Ca guca gate gulaj Jesús
2
Ca lu zra naꞌ gate dxenná bea Augusto,
benneꞌ xe̱zre Roma,
benneꞌ dxenná beꞌe̱ xúgute̱ cueꞌ xe̱zr la xu,
le̱ꞌ gunná béꞌene̱ꞌ xelúꞌu lu xiche xúgute̱ benneꞌ zaj zre̱ꞌe̱ xe̱zr la xu.
2 Da nigá naca da nédxudauꞌ gulúꞌu bénneache lu xiche.
Guca caní gate naca Cirenio benneꞌ zaj xuꞌu lu ne̱ꞌe̱ xe̱zre caꞌ zaj nababa Siria.
3 Xúgute̱ bénneache dxun na ba xen chjaque̱ꞌ lu xe̱zre naga zaj nababe̱ꞌ chee̱ xeluꞌe̱ lu xiche.
4 Chee̱ le̱ naꞌ José guzé̱ꞌe̱ lu xe̱zre Nazaret,
da nababa Galilea,
chee̱ bzrine̱ꞌ lu xe̱zre Belén,
da nababa Judea,
naga gulaj wenná bea David.
Bzrin José naꞌ laweꞌ da naque̱ꞌ xrtia David naꞌ.
5 José guxíaje̱ꞌ Belén chee̱ chuꞌe̱ lu xiche tu zren nen María.
María nigá ba naché̱bebeꞌ guchaga náꞌale̱beꞌ José,
naꞌ ba bnezruj Dios chee̱beꞌ.
6 Dxácate̱ naꞌ zaj zre̱ꞌe̱ lu xe̱zre Belén,
naꞌ bzrin zra san María bidu chee̱ꞌ.
7 Lu xe̱zre naꞌ gulaj bidu nedxu chee̱ꞌ,
naꞌ bchele̱ꞌ-beꞌ ládxeꞌdu caꞌ,
naꞌ gúxrue̱ꞌ-beꞌ xuꞌu naga dxelún chiꞌe̱ da dxelagu bea caꞌ,
laweꞌ da quebe ga bzrela tu lataj lu xuꞌu naga che̱ꞌe̱.
Dxuluchálajle̱ gubáz chee̱ xabáa benneꞌ caꞌ dxuluxúe̱ꞌ zrilaꞌ caꞌ
8 Gagu cuita xe̱zre Belén zaj zraꞌ benneꞌ caꞌ dxuluxúe̱ꞌ zrilaꞌ caꞌ,
dxelexegáꞌane̱ꞌ le̱ꞌe̱ xixreꞌ chizrela,
dxuluxúe̱ꞌ zrilaꞌ chee̱ꞌ caꞌ.
9 Naga zaj zre̱ꞌe̱ bleꞌe lau tu gubáz chee̱ xabáa chee̱ Xránadxu.
Naꞌ xel-la naxaníꞌ chee̱ Xránadxu Dios bsaní na naga zaj zre̱ꞌe̱.
Caꞌan guca,
belezrébele̱ꞌe̱.
10 Naꞌ gubáz chee̱ xabáa naꞌ guzre̱ꞌ le̱ꞌ:
―Quebe zrébele,
laweꞌ da dxuzenlaꞌ leꞌe tu dizraꞌ chaweꞌ.
Ne̱ chee̱ dizraꞌ nigá xelebéle̱ꞌe̱ xúgute̱ bénneache.
11 Naꞌa,
lu xe̱zre chee̱ David,
ba gulaj tu bidauꞌ gácabeꞌ weselá chee̱le.
Bi nigá naque̱ꞌ Cristo,
Xránadxu.
12 Da nigá gaca na tu da gunna bea na chee̱le.
Cheajxrácale bidu dxeꞌene nigá,
dxélabeꞌ ládxeꞌdu caꞌ,
ne de̱beꞌ tu xuꞌu naga dxelún chiꞌe̱ da xelagu bea caꞌ.
13 Chadí lau,
cuita gubáz chee̱ xabáa naꞌ bululéꞌe lau zandxa gubáz chee̱ xabáa,
dxelúe láꞌane̱ꞌ Dios,
dxelenné̱ꞌ:
14 ¡Gaca ba Dios naꞌala,
naꞌ lu xe̱zr la xu nigá sua xel-la dxebeza zri lazreꞌ chee̱ bénneache,
benneꞌ dxelune̱ꞌ ca da dxaca lazreꞌ Dios!
