Jesús dxibe̱ꞌ niꞌa benneꞌ caꞌ dxusé̱dene̱ꞌ
13
Naca na zra nedxu gate za chuꞌu Laní Pascua chee̱ judío caꞌ.
Jesús ba nézene̱ꞌ ba bzrin zra xezé̱ꞌe̱ lu xe̱zr la xu nigá chee̱ xexíaje̱ꞌ naga zua Xre̱ꞌ.
Nazríꞌiquezne̱ꞌ benneꞌ zaj naca chee̱ꞌ,
benneꞌ zaj zre̱ꞌe̱ xe̱zr la xu,
naꞌ naꞌa ba zua guléꞌene̱ꞌ benneꞌ caꞌ tu da zrendxa da guléꞌe na nazríꞌine̱ꞌ le̱ꞌ.
Jesús lava los pies de los discipulos (Juan 13.1-17)
2-4 Da xriwe̱ꞌ ba nagúꞌu na xichaj lázxdau Judas Iscariote,
zriꞌine Simón,
ca dxal-laꞌ gune̱ꞌ chee̱ gudée̱ꞌ Jesús lu naꞌ benneꞌ guledábague̱ꞌ Le̱ꞌ.
Nézqueze Jesús ze̱ꞌe̱ naga zua Dios,
ne dxal-laꞌ xezrine̱ꞌ naga zua Dios,
naꞌ Xre̱ꞌ ba bnézruje̱ꞌ Le̱ꞌ dute̱ xel-laꞌ dxenná bea.
Chee̱ le̱ naꞌ,
gate dxelawe̱ꞌ xrcheꞌ,
guxasa Jesús,
naꞌ gudúe̱ꞌ ladxeꞌ naxrúa cuzre̱ꞌ,
ne bnase̱ꞌ tu ladxeꞌ dxuꞌa le̱ꞌe̱.
5 Nadxa gudé̱ꞌe̱ nisa tu zriga xia zren,
ne guzú lawe̱ꞌ dxibe̱ꞌ niꞌa benneꞌ caꞌ dxusé̱dene̱ꞌ,
naꞌ bsebizre̱ꞌ niꞌe̱ nen ladxeꞌ naꞌ da nunase̱ꞌ dxuꞌa le̱ꞌe̱.
6 Ca bzrine̱ꞌ chee̱ quibe̱ꞌ niꞌa Simón Pedro,
le̱ꞌ guzre̱ꞌ Jesús:
―Xran,
¿Lueꞌ quíbequezuꞌ niꞌa?
7 Jesús beche̱be̱ꞌ:
―Naꞌa quebe dxéajniꞌinuꞌ da dxunaꞌ.
Te naꞌa chéajniꞌinuꞌ na.
8 Pedro guzre̱ꞌ Le̱ꞌ:
―Cabataꞌ quibuꞌ niꞌa.
Jesús guzre̱ꞌ le̱ꞌ:
―Che quebe quibaꞌ niꞌu,
quebe gaca gacuꞌ nedaꞌ tuze.
9 Naꞌ Simón Pedro guzre̱ꞌ Jesús:
―Xran,
quegá tuze niꞌa quibuꞌ.
Cáꞌanqueze naꞌa,
ne xíchajaꞌ.
10 Jesús guzre̱ꞌ le̱ꞌ:
―Benneꞌ ba bexuzrte̱ guzje̱ꞌ,
tuze niꞌe̱ dxal-laꞌ chadxe laweꞌ da ba naxádxequeze̱ꞌ.
Leꞌe ba naxádxele,
san quegá xúgute̱le.
11 Gunná Jesús:
“Quegá xúgute̱le”,
laweꞌ da nézene̱ꞌ nu naꞌ gudée̱ꞌ Le̱ꞌ lu naꞌ benneꞌ dxeledábague̱ꞌ Le̱ꞌ.
12 Ca gudé gudibe Jesús niꞌa benneꞌ caꞌ,
naꞌ bexrúe̱ꞌ ladxeꞌ chee̱ꞌ cuzreꞌ,
ne bebeꞌe̱ ga dxelawe̱ꞌ,
naꞌ guzre̱ꞌ benneꞌ caꞌ:
―¿Dxéajniꞌile leꞌe da ba be̱naꞌ?
