Dxeleché̱ꞌe̱ Jesús lau Pilato
27
Gate guxaníꞌ,
xúgute̱ benneꞌ xíchaje̱ caꞌ chee̱ bxruze caꞌ,
ne benneꞌ gula sina caꞌ chee̱ benneꞌ judío caꞌ belune̱ꞌ tuze dizraꞌ ájala xelune̱ꞌ chee̱ xelútie̱ꞌ Jesús.
2 Nadxa beleché̱ꞌe̱ Le̱ꞌ nadxéaje̱ꞌ,
ne xeajleguꞌe̱ Le̱ꞌ lau Poncio Pilato,
benneꞌ dxenná beꞌe waláz chee̱ xezr la xu Roma.
Ca guca gate gute Judas
3 Nadxa Judas,
bénneaꞌ bdee̱ꞌ Jesús,
gate guque béꞌene̱ꞌ ba buluzría xiꞌe̱ Jesús,
bexíajele̱ꞌe̱ne̱ꞌ,
naꞌ bunézruje̱ꞌ da chi dxua dumí plata lau benneꞌ xíchaje̱ caꞌ chee̱ bxruze caꞌ,
ne benneꞌ gula sina caꞌ.
4 Dxe̱ꞌe̱ le̱ꞌ:
―Nedaꞌ be̱naꞌ dul-la laweꞌ da bdeaꞌ tu benneꞌ naque̱ꞌ du lazreꞌ chee̱ gatie̱ꞌ.
Belexeche̱be benneꞌ xíchaje̱ caꞌ:
―¿Bizra naca chee̱ntuꞌ da nigá?
Chiuꞌ lueꞌ naca da naꞌ.
5 Nadxa Judas buzale̱ꞌ dumí naꞌ lu xudauꞌ,
ne bezé̱ꞌe̱,
naꞌ xeajxelúꞌu du lbe̱ꞌe̱.
6 Benneꞌ xíchaje̱ caꞌ chee̱ bxruze caꞌ buluxutupe̱ꞌ dumí naꞌ,
dxelenné̱ꞌ:
―Quebe gaca cúꞌudxu dumí nigá naga xuꞌu dumí chee̱ xudauꞌ,
laweꞌ da naca na lazruj chee̱ benneꞌ dxute benneꞌ.
7 Nadxa belune̱ꞌ tuze dizraꞌ xeláꞌawe̱ꞌ tu xe̱zr la xu nen dumí naꞌ da nazí le na xe̱zr la xu chee̱ we̱n xesuꞌ zruaga,
chee̱ gaca na tu lataj naga xelegache benneꞌ zituꞌ.
8 Chee̱ le̱ naꞌ nazí le xe̱zr la xu naꞌ Xe̱zr La Xu Chee̱ Dxen ca lu zra naꞌa zra.
9 Caní guca na chee̱ gaca ca da gunná Jeremías,
benneꞌ bchálaje̱ꞌ waláz chee̱ Dios,
gunné̱ꞌ:
“Gulequé̱ꞌe̱ chi dxua dumí plata da naca na da zaca Le̱ꞌ da buluzúa benneꞌ Israel.
10 Nen dumí naꞌ beláꞌawe̱ꞌ xe̱zr la xu chee̱ benneꞌ we̱n xesuꞌ zruaga,
cáte̱ze gunná beꞌe Xranaꞌ nedaꞌ.”
Dxezrín Jesús lau Pilato
11 Guleché̱ꞌe̱ Jesús lau bénneaꞌ dxenná beꞌe̱ waláz chee̱ xe̱zr la xu Roma,
naꞌ le̱ꞌ bche̱be̱ꞌ Jesús:
―¿Nacuꞌ Lueꞌ Wenná Bea chee̱ judío caꞌ?
Jesús gunné̱ꞌ:
―Caꞌ naca na,
ca dxennáuꞌ lueꞌ.
12 Gate benneꞌ xíchaje̱ caꞌ chee̱ bxruze caꞌ,
ne benneꞌ gula sina caꞌ gulawe̱ꞌ zria chee̱ Jesús,
naꞌ Le̱ꞌ quebe bi beche̱be̱ꞌ.
13 Nadxa gunná Pilato,
dxe̱ꞌe̱ Jesús:
―¿Quebe dxennuꞌ ca da dxelenná benneꞌ caní chiuꞌ?