15 Gate besíꞌaca gubáz chee̱ xabáa caꞌ,
zeajxaque̱ꞌ xabáa,
nadxa benneꞌ caꞌ dxuluxúe̱ꞌ zrilaꞌ gulezú lawe̱ꞌ dxelé̱ꞌ ljwezre̱ꞌ tue̱ꞌ xetúe̱ꞌ:
―Chéajxquedxu lu xe̱zre Belén cheajnnadxu da ba guca,
ca da ba gunná Xránadxu Dios,
guzre̱ꞌ dxiꞌu.
16 Caꞌan guca,
besíꞌaca zé̱zxuje̱ꞌ,
naꞌ xeajlexraque̱ꞌ María ne José,
ne bidu dxeꞌene naꞌ,
de̱beꞌ xuꞌu naga dxelún chiꞌe̱ da xelagu bea caꞌ.
17 Gate beleléꞌene̱ꞌ bidu naꞌ,
naꞌ buluchálajle̱ne̱ꞌ benneꞌ caꞌ ca da gunná gubáz chee̱ xabáa ca da naca chee̱ bidu naꞌ.
18 Naꞌ xúgute̱ benneꞌ caꞌ belenne̱ꞌ da nigá belexebánele̱ꞌe̱ne̱ꞌ ca da gulenná benneꞌ caní.
19 María bcache̱ꞌ da nigá lu xichaj lázrdawe̱ꞌ,
naꞌ blaba lazre̱ꞌ ca naca da nigá.
20 Caꞌan guca besíꞌaca benneꞌ caꞌ dxuluxúe zrilaꞌ,
dxulucáꞌana szrene̱ꞌ Dios,
ne dxelúe láꞌane̱ꞌ Le̱ꞌ ca naca xúgute̱ da belenne̱ꞌ,
ne da beleléꞌene̱ꞌ,
laweꞌ da guca xúgute̱ ca da guzre gubáz chee̱ xabáa naꞌ le̱ꞌ.
Nacimiento de Jesús
Ca guca gate belúꞌe̱ bidu Jesús lu xudauꞌ
21 Ca guca xrunuꞌ zra,
naꞌ gulechugue̱ꞌ tu lu xpe̱la bidu naꞌ ca da nadxixruj bea na chee̱ Dios,
naꞌ belúꞌe̱ La bidu naꞌ Jesús,
cáte̱ze naca da gunná gubáz chee̱ xabáa naꞌ,
guzre̱ꞌ María nédxudxa ca za guꞌe̱ bidu naꞌ.
22 Ca bzrin zra chee̱ xelune̱ꞌ ca bdxixruj bea Moisés chee̱ xelexexaque̱ꞌ chaweꞌ lau Dios,
naꞌ belúꞌe̱ bidu naꞌ lu xe̱zre Jerusalén chee̱ xuluzúe̱ꞌ-beꞌ lu naꞌ Xránadxu Dios.
23 Belune̱ꞌ caní laweꞌ da ba naxúaj lu da nadxixruj bea Xránadxu Dios da dxenná na caní:
Xúgute̱ bi biu,
bi nedxu gálajbeꞌ dxal-laꞌ guzúale-beꞌ chee̱ Xránadxu Dios.
24 Naꞌ xjaque̱ꞌ xeajleguꞌe̱ dxen chee̱ be̱ xíxreꞌdu caꞌ lau Dios ca da dxenná da nadxixruj bea na chee̱ Xránadxu Dios,
da dxenná na:
Chupa bgugu,
che chupa bxínnedauꞌ.
25 Ca lu zra naꞌ zua tu benneꞌ biu gula lu xe̱zre Jerusalén,
le̱ꞌ Simeón.
Naque̱ꞌ tu benneꞌ chaweꞌ,
naꞌ dxue láꞌanaqueze̱ꞌ Dios,
ne dxebeze̱ꞌ benneꞌ sel-la Dios chee̱ guselé̱ꞌ bénneache Israel.
Zúale̱ Beꞌ Láꞌazxa chee̱ Dios Simeón naꞌ.
26 Beꞌ Láꞌazxa ba guzre̱ꞌ Simeón naꞌ quebe gatie̱ꞌ cadxa léꞌene̱ꞌ Cristo,
benneꞌ naꞌ sel-la Xránadxu Dios.