13 Leꞌe dxe̱le nedaꞌ:
Benneꞌ Wese̱de,
ne:
Xran,
naꞌ caní dxal-laꞌ nnale laweꞌ da caní nacaꞌ.
14 Che nedaꞌ,
Benneꞌ Weséde chee̱le,
ne Xránale,
ba gudibaꞌ níꞌale,
cáꞌanqueze leꞌe dxal-laꞌ quíbele niꞌa ljwézrele tule xetule.
15 Nedaꞌ ba bleꞌedaꞌ leꞌe tu da dxuléꞌe na,
chee̱ gunle leꞌe ca da be̱naꞌ nedaꞌ.
16 Da li dxapaꞌ leꞌe,
tu benneꞌ we̱n zrin quebe nácadxe̱ꞌ szren ca xrane̱ꞌ,
naꞌ tu benneꞌ gubáz quebe nácadxe̱ꞌ szren ca benneꞌ nasel-le̱ꞌ le̱ꞌ.
17 Che dxéajniꞌile da caní,
ne dxunle ca zaj naca na,
gaca chee̱le tu da ba neza.
18 ’Quebe dxuchálajaꞌ chee̱ xúgute̱le leꞌe.
Nedaꞌ núnbeꞌa benneꞌ caꞌ gucáꞌa,
san dxal-laꞌ gaca ca naxúaj na lu xiche chee̱ Dios,
dxenná na:
Benneꞌ dxágule̱ nedaꞌ ba gudábague̱ꞌ nedaꞌ chee̱ gudée̱ꞌ nedaꞌ.
Jesús predice la traición (Juan 13.18-38)
19 Dxapaꞌ leꞌe da nigá naꞌa,
nédxula gate quebe ne gaca na,
chee̱ gate gaca na,
naꞌ chéajle̱le leꞌe zúaquezaꞌ nedaꞌ.
20 Da li dxapaꞌ leꞌe:
Benneꞌ dxezíꞌ lu ne̱ꞌe̱ Bénneaꞌ dxusel-le̱ꞌ nedaꞌ,
nedaꞌ naꞌ dxezíꞌ lu ne̱ꞌe̱,
naꞌ benneꞌ dxezíꞌ lu ne̱ꞌe̱ nedaꞌ,
dxezíꞌ lu ne̱ꞌe̱ Xraꞌ nasel-le̱ꞌ nedaꞌ.
Dxenná Jesús gudé Judas Le̱ꞌ lu naꞌ benneꞌ dxeledábague̱ꞌ Le̱ꞌ
21 Ca gudé gunná Jesús da nigá,
naꞌ guzúe̱ꞌ ste̱be lu xichaj lázrdawe̱ꞌ,
naꞌ bzéajniꞌine̱ꞌ benneꞌ caꞌ,
gunné̱ꞌ:
―Da li dxapaꞌ leꞌe,
tu benneꞌ ládujla leꞌe gudée̱ꞌ nedaꞌ lu naꞌ benneꞌ caꞌ dxeledábague̱ꞌ nedaꞌ.
22 Nadxa benneꞌ caꞌ dxuse̱de Jesús gulezú lawe̱ꞌ dxelennáꞌ ljwezre̱ꞌ,
ne quebe zaj nézene̱ꞌ nu chee̱ naꞌ dxuchalaj Jesús.
23 Tu benneꞌ caꞌ dxuse̱de Jesús,
bénneaꞌ nazríꞌile̱ꞌe̱ Jesús le̱ꞌ,
zue̱ꞌ cuita Jesús naga dxelawe̱ꞌ xrcheꞌ,
24 naꞌ Simón Pedro be̱ne̱ꞌ tu da dxunna bea lau bénneaꞌ chee̱ guche̱be̱ꞌ Jesús nu chee̱ naꞌ dxenné̱ꞌ caní.
25 Nadxa bénneaꞌ de̱ꞌe̱ cuita Jesús bche̱be̱ꞌ Le̱ꞌ:
―Xran,
¿nuzra naꞌ?