14 Jesús quebe bi beche̱be̱ꞌ.
Caꞌan guca bebanne bénneaꞌ,
ne quebe bezrela lazre̱ꞌ ájala nne̱ꞌ.
Dxelechugue̱ꞌ chee̱ Jesús gatie̱ꞌ
15 Gate dxuꞌu laní naꞌ,
bénneaꞌ dxenná beꞌe̱ naꞌ xuꞌu lawe̱ꞌ dxusane̱ꞌ tu benneꞌ we̱n da zrinnaj,
nútete̱ze benneꞌ dxelaca lazreꞌ benneꞌ caꞌ.
16 Ca lu zra naꞌ xuꞌu tu benneꞌ lizre xia,
benneꞌ wé̱nle̱ꞌe̱ da zrinnaj,
nazí le̱ꞌ Barrabás.
17 Ca zaj nazraga benneꞌ caꞌ naꞌ,
Pilato bche̱be̱ꞌ le̱ꞌ:
―¿Nuzra dxaca lázrele gusanaꞌ nedaꞌ?
¿Gusanaꞌ Barrabás,
che Jesús,
bénneaꞌ le̱ꞌ Cristo?
18 Caní gunné̱ꞌ laweꞌ da ba nézene̱ꞌ buludée̱ꞌ Jesús lawe̱ꞌ le̱ꞌ laweꞌ da dxelaque̱ꞌ xa lazreꞌ chee̱ Jesús.
19 Dxácate̱ naꞌ dxeꞌ Pilato naga dxuchiꞌe̱ chee̱ bénneache,
naꞌ zruꞌule̱ꞌ gusel-le̱ꞌ tu benneꞌ xeaje̱zre̱ꞌ Pilato:
“Quebe guchixre chiuꞌ da naca chee̱ benneꞌ xrlátaje naꞌ,
laweꞌ da gunedaꞌ xe̱la ba dxe̱le,
da bzúale̱ꞌe̱ na nedaꞌ ste̱be ne̱ chee̱ Le̱ꞌ.”
20 Benneꞌ xíchaje̱ caꞌ chee̱ bxruze caꞌ,
ne benneꞌ gula sina caꞌ belegúꞌu xele̱ꞌ benneꞌ caꞌ chee̱ xelenabe̱ꞌ la Barrabás,
ne gate Jesús.
21 Bénneaꞌ dxenná beꞌe̱ bchálajle̱ne̱ꞌ benneꞌ caꞌ xecha lasa.
Buche̱be̱ꞌ le̱ꞌ:
―¿Nula benneꞌ chupa caní dxaca lázrele leꞌe gusanaꞌ?
Benneꞌ zan caꞌ gulenné̱ꞌ:
―Barrabás.
22 Pilato bche̱be̱ꞌ benneꞌ caꞌ:
―¿Bizra gunaꞌ chee̱ Jesús,
benneꞌ le̱ꞌ Cristo?
Xúgute̱ꞌ belexeche̱be̱ꞌ:
―Bde̱ꞌe̱ xaga béguaj.
23 Nadxa gunná Pilato,
dxe̱ꞌe̱ benneꞌ caꞌ:
―¿Bizra da cale̱la nune̱ꞌ?
Benneꞌ caꞌ gulezú lawe̱ꞌ dxelebezre xe̱ꞌe̱,
gulenné̱ꞌ:
―Bde̱ꞌe̱ xaga béguaj.
Bde̱ꞌe̱ xaga béguaj.
24 Gate Pilato guque béꞌene̱ꞌ quebe bi séquene̱ꞌ,
naꞌ benneꞌ zan caꞌ dxeledábague̱ꞌ le̱ꞌ,
naꞌ gunná béꞌene̱ꞌ blaꞌ nisa,
naꞌ gudibe ne̱ꞌe̱ láwela benneꞌ caꞌ,
dxenné̱ꞌ:
―Quebe bi dul-la nabagaꞌ chee̱ xel-laꞌ gute chee̱ benneꞌ xrlátaje nigá.
Naca na chee̱le leꞌe.
25 Xúgute̱ benneꞌ caꞌ belexeche̱be̱ꞌ:
―Netuꞌ,
ne zríꞌinentuꞌ nabágantuꞌ ca naca chee̱ xel-laꞌ gute chee̱ꞌ.
