Dxelílaje̱ꞌ ájala xele̱le̱ꞌ Jesús
26
Gate bexuzre bchalaj Jesús caní,
naꞌ guzre̱ꞌ benneꞌ caꞌ dxusé̱dene̱ꞌ:
2 ―Ca ba nézquezle,
xechupa zraze naꞌa súadxu Laní Pascua,
da naca na zra dxuluxucube benneꞌ judío ca guca gate Dios bebéaje̱ꞌ bénneache chee̱ꞌ lu xe̱zr la xu Egipto,
naꞌ nedaꞌ,
Benneꞌ Gulje̱ꞌ Bénneache,
xuludée̱ꞌ nedaꞌ lu naꞌ benneꞌ xuludé̱ꞌe̱ nedaꞌ xaga béguaj.
3 Ca lu zra naꞌ benneꞌ xíchaje̱ caꞌ chee̱ bxruze caꞌ,
ne benneꞌ dxuluxuzájle̱ꞌe̱ da bdxixruj Moisés,
ne benneꞌ gula sina caꞌ chee̱ judío caꞌ,
belezrague̱ꞌ chaleꞌaj chee̱ xuꞌu zaca chee̱ Caifás,
bxruze blau.
4 Naꞌ belílaje̱ꞌ ájala xele̱le̱ꞌ Jesús lu da we̱n lazreꞌ chee̱ xelútie̱ꞌ Le̱ꞌ.
5 Gulenné̱ꞌ:
―Quebe gundxu na lu zra laní nigá,
chee̱ quebe xeledábaga benneꞌ caꞌ dxiꞌu.
Tu nuꞌula dxeguꞌe̱ Jesús da dxelá zixre
6 Zua Jesús xe̱zre Betania lizre Simón,
bénneaꞌ güéꞌene̱ꞌ we̱ꞌ guzruꞌ.
7 Bzrin tu nuꞌula naga zua Jesús,
nuꞌe̱ tu zruágadauꞌ da naca na xiaj alabastro,
ne nazrate̱ na da dxelá zixre da zácale̱ꞌe̱ na.
Gate naꞌ dxeꞌ Jesús ga dxelawé̱ꞌ,
naꞌ nuꞌula nigá guluꞌe̱ na xichaj Jesús.
8 Gate beleléꞌe benneꞌ caꞌ dxuse̱de Jesús da nigá,
naꞌ belezré̱ꞌe̱,
ne gulezú lawe̱ꞌ dxelenné̱ꞌ:
―¿Bizr chee̱ naꞌ guzría xiꞌ da nigá?
9 Da nigá waca la gudáꞌu na síꞌadxu da zrente̱,
chee̱ gácale̱dxu benneꞌ xacheꞌ caꞌ.
10 Jesús benne̱ꞌ da nigá,
naꞌ guzre̱ꞌ benneꞌ caꞌ:
―¿Bizr chee̱ naꞌ dxunle nuꞌula nigá ze̱de?
Da nigá be̱ne̱ꞌ naca na tu da xrlátaje.
11 Benneꞌ xacheꞌ caꞌ tu zrázqueze̱ꞌ ládujla leꞌe,
naꞌ nedaꞌ quegá tu súale̱zaꞌ leꞌe.
12 Ca naca da be̱n nuꞌula nigá,
guluꞌe̱ da zixre naꞌ be̱l-laꞌ dxen chiaꞌ,
naca na da xucáꞌana chawe na nedaꞌ chee̱ zra gachiaꞌ lu xe̱dxu ba.
13 Da li dxapaꞌ leꞌe,
gátete̱ze xuluchálaje̱ꞌ dizraꞌ chaweꞌ chiaꞌ nigá du gabíꞌi xe̱zr la xu,
naꞌ zrálajqueze ca da be̱n nuꞌula nigá,
chee̱ cheajlesá lazreꞌ bénneache le̱ꞌ.
Judas dxeche̱be lazre̱ꞌ gudée̱ꞌ Jesús
14 Nadxa tu benneꞌ chazrinnu caꞌ dxuse̱de Jesús,
bénneaꞌ le̱ꞌ Judas Iscariote,
guxíaje̱ꞌ xeajchálajle̱ne̱ꞌ benneꞌ xíchaje̱ caꞌ chee̱ bxruze caꞌ.
