DIZRAꞌ CHAWEꞌ CA NACA CHEE̱ JESUCRISTO SDA BZUAJ SAN LUCAS
Dizraꞌ dxuchalaj San Lucas, dxe̱ꞌe̱ Teófilo
1
Benneꞌ zan ba belune̱ꞌ ca da gulezéquene̱ꞌ buluzúaje̱ꞌ cáte̱ze naca da guca ládujla dxiꞌu,
2 cáte̱ze naꞌ gulé̱ benneꞌ caꞌ,
benneꞌ beleléꞌene̱ꞌ nédxudaute̱ ca naca da guca na,
naꞌ buluchálaje̱ꞌ dizraꞌ chaweꞌ naꞌ.
3 Cáꞌanqueze nedaꞌ ba bchiꞌa xánniaꞌ xúgute̱ da caꞌ gulaca na nédxudaute̱,
naꞌ dxéquedaꞌ chaweꞌ guzúajaꞌ da nigá chiuꞌ cáte̱ze guca,
bi nazríꞌite̱ lazraꞌ,
lueꞌ,
Teófilo.
4 Dxunaꞌ caní chee̱ nézenuꞌ naca na da li ca da ba bululéꞌene̱ꞌ lueꞌ.
El Comienzo
Gubáz chee̱ xabáa dxuzenne̱ꞌ ca galaj Juan, benneꞌ guchúe̱ꞌ bénneache nisa
5 Gate naꞌ naca Herodes wenná bea chee̱ xe̱zre caꞌ zaj nababa Judea,
naꞌ zua tu bxruze le̱ꞌ Zacarías,
benneꞌ nababe̱ꞌ cueꞌ bxruze caꞌ gunná beꞌe Abías ca niꞌte.
Zruꞌula Zacarías naꞌ le̱ꞌ Elisabet,
naꞌ nácaqueze Zacarías naꞌ zre sua benneꞌ caꞌ gulebábale̱ bxruze Aarón.
6 Zacarías ne zruꞌule̱ꞌ Elisabet gulaque̱ꞌ xrlátaje lau Dios,
ne dxelune̱ꞌ ca zaj naca da bdxixruj bea Xránadxu,
ne ca da naxúaj na lu da gunné̱ꞌ.
Caꞌan guca,
quebe nu guzeque gagu zria le̱ꞌ lau Dios.
7 Quebe nu zríꞌine̱ꞌ chiláꞌ,
laweꞌ da naca Elisabet naꞌ nuꞌula wizre,
naꞌ dxúpate̱ꞌ zaj bezúale̱ꞌe̱ gula.
8 Tu zra,
gate belexala bxruze caꞌ naga nababa Zacarías xelune̱ꞌ zrin lu xel-la bxruze chee̱ꞌ lau Dios,
9 cáte̱ze naca da dxelún bxruze caꞌ,
naꞌ bexala Zacarías chuꞌe̱ lu lataj láꞌazxa chee̱ Xránadxu lu xudauꞌ chee̱ guzezxe̱ꞌ xala.
10 Dxácate̱ naꞌ dxezxe xala naꞌ,
ca naca benneꞌ caꞌ zaj zraꞌ chaléꞌajla dxuluchálajle̱ne̱ꞌ Dios.
11 Nadxa bleꞌe lau tu gubáz chee̱ xabáa chee̱ Xránadxu,
ze̱ꞌ chaláꞌa xabe̱la chee̱ cugu naga zría xala dxezxe na.
12 Ca bleꞌe Zacarías gubáz chee̱ xabáa naꞌ,
guzúe̱ꞌ ste̱be,
ne bzrébele̱ꞌe̱.
13 Gubáz chee̱ xabáa naꞌ guzre̱ꞌ le̱ꞌ:
―Zacarías,
quebe zrebuꞌ,
laweꞌ da ba ben Dios dizraꞌ da dxuchálajle̱nuꞌ Le̱ꞌ,
naꞌ nuꞌula chiuꞌ,
Elisabet,
walaj tu zriꞌine̱ꞌ,
bi naꞌ guzúꞌ labeꞌ Juan.
14 Wabéle̱ꞌe̱nuꞌ,
ne gaca chiuꞌ tu da ba neza zrente̱,
naꞌ benneꞌ zan xelebene̱ꞌ laweꞌ da ba gulaj bidu naꞌ.