26 Nadxa Pilato bsane̱ꞌ Barrabás,
ne gunná béꞌene̱ꞌ beleché̱ꞌe̱ Jesús chee̱ xeluꞌe̱ Le̱ꞌ,
naꞌ bdee̱ꞌ Le̱ꞌ chee̱ te̱ꞌe̱ xaga béguaj.
27 Nadxa benneꞌ dxjaque̱ꞌ wedil-la chee̱ bénneaꞌ dxenná beꞌe̱ guleché̱ꞌe̱ Jesús,
ne gulegúꞌe̱ Le̱ꞌ lu xuꞌu laweꞌ.
Belexezraga ca naca benneꞌ dxjaque̱ꞌ wedil-la naga ze̱ Jesús.
28 Belequé̱ꞌe̱ zra lane̱ꞌ,
ne bulugácue̱ꞌ Le̱ꞌ tu ladxeꞌ bzawe.
29 Buluzúe̱ꞌ xíchaje̱ꞌ tu da naca na zruze xaga xecheꞌ,
ne buluguxre̱ꞌ Le̱ꞌ tu xaga ne̱ꞌe̱ xabe̱la.
Nadxa buluzú zribe̱ꞌ lau Jesús,
ne belún le̱ꞌ chee̱ꞌ,
dxelenné̱ꞌ:
―Gaca xabáa chiuꞌ,
Wenná Bea chee̱ judío caꞌ.
30 Cáꞌanqueze buluzré̱ꞌe̱ Le̱ꞌ zrene̱ꞌ,
naꞌ gulequé̱ꞌe̱ xaga da nuxru Jesús,
ne guline̱ꞌ na xíchaje̱ꞌ.
31 Ca gudé belún le̱ꞌ chee̱ Jesús,
naꞌ belexegüe̱ꞌ ladxeꞌ bzawe,
naꞌ buluxugácue̱ꞌ Le̱ꞌ zra lánaqueze̱ꞌ.
Nadxa beleché̱ꞌe̱ Le̱ꞌ chee̱ te̱ꞌe̱ xaga béguaj.
Dxuludé̱ꞌe̱ Jesús xaga béguaj
32 Ca gusiáꞌque̱ꞌ naꞌ,
belexezrague̱ꞌ tu benneꞌ xe̱zre Cirene,
le̱ꞌ Simón,
naꞌ gulenná béꞌene̱ꞌ le̱ꞌ biꞌe̱ xaga béguaj chee̱ Jesús.
33 Caꞌan guca belezrine̱ꞌ tu lataj nazí le na Gólgota,
da dxennadxu,
Lataj Chee̱ Zrita Xichaj Benneꞌ Gate.
34 Naꞌ bulunézruje̱ꞌ da xiꞌaj Jesús xrise uva wal-la da nachixre na da slaꞌ,
san gate bxue Jesús ca naca na,
quebe guꞌe̱ na.
35 Ca bexuzre benneꞌ dxjaca wedil-la buludé̱ꞌe̱ Le̱ꞌ xaga béguaj,
naꞌ gulebéaje̱ꞌ da gaca bea na chee̱ xelexelé̱ꞌe̱ ca naca zra lana Jesús.
Caꞌan guca guxá ca da gunná benneꞌ bchálaje̱ꞌ waláz chee̱ Dios,
gunné̱ꞌ:
“Belexelé̱ꞌe̱ zra lanaꞌ le̱ze̱ꞌ.
Gulebéaje̱ꞌ da gaca bea na.”
36 Nadxa gulebéꞌe̱ dxuluzuzre̱ꞌ Jesús.
37 Buluzríe̱ꞌ xichaj Jesús naꞌ tu xiche da naxúaj na da nabague̱ꞌ,
da dxenná na:
Jesús,
wenná bea chee̱ judío caꞌ.
38 Cáꞌanqueze buludé̱ꞌe̱ chupa benneꞌ gubán tu zren nen Jesús le̱ꞌe̱ xaga béguaj caꞌ,
tue̱ꞌ chaláꞌa xabe̱la,
ne xetúe̱ꞌ chaláꞌa xéglala ga daꞌ xaga béguaj chee̱ Jesús.
39 Benneꞌ dxeledée̱ꞌ naꞌ dxelún le̱ꞌ chee̱ Jesús.
Dxulutá xíchaje̱ꞌ,
40 ne dxelenné̱ꞌ:
―¿Dxuchínnajuꞌ xudauꞌ,
naꞌ laweꞌ chunna zraze xexunuꞌ na?
