Jesús naque̱ꞌ neza da dxezrín na naga zua Xradxu Dios
14
Gunná Jesús:
―Quebe cuele leꞌe gunne xue.
Le guxrén lazreꞌ Dios,
ne le guxrén lazreꞌ nedaꞌ.
2 Lizre Xraꞌ dé̱le̱ꞌe̱ lataj naga súale.
Chela quebe naca na caní,
nedaꞌ ba guchaꞌ leꞌe.
Wexáꞌa cheajxecuezaꞌ lataj chee̱le.
El único camino a Dios (Juan 14.1-14)
3 Ca te xexáꞌa cheajxecuezaꞌ lataj chee̱le,
naꞌ wexelájquezaꞌ xetú chee̱ xedajxezriꞌa leꞌe súale̱le nedaꞌ,
chee̱ súale leꞌe naga súaquezaꞌ nedaꞌ.
4 Leꞌe nézele naga chaꞌa,
ne núnbeale neza naꞌ.
5 Tomás guzre̱ꞌ Jesús:
―Xran,
quebe nézentuꞌ ga chéajuꞌ.
¿Ájazra guntuꞌ gúnbeantuꞌ neza naꞌ?
6 Jesús beche̱be̱ꞌ:
―Nedaꞌ nacaꞌ neza naꞌ,
ne nacaꞌ da li,
ne nacaꞌ xel-laꞌ nabán.
Tuze ne̱ chiaꞌ nedaꞌ waca zrinle naga zua Xraꞌ.
7 Chela núnbeale nedaꞌ,
cáꞌanqueze núnbeale Xraꞌ.
Náꞌate̱la núnbeale Le̱ꞌ laweꞌ da ba dxeléꞌele Le̱ꞌ.
8 Nadxa Felipe guzre̱ꞌ Jesús:
―Xran,
bleꞌe netuꞌ Xrauꞌ,
xetú da náꞌte̱ze.
9 Beche̱be Jesús:
―Felipe,
schaꞌ ba guzúale̱naꞌ leꞌe,
naꞌ ¿quebe ne gúnbeꞌu nedaꞌ?
Benneꞌ dxeléꞌene̱ꞌ nedaꞌ,
dxeléꞌequezene̱ꞌ Xraꞌ.
Chee̱ le̱ naꞌ,
¿bizr chee̱ naꞌ dxenabuꞌ nedaꞌ guléꞌedaꞌ leꞌe Xraꞌ?
10 ¿Quebe dxéajle̱ꞌu zúale̱naꞌ Xraꞌ,
naꞌ Xraꞌ zúale̱ne̱ꞌ nedaꞌ?
Da dxapaꞌ leꞌe,
quegá dxennéaꞌ na cheé̱zquezaꞌ.
Xraꞌ,
Bénneaꞌ zúale̱ne̱ꞌ nedaꞌ,
Lé̱queze̱ꞌ naꞌ dxune̱ꞌ zrin chee̱ꞌ lu naꞌa nedaꞌ.
11 Le chéajle̱le zúale̱naꞌ Xraꞌ,
naꞌ Xraꞌ zúale̱ne̱ꞌ nedaꞌ,
u che cabí dxéajle̱le ca da dxennéaꞌ,
le chéajle̱ chiaꞌ ne̱ chee̱ da caꞌ dxunaꞌ.
12 Da li dxapaꞌ leꞌe,
benneꞌ dxéajle̱ꞌe̱ chiaꞌ,
gúnqueze̱ꞌ ca da dxunaꞌ nedaꞌ,
naꞌ gune̱ꞌ da zaj nácadxa zren ca da caní dxunaꞌ laweꞌ da xexáꞌa nedaꞌ naga zua Xraꞌ.
13 Xúgute̱ da nábale leꞌe lu Laꞌ nedaꞌ,
nedaꞌ gunaꞌ na,
chee̱ guléꞌedaꞌ nedaꞌ xel-laꞌ szren chee̱ Xraꞌ.
14 Nédaꞌquezaꞌ gunaꞌ bítete̱ze da nábale lu Laꞌ nedaꞌ.
Jesús dxeche̱be lazre̱ꞌ sel-le̱ꞌ Beꞌ Láꞌazxa
15 Gunná Jesús:
―Che leꞌe nazríꞌile nedaꞌ,
le guzúa dizraꞌ ca naca da dxixruj beꞌedaꞌ leꞌe.
Jesús habla del Espíritu Santo (Juan 14.15-31)
16 Nedaꞌ gataꞌ xuedaꞌ Xraꞌ sel-le̱ꞌ chee̱le xetú Benneꞌ gácale̱queze̱ꞌ leꞌe,
ne súale̱tecaze̱ꞌ leꞌe.