15 Caꞌan gaca laweꞌ da gaca zriꞌinuꞌ szrente̱ lau Dios.
Quebe xíꞌajbeꞌ xrise uva wal-la,
u da dxusuzre na bénneache,
naꞌ gate gálajte̱beꞌ tu súale̱zqueze Beꞌ Láꞌazxa nen le̱beꞌ.
16 Ne̱ chee̱ le̱beꞌ benneꞌ zan xelexaque̱ꞌ bi chee̱ Xránadxu Dios.
17 Juan nigá quia laubeꞌ lau Xránadxu,
naꞌ Beꞌ naꞌ,
ne xel-la waca da gulezúale̱ na Elías,
bénneaꞌ bchálaje̱ꞌ waláz chee̱ Dios gate nate,
xelezúale̱ na le̱beꞌ,
chee̱ guzúabeꞌ tuze benneꞌ caꞌ zaj naque̱ꞌ xra xrna nen zríꞌine̱ꞌ,
ne chee̱ guléꞌebeꞌ benneꞌ dxeledábague̱ꞌ Dios chee̱ xelune̱ꞌ ca dxenná xrtizraꞌ Dios.
Caꞌan gaca,
gucáꞌana cháwebeꞌ bénneache chee̱ xelezíꞌ lu ne̱ꞌe̱ Xránadxu.
18 Zacarías naꞌ bche̱be̱ꞌ gubáz chee̱ xabáa:
―¿Ájazra gaca nezdaꞌ gaca caní?
Nedaꞌ ba nagúlale̱ꞌa,
ne cáꞌanqueze naca nuꞌula chiaꞌ.
19 Naꞌ beche̱be gubáz chee̱ xabáa naꞌ:
―Nedaꞌ nacaꞌ Gabriel,
ne nacaꞌ we̱n zrin chee̱ Dios.
Le̱ꞌ gusel-le̱ꞌ nedaꞌ chee̱ guchálajle̱naꞌ lueꞌ,
ne guzendaꞌ lueꞌ dizraꞌ chaweꞌ nigá.
20 Naꞌa,
laweꞌ da quebe guxéajle̱ꞌu da guchaꞌ lueꞌ,
xegáꞌanuꞌ quebe gaca nníuꞌ cadxa galaj zriꞌinuꞌ.
Caní gaca na ca zrinte̱ zra chee̱ na.
21 Dxácate̱ naꞌ zaj zraꞌ benneꞌ caꞌ chaléꞌajla,
dxelebeze̱ꞌ Zacarías,
ne dxelexebánene̱ꞌ laweꞌ da dxezréle̱ꞌe̱ne̱ꞌ,
quebe dxedxúaje̱ꞌ lu lataj láꞌazxa.
22 Gate bedxúaj Zacarías,
québedxa dxaca nnie̱ꞌ.
Nadxa guleque béꞌene̱ꞌ ba bleꞌe Zacarías tu da bleꞌe Dios le̱ꞌ lu lataj láꞌazxa naꞌ.
Naꞌ le̱ꞌ bta náꞌase̱ꞌ,
laweꞌ da quebe dxaca nnie̱ꞌ.
23 Ca xeajsé̱ chee̱ zra caꞌ dxal-laꞌ gun Zacarías zrin chee̱ xudauꞌ,
naꞌ bezé̱ꞌe̱ zexíaje̱ꞌ lizre̱ꞌ.
24 Ca gudé naꞌ zruꞌule̱ꞌ Elisabet ba zue̱ꞌ ziꞌi,
naꞌ quebe bdxúaje̱ꞌ lataj bchinaꞌ chie̱ꞌ ca gazxuꞌ beuꞌ,
naꞌ dxenné̱ꞌ lu lázrdawe̱ꞌ:
25 “Xranaꞌ Dios ba be̱ne̱ꞌ chiaꞌ da nigá chee̱ québedxa xuluzúa bénneache nedaꞌ chaláꞌala.”
Gubáz chee̱ xabáa dxuzenne̱ꞌ ca galaj Jesús
26 Ca gudé xrupa beuꞌ gate naꞌ bchálajle̱ gubáz chee̱ xabáa naꞌ Zacarías,
naꞌ Dios gusel-le̱ꞌ le̱ꞌ tu xe̱zre nababa Galilea nazí le na Nazaret,
Un ángel anuncia el nacimiento de Jesús (Lucas 1.26-38)
27 chee̱ cheajchálajle̱ne̱ꞌ tu nuꞌula cuídeꞌdauꞌ le̱beꞌ María.