Bselá cuinuꞌ.
Che nacuꞌ Zriꞌine Dios,
bexetaj le̱ꞌe̱ xaga béguaj naꞌ.
41 Cáꞌanqueze belún la chee̱ꞌ benneꞌ xíchaje̱ caꞌ chee̱ bxruze caꞌ,
ne benneꞌ dxuluxuzájle̱ꞌe̱ da bdxixruj beꞌe Moisés,
ne benneꞌ xudauꞌ fariseo caꞌ,
ne benneꞌ gula sina caꞌ.
Dxelé̱ ljwezre̱ꞌ:
42 ―Bselé̱ꞌ benneꞌ xula,
san quebe dxezéquene̱ꞌ guselá cuine̱ꞌ.
Che naque̱ꞌ Wenná Bea Chee̱ Xe̱zre Israel,
dxal-laꞌ xexétaje̱ꞌ le̱ꞌe̱ xaga béguaj,
naꞌ chéajle̱dxu chee̱ꞌ.
43 Le̱ꞌ bxren lazre̱ꞌ Dios.
Naꞌa guselá Dios Le̱ꞌ che da li dxaca lazre̱ꞌ,
laweꞌ da gunná Le̱ꞌ naque̱ꞌ Zriꞌine Dios.
44 Cáꞌanqueze gubán caꞌ zaj daꞌ xaga béguaj caꞌ nen Jesús gulenné̱ꞌ schanniꞌ chee̱ Jesús.
Ca guca gate gute Jesús
45 Nadxa ca naca xe̱zr la xu naꞌ guchul-la na.
Guzú lau na wagubizra ca bzrinte̱ na ca dxedá chunna.
46 La náꞌqueze Jesús gudxezre xe̱ꞌe̱,
dxenné̱ꞌ:
―Elí,
Elí,
¿lama sabactani?
(Da nigá zéaje̱ na:
Dios chiaꞌ,
Dios chiaꞌ,
¿bizr chee̱ naꞌ nusán lazruꞌ nedaꞌ?)
47 Bal-la benneꞌ zaj zre̱ꞌe̱ naꞌ belenne̱ꞌ ca da gunná Jesús,
naꞌ gulenné̱ꞌ:
―Benneꞌ nigá dxenné̱ꞌ Elías,
benneꞌ bchálaje̱ꞌ waláz chee̱ Dios.
48 Dxácate̱ naꞌ guzáꞌ chegu tu benneꞌ caꞌ,
xeajxríꞌe̱ tu da dxezrupe nisa,
naꞌ ca bsebise̱ꞌ na nen nupe zichaj,
naꞌ bzue̱ꞌ na laweꞌ tu xaga,
ne bzrigue̱ꞌ na dxuꞌa Jesús chee̱ xrupe̱ꞌ na.
49 Benneꞌ xezica caꞌ gulenné̱ꞌ:
―Le guxúe xcaꞌ.
Quebe gunuꞌ caꞌ.
Nnáꞌxquedxu che wida Elías guselé̱ꞌ Le̱ꞌ.
50 Xecha lasa gudxezre xaꞌa Jesús,
naꞌ gutie̱ꞌ.
51 Lu zra náꞌqueze ladxeꞌ da ze̱ lu xudauꞌ bdxuaj na chúpala,
guzú lau na xíchaje̱,
bedxúajte̱ na dxeꞌela.
Guzrúꞌ xe̱zr la xu,
naꞌ xiaj xre caꞌ gulúzruqueze na.
52 Gulexalaj ba,
naꞌ belexebán benneꞌ gate caꞌ,
benneꞌ guléajle̱ꞌe̱ da naca chee̱ Dios.
53 Ca gudé bebán Jesús,
naꞌ benneꞌ caní belexedxúaje̱ꞌ lu xe̱dxu ba,
ne belexexúꞌe̱ lu xe̱zre láꞌazxa Jerusalén,
naga benneꞌ zan beleléꞌene̱ꞌ benneꞌ caꞌ.
54 Nadxa benneꞌ dxenná beꞌe̱ lu wedil-la,
ne benneꞌ dxjaque̱ꞌ wedil-la,
benneꞌ caꞌ dxuluzuzre̱ꞌ Jesús,
gate beleléꞌene̱ꞌ guzrúꞌ,
ne xezícadxa da caꞌan gulaca,
naꞌ belezrébele̱ꞌe̱,
dxelenné̱ꞌ:
―Da lítegaze benneꞌ nigá guque̱ꞌ Zriꞌine Dios.