15 Guzre̱ꞌ le̱ꞌ:
―¿Ájate̱ gúnnale nedaꞌ che caꞌ gudéaꞌ Jesús lu naꞌle?
Nadxa benneꞌ caꞌ gulízruje̱ꞌ le̱ꞌ chi dxua dumí plata.
16 Ca lu zra naꞌ guzú lau Judas dxexílaje̱ꞌ ájala gune̱ꞌ gudée̱ꞌ Jesús lu naꞌ benneꞌ caꞌ.
Da dxágudxu chee̱ xucúbedxu ca guca gate gute Xránadxu
17 Zra nedxu chee̱ laní naꞌ gate naꞌ dxelawe̱ꞌ xeta xtila da quebe nachixre cua zichaj chee̱ na,
benneꞌ caꞌ dxuse̱de Jesús belezrine̱ꞌ lau Le̱ꞌ,
naꞌ buluche̱be̱ꞌ Le̱ꞌ:
―¿Gazra dxaca lazruꞌ gucuézentuꞌ da gágudxu chee̱ laní pascua chee̱ benneꞌ judío?
18 Jesús guzre̱ꞌ le̱ꞌ:
―Le chjaca lu xe̱zre naꞌ,
naga zua lizre tu benneꞌ,
naꞌ le xe̱ꞌe̱:
“Benneaꞌ dxusé̱dene̱ꞌ dxiꞌu dxenné̱ꞌ:
Zra chiaꞌ gatiaꞌ ba zua gágute̱,
naꞌ lizruꞌ lueꞌ gawaꞌ chee̱ Laní Pascua tu zren nen benneꞌ caꞌ dxusé̱dedaꞌ.”
19 Benneꞌ caꞌ dxuse̱de Jesús belune̱ꞌ ca da gunná béꞌene̱ꞌ le̱ꞌ,
naꞌ bulucueze̱ꞌ da xelawe̱ꞌ chee̱ Laní Pascua.
20 Gate gula chizrela,
naꞌ gudxéꞌ Jesús ga gawe̱ꞌ tu zren nen benneꞌ caꞌ dxusé̱dene̱ꞌ.
21 Dxácate̱ naꞌ dxelawe̱ꞌ,
guzre Jesús benneꞌ caꞌ:
―Da li dxapaꞌ leꞌe,
tule leꞌe naca bénneaꞌ gudée̱ꞌ nedaꞌ lu naꞌ benneꞌ caꞌ dxelune̱ꞌ da cale̱la.
22 Nadxa benneꞌ caꞌ belexewíꞌinele̱ꞌe̱,
naꞌ gulezú lawe̱ꞌ tu tue̱ꞌ dxuluche̱be̱ꞌ Jesús:
―Xran,
¿quebe naca nedaꞌ?
23 Naꞌ beche̱be Jesús:
―Bénneaꞌ dxudé ne̱ꞌe̱ lu xéꞌena tu zren nen nedaꞌ,
benneꞌ naꞌ gudée̱ꞌ nedaꞌ.
24 Nedaꞌ,
Benneꞌ Gulje̱ꞌ Bénneache,
waxáꞌa naga dxal-laꞌ gatiaꞌ ca naxúaj na lu xiche chee̱ Dios,
san edxugúa bénneaꞌ gudée̱ꞌ nedaꞌ.
Cháwedxa naca la quebe gulaj bénneaꞌ.
25 Nadxa gunná Judas,
bénneaꞌ gudée̱ꞌ Jesús,
dxenné̱ꞌ:
―Benneꞌ dxuse̱de,
¿quebe naca nedaꞌ?
Naꞌ beche̱be Jesús,
gunné̱ꞌ:
―Aweꞌ,
lueꞌ naꞌ.
26 Dxácate̱ dxelawe̱ꞌ,
Jesús guqué̱ꞌe̱ xeta xtila,
naꞌ guzre̱ꞌ Dios:
“Xcalenuꞌ.”
Gudé naꞌ bzúzruje̱ꞌ na,
naꞌ bnézruje̱ꞌ na benneꞌ caꞌ dxusé̱dene̱ꞌ,
dxenné̱ꞌ:
―Le gagu.
Da nigá naca na be̱l-laꞌ dxen chiaꞌ.