Le̱beꞌ ba zua guchaga naꞌbeꞌ benneꞌ biu naꞌ le̱ꞌ José,
benneꞌ naque̱ꞌ zriꞌine zre sua wenná bea David.
28 Gubáz chee̱ xabáa naꞌ guxúꞌe̱ naga zua María naꞌ,
naꞌ guzre̱ꞌ-beꞌ:
―Padiuzre.
Dios dxune̱ꞌ lueꞌ tu culuén.
Xránadxu zúale̱ne̱ꞌ lueꞌ.
Dios ba be̱ne̱ꞌ tu da cháwedxa chiuꞌ quézcala chee̱ xúgute̱ nuꞌula caꞌ.
29 Gate María naꞌ bleꞌebeꞌ gubáz chee̱ xabáa naꞌ,
bebánebeꞌ ca naca dizraꞌ naꞌ,
naꞌ gunabeꞌ lu lázrdaubeꞌ:
¿Bizr chee̱ naꞌ dxugape̱ꞌ nedaꞌ diuzre caní?
30 Nadxa gunná gubáz chee̱ xabáa naꞌ:
―María,
quebe zrebuꞌ laweꞌ da ba bzruéꞌenuꞌ tu culuén da dxun Dios chiuꞌ lueꞌ.
31 Naꞌa,
zua da gunna Dios chiuꞌ,
naꞌ galaj tu bidu biu chiuꞌ,
naꞌ guzúꞌ labeꞌ Jesús.
32 Le̱beꞌ gácabeꞌ szren,
naꞌ xelennáqueze̱ꞌ naque̱ꞌ Zriꞌine Dios szrente̱,
naꞌ Xránadxu Dios gune̱ꞌ Le̱ꞌ wenná bea ca guca xra xrtawe̱ꞌ David,
33 chee̱ nna béꞌetecaze̱ꞌ xe̱zr la xu Israel,
naꞌ xel-la dxenná bea chee̱ꞌ quebe cheajsé̱queze chee̱ na.
34 Nadxa María bché̱bebeꞌ gubáz chee̱ xabáa:
―¿Ájazra gaca da nigá,
laweꞌ da quebe nu benneꞌ biu zúale̱naꞌ?
35 Gubáz chee̱ xabáa naꞌ gunné̱ꞌ:
―Beꞌ Láꞌazxa chee̱ Dios sue̱ꞌ xichaj lázrdaꞌu,
naꞌ xel-la waca chee̱ Dios szrente̱ sua na nen lueꞌ.
Chee̱ le̱ naꞌ bidu naꞌ gálajbeꞌ gácaquezebeꞌ chee̱ Dios,
naꞌ síꞌqueze labeꞌ Zriꞌine Dios.
36 Cáꞌanqueze bila ljwezruꞌ Elisabet wálajqueze bidu chee̱ꞌ lácala ba naque̱ꞌ benneꞌ gula.
Caꞌan naca,
nuꞌula naꞌ gulenné̱ꞌ naque̱ꞌ wizre,
ba zeaj xrupa beuꞌ bnezruj Dios chee̱ꞌ.
37 Quebe bi de̱ da quebe gaca gun Dios.
38 Nadxa gunná María:
―Nedaꞌ nácaquezaꞌ we̱n zrin chee̱ Xránadxu.
Gun Dios chiaꞌ ca da ba gunnáuꞌ.
Naꞌ gubáz chee̱ xabáa naꞌ bezé̱ꞌe̱ naga zua María naꞌ.
María zeajxúebeꞌ Elisabet
39 Ca lu zra naꞌ María guzáꞌabeꞌ zéajbeꞌ tu xé̱zredauꞌ da zua na laduj xiꞌa caꞌ chee̱ ga nababa Judea.
40 Naꞌ guxúꞌubeꞌ lizre Zacarías,
ne bgápabeꞌ diuzre Elisabet.
41 Gate ben Elisabet dizraꞌ da gunné̱ María,
naꞌ bidu naꞌ xúꞌubeꞌ le̱ꞌe Elisabet guxrítebeꞌ,
naꞌ guzúale̱ Beꞌ Láꞌazxa le̱ꞌ.
42 Nadxa gunné̱ꞌ tu chiꞌe̱ zizraj:
―Dios ba be̱ne̱ꞌ tu da cháwedxa chiuꞌ quézcala chee̱ xúgute̱ nuꞌula caꞌ,
laweꞌ da ba zua da be̱nna Dios chiuꞌ.