55 Nuꞌula zan zaj zre̱ꞌe̱ naꞌ dxelenné̱ꞌe̱ zítuꞌla,
nuꞌula caꞌ xjácale̱ne̱ꞌ Jesús gate bezé̱ꞌe̱ ga nababa Galilea,
ne gulácale̱queze̱ꞌ Le̱ꞌ.
56 Ládujla nuꞌula caꞌ xuꞌu María Magdalena,
ne María xrna Jacobo ne José,
ne xrna zriꞌine Zebedeo caꞌ.
Dxulucache̱ꞌ Jesús lu xe̱dxu ba
57 Ca guzú lau dxaca waxrinne,
naꞌ blaꞌ tu benneꞌ gunníꞌa le̱ꞌ José,
benneꞌ xe̱zre Arimatea,
benneꞌ dxéajle̱queze̱ꞌ chee̱ Jesús.
58 Benneꞌ nigá guxíaje̱ꞌ xeajchálajle̱ne̱ꞌ Pilato,
naꞌ benabe̱ꞌ be̱l-laꞌ dxen chee̱ Jesús.
Pilato gunná béꞌene̱ꞌ xulunézruje̱ꞌ le̱ꞌ be̱l-laꞌ dxen naꞌ.
59 Nadxa José bequé̱ꞌe̱ be̱l-laꞌ dxen naꞌ,
naꞌ bchele̱ꞌ na tu ladxeꞌ da naxadxe.
60 Nadxa guluꞌe̱ Le̱ꞌ lu ba da naca na cheé̱queze José naꞌ,
da be̱ne̱ꞌ tu lu xiaj.
Gulexrúe̱ꞌ tu xiaj blaga zren dxuꞌa ba chee̱ Jesús,
naꞌ bezé̱ꞌe̱ ga naꞌ.
61 Gulezráꞌ María Magdalena,
ne xetú María,
zaj dxeꞌe̱ le nnaꞌ dxuꞌa ba naꞌ.
Dxulubia dxuluxue̱ꞌ ba chee̱ Jesús
62 Zeaj zra xula,
da naca na zra ca gudé zra bulucueze̱ꞌ,
naꞌ benneꞌ xíchaje̱ caꞌ chee̱ bxruze caꞌ,
ne benneꞌ xudauꞌ fariseo caꞌ belezrine̱ꞌ lau Pilato.
63 Dxelé̱ꞌe̱ le̱ꞌ:
―Xran,
dxeajsá lázrentuꞌ ca naca da gunná benneꞌ we̱n lazreꞌ naꞌ gate naꞌ zue̱ꞌ.
Gunné̱ꞌ gate gaca chunna zra,
naꞌ xebane̱ꞌ ládujla benneꞌ gate.
64 Chee̱ le̱ naꞌ,
bdixruj beꞌene̱ꞌ benneꞌ caꞌ xulubia xuluxue̱ꞌ ba chee̱ꞌ naꞌ cadxa gaca chunna zra,
chee̱ quebe xeleláꞌ benneꞌ caꞌ bsé̱dene̱ꞌ xedajlexebéaje̱ꞌ be̱l-laꞌ dxen naꞌ chizrela,
naꞌ te naꞌ xuluzenne̱ꞌ bénneache ba bebane̱ꞌ ládujla benneꞌ gate.
Che caꞌan gaca,
naꞌ dizraꞌ we̱n lazreꞌ bze̱be nigá gun na da zrinnaj zrendxa ca da nedxu.
65 Pilato guzre̱ꞌ benneꞌ caꞌ:
―Naꞌ zaj zraꞌ benneꞌ dxjaque̱ꞌ wedil-la xuluzuzre̱ꞌ na.
Le chjaca leꞌe,
ne le guxúe xanneꞌ ba naꞌ ca se̱ lau séquele.
66 Nadxa xjaque̱ꞌ,
xeajlexúe̱ꞌ ba naꞌ.
Buluchiche̱ꞌ tu da gunna bea na che xalaj ba naꞌ,
naꞌ bulucáꞌane̱ꞌ benneꞌ dxjaca wedil-la ga naꞌ.