17 Benneꞌ nigá naque̱ꞌ Beꞌ Láꞌazxa guléꞌene̱ꞌ leꞌe ca naca da li.
Benneꞌ zaj naca chee̱ xe̱zr la xu nigá quebe xelezéquene̱ꞌ xelezíꞌ lu ne̱ꞌe̱ Le̱ꞌ laweꞌ da quebe gaca xeleléꞌene̱ꞌ Le̱ꞌ,
ne quebe zaj núnbeꞌe̱ Le̱ꞌ.
Leꞌe núnbeale Le̱ꞌ laweꞌ da zúale̱ne̱ꞌ leꞌe,
ne súaqueze̱ꞌ lu xichaj lázrdaule.
18 Quebe gucáꞌanaꞌ leꞌe ca bi we̱ze̱be caꞌ.
Weláꞌquezaꞌ súale̱naꞌ leꞌe.
19 Xetú chíꞌidauꞌ bénneache caꞌ québedxa xeleléꞌene̱ꞌ nedaꞌ,
san leꞌe weléꞌele nedaꞌ.
Leꞌe tu gaca bánzquezle laweꞌ da tu naca bánzquezaꞌ nedaꞌ.
20 Lu zra naꞌ guéquebeꞌele nedaꞌ zúale̱naꞌ Xraꞌ,
naꞌ leꞌe zúale̱le nedaꞌ,
naꞌ nedaꞌ zúale̱naꞌ leꞌe.
21 Benneꞌ nézene̱ꞌ ca naca da nadxixruj bea na nunaꞌ nedaꞌ,
ne dxune̱ꞌ na,
dxuléꞌene̱ꞌ nazríꞌiqueze̱ꞌ nedaꞌ.
Xraꞌ zríꞌine̱ꞌ benneꞌ nazríꞌine̱ꞌ nedaꞌ,
naꞌ cáꞌanqueze nedaꞌ zriꞌidaꞌ bénneaꞌ,
ne guléꞌe lawaꞌ le̱ꞌ.
22 Judas,
quegá bénneaꞌ le̱ꞌ Iscariote,
guzre̱ꞌ Jesús:
―Xran,
¿bizr chee̱ naꞌ guléꞌe lauꞌ netuꞌ,
ne quegá guléꞌe lauꞌ lau bénneache zaj zre̱ꞌe̱ xe̱zr la xu nigá?
23 Jesús beche̱be̱ꞌ:
―Benneꞌ nazríꞌine̱ꞌ nedaꞌ dxune̱ꞌ ca naca da dxennéaꞌ,
naꞌ Xraꞌ zríꞌine̱ꞌ bénneaꞌ,
naꞌ nedaꞌ ne Xraꞌ xedajsúale̱ntuꞌ le̱ꞌ.
24 Benneꞌ quebe nazríꞌine̱ꞌ nedaꞌ quebe dxune̱ꞌ ca da dxennéaꞌ.
Ca naca dizraꞌ da dxénele quebe zaj naca na cheé̱zquezaꞌ.
Zaj naca na chee̱ Xraꞌ nasel-le̱ꞌ nedaꞌ.
25 ’Dxapaꞌ leꞌe xúgute̱ da caní dxácate̱ ne zúale̱naꞌ leꞌe,
26 naꞌ Beꞌ Láꞌazxa,
Bénneaꞌ sel-la Xraꞌ lu Laꞌ nedaꞌ chee̱ gácale̱ne̱ꞌ leꞌe,
Le̱ꞌ guléꞌene̱ꞌ leꞌe xúgute̱,
ne gusáꞌqueze̱ꞌ lázrele ca naca xúgute̱ da ba guchaꞌ leꞌe.
27 ’Xel-laꞌ dxebeza zri lazreꞌ dxucaꞌanaꞌ chee̱le.
Dxunnaꞌ leꞌe xel-laꞌ dxebeza zri lazreꞌ chiaꞌ.
Quebe dxunnaꞌ na ca dxelunna bénneache xel-laꞌ dxebeza zri lazreꞌ.
Quebe cuele gunne xue,
ne quebe zrébele.
28 Ba bénele gunnéaꞌ wexáꞌa,
ne weláꞌa súale̱naꞌ leꞌe xetú.
Chela da li nazríꞌile nedaꞌ,
suale xel-laꞌ dxebé,
laweꞌ da xexáꞌa naga zua Xraꞌ,
naꞌ nácadxa Le̱ꞌ szren ca nedaꞌ.
29 Da nigá dxapaꞌ leꞌe naꞌa nédxula gate quebe ne gaca na,
chee̱ gate gaca na,
naꞌ chéajle̱le chee̱ da dxennéaꞌ.