43 ¿Núzraqueze nacaꞌ nedaꞌ,
za xrna Xranaꞌ ga zuaꞌ nedaꞌ?
44 Cáte̱ze bendaꞌ dizraꞌ da gunnéuꞌ,
naꞌ guxrite bidu chiaꞌ lu le̱ꞌa lu xel-la dxebé chee̱beꞌ.
45 Ba neza naca na chiuꞌ guxéajle̱ꞌu laweꞌ da gaca li ca da gunná Xránadxu.
46 Nadxa gunná María:
Bénneꞌdu xuꞌa dxue láꞌana na Xranaꞌ.
47 Lázrdawaꞌ dxebé na ca dxun Dios,
weselá chiaꞌ.
48 Laweꞌ da gudxéꞌ Dios gunne xue chiaꞌ,
nácaquezaꞌ we̱n zrin chee̱ꞌ.
Naꞌa su lau na,
xúgute̱ benneꞌ xelenné̱ꞌ naziꞌa tu culuen zren chee̱ Dios.
49 Dios Szrente̱ ba be̱ne̱ꞌ tu da zrente̱ chiaꞌ nedaꞌ.
Chee̱ le̱ naꞌ láꞌazxa naca La Le̱ꞌ.
50 Le̱ꞌ xexache lázrqueze̱ꞌ xúgute̱ benneꞌ caꞌ dxelezrebe̱ꞌ Le̱ꞌ.
51 Da zrente̱ ba be̱n Le̱ꞌ.
Bzue̱ꞌ zrila benneꞌ caꞌ dxulucáꞌana szren cuine̱ꞌ.
52 Bebéaje̱ꞌ benneꞌ blau caꞌ lu lataj chee̱ꞌ,
ne bechise̱ꞌ benneꞌ dxexruj lazreꞌ caꞌ.
53 Bnézrujle̱ꞌe̱ da gulagu benneꞌ dxeledún,
naꞌ benneꞌ gunníꞌa caꞌ bcaꞌane̱ꞌ le̱ꞌ cáꞌaze.
54 Gúcale̱ne̱ꞌ benneꞌ Israel,
benneꞌ we̱n zrin chee̱ꞌ caꞌ
laweꞌ da bezrí lázrqueze̱ꞌ le̱ꞌ,
55 ca da guche̱be lazre̱ꞌ chee̱ xra xrtáudxu caꞌ,
chee̱ Abraham,
ne chee̱ benneꞌ xrtie̱ꞌ caꞌ chadía chacanna.
56 María begáꞌanale̱beꞌ Elisabet ca chunna beuꞌ,
naꞌ ca gudé naꞌ bezrinbeꞌ lízrebeꞌ.
Ca gulaj Juan, benneꞌ bchue̱ꞌ bénneache nisa
57 Ca gudé naꞌ guxáꞌ beuꞌ chee̱ Elisabet naꞌ chee̱ galaj bidu chee̱ꞌ,
naꞌ guzane̱ꞌ tu bi biu chee̱ꞌ.
58 Benneꞌ walízr chee̱ꞌ caꞌ,
ne xrtia ljwezre̱ꞌ belezrine̱ꞌ dxelebene̱ꞌ nen le̱ꞌ,
gate belenne̱ꞌ Dios bezrí lázrele̱ꞌe̱ le̱ꞌ.
59 Gate guca xrunuꞌ zra,
belezrine̱ꞌ chee̱ xelechúgue̱ꞌ lu xpé̱labeꞌ da guléꞌe na naca be̱ꞌ bi chee̱ Dios,
naꞌ gulaca lazre̱ꞌ xuluzúe̱ꞌ labeꞌ Zacarías ca le̱ xrabeꞌ.
60 Naꞌ gunná xrnabeꞌ:
―Quebe gaca.
Dxal-laꞌ siꞌ labeꞌ Juan.
61 Naꞌ gulé̱ꞌe̱ le̱ꞌ:
―¿Bizr chee̱ naꞌ?
Quebe nu chiláꞌ xrtia ljwézrele le̱ꞌ caꞌ.
62 Naꞌ buluche̱be̱ꞌ xra bidu naꞌ,
bulutá ne̱ꞌe̱ chee̱ xelenézene̱ꞌ ájazra guzúe̱ꞌ labeꞌ.
63 Naꞌ xrabeꞌ naꞌ gunabe̱ꞌ tu blágadauꞌ,
naꞌ bzuaje̱ꞌ le̱ꞌe̱ na:
Juan siꞌ labeꞌ.