27 Gudé naꞌ guqué̱ꞌe̱ tu zrigaꞌ,
naꞌ guzre̱ꞌ Dios:
“Xcalenuꞌ”,
naꞌ bnézruje̱ꞌ na benneꞌ caꞌ,
dxenné̱ꞌ:
―Le xiꞌaj xúgute̱le da xuzru lu zrigaꞌ nigá.
28 Da nigá naca na dxen chiaꞌ da guzúa chacha na xel-laꞌ wezría cube da dxun Dios.
Dxen nigá lalaj na ne̱ chee̱ benneꞌ zante̱ chee̱ gunite lau Dios dul-la zaj nabaga benneꞌ caꞌ.
29 Dxapaꞌ leꞌe,
québedxa xíꞌajaꞌ ca naca xrise uva nigá ca zrindxa zra xíꞌajaꞌ da cube tu zren nen leꞌe naga dxenná bea Xraꞌ.
Jesús dxenné̱ꞌ nna Pedro quebe núnbeꞌe̱ Le̱ꞌ
30 Ca gudé belul-le̱ꞌ chee̱ Dios,
naꞌ gusiáꞌque̱ꞌ zjaque̱ꞌ lu Xiꞌa Xaga Olivo Caꞌ.
31 Nadxa Jesús guzre̱ꞌ benneꞌ caꞌ:
―Xúgute̱le leꞌe gusán lázrele nedaꞌ naꞌa zreꞌ,
laweꞌ da naxúaj na lu xiche chee̱ Dios,
dxenné̱ꞌ:
“Gutiaꞌ benneꞌ dxuxúe̱ꞌ zrilaꞌ,
naꞌ zrilaꞌ caꞌ xelase dínnajbaꞌ.”
32 Gate te xebanaꞌ nedaꞌ,
chaꞌa nedaꞌ ga nababa Galilea nédxudxa ca leꞌe.
33 Nadxa beche̱be Pedro:
―Lácala xúgute̱ benneꞌ caní xulusán lazre̱ꞌ Lueꞌ,
quebe gunaꞌ nedaꞌ caꞌ.
34 Nadxa Jesús guzre̱ꞌ le̱ꞌ:
―Da li dxapaꞌ lueꞌ,
lu zreꞌ naꞌa zreꞌ nédxudxa gate cuezre xjeaj,
lueꞌ wannáuꞌ chunna lasa quebe núnbeꞌu nedaꞌ.
35 Pedro guzre̱ꞌ Jesús:
―Lácala gatiaꞌ nedaꞌ tu zren nen Lueꞌ,
québequeze nniaꞌ quebe núnbeꞌa Lueꞌ.
Cáꞌanqueze gulenná xúgute̱ benneꞌ caꞌ dxuse̱de Jesús.
Jesús dxuchálajle̱ne̱ꞌ Dios naga zaj zxeꞌ xaga olivo caꞌ nazí le na Getsemaní
36 Nadxa bzrin Jesús nen benneꞌ caꞌ dxusé̱dene̱ꞌ tu lataj nazí le na Getsemaní,
naꞌ guzre̱ꞌ le̱ꞌ:
―Le cueꞌe nigá dxácate̱ chaꞌa nedaꞌ,
guchálajle̱naꞌ Dios.
37 Jesús guché̱ꞌe̱ Pedro,
ne dxúpate̱ zriꞌine Zebedeo,
naꞌ guzú lawe̱ꞌ bewíꞌinele̱ꞌe̱ne̱ꞌ ne guzúale̱ꞌe̱ ste̱be.
38 Nadxa guzre̱ꞌ benneꞌ caꞌ:
―Dxewíꞌine lázrele̱ꞌa dxunte̱ na gute na nedaꞌ.
Le xegáꞌana leꞌe nigá,
ne le sua ban lazreꞌ tu zren nen nedaꞌ.
39 Nadxa Jesús guzé̱ꞌe̱ zéaje̱ꞌ xelateꞌ caníladxa,
naꞌ gute̱ꞌ sudxúꞌala lu xu,
ne bchálajle̱ne̱ꞌ Dios,
dxenné̱ꞌ:
―Xrae,
chela gaca,
bde na chaláꞌala quebe gaca chiaꞌ ca naca xel-laꞌ gute caní da naca na ca tu da slaꞌ da xíꞌajaꞌ.
