chupa cueꞌ dumí,
naꞌ gunabeꞌ:
“Xran,
be̱nnuꞌ nedaꞌ chupa cueꞌ dumí.
Nigá de̱ xechupa cueꞌ da beziꞌa nen dumí chiuꞌ.”
23 Naꞌ xránabeꞌ guzre̱ꞌ le̱beꞌ:
“Da chaweꞌ be̱nuꞌ.
Nacuꞌ tu bi we̱n zrin xrlátaje,
ne li lazreꞌ.
Gucuꞌ li lazreꞌ lu lateꞌ da be̱nnaꞌ lueꞌ,
naꞌ gúnnaquezaꞌ lueꞌ da zréndxaqueze.
Guxúꞌu naga zuaꞌ nedaꞌ,
ne gubéle̱ꞌe̱.”
24 Gate bzrin bi we̱n zrin naꞌ guziꞌbeꞌ tu cueꞌ dumí,
naꞌ gúzrebeꞌ xránabeꞌ:
“Xran,
nezdaꞌ nacuꞌ benneꞌ dxenné̱ xue,
ne dxeziꞌu da quebe guzuꞌ,
ne dxexecaꞌu da quebe be̱siuꞌ.
25 Chee̱ le̱ naꞌ bzrebaꞌ,
naꞌ guxáꞌa xeajcáchiaꞌ dumí chiuꞌ lu xu.
Nigá de̱ da naca chiuꞌ.”
26 Naꞌ xránabeꞌ guzre̱ꞌ le̱beꞌ:
“Nacuꞌ bi we̱n zrin cale̱la,
ne zrawe̱de.
Ba nézqueznuꞌ dxeziꞌa da quebe guzaꞌ,
ne dxexecáꞌa da quebe be̱siaꞌ.
27 Chee̱ le̱ naꞌ la xjuꞌu dumí chiaꞌ naꞌ lu naꞌ benneꞌ dxelízruje̱ꞌ chee̱ dumí da dxuluchínene̱ꞌ,
naꞌ gate zaꞌ nedaꞌ,
naꞌ xeziꞌa da naca chiaꞌ nen da belezíꞌe̱.”
28 Nadxa guzre̱ꞌ benneꞌ caꞌ zaj zre̱ꞌe̱ naꞌ:
“Le xecáꞌa dumí naꞌ da núxrubeꞌ,
ne le gunezruj na bénneaꞌ nape̱ꞌ chi cueꞌ dumí.
29 Benneꞌ nape̱ꞌ wazidxe̱ꞌ da zrendxa,
naꞌ benneꞌ quebe nape̱ꞌ,
ca lateꞌ da du naꞌ nape̱ꞌ wecáꞌa na.
30 Ca naca bi we̱n zrin nigá,
bi wedegún,
le xebéaj-beꞌ chaléꞌajla naga naca chul-la,
naga cuézrebeꞌ,
ne xáguxaꞌate̱ lázxabeꞌ.”
Ca gun Dios gate guchiꞌe̱ chee̱ bénneache zaj zre̱ꞌe̱ xe̱zr la xu
31 Naꞌ gunná Jesús:
―Gate xeláꞌa nedaꞌ,
Benneꞌ Gulje̱ꞌ Bénneache,
ne Benneꞌ Wenná Bea,
nen ca naca gubáz chee̱ xabáa chiaꞌ,
naꞌ cuéꞌquezaꞌ lataj naga nna beꞌa,
da naca na da xabáa.
32 Naꞌ bénneache chee̱ xúgute̱ cueꞌ xe̱zr la xu xelexezrague̱ꞌ lawaꞌ nedaꞌ,
naꞌ xebéajaꞌ cha chee̱ꞌ ca dxun benneꞌ dxuxúe̱ꞌ zrilaꞌ.
xebéaje̱ꞌ chíbudu caꞌ ládujla zrilaꞌ caꞌ.
33 Guzráꞌa benneꞌ caꞌ zaj naca zrilaꞌ chiaꞌ chaláꞌa xabe̱la chiaꞌ,
naꞌ benneꞌ caꞌ zaj naca ca chíbudu caꞌ guzráꞌa le̱ꞌ chaláꞌa xéglala chiaꞌ.
34 Nadxa xapaꞌ benneꞌ caꞌ zaj zraꞌ chaláꞌa xabe̱la chiaꞌ:
“Le da leꞌe,
nácale xrlátaje lau Xraꞌ.