27 Simeón nigá guxíaje̱ꞌ lu xudauꞌ laweꞌ da bsiꞌ Beꞌ Láꞌazxa chee̱ Dios le̱ꞌ.
Naꞌ gate xra xrna bidu Jesús zaj nuꞌe̱-beꞌ lu xudauꞌ chee̱ xelune̱ꞌ chee̱beꞌ ca da bdxixruj beꞌe Moisés,
28 naꞌ Simeón naꞌ guqué̱ꞌe̱ bidu naꞌ.
Bnide̱ꞌ-beꞌ,
ne be̱ láꞌane̱ꞌ Dios,
gunné̱ꞌ:
29 Xranaꞌ,
naꞌa waca gunnuꞌ lataj gatiaꞌ lu xel-la dxebeza zri lazreꞌ
laweꞌ da ba be̱nuꞌ ca da guche̱be lazruꞌ chiaꞌ,
nacaꞌ we̱n zrin chiuꞌ.
30 Nen xiaj láuquezaꞌ ba bleꞌedaꞌ Benneꞌ Weselá,
31 Bénneaꞌ ba bzuꞌ chee̱ gácalene̱ꞌ xúgute̱ bénneache.
32 Le̱ꞌ naque̱ꞌ tu xiꞌ da gusení na chee̱ benneꞌ quebe zaj nababe̱ꞌ Israel.
Ne̱ chee̱ Le̱ꞌ gaca tu da ba neza chee̱ bénneache chiuꞌ,
benneꞌ Israel.
33 José ne xrna Jesús belexebánele̱ꞌe̱ne̱ꞌ ca da gunná Simeón chee̱ bidu Jesús.
34 Nadxa Simeón gunabe̱ꞌ lau Dios gune̱ꞌ chee̱ꞌ da chaweꞌ,
naꞌ guzre̱ꞌ María,
xrna Jesús:
―¡Gunnáꞌxque nigá!
Bidu nigá,
Dios nuzúe̱ꞌ le̱beꞌ chee̱ gunbeꞌ chee̱ benneꞌ Israel caꞌ,
cheajlecházie̱ꞌ benneꞌ zante̱ lu naꞌ da xriwe̱ꞌ,
naꞌ benneꞌ zante̱ xelexexase̱ꞌ lau Dios.
Le̱beꞌ gácabeꞌ tu da dxunna bea chee̱ Dios,
naꞌ benneꞌ zante̱ xuluzúe̱ꞌ le̱beꞌ chaláꞌala.
35 Ne̱ chee̱ le̱beꞌ guléꞌe lau ca da dxeajlesá lazreꞌ tu tue̱ꞌ.
Naꞌ chiuꞌ lueꞌ da nigá gaca na ca tu xia nalá,
da cheajsúa lu lázrdaꞌu.
36 Cáꞌanqueze zua naꞌ tu nuꞌula dxenné̱ꞌ waláz chee̱ Dios,
le̱ꞌ Ana.
Nuꞌula nigá naque̱ꞌ zriꞌine Fanuel,
ne xrtia Aser.
Ba naque̱ꞌ nuꞌula gúlale̱ꞌe̱.
Bchaga ne̱ꞌe̱ gate naꞌ naque̱ꞌ nuꞌula cuídeꞌte̱,
naꞌ guzúale̱ne̱ꞌ benneꞌ chee̱ꞌ gazre iza.
37 Naꞌ begáꞌane̱ꞌ tuze̱ꞌ,
ne ba xuꞌe̱ tapa lalaj tapa iza.
Quebe becuase̱ꞌ xudauꞌ,
naꞌ dxune̱ꞌ zrin chee̱ Xránadxu Dios te zra chizrela.
Dxune̱ꞌ gubasa,
ne dxuchálajle̱ne̱ꞌ Dios.
38 Ana naꞌ bzrínqueze̱ꞌ naꞌ,
naꞌ ca gudé guzre̱ꞌ Dios:
“Xcalenuꞌ”,
naꞌ guzú lawe̱ꞌ dxuchálaje̱ꞌ chee̱ bidu Jesús nen xúgute̱ benneꞌ caꞌ dxelebeze̱ꞌ benneꞌ naꞌ sel-la Dios chee̱ guselé̱ꞌ benneꞌ Jerusalén caꞌ.