Quebe gaca na ca dxaca lazraꞌ nedaꞌ.
Gaca na ca dxaca lazruꞌ Lueꞌ.
40 Nadxa bezrín Jesús naga zaj zraꞌ benneꞌ caꞌ dxusé̱dene̱ꞌ,
naꞌ bléꞌene̱ꞌ benneꞌ caꞌ dxelásie̱ꞌ,
naꞌ guzre̱ꞌ Pedro:
―¿Quebe gúcale leꞌe quíchale bchigala nen nedaꞌ tu chíꞌidauꞌze?
41 Le nnaze,
ne le guchálajle̱ Dios chee̱ quebe gun zréaje da xriwe̱ꞌ leꞌe.
Da li bénneꞌdu xuꞌule dxaca lázreꞌle̱ꞌe na,
san lu be̱laꞌ dxen chee̱le dxate niꞌa naꞌle.
42 Da gudxupeꞌ lasa guxíaj Jesús bchálajle̱ne̱ꞌ Dios caní:
―Xrae,
che quebe gaca te chaláꞌala ca naca da dxal-laꞌ sacaꞌ,
gaca na ca dxaca lazruꞌ Lueꞌ.
43 Ca gudé naꞌ bezrine̱ꞌ,
ne beléꞌene̱ꞌ benneꞌ caꞌ dxusé̱dene̱ꞌ,
dxelásie̱ꞌ laweꞌ da ba dxelezrudeꞌ lawe̱ꞌ dxelaca wásele̱ꞌe̱.
44 Bcaꞌane̱ꞌ benneꞌ caꞌ,
guzé̱ꞌe̱ zéaje̱ꞌ bchálajle̱ne̱ꞌ Dios da guxunneꞌ lasa,
naꞌ gunnáqueze̱ꞌ ca da ba gunné̱ꞌ caꞌan bache.
45 Nadxa bezrine̱ꞌ naga zaj zraꞌ benneꞌ caꞌ dxusé̱dene̱ꞌ,
naꞌ guzre̱ꞌ le̱ꞌ:
―Le gase naꞌa,
ne le xezíꞌ lazreꞌ.
Ba bzrin zra gate nedaꞌ,
Benneꞌ Gulje̱ꞌ Bénneache,
teaꞌ lu naꞌ benneꞌ dul-la caꞌ.
46 Le chasa,
ne le chuꞌu.
Ba za bénneaꞌ dxudée̱ꞌ nedaꞌ.
Dxeleché̱ꞌe̱ Jesús ca tu benneꞌ we̱n da zrinnaj
47 Ne dxuchálajte̱ Jesús naꞌ gate bzrin Judas.
Naque̱ꞌ tu benneꞌ chazrinnu caꞌ,
naꞌ záꞌacale̱ benneꞌ zante̱ le̱ꞌ,
benneꞌ zaj nuꞌe̱ xia caꞌ ne xaga caꞌ.
Benneꞌ caní zaj naque̱ꞌ benneꞌ gulesel-la benneꞌ xíchaje̱ caꞌ chee̱ bxruze caꞌ,
ne benneꞌ gula sina caꞌ chee̱ judío caꞌ.
48 Judas,
bénneaꞌ dxudée̱ꞌ Jesús,
ba bléꞌene̱ꞌ benneꞌ caꞌ ca tu da gune̱ꞌ da guléꞌe na nu naꞌ naca Jesús.
Gunné̱ꞌ:
―Bénneaꞌ gunupaꞌ nedaꞌ,
Le̱ꞌ naꞌ.
Le che̱ꞌe̱ ca tu benneꞌ we̱n da zrinnaj.
49 Nadxa bzrin Judas lau Jesús,
dxenné̱ꞌ:
―Diuzre,
Benneꞌ dxuse̱de.
Naꞌ bnupe̱ꞌ Jesús.
50 Beche̱be Jesús:
―Ljwezraꞌ,
¿bi chee̱ zaꞌu?
Nadxa gulebiga benneꞌ caꞌ,
gule̱le̱ꞌ Jesús,
naꞌ beleché̱ꞌe̱ Le̱ꞌ ca tu benneꞌ we̱n da zrinnaj.