Le chuꞌu naga dxenná bea Xraꞌ,
lataj naꞌ bcueze̱ꞌ chee̱le gate naꞌ be̱ne̱ꞌ xe̱zr la xu nigá.
35 Caní dxaca laweꞌ da gudunaꞌ,
naꞌ bgágule nedaꞌ.
Gubíledaꞌ,
naꞌ bé̱nnale da guꞌa.
Gudáꞌ ca tu benneꞌ xuꞌe̱ neza,
naꞌ guluꞌule nedaꞌ lízrele.
36 Bxázrjedaꞌ zra lanaꞌ gácuaꞌ,
naꞌ bgácule nedaꞌ.
Quebe chaweꞌ guzúaꞌ,
naꞌ bedajnábale nedaꞌ.
Guxuꞌa lizre xia,
naꞌ bedajnábale nedaꞌ.”
37 Nadxa benneꞌ xrlátaje caní xelenné̱ꞌ:
“Xran,
¿bata bléꞌentuꞌ Lueꞌ dxedunuꞌ,
naꞌ bgáguntuꞌ Lueꞌ?
¿Bata bléꞌentuꞌ Lueꞌ dxebílenuꞌ,
naꞌ bé̱nnantuꞌ da guꞌu?
38 ¿Bata bléꞌentuꞌ Lueꞌ ca tu benneꞌ xuꞌe̱ neza,
naꞌ gulúꞌuntuꞌ Lueꞌ lízrentuꞌ?
¿Bata bléꞌentuꞌ Lueꞌ dxexázrjenuꞌ zra lanuꞌ,
naꞌ bgácuntuꞌ Lueꞌ?
39 ¿Bata bénentuꞌ quebe chaweꞌ zuꞌ,
u xuꞌu lizre xia,
naꞌ bedajnábantuꞌ Lueꞌ?”
40 Nedaꞌ xeche̱baꞌ:
Da li dxapaꞌ leꞌe,
ca da be̱nle chee̱ bénnedu caní,
benneꞌ zaj naca dxexruj lazreꞌ,
chee̱ nédaꞌquezaꞌ be̱nle caꞌ.
41 ’Nadxa nedaꞌ,
Benneꞌ Wenná Bea,
xapaꞌ benneꞌ caꞌ zaj zraꞌ chaláꞌa xéglala chiaꞌ:
Le cuasa cuitaꞌ nedaꞌ,
leꞌe,
nácale we̱n da cale̱la lau Xraꞌ.
Le chjaca lu xiꞌ chee̱ lataj ba xaꞌ da nabeza na chee̱ da xriwe̱ꞌ,
ne chee̱ gubáz chee̱ na caꞌ.
42 Caní dxaca laweꞌ da gudunaꞌ,
naꞌ leꞌe quebe bé̱nnale da gawaꞌ.
Gubíledaꞌ,
naꞌ quebe bé̱nnale da xíꞌajaꞌ.
43 Gudáꞌ ca tu benneꞌ xuꞌe̱ neza,
naꞌ quebe guluꞌule nedaꞌ lízrele.
Bxázrjedaꞌ zra lanaꞌ gacuaꞌ,
naꞌ quebe bgácule nedaꞌ.
Quebe chaweꞌ guzúaꞌ ne guxuꞌa lizre xia,
naꞌ quebe bedajnábale nedaꞌ.
44 Nadxa benneꞌ caꞌ xelé̱queze̱ꞌ nedaꞌ:
“Xran,
¿bata bléꞌentuꞌ Lueꞌ dxedunuꞌ,
u dxebílenuꞌ,
u xuꞌu neza,
u dxexázrjenuꞌ zra lanuꞌ,
u quebe chaweꞌ zuꞌ,
u xuꞌu lizre xia,
naꞌ quebe gúcale̱ntuꞌ Lueꞌ?”
45 Nedaꞌ,
benneꞌ wenná bea,
xeche̱baꞌ:
Da li dxapaꞌ leꞌe,
laweꞌ da quebe bi be̱nle chee̱ bénnedu caní,
benneꞌ zaj naca dxexruj lazreꞌ,
quebe bi be̱nle chee̱ nédaꞌquezaꞌ.
46 Benneꞌ caní chjácaqueze̱ꞌ lataj ba xaꞌ,
naꞌ benneꞌ xrlátaje caꞌ chjaque̱ꞌ lu xel-laꞌ nabán da zeajlí canna.