Ca guca gate belexezrine̱ꞌ xe̱zre Nazaret
39 Ca belune̱ꞌ xúgute̱ ca da dxenná da nadxixruj bea Xránadxu,
nadxa besiáꞌque̱ꞌ xjaque̱ꞌ naga nababa Galilea,
naꞌ belexezrine̱ꞌ xe̱zre Nazaret da naca lazrie̱ꞌ.
40 Naꞌ bidu Jesús bgúlabeꞌ,
ne gúcadxabeꞌ chuchu,
ne gúcadxabeꞌ bi naxéajniꞌi,
naꞌ Dios bcaꞌane̱ꞌ le̱beꞌ chaweꞌ.
Ca guca gate bzrin bidu Jesús lu xudauꞌ
41 Xra xrnaꞌ Jesús,
tu tu iza dxjáꞌaque̱ꞌ xe̱zre Jerusalén gate dxuꞌu laní chee̱ xulusá lazreꞌ benneꞌ judío ca da be̱n Dios,
bebéaje̱ꞌ xra xrtawe̱ꞌ caꞌ lu xe̱zr la xu Egipto.
42 Ca guque Jesús chazrinnu iza,
naꞌ xjáꞌaque̱ꞌ xúgute̱ꞌ Jerusalén,
ca dxelúnqueze̱ꞌ ca dxaca laní.
43 Ca gudé laní,
naꞌ besiáꞌque̱ꞌ,
naꞌ bidu Jesús begáꞌanabeꞌ Jerusalén,
ne quebe guleque beꞌe xrnabeꞌ,
ne José.
44 Dxeléquene̱ꞌ Jesús zezabeꞌ ládujla benneꞌ zan caꞌ,
naꞌ besiáꞌque̱ꞌ tu zra nez.
Gate belexilje̱ꞌ-beꞌ ládujla benneꞌ xrtie̱ꞌ caꞌ,
ne benneꞌ caꞌ zaj núnbeꞌe̱,
45 quebe belexezrélne̱ꞌ-beꞌ.
Caꞌan guca belexebiꞌe̱ zeajxáꞌaque̱ꞌ Jerusalén chee̱ cheajlexedílje̱ꞌ-beꞌ naꞌ.
46 Ca gudé guca chunna zra,
nadxa belexezrélne̱ꞌ-beꞌ lu xudauꞌ,
dxeꞌebeꞌ ládujla benneꞌ caꞌ dxuluxuzájle̱ꞌe̱ da nadxixruj bea Dios,
naꞌ dxenbeꞌ ca dxelenné̱ꞌ,
ne dxuché̱bebeꞌ benneꞌ caꞌ.
47 Xúgute̱ benneꞌ caꞌ dxelenne̱ꞌ dxelexebánene̱ꞌ chee̱beꞌ ca naca xel-la sina chee̱beꞌ,
ne ca naca da dxuchálajle̱beꞌ le̱ꞌ.
48 Gate beleléꞌe xra xrnabeꞌ le̱beꞌ,
naꞌ belexebánene̱ꞌ.
Naꞌ gunná xrnabeꞌ,
dxe̱ꞌe̱-beꞌ:
―Zriꞌinaꞌ,
¿bizr chee̱ naꞌ be̱nuꞌ caní nen netuꞌ?
Cadite ste̱be ba guzúantuꞌ chiuꞌ dxexílajntuꞌ lueꞌ,
xrauꞌ ne nedaꞌ.
49 Nadxa Jesús dxe̱ꞌe̱beꞌ le̱ꞌ:
―¿Bizr chee̱ naꞌ dxexílajle nedaꞌ?
¿Quebe nézele leꞌe dxal-laꞌ gunaꞌ nedaꞌ da naca chee̱ Xraꞌ?
50 Xra xrnabeꞌ quebe guléajniꞌine̱ꞌ ca da gúzrebeꞌ le̱ꞌ.
51 Nadxa bezále̱beꞌ le̱ꞌ zeajxáꞌaque̱ꞌ Nazaret,
naꞌ gúcaquezebeꞌ bi wezúa dizraꞌ chee̱ xra xrnabeꞌ.
Naꞌ xrnabeꞌ bcache chawe̱ꞌ xúgute̱ da nigá lu lázrdawe̱ꞌ.
52 Jesús zéajbeꞌ dxegúlabeꞌ lu be̱l-laꞌ dxen chee̱beꞌ,
ne lu xichaj lázrdaubeꞌ,
naꞌ dxedxúajquezebeꞌ chaweꞌ lau Dios,
ne lau bénneache.
La Niñez de Jesús.