26 Beche̱be Jesús:
―Gusebisaꞌ lateꞌ xeta xtila,
naꞌ bénneaꞌ gunézrujaꞌ na,
benneꞌ náꞌqueze̱ꞌ.
Nadxa Jesús bsebise̱ꞌ lateꞌ xeta xtila,
naꞌ bnézruje̱ꞌ na chee̱ Judas Iscariote,
zriꞌine Simón.
27 Ca gucáꞌa Judas xeta xtila naꞌ,
naꞌ da xriwe̱ꞌ guxúꞌute̱ na lu xichaj lázrdawe̱ꞌ.
Nadxa Jesús guzre̱ꞌ le̱ꞌ:
―Da dxal-laꞌ gunuꞌ,
bé̱ntega na.
28 Benneꞌ caꞌ zaj zre̱ꞌe̱ dxelawe̱ꞌ naꞌ quebe guléajniꞌine̱ꞌ bizr chee̱ naꞌ guzre̱ꞌ Judas naꞌ caní.
29 Laweꞌ da nua Judas bzudeꞌ dumí,
bal-le̱ꞌ guléquene̱ꞌ Jesús guzre̱ꞌ le̱ꞌ bi siꞌe̱ chee̱ laní naꞌ,
u bi gunézruje̱ꞌ benneꞌ xacheꞌ caꞌ.
30 Ca gudé gudagu Judas xeta xtila naꞌ,
naꞌ bdxúaje̱ꞌ.
Ba guxrinne.
Da nadxixruj bea cube
31 Ca gudé bdxuaj Judas,
gunná Jesús:
―Naꞌa guléꞌe lau xel-laꞌ szren chiaꞌ nedaꞌ,
Benneꞌ Gulje̱ꞌ Bénneache,
naꞌ xegáꞌana szren Dios ne̱ chiaꞌ nedaꞌ.
32 Che nedaꞌ,
Benneꞌ Gulje̱ꞌ Bénneache,
dxuléꞌedaꞌ ca naca xel-laꞌ szren chee̱ Dios,
naꞌ Dios guléꞌene̱ꞌ ca naca xel-laꞌ szren chiaꞌ nedaꞌ,
ne la gúnte̱queze̱ꞌ na.
33 Leꞌe,
bidu chiaꞌ caꞌ,
québedxa suaꞌ schaꞌ nen leꞌe.
Leꞌe wexílajle nedaꞌ,
san ca guchaꞌ benneꞌ judío caꞌ,
dxapaꞌ leꞌe naꞌa,
quebe gaca saꞌle leꞌe naga chaꞌa nedaꞌ.
34 Tu da cube dxixruj beꞌedaꞌ leꞌe.
Le zriꞌi le saꞌ ljwézrele tule xetule ca nedaꞌ nazríꞌidaꞌ leꞌe.
Caní dxal-laꞌ zriꞌi ljwézrele tule xetule.
35 Che nazríꞌi ljwézrele tule xetule,
naꞌ xúgute̱ bénneache xeleque béꞌene̱ꞌ nácale nedaꞌ tuze.
Jesús dxenné̱ꞌ nna Pedro quebe núnbeꞌe̱ Le̱ꞌ
36 Simón Pedro bche̱be̱ꞌ Jesús:
―Xran,
¿gazra chéajuꞌ?
Beche̱be Jesús:
―Naga chaꞌa nedaꞌ,
quebe gaca sáꞌle̱nuꞌ nedaꞌ naꞌa.
Te naꞌa wadéquezuꞌ naga teaꞌ nedaꞌ.
37 Nadxa gunná Pedro:
―Xran,
¿bizr chee̱ naꞌ quebe gaca sáꞌle̱naꞌ Lueꞌ naꞌa?
Zúaquezaꞌ guzúaꞌ xel-laꞌ nabán chiaꞌ chee̱ gunaꞌ Lueꞌ tuze.
38 Jesús beche̱be̱ꞌ:
―¿Zúaquezuꞌ guzúꞌ xel-laꞌ nabán chiuꞌ chee̱ gacuꞌ nedaꞌ tuze?
Da li dxapaꞌ lueꞌ,
nédxudxa ca cuezre xjeaj,
lueꞌ wannáquezuꞌ chunna lasa quebe núnbeꞌu nedaꞌ.