51 Tu benneꞌ caꞌ dxuse̱de Jesús guléaje̱ꞌ xia chee̱ꞌ,
ne guchugue̱ꞌ chaláꞌa naga bi we̱n zrin chee̱ bxruze blau.
52 Nadxa Jesús guzre̱ꞌ le̱ꞌ:
―Begúꞌu xia chiuꞌ lu zre na,
laweꞌ da xúgute̱ benneꞌ dxelute benneꞌ nen xia nalá,
cáꞌanqueze gate le̱ꞌ.
53 ¿Quebe nézenuꞌ wazéquedaꞌ nedaꞌ nabaꞌ Xraꞌ,
naꞌ Le̱ꞌ sél-late̱ꞌ naꞌa naga zuaꞌ da zandxa ca chazrinnu cueꞌ gubáz chee̱ xabáa,
zaj naque̱ꞌ zánete̱ tu tu cueꞌ?
54 Naꞌa che caꞌan gunaꞌ,
¿ájazra gaca gaca na ca da naxúaj na lu xiche chee̱ Dios,
da dxenná na caní dxal-laꞌ gaca na?
55 Nadxa guzre Jesús benneꞌ caꞌ:
―Leꞌe bdxuajle nen xia nalá caꞌ,
ne nen xaga caꞌ chee̱ qué̱lale nedaꞌ,
dxunle nedaꞌ ca tu benneꞌ gubán.
Xúgute̱ zra gudxeꞌa nedaꞌ lu xudauꞌ dxusé̱dedaꞌ leꞌe,
ne quebe gudé̱lale nedaꞌ.
56 Xúgute̱ da caní dxaca na chee̱ gaca na ca da gulenná benneꞌ caꞌ buluchálaje̱ꞌ waláz chee̱ Dios,
da naꞌ naxúaj na lu xiche chee̱ Dios.
Nadxa xúgute̱ benneꞌ caꞌ dxuse̱de Jesús bulucáꞌane̱ꞌ Le̱ꞌ tuze̱ꞌ,
buluxuzrúnnuje̱ꞌ.
Dxezrín Jesús lau benneꞌ caꞌ chee̱ xuꞌu laweꞌ blau chee̱ judío caꞌ
57 Benneꞌ caꞌ gule̱le̱ꞌ Jesús guleché̱ꞌe̱ Le̱ꞌ lau Caifás,
bxruze blau,
ga naꞌ zaj nazraga benneꞌ caꞌ dxuluxuzájle̱ꞌe̱ da bdixruj beꞌe Moisés,
nen benneꞌ gula sina caꞌ.
58 Pedro zéaje nawe̱ꞌ Jesús zítuꞌla,
naꞌ bzrine̱ꞌ chaleꞌaj chee̱ lizre bxruze blau,
naꞌ guxúꞌe̱,
ne gudxéꞌe̱ tu zren nen bi xaꞌaga chee̱ léꞌene̱ꞌ ájala xexuzre da dxaca naꞌ.
59 Benneꞌ xíchaje̱ caꞌ chee̱ bxruze caꞌ,
ne benneꞌ gula sina caꞌ,
ne xúgute̱ benneꞌ caꞌ chee̱ xuꞌu laweꞌ blau chee̱ judío caꞌ belílaje̱ꞌ ájala xuluzría xiꞌe̱ Jesús,
lácala naca na da we̱n lazreꞌ,
chee̱ xelezéquene̱ꞌ xuludée̱ꞌ Le̱ꞌ gatie̱ꞌ.
60 Quebe bi belezrelne̱ꞌ,
lácala belezrín benneꞌ zan benneꞌ gulenné̱ꞌ da we̱n lazreꞌ chee̱ Jesús.
Naga xeajse̱te̱ na belezrín chupa benneꞌ we̱n lazreꞌ.
61 Dxelenné̱ꞌ:
―Benneꞌ nigá gunné̱ꞌ:
“Wazéquedaꞌ nedaꞌ guchínnajaꞌ xudauꞌ chee̱ Dios,
naꞌ xexunaꞌ na laweꞌ chunna zraze.”
62 Nadxa guxasa bxruze blau,
naꞌ guzre̱ꞌ Jesús:
―¿Quebe bi dxexeche̱buꞌ?
¿Bizra da dxelenné̱ꞌ chiuꞌ lueꞌ?
63 Jesús guzúe̱ꞌ zrize.
Nadxa bxruze blau naꞌ guzre̱ꞌ Le̱ꞌ:
―Lu La Dios ban dxenná beꞌedaꞌ lueꞌ nneuꞌ da li.
Gunná che nacuꞌ lueꞌ Cristo,
Zriꞌine Dios.
64 Jesús guzre̱ꞌ le̱ꞌ:
―Nácaquezaꞌ ca dxennáuꞌ lueꞌ.
Cáꞌanqueze dxapaꞌ leꞌe,
waléꞌele nedaꞌ,
Benneꞌ Gulje̱ꞌ Bénneache,
cueꞌa chaláꞌa xabe̱la chee̱ Dios nen xel-laꞌ szren chee̱ꞌ,
naꞌ xeláꞌa lu beuj bza chee̱ xabáa.
65 Nadxa bxruze blau gucheze̱ꞌ zra lane̱ꞌ chee̱ bléꞌene̱ꞌ quebe nabague̱ꞌ zria,
naꞌ gunné̱ꞌ:
―Benneꞌ nigá dxenné̱ꞌ schanniꞌ chee̱ Dios.
¿Nachínnedxadxu benneꞌ xeche̱be̱ꞌ?
Ba bénquezle leꞌe ca dizraꞌ schanniꞌ dxenné̱ꞌ.
66 ¿Bi dxennale leꞌe?
Benneꞌ caꞌ gulenné̱ꞌ:
―Nabague̱ꞌ zria,
ne dxal-laꞌ gatie̱ꞌ.
67 Nadxa buluzré̱ꞌe̱ zrene̱ꞌ lau Jesús,
ne belúꞌe̱ Le̱ꞌ,
naꞌ xebal-le̱ꞌ belegape̱ꞌ dxuꞌa lawe̱ꞌ.
68 Naꞌ gulé̱ꞌe̱ Le̱ꞌ:
―¿Nácaquezuꞌ Lueꞌ Cristo?
Gunné̱ xaꞌa nu be̱ Lueꞌ.
Dxenná Pedro quebe núnbeꞌe̱ Jesús
69 Dxácate̱ naꞌ dxeꞌ Pedro chaléꞌajla,
naꞌ tu nuꞌula we̱n zrin bzrine̱ꞌ lau Pedro ne guzre̱ꞌ le̱ꞌ:
―Cáꞌanqueze lueꞌ nacuꞌ Jesús,
benneꞌ Galilea naꞌ,
tuze.
70 Pedro be̱n chúchue̱ꞌ xrtizre̱ꞌ láwela xúgute̱ benneꞌ caꞌ,
gunné̱ꞌ:
―Quebe nezdaꞌ nu chee̱ naꞌ dxenníuꞌ.
71 Nadxa Pedro zexíaje̱ꞌ chee̱ xedxúaje̱ꞌ chaleꞌaj naꞌ,
naꞌ bleꞌe xetú nuꞌula caꞌ le̱ꞌ,
ne guzre̱ꞌ benneꞌ caꞌ zaj zre̱ꞌe̱ naꞌ:
―Cáꞌanqueze benneꞌ nigá dxedále̱ne̱ꞌ Jesús,
benneꞌ Nazaret naꞌ.
72 Xecha lasa be̱n chúchue̱ꞌ Pedro xrtizre̱ꞌ,
naꞌ bzétaje̱ꞌ Dios,
gunné̱ꞌ:
―Quebe núnbeꞌa benneꞌ naꞌ.
73 Xetú chíꞌidauꞌ guca belezrín benneꞌ zaj zre̱ꞌe̱ naꞌ lau Pedro,
naꞌ gulé̱ꞌe̱ le̱ꞌ:
―Da li,
tuze nácaquezuꞌ nen bénneaꞌ laweꞌ da xel-laꞌ dxenné̱ chiuꞌ dxunna bea na lueꞌ.
74 Nadxa guzú lau Pedro dxuzría xiꞌ cuínazqueze̱ꞌ,
ne dxuzétaje̱ꞌ Dios,
dxenné̱ꞌ:
―Quebe núnbeaquezaꞌ benneꞌ naꞌ.