Naꞌ xúgute̱ benneꞌ caꞌ belexebánene̱ꞌ.
64 Caꞌ guca Zacarías benné̱ꞌ,
naꞌ guzú lawe̱ꞌ dxue láꞌane̱ꞌ Dios.
65 Ca beleléꞌene̱ꞌ da nigá,
xúgute̱ benneꞌ walízr chee̱ꞌ belexebánene̱ꞌ,
naꞌ ca naca xe̱zre zaj nnita laduj xiꞌa ca ga nababa Judea,
buluchálaje̱ꞌ ca da guca.
66 Xúgute̱ benneꞌ belenne̱ꞌ na,
gulezú lawe̱ꞌ dxelenné̱ꞌ lu lázrdawe̱ꞌ,
ne buluche̱be ljwezre̱ꞌ tue̱ꞌ xetúe̱ꞌ:
―¿Ájazraqueze gun bi nigá?
Naca bea na Xránadxu zúale̱ne̱ꞌ-beꞌ.
Ca da bil-la Zacarías
67 Naꞌ Beꞌ Láꞌazxa guzúale̱ne̱ꞌ Zacarías,
xra bidu nigá,
naꞌ bchálaje̱ꞌ waláz chee̱ Dios,
gunné̱ꞌ:
68 ¡Gaca ba Xránadxu,
Dios chee̱ xe̱zre Israel!
Ba ble̱ꞌe̱ naga zúadxu,
bénneache chee̱ꞌ,
naꞌ bselé̱ꞌ dxiꞌu.
69 Ba gusel-le̱ꞌ tu benneꞌ wál-lale̱ꞌe̱,
weselá chee̱dxu.
Bénneaꞌ gulaj ládujla xrtia David,
benneꞌ we̱n zrin chee̱ꞌ.
70 Caꞌan guche̱be lazreꞌ Dios lu dxuꞌa benneꞌ caꞌ buluchálaje̱ꞌ waláz chee̱ꞌ nédxudaute̱.
71 Guche̱be lazre̱ꞌ guselé̱ꞌ dxiꞌu lu naꞌ benneꞌ dxelezré̱ꞌe̱ dxiꞌu,
ne lu naꞌ benneꞌ dxelecuídene̱ꞌ dxiꞌu.
72 Xezrí lazre̱ꞌ xra xrtáudxu caꞌ,
ne quebe gal-la lazre̱ꞌ xel-la wezría láꞌazxa chee̱ꞌ.
73 Da nigá naca na da guche̱be lazreꞌ Dios da bzua chache̱ꞌ nen xra xrtáudxu Abraham,
da naca tu da gunne̱ꞌ chee̱dxu dxiꞌu.
74 Guche̱be lazre̱ꞌ guselé̱ꞌ dxiꞌu lu naꞌ benneꞌ dxelezré̱ꞌe̱ dxiꞌu
chee̱ gaca gundxu zrin chee̱ꞌ,
ne quebe zrébedxu,
75 ne gácadxu xrlátaje lau Le̱ꞌ,
ne gácadxu bi cheé̱queze̱ꞌ xúgute̱ zra naca bandxu.
76 Lueꞌ,
zríꞌinaꞌdauꞌ,
síꞌqueze lauꞌ bi guchálajqueze waláz chee̱ Dios szrente̱,
laweꞌ da quia lauꞌ lau Xránadxu,
saljuꞌ neza chee̱ Xránadxu,
77 Guzénenuꞌ bénneache chee̱ꞌ,
Le̱ꞌ gunite lawe̱ꞌ dul-la chee̱ꞌ,
ne guselé̱ꞌ benneꞌ caꞌ.
78 Caꞌan gaca laweꞌ da dxexezrí lazreꞌ Dios dxiꞌu.
Dxune̱ꞌ naꞌa dxalaj tu xiꞌ chee̱ xabáa da dxuseníꞌ chee̱dxu,
79 naꞌ gusení na naga zaj zraꞌ benneꞌ zaj zre̱ꞌe̱ lu naꞌ xel-la gute,
chee̱ cuꞌu na dxiꞌu lu neza xrtante̱ lau Dios.
80 Bidu naꞌ bgúlabeꞌ,
ne bgula bénneꞌdu xuꞌubeꞌ chaweꞌ lu da naca chee̱ Dios.
Guzúaquezbeꞌ le̱ꞌe̱ xixreꞌ laweꞌ lataj cadxa bzrin zra bleꞌe laubeꞌ xe̱zre Israel.