―Bleꞌentuꞌ benneꞌ nigá dxegúꞌu xel-le̱ꞌ bénneache chee̱ xeledábague̱ꞌ xuꞌu laweꞌ.

Dxenné̱ꞌ quebe dxal-laꞌ quízrujntuꞌ da dxuchizruj César,

benneꞌ Roma,

naꞌ cáꞌanqueze dxenné̱ꞌ naque̱ꞌ Cristo,

Benneꞌ Wenná Bea.

3 Nadxa Pilato bche̱be̱ꞌ Jesús:

―¿Nacuꞌ Lueꞌ Wenná Bea chee̱ judío caꞌ?

Naꞌ beche̱be Jesús:

―Caꞌ naca na,

ca ba gunnáuꞌ lueꞌ.

4 Nadxa gunná Pilato,

guzre̱ꞌ benneꞌ xíchaje̱ caꞌ chee̱ bxruze caꞌ,

ne bénneache caꞌ:

―Quebe bi da zrinnaj dxezreldaꞌ nun benneꞌ nigá.

5 Benneꞌ caꞌ belún chúchue̱ꞌ dizraꞌ chee̱ꞌ,

gulenné̱ꞌ:

―Dxeguꞌu xel-le̱ꞌ xúgute̱ benneꞌ zaj zre̱ꞌe̱ xe̱zre caꞌ zaj nababa Judea chee̱ xeledábague̱ꞌ xuꞌu laweꞌ.

Guzú lawe̱ꞌ dxune̱ꞌ na naga nababa Galilea,

naꞌ naꞌa dxune̱ꞌ na nigá.

6 Gate ben Pilato da nigá,

naꞌ bche̱be̱ꞌ che naca Jesús benneꞌ Galilea.

7 Gate gulé̱ꞌe̱ le̱ꞌ naca Jesús benneꞌ Galilea,

naꞌ Pilato gusél-le̱ꞌ Le̱ꞌ lau Herodes,

benneꞌ dxenná beꞌe̱ xe̱zre caꞌ zaj nababa Galilea,

naꞌ lu zra naꞌ zue̱ꞌ Jerusalén.

8 Gate bleꞌe Herodes Jesús,

gubéle̱ꞌe̱ne̱ꞌ,

laweꞌ da bátate̱ dxaca lazre̱ꞌ léꞌene̱ꞌ Le̱ꞌ,

laweꞌ da ba benne̱ꞌ dxuluchalaj bénneache chee̱ Jesús,

naꞌ guca lazre̱ꞌ léꞌene̱ꞌ gun Jesús tu xel-la waca da za xabáa.

9 Da zante̱ da bche̱be̱ꞌ Jesús,

naꞌ Le̱ꞌ quebe bi beche̱be̱ꞌ.

10 Zráqueze benneꞌ xíchaje̱ caꞌ chee̱ bxruze caꞌ naꞌ,

nen benneꞌ caꞌ dxuluxuzájle̱ꞌe̱ da nadxixruj bea na,

naꞌ belún chúchue̱ꞌ dizraꞌ chee̱ꞌ da dxelagu zria Jesús.

11 Nadxa Herodes,

ne benneꞌ chee̱ꞌ caꞌ dxjaque̱ꞌ wedil-la buluzúe̱ꞌ Le̱ꞌ chaláꞌala,

naꞌ chee̱ xelún le̱ꞌ chee̱ꞌ,

bulugácue̱ꞌ Le̱ꞌ ladxeꞌ bzawe ca naca zra tu benneꞌ wenná bea.

Nadxa Herodes besel-le̱ꞌ Le̱ꞌ lau Pilato.

12 Lu zra naꞌ Pilato,

ne Herodes belexaque̱ꞌ tuze,

laweꞌ da belezráꞌa ljwezre̱ꞌ nédxute̱.

13 Nadxa Pilato bchague̱ꞌ benneꞌ xíchaje̱ caꞌ chee̱ bxruze caꞌ,

ne benneꞌ xuꞌu laweꞌ caꞌ,

14 naꞌ guzre̱ꞌ benneꞌ caꞌ:

―Leꞌe guche̱le benneꞌ nigá zaꞌle naga zuaꞌ,

dxennale dxegúꞌu xel-le̱ꞌ bénneache chee̱ xeledábague̱ꞌ xuꞌu laweꞌ.

Nedaꞌ ba bche̱baꞌ Le̱ꞌ laule leꞌe,

naꞌ quebe bi da zrinnaj dxezréledaꞌ nune̱ꞌ ca naca da dxennale chee̱ꞌ.

15 Cáꞌanqueze Herodes quebe bi da zrinnaj bzrélene̱ꞌ da nun Jesús,

naꞌ budée̱ꞌ Le̱ꞌ launtuꞌ.

Quebe bi ne gune̱ꞌ chee̱ chugaꞌ chee̱ꞌ gatie̱ꞌ.

16 Gudéaꞌ Le̱ꞌ xel-la ziꞌ,

naꞌ gusánquezaꞌ Le̱ꞌ.

17 Dxácate̱ dxaca laní naꞌ,

Pilato dxal-laꞌ gune̱ꞌ tu da dxelezaca ba lazreꞌ bénneache,

gusane̱ꞌ tu benneꞌ xuꞌe̱ lizre xia.

18 Xúgute̱ benneꞌ caꞌ gulezú lawe̱ꞌ dxelebezre xe̱ꞌe̱,

dxelenné̱ꞌ:

―¡Gate benneꞌ nigá!

¡Bsan Barrabás naꞌ!

19 Barrabás nigá gulegúꞌe̱ le̱ꞌ lizre xia laweꞌ da gudábague̱ꞌ xuꞌu laweꞌ,

naꞌ be̱tie̱ꞌ tu benneꞌ.

20 Pilato guca lazre̱ꞌ gusane̱ꞌ Jesús,

naꞌ bchálajle̱ne̱ꞌ benneꞌ caꞌ xetú.

21 Naꞌ benneꞌ caꞌ gulebezre xe̱ꞌe̱ zízrajdxa,

dxelenné̱ꞌ:

―¡Bde̱ꞌe̱ xaga béguaj!

¡Bde̱ꞌe̱ xaga béguaj!

22 Da guxunneꞌ lasa gunná Pilato:

―¿Bizra da zrinnaj nune̱ꞌ?

Quebe bi dxezréledaꞌ da gudé na Le̱ꞌ gatie̱ꞌ.

Gudéaꞌ Le̱ꞌ xel-la ziꞌ,

naꞌ te naꞌ gusanaꞌ Le̱ꞌ.

23 Naꞌ benneꞌ caꞌ belún chúchue̱ꞌ dizraꞌ chee̱ꞌ chee̱ te̱ꞌe̱ xaga béguaj,

ne gulebezre xáꞌatie̱ꞌ,

nen benneꞌ xíchaje̱ caꞌ chee̱ bxruze caꞌ,

cadxa guca ca da gulaca lazre̱ꞌ.

24 Nadxa Pilato guchugue̱ꞌ chee̱ Jesús gaca chee̱ꞌ ca da dxelaca lazreꞌ benneꞌ caꞌ.

25 Naꞌ bsane̱ꞌ bénneaꞌ belenabe̱ꞌ,

xuꞌe̱ lizre xia laweꞌ da gudábague̱ꞌ xuꞌu laweꞌ,

ne be̱tie̱ꞌ tu benneꞌ,

naꞌ bdee̱ꞌ Jesús chee̱ gaca chee̱ꞌ ca dxelaca lazreꞌ benneꞌ caꞌ.

26 Gate zjaque̱ꞌ zaj naché̱ꞌe̱ Jesús chee̱ xuludé̱ꞌe̱ Le̱ꞌ xaga béguaj,

naꞌ gule̱le̱ꞌ tu benneꞌ Cirene,

le̱ꞌ Simón,

zezé̱ꞌe̱ le̱ꞌe̱ xixreꞌ,

naꞌ buluguꞌe̱ le̱ꞌ xaga béguaj chee̱ Jesús,

naꞌ zéaje̱ꞌ cuzru Jesús naꞌ.

27 Naꞌ xjácale̱ Le̱ꞌ benneꞌ zante̱,

ne nuꞌula zan dxelebezre̱ꞌ,

naꞌ dxelebezre xache̱ꞌ ne̱ chee̱ da dxaca chee̱ Jesús.

28 Nadxa Jesús gunné̱ꞌe̱ nuꞌula caꞌ,

naꞌ guzre̱ꞌ le̱ꞌ:

―Leꞌe,

nuꞌula Jerusalén,

quebe cuézrele chiaꞌ nedaꞌ.

Le cuezre cheé̱quezle,

ne chee̱ zríꞌinele,

29 laweꞌ da zrin zra gate xelenné̱ꞌ:

“Ba neza zren naca na chee̱ nuꞌula wizre,

ne nuꞌula caꞌ cabataꞌ gulezúe̱ꞌ ziꞌi,

ne nuꞌula caꞌ cabataꞌ bulugazre̱ꞌ bidauꞌ.”

30 Lu zra naꞌ xelezú lau bénneache xelé̱ꞌe̱ xiꞌa caꞌ:

“Le gugacu netuꞌ xu.”

Naꞌ xelé̱ꞌe̱ xíꞌadu caꞌ:

“Le gucache netuꞌ.”

31 Che dxelune̱ꞌ da caní chiaꞌ nedaꞌ,

nacaꞌ ca tu xaga ban,

¿gázradxa xelune̱ꞌ chee̱le leꞌe,

nácale ca xaga bizre caꞌ?

32 Cáꞌanqueze guleché̱ꞌe̱ chupa benneꞌ we̱n da zrinnaj chee̱ xelútie̱ꞌ le̱ꞌ tu zren nen Jesús.

33 Gate belezrine̱ꞌ lataj naꞌ nazí le na,

Calavera,

da zéaje̱ na,

Xiꞌa Zrita Xíchajdxu,

naꞌ buludé̱ꞌe̱ Jesús xaga béguaj,

ne cáꞌanqueze belune̱ꞌ chee̱ benneꞌ we̱n da zrinnaj caꞌ,

tue̱ꞌ cuite̱ꞌ xabe̱la,

ne xetúe̱ꞌ cuite̱ꞌ xéglala.

34 Ca dxuludé̱ꞌe̱ Le̱ꞌ xaga béguaj,

naꞌ gunná Jesús:

―Xrae,

bnite lau chee̱ benneꞌ caní laweꞌ da quebe zaj nézeneꞌ bi naꞌ dxeluneꞌ.

Naꞌ benneꞌ dxjaque̱ꞌ wedil-la gulebeje̱ꞌ da dxunna beaꞌ chee̱ xelezíꞌe̱ lateꞌ weaj zra lana Jesús.

35 Benneꞌ caꞌ zaj zre̱ꞌe̱ naꞌ dxelenné̱ꞌe̱,

ne benneꞌ xuꞌu laweꞌ caꞌ belún le̱ꞌ chee̱ꞌ,

dxelenné̱ꞌ:

―Bselé̱ꞌ benneꞌ xula caꞌ.

Naꞌa dxal-laꞌ guselá cuine̱ꞌ che da li naque̱ꞌ Cristo,

Bénneaꞌ Gucáꞌa Dios.

36 Cáꞌanqueze benneꞌ dxjaque̱ꞌ wedil-la belún le̱ꞌ chee̱ꞌ,

naꞌ gulebigue̱ꞌ cuita Jesús,

ne buluxíꞌaje̱ꞌ Le̱ꞌ nupe zichaj.

37 Gulé̱ꞌe̱ Le̱ꞌ:

―Che lueꞌ nacuꞌ Wenná Bea chee̱ judío caꞌ,

bselá cuinuꞌ.

38 Zua xichaj Jesús tu da naxúaj nen dizraꞌ griego,

ne dizraꞌ latín,

ne dizraꞌ hebreo,

da dxenná na:

―Wenná Bea chee̱ judío caꞌ.

39 Tu benneꞌ we̱n da zrinnaj,

bénneaꞌ de̱ꞌe̱ xaga béguaj be̱n le̱ꞌ chee̱ Jesús,

dxenné̱ꞌ:

―Che Lueꞌ nacuꞌ Cristo,

bselá cuinuꞌ,

ne bselate̱ netuꞌ.

40 Naꞌ xetú benneꞌ we̱n da zrinnaj naꞌ gudil-le̱ꞌ ljwezre̱ꞌ.

Guzre̱ꞌ le̱ꞌ:

―¿Quebe dxezrebuꞌ Dios?

Lueꞌ dxezácaquezuꞌ ca da gulechugue̱ꞌ chee̱ꞌ Le̱ꞌ.

41 Dxiꞌu dxezácadxu ca da dxál-laꞌqueze sácadxu,

laweꞌ da dxaca chee̱dxu da dxal-laꞌ sidxu ca naca da zrinnaj da nundxu,

san benneꞌ nigá quebe bi da zrinnaj nune̱ꞌ.

42 Nadxa gunné̱ꞌ:

―Jesús,

xeajsá lazreꞌ nedaꞌ gate su lauꞌ nna beꞌu.

43 Naꞌ beche̱be Jesús:

―Da li dxapaꞌ lueꞌ,

náꞌate̱la súale̱quezuꞌ nedaꞌ lu lataj chaweꞌ chee̱ Dios.

44 Guca ca wagubizra.

Nadxa ca naca lu xe̱zr la xu guchul-la na cadxa bzrinte̱ na dxedáꞌ chunna.

45 Gubizra guchul-la na,

naꞌ ladxeꞌ ze̱ lu xudauꞌ bdxuaj na chúpala.

46 Nadxa gudxezre xaꞌa Jesús,

dxenné̱ꞌ:

―Xrae,

lu naꞌu dxeguꞌa beꞌ xuꞌa.

Ca gunné̱ꞌ caꞌ,

naꞌ gutie̱ꞌ.

47 Gate benneꞌ dxenná béꞌene̱ꞌ benneꞌ dxjaque̱ꞌ wedil-la bléꞌene̱ꞌ ca da guca,

naꞌ be̱ láꞌane̱ꞌ Dios,

gunné̱ꞌ:

―Da li,

benneꞌ nigá quebe bi da zrinnaj be̱ne̱ꞌ.

48 Xúgute̱ benneꞌ caꞌ zaj zre̱ꞌe̱ naꞌ,

gate beleléꞌene̱ꞌ ca da guca,

naꞌ besiáꞌque̱ꞌ naꞌ,

dxeluꞌe̱ lachuꞌe̱.

49 Xúgute̱ benneꞌ caꞌ zaj núnbeꞌe̱ Jesús,

ne nuꞌula caꞌ xjácale̱ne̱ꞌ Jesús gate bezé̱ꞌe̱ Galilea,

belexegáꞌane̱ꞌ zítuꞌla dxelenné̱ꞌe̱ da caní.

50 Zua tu benneꞌ chaweꞌ ne xrlátaje le̱ꞌ José,

benneꞌ xe̱zre Arimatea chee̱ xe̱zre caꞌ zaj nababa Judea.

Nababe̱ꞌ xuꞌu laweꞌ blau chee̱ judío caꞌ.

51 José nigá dxebeze̱ꞌ zra nna bea Dios,

naꞌ quebe be̱ne̱ꞌ tuze ca da belún benneꞌ xuꞌu laweꞌ blau caꞌ.

52 Benneꞌ nigá guxíaje̱ꞌ xeajchálajle̱ne̱ꞌ Pilato,

naꞌ gunabe̱ꞌ latja gucache̱ꞌ Jesús.

53 Ca bexuzre buluxulétaje̱ꞌ Le̱ꞌ xaga béguaj,

naꞌ buluxuchele̱ꞌ Le̱ꞌ tu ladxeꞌ,

naꞌ guluꞌe̱ Le̱ꞌ tu lu xe̱dxu ba,

da ba gude̱ne̱ꞌ tu le̱ꞌe̱ xiꞌa xiaj,

naga quebe nu ne gáchequeze.

54 Naca na zra dxulucueze̱ꞌ chee̱ zra dxulupáꞌane̱ꞌ,

da ba zua su lau na.

55 Nuꞌula caꞌ xjácale̱ne̱ꞌ Jesús gate bezé̱ꞌe̱ xe̱zre caꞌ zaj nababa Galilea,

xjaque̱ꞌ naꞌ,

ne beleléꞌene̱ꞌ ba naꞌ,

ne belené̱ꞌe̱ ájala zaj naguꞌe̱ Le̱ꞌ xe̱dxu ba.

56 Gate belexezrine̱ꞌ xuꞌu naga zaj zre̱ꞌe̱,

naꞌ bulucueze̱ꞌ da du caꞌ dxelelále̱ꞌe̱ zixre,

ne da zaj naca na ca za dxelelále̱ꞌe̱ na zixre.

Belexezíꞌ lazre̱ꞌ zra dxulupáꞌane̱ꞌ cáte̱ze naca da gunná